“Say Espiritu so Manguusisa ed . . . Aralem a Kanonotan na Dios”

“Say espiritu so manguusisa ed amin a bengatla, anggan saray aralem a kanonotan na Dios.”​—1 COR. 2:10.

1. Anto so impabitar nen Pablo diad 1 Corinto 2:10 a betang na masanton espiritu, tan antoray apalesan tepet?

AGAYLAY pisasalamat tayo lapud masanton espiritu nen Jehova! Diad Kasulatan et tinukoy so espiritu bilang mananulong, regalo, tasi, tan mikasi parad sikatayo. (Juan 14:16; Gawa 2:38; Roma 8:16, 26, 27) Wala ni impabitar nen apostol Pablo ya importantin betang na masanton espiritu: “Say espiritu so manguusisa ed amin a bengatla, anggan saray aralem a kanonotan na Dios.” (1 Cor. 2:10) On, uusaren nen Jehova so masanton espiritu pian iparungtal iray aralem ya espiritual a katuaan. No anggapo iyan tulong, kaunongan la kasi naamtaan tayo ed saray gagala nen Jehova? (Basaen so 1 Corinto 2:9-12.) Balet, walaray tepet nipaakar ed satan: Panon ya uusisaen na espiritu so “aralem a kanonotan na Dios”? Siopa so angiparungtalan nen Jehova ed saraya nen inmunan siglo C.E.? Diad panaon tayo, panon ya uusisaen na espiritu irayan aralem a kanonotan tan siopay pangipaparungtalan to?

2. Diad anton duaran paraan ya ontutulong so espiritu?

² Impaimano nen Jesus so duaran paraan no panon ya ontutulong so espiritu. Antis na impatey to, oniay inkuan to ed saray apostol to: “Say mananulong, say masanton espiritu, ya ibaki na Ama diad ngaran ko, so mangibangat ed sikayo na amin a bengatla tan mangipanonot ed sikayo ed amin ya imbagak ed sikayo.” (Juan 14:26) Say  masanton espiritu sirin so onkanan managbangat tan manangipanonot. Tulongan na satan iray Kristiano a nalinewan iray bengatlan dati et agnatalosan. Ontulong met itan pian nanonotan tan dugan niyaplika da iray nadngel da.

Nen Inmunan Siglo

3. Diad samay imbaga nen Jesus, antoy mangipapanengneng ya kalkalnan niparungtal ‘iray aralem a kanonotan na Dios’?

³ Imbangat a mismo nen Jesus ed saray disipulo to so dakel a katuaan a balo ed sikara. Ingen ta dakel nin siansiay kaukolan dan aralen. Inkuan nen Jesus ed saray apostol to: “Dakel ni so ibagak ed sikayo, balet agyo ni natalosan iratan natan. Balet sano onsabi itan, say espiritu na katuaan, iwanwan to kayo diad amin a katuaan.” (Juan 16:12, 13) Impaimano sirin nen Jesus a panamegley na masanton espiritu et kalkalnan niparungtal iray aralem ya espiritual a bengatla.

4. Nen Pentecostes 33 C.E., panon a kinmanan managbangat tan manangipanonot so masanton espiritu?

⁴ Nen Pentecostes 33 C.E., nikalbo so “espiritu na katuaan” ed manga 120 a Kristiano a nantitipon ed Jerusalem. Walaray anengneng tan nadngel ya ebidensya ed saman. (Gawa 1:4, 5, 15; 2:1-4) Akapansalita iray disipulo na nanduruman lenguahe tan impaamta ra so “nipaakar ed makapadinayew iran gawa na Dios.” (Gawa 2:5-11) Panaon la’d saman pian iparungtal iray balon bengatla. Impasakbay nen propeta Joel iyan kikalbo na masanton espiritu. (Joel 2:28-32) Naimatonan na saramay wadman so impakasumpal na satan diad paraan ya agdan balot inilaloan, tan impaliwawa nen apostol Pedro iman ya agawa. (Basaen so Gawa 2:14-18.) Kinmana sirin so masanton espiritu a managbangat, ta impalinew na satan ed si Pedro a say agawa ed saray disipulo et kasumpalan na abayag lan propesiya. Kinmana met so espiritu a manangipanonot, ta aliwa labat lan samay imbaga nen Joel so sinalambit nen Pedro noag pati say duaran salmo nen David. (Sal. 16:8-11; 110:1; Gawa 2:25-28, 34, 35) Talagan aralem a kanonotan na Dios so anengneng tan nadngel na amin a wadman.

5, 6. (a) Kayari Pentecostes 33 C.E., antoran importantin tepet nipaakar ed balon sipanan so kaukolan ya ebatan? (b) Siopa so angamta na ebat ed sarayan isyu, tan panon iran nanggaway desisyon?

⁵ Balet, dakel ni ray kaukolan a nalinewan na saray Kristiano nen inmunan siglo. Alimbawa, walaray tepet nipaakar ed balon sipanan a ginmapo ed saman ya agew na Pentecostes. Para labat kasi ed saray Judio tan Judion proselita so balon sipanan? Odino, para met ed saray Gentil? Kasin nalanaan met ira na masanton espiritu? (Gawa 10:45) Kaukolan ni kasin segaten iray lalakin Gentil tan manpasakop ed Mosaikon Ganggan? (Gawa 15:1, 5) Importantin maong irayan tepet. Kaukolan so espiritu nen Jehova pian nausisa irayan aralem a bengatla. Siopa balet so pangiparungtalan na satan?

⁶ Saray responsablin lalaki so angamta na ebat ed sarayan isyu. Wadman si Pedro, Pablo, tan Bernabe ed miting na mananguley ya ulop, tan impaliwawa ra no panoy pangipapasen nen Jehova ed saray ag-asegat ya Gentil. (Gawa 15:7-12) Kayari ran inaral a maong iyan ebidensya diad tulong na Hebreon Kasulatan tan masanton espiritu, nandesisyon so mananguley ya ulop. Insan, sinulat da iray kongregasyon nipaakar ed satan a desisyon.​—Basaen so Gawa 15:25-30; 16:4, 5; Efe. 3:5, 6.

7. Panon a niparungtal iray aralem a katuaan?

⁷ Dakel ni ran bengatla so alinewan panamegley na pinuyanan a sulsulat di Juan, Pedro, Santiago, tan Pablo. Balet sanen asumpal lay Kristianon Kasulatan, angangga met lay langkap a panagpropesiya tan say mamilagron panangiparungtal na kakabatan. (1 Cor. 13:8) Kasin mangibangat tan mangipanonot nin siansia so espiritu? Tulongan to nin siansia kasi iray Kristiano a mangusisa ed aralem iran kanonotan na Dios? Say ebat et on, base ed propesiya.

Diad Panaon na Anggaan

8, 9. Diad sayan panaon na anggaan, siopa so “onsinag” lapud kakabatan da?

⁸ Oniay impasakbay na sakey ya anghel nipaakar  ed panaon na anggaan: “Saray makabat onsinag ira naani a singa sinag na tawen, et saray mangipawit na dakerakel ed inkatunong singa ra naani saray bitewen ed ando lan ando lawas. . . . Tan say [tuan] pikakabat ondaak naani.” (Dan. 12:3, 4) Siopa ray “makabat” tan “onsinag”? Pian nalinewan iya, angiter si Jesus na ideya diad samay ilustrasyon to nipaakar ed trigo tan sisanyas. Sanen sinalambit to so nipaakar ed “sampot a panaon na sayan sistema na mundo,” inkuan to: “Diad satan a panaon, saray matunong et onsinag a singa kaliwawa na agew diad panarian na Ama ra.” (Mat. 13:39, 43) Impaliwawa nen Jesus a “saray matunong” et “ananak na panarian,” salanti, saray alanaan a Kristiano.​—Mat. 13:38.

⁹ “Onsinag” kasi so amin ya alanaan a Kristiano? On. Nibagan ontan lapud amin da et manpupulong, manggagaway babangatan, tan manpapasesegan diad saray pantitipon. Saray alanaan sirin et napanuliranan na arum nin Kristiano. (Zac. 8:23) Niarum ni, niparungtal iray aralem a bengatla diad panaon na anggaan. Salanti, say mismon propesiyan insulat nen Daniel ya ‘agbalot ipaamta’ anggad isabi na satan a panaon. (Dan. 12:9, Maung a Balita) Panon ya uusisaen na espiritu irayan aralem a kanonotan tan siopay pangipaparungtalan to?

10. (a) Diad sarayan kaunoran ya agew, siopa so pangipaparungtalan na espiritu ed saray aralem a katuaan? (b) Ipaliwawa no panon ya alinewan so nipaakar ed baleg ya espiritual a templo nen Jehova.

 ¹⁰ Diad panaon tayo, sano walay espiritual a bengatla a kaukolan ya ipalinew, tutulongan na masanton espiritu iray responsablin lalaki a mangirerepresenta ed “matoor tan makabat ya aripen” diad hedkuarter tayo pian natebek iray aralem ya katuaan a dati et ag-atalosan. (Mat. 24:45; 1 Cor. 2:13) Aaralen a maong na interon Mananguley ya Ulop no kasin walaray kaukolan ya umanen. (Gawa 15:6) Kayari na satan et mandesisyon ira, tan no nakaukolan et ipalapag da so nauman ya eksplinasyon a pakagunggonaan na amin. (Mat. 10:27) Diad ilalabas na panaon, nayarin wala ni ray kaukolan ya ipalinew, tan ipapaamta da met iraya.​—Nengnengen so kahon ya  “No Panon ya Imparungtal na Espiritu so Kabaliksan na Espiritual a Templo.”

Pakagunggonaan Natan so Betang na Espiritu

11. Panon a pakagunggonaan na amin a Kristiano natan so pangipaparungtal na masanton espiritu ed saray aralem a kanonotan na Dios?

¹¹ Pakagunggonaan na amin a matoor a Kristiano so betang na masanton espiritu, salanti, say pangipaparungtal na satan ed saray aralem a kanonotan na Dios. Singa saray inmunan siglo a Kristiano, manaaral itayo met, tan diad saginonor et nanonotan tan niyaplika tayo iray impormasyon ya atalosan tayo lapud tulong na masanton espiritu. (Luc. 12:11, 12) Agtayo la kaukolan so andukey ya panaral ed eskuelaan pian natalosan iray aralem ya espiritual a katuaan ya impalapag. (Gawa 4:13) Panon tayon napaaligwas so pakatalos tayo ed saray aralem a kanonotan na Dios? Pantongtongan tayo pay pigaran suhestion.

12. Kapigan tayo kerewen so masanton espiritu?

¹² Kerewen ed pikakasi so masanton espiritu. Antis ya aralen iray base ed Biblia a publikasyon, nepeg tayon kerewen so masanton espiritu a mangiwanwan ed sikatayo. Gawaen tayo itan anggan sano bukor tayoy manaral odino antikey labat so panaral tayo. Seguradon naliketan so mangatatawen ya Ama tayo ed ontan iran mapaabeban pikakasi. Unong ya imbaga nen Jesus, say masanton espiritu et mabulos ya iter nen Jehova no masimoon tayon kerewen itan.​—Luc. 11:13.

13, 14. Pian natalosan iray aralem a kanonotan na Dios, antoy nagawaan na panagparaan parad aral?

¹³ Manparaan parad aral. Makakaawat tayo na ‘naakan diad dugan panaon’ panamegley na matoor ya aripen. Susumpalen na sayan “aripen” so responsabilidad to diad pangitatarya na base ed Biblia iran publikasyon tan diad pangiye-eskedyul ed no anto so aralen tan no kapigan itan aralen. Walay maabig a rason no akin a kekerewen na matoor ya aripen ed “amin ya agagi” ya aralen so espisipikon impormasyon. (1 Ped. 2:17; Col. 4:16; Jud. 3) No gawaen tayoy anggaay nayarian tayon tumboken so uksoyan, mikokoopera tayo ed masanton espiritu.​—Apo. 2:29.

¹⁴ Sano manpaparaan itayo parad aral, maabig no basaen tayo iray nisitas a teksto tan tebeken no antoy koneksion na saratan ed aaralen. No oniay gawaen tayo, kalkalnan onaralem so pakatalos tayo ed Biblia. (Gawa 17:11, 12)  Niarum ni, nipaslep itan ed nonot tayo kanian walay nipanonot ed sikatayo na masanton espiritu. Ontan met, no anapen tayon mismo ed Biblia so sakey a teksto, natandaan tayo no iner so kawalaan to no nakaukolan tayo.

15. Akin et kaukolan tayon amtaen iray sankabaloan ya espiritual ya impormasyon, tan panon tayon nagawaan itan?

¹⁵ Amtaen so sankabaloan iran espiritual ya impormasyon. Walaray publikasyon ya ag-aaralen ed saray miting tayo. Balet, imparaan iratan pian nagunggonaan itayo. Anggan saray publikasyon ya iyoopresi’d publiko et para met ed sikatayo. Kanian, maabig no mangawit tayon naynay na publikasyon ya agtayo ni abasa odino ag ‘ti ni asumpal ya abasa. Diad sayan okupadon mundo et mabetbet tayon manaalagar, sirin et nausar tayo itan a pankanawnawa pian makapanbasa. Say gagawaen na arum et ondedengel ira’d saray audio recording tayo legan iran manaakar odino manbiabiahe. Lapud amin irayan publikasyon et ni-research a maong tan para ed amin, mas napaaralem so apresasyon tayo ed saray espiritual a bengatla.​—Hab. 2:2.

16. Antoy nagunggona no isulat tan i-research tayo iray tepet tayo?

¹⁶ Mandalepdep. Sano babasaen yoy Biblia odino saray publikasyon tayo, ipanaon yoy mandalepdep. Legan yon tatalosan iray punto, nayarin walaray tepet yo. Maabig no isulat yo iratan pian napawil ed saginonor. No i-research tayo iray bengatlan akalay atension tayo, lalo tayon pampursigian ya amtaen so ebat. Saray naamtaan tayo et unarum ed “kayamanan” tayo ya sarag ti’n ‘ipaway’ no nakaukolan.​—Mat. 13:52.

17. Anto so eskedyul tan aaralen yo bilang pamilya odino bilang indibidual?

¹⁷ Iyeskedyul so panagdayew na pamilya. Pinaseseg tayon amin na Mananguley ya Ulop ya mangigana na panaon kada simba parad personal odino pamilyan panag-aral. Lapud walay ginawan pananguman ed eskedyul na aral tayo, aliwan mairap ya unoren itan a simbawa. Antoy aaralen yo diad Panagdayew na Pamilya yo ed labi? Saray arum et babasaen da so Biblia, manreresearch ed saray bersikulon labay dan nalinewan, tan mannonota diad Biblia ra. Pantotongtongan met na dakel a pamilya no panon dan niyaplika iray inaral da. Saray arum ya ulo na pamilya et mamipili na tema ya amta ran kaukolan na pamilya ra, odino, say aaralen da et say tema o tepet a kinerew na pamilya ra ya aralen. Diad ilalabas na panaon, seguradon makanonot kayo na arum nin tema a napantongtongan yo. *

18. Akin ya agtayo nepeg ya ipasen a mairap ya aralen iray aralem a katuaan a walad Salita na Dios?

¹⁸ Imbaga nen Jesus a say espiritu et onkanan mananulong. Kanian agtayo komon ipapasen a mairap ya aralen iray aralem a katuaan a walad Salita na Dios. Saratan a katuaan et kabiangan na mablin kakabatan na Dios, tan iimbitaan to itayon usisaen iratan. (Basaen so Uliran 2:1-5.) Dakel so ipaparungtal na saratan nipaakar ed saray “bengatlan imparaan la na Dios parad saramay mangaaro ed sikato.” No pansagpotan tayon aralen a nagkalalo so nipaakar ed Salita nen Jehova, tulongan itayo na masanton espiritu, ta “say espiritu so manguusisa ed amin a bengatla, anggan saray aralem a kanonotan na Dios.”​—1 Cor. 2:9, 10.

[Paimano ed leksab]

Antoy Ebat Mo?

• Diad anton duaran paraan ya ontutulong ed sikatayo so espiritu pian nausisa iray “aralem a kanonotan na Dios”?

• Nen inmunan siglo, siopa so angiparungtalan na masanton espiritu ed saray aralem a katuaan?

• Diad panaon tayo, panon ya ontutulong so masanton espiritu pian nalinewan iray bengabengatla?

• Antoy gawaen mo pian nagunggonaan ka ed betang na espiritu?

[Tepetepet Parad Panagaral]

[Kahon ed pahina 22]

 No Panon ya Imparungtal na Espiritu so Kabaliksan na Espiritual a Templo

Kabiangan ed “saray aralem a kanonotan na Dios” ya imparungtal nen inmunan siglo et samay ililitrato na tabernakulo tan diad saginonor et saray templo. Tinawag itan nen Pablo a “tuan tabernakulo, ya impaalagey nen Jehova, aliwan too.” (Heb. 8:2) Saya imay baleg ya espiritual a templo, ya uksoyan pian naasinggeran so Dios panamegley na dondon tan inkasaserdote nen Jesu-Kristo.

Niletneg iyan “tuan tabernakulo” nen 29 C.E. sanen nampabautismo si Jesus tan sanen sikato so inawat nen Jehova a magmaliw a perpekton bagat. (Heb. 10:5-10) Kayari impatey tan inyoli’d bilay nen Jesus, sikatoy linmoob ed Sankasantosan a pasen na espiritual a templo tan inter toy balor na bagat to diad mismon ‘arap na Dios.’​—Heb. 9:11, 12, 24.

Balet, insulat nen apostol Pablo ya saray alanaan a Kristiano et “magmaliw a masanton templo parad si Jehova.” (Efe. 2:20-22) Saya met lanlamang kasi imay “tuan tabernakulo” ya sinalambit to ed saginonor sanen nansulat ed saray Hebreo? Ontan so abayag lan papanisiaan na saray lingkor nen Jehova. Say amta da et ipaparaan iray alanaan a Kristiano diad dalin pian magmaliw a kabiangan na ‘saray bato’ ed mangatatawen a templo nen Jehova.​—1 Ped. 2:5.

Antis na taon 1971 balet, atebek na saray responsablin membro na matoor tan makabat ya aripen ya say templon tinukoy nen Pablo ed Efeso et aliwan say baleg ya espiritual a templo nen Jehova. Ta no talagan kabiangan na “tuan tabernakulo” iray pinaolin alanaan a Kristiano, di ompapaway ya onlesa ni labat itan kayari igapo na kioli ra salanti legan na “kiwawala na Katawan.” (1 Tes. 4:15-17) Sakey ni, oniay insulat nen Pablo nipaakar ed sayan tabernakulo: “Sayan mismon tabernakulo so mangililitrato ed aturon panaon a wadia la.”​—Heb. 9:9.

Diad maalwar ya impankokompara ed saraya tan ed saray arum nin teksto, alinewan ya say espiritual a templo et aggagapoan ya ipaalagey natan ni labat, tan saray alanaan ya Kristiano et aliwa “iran bato” ya ipaparaan diad dalin pian ipila ed satan. Noagta, saray alanaan a Kristiano et manlilingkor ed lolooban tan diad Masanton pasen na espiritual a templo, ya inagew-agew a mangiyaapay ed Dios na “bagat a panangidayew.”​—Heb. 13:15.

[Litrato ed pahina 23]

Panon tayon napaaligwas so pakatalos tayo ed “saray aralem a kanonotan na Dios”?