Sigpot a Mibiang ed Baleg ya Espiritual a Panag-ani

‘Dakel komon so gawaen yo ed kimey na Katawan.’​—1 COR. 15:58.

1. Anto so kerew nen Jesus ed saray disipulo to?

LEGAN a manbabaroy ira di Jesus ed rehyon na Samaria diad sampot na 30 C.E., sikatoy nampainawan agano diad abay na bobon ya asingger ed baley na Sicar. Diman et inkuan to ed saray disipulo to: “Nengneng yo iray kaumaan, ya amputi la ra parad panag-ani.” (Juan 4:35) Aliwan literal a panag-ani so tutukoyen nen Jesus, noagta espiritual a panagtipon ed saray maptek-impanpuson totoo a magmaliw a papatumbok to. Diad tua et kekerewen to’d saray disipulo to a mibiang ed satan a panag-ani. Dakel so kaukolan dan gawaen, balet ta antikey lay panaon pian nagawaan itan!

2, 3. (a) Antoy mangipapanengneng a manbibilay itayo ed panaon na panag-ani? (b) Antoy aralen tayo ed sayan artikulo?

² Saman ya imbaga nen Jesus et makabkabaliksan ed sikatayo natan. Manbibilay itayo ed panaon a say “kaumaan” et ‘amputi la parad panag-ani.’ Kada taon, naiimbitaan so minilyon a totoo ya mangamta ed katuaan a mangipagamor na bilay, tan nilibo-libo a balon disipulo so nababautismoan. Pribilehyo tayoy mibiang ed sankabalgan a panag-ani ya idadaulo nen Jehova a Dios, say Katawan na panag-ani. Kasin ‘dakel so nagagawaan yo’ ed sayan kimey?​—1 Cor. 15:58.

³ Legan na talora tan kapalduan taon ya impanministeryo nen Jesus diad dalin, impasal to ray disipulo to ed betang da bilang manag-ani. Diad sayan artikulo et pantongtongan tayo so talora ed saray dakel ya importantin leksion ya imbangat nen Jesus ed saray disipulo to. Ipabitar na kada leksion so sakey a kualidad ya makanakana ed sikatayo legan tayon gagawaey anggaan na nayarian tayo ed kaplesan a panag-ani na disipulo. Sansakeyen tayo pa irayan taloran kualidad.

Importante so Kapaabebaan

4. Panon ya inyilustra nen Jesus so kaimportantian na kapaabebaan?

⁴ Ilitrato pa’d nonot iyan eksena: Kakkayari na saray disipulo a nansasangsangan no siopa so sankamanunaan odino sankatalonggaringan ed sikara. Nayarin napatnagan ni’d lupa ra so pan-inap tan pansyodot. Kanian, tinawag nen Jesus so sakey ya ugaw tan pinaalagey to’d pegley da. Insan, inkuan to’d sikara: “Siopaman a manpaabeba [odino, “siopaman a pagmaliwen ton melag so inkasikato,” Byington] a singa sayan melag ya ugaw, sikato so sankamanunaan ed panarian na katawenan.” (Basaen so Mateo 18:1-4.) Imbes ya aligen so panagnonot na saray totoo ed mundo, a kabkabat da labat so sakey no makuarta, maimpluensya, tan prominente, kaukolan a natalosan na saray disipulo a matalonggaring ira no ‘pagmaliwen dan melag so inkasikara’ diad pakanengneng na arum. Bendisyonan tan usaren ira labat nen Jehova no talagan mapaabeba ira.

5, 6. Pian sigpot kan makapibiang ed panag-ani, akin et nepeg a magmaliw kan mapaabeba? Mangiter na alimbawa.

⁵ Anggad natan, dakel a totoo ed mundo so tumalikarkar a manaanap na kayamanan, tan nawalaay pakayari odino posisyon. Kanian, ngalngali anggapoy panaon da odino talagan anggapoy panaon da ed espiritual iran bengatla. (Mat. 13:22) Balet, duma iray totoo nen Jehova ta labay dan ‘pagmaliwen a melag so inkasikara’ diad pakanengneng na arum. Diad ontan et bendisyonan tan abobonan ira na Katawan  na panag-ani.​—Mat. 6:24; 2 Cor. 11:7; Fil. 3:8.

⁶ Alaen pan alimbawa si Francisco, sakey ya elder ed South America. Sanen kalangweran ni, intunda toy panaaral to ed unibersidad pian makapanpayunir. “Sanen asabi panaon a mangasawa ak la,” kuan to, “sarag ko komoy makalmo na trabaho a yamanan mi. Balet, nandesisyon kami a pasimplien so kabibilay mi tan mansiansia ed sigpot panaon a ministeryo. Diad saginonor, awalaan kami na ananak, tan inmirap so situasyon mi. Balet tinulongan kami nen Jehova pian natalindegan mi desisyon mi.” Onia ni inkuan nen Francisco: “Diad masulok lan 30 taon, panliliketan koy manlingkor bilang elder, nilikud ni’d dakel ya espisyal ya asainmin. Agmin balot nagbabawian so simplin bilay mi.”

7. Asalim ta lan inyaplika so simbawan walad Roma 12:16?

⁷ No ipulisay mo iray “atatagey a bengatla” na sayan mundo tan ‘paitonton ka ed saray abeban bengatla,’ nawalaan ka met na dakel a kaaruman a bendisyon tan pribilehyo diad kimey a panag-ani.​—Roma 12:16; Mat. 4:19, 20; Luc. 18:28-30.

Pakabendisyonan so Inkakuli

8, 9. (a) Isalaysay ed antikey so ilustrasyon nen Jesus nipaakar ed saray talento. (b) Siopay nagkalalo lan napaseseg ed sayan ilustrasyon?

⁸ Say sakey nin kualidad a kaukolan tayo pian sigpot a makapibiang ed panag-ani et say inkakuli. Inyilustra iya nen Jesus diad parabolon nipaakar ed talento. * Diad satan ya ilustrasyon et walay sakey a laki ya inmatalek toy kaykayarian to ed taloran aripen to antis ya linma ed arum a bansa. Samay unonan aripen et akaawat na limaran talento, samay mikadua et duaran talento, tan samay mikatlo et sakey ya talento. Kaalis na katawan da, samay unonan duaran aripen et makulikuli ran “inyanap” a tampol iray talenton walad sikara. Balet, samay komatlon aripen et “mangiras.” Inkotkot toy talenton walad sikato. Kapawil na katawan da, tinumangan to ray unonan duaran aripen, a tinuro to ran mangasikaso ed “dakel a bengatla.” Inala to balet imay talenton walad komatlon aripen tan pinaekal to la’d sankaabungan to.​—Mat. 25:14-30.

⁹ Seguradon pipilaleken mo met ya aligen iramay duaran makulin aripen diad parabolo nen Jesus tan sigpot a mibiang ed panaggaway babangatan anggad posible. Panon to balet no limitado lay nagawaan mo lapud sirkumstansyam? Ompan lapud irap na bilay et napilitan kan mantrabaho na andukdukey ya oras pian nalegpet moy pamilyam. Odino  ompan maedad kayo la tan makapuy lay laman yo. No ontan, napaseseg kayo na parabolon nipaakar ed talento.

10. Diad samay parabolon nipaakar ed talento, panon ya nibagan makatunongan so katawan, tan akin et makapaseseg iya ed sika?

¹⁰ Imanoen ya amta na samay katawan ed parabolo ya nandurumay potensyal na ariripen to. Napatnagan iya sanen inter to ray talento “unong ed dilin abilidad” da. (Mat. 25:15) Anggaman samay unonan aripen et mas dakel so nalmo to nen samay komadua, kinomendaan to iran dua a tinawag to ran “maong tan matoor” ya aripen tan parehoy tumang to ed sikara. (Mat. 25:21, 23) Mipadpara, amta nen Jehova a Dios, say Katawan na panag-ani, ya naapektoan na sirkumstansya yo so nasarag yon gawaen. Seguradon naiimano to so sigpot-puson pansasagpot yo a manlingkor tan tumangan to kayo lapud satan.​—Mar. 14:3-9; basaen so Lucas 21:1-4.

11. Mangiter na alimbawa no panon a pakabendisyonan so inkakuli anggaman mairap so sirkumstansya.

¹¹ Papaneknekan na eksperiensya nen Selmira, sakey ya agin bii a taga Brazil, ya ag-akadepende ed maabig a sirkumstansya so makulin panaglingkor ed Dios. Duamplon taon lay apalabas, apaltog so asawa to nen walay agawan holdapan, kanian bukor toy amabaleg ed taloran anak da. Sikatoy nankatulong tan andukey ya oras so pantatrabaho to. Ontan met, nababanalan ed biahe to tan seksekan ni ed luluganan. Anggaman mairap so kipapasen to, inyuksoy toy eskedyul to pian makapanregular payunir. Diad saginonor, nampayunir met lay duara ed saray anak to. “Diad inlabas na pigaran taon, masulok a 20 totoo so naiyaralan ko na Biblia tan nagmaliw a membro na ‘pamilyak,’” so kuan to. “Anggad natan et naliliketan ak ed panangaro tan pikakaaro ra. Sakey itan a kayamanan ya agnabayaran na kuarta.” Peteg a benendisyonan na Katawan na panag-ani so inkakuli nen Selmira!

12. Panon tayon nipanengneng a makuli itayon manpulong?

¹² No limitado lay nagagawaan mo ed ministeryo lapud sirkumstansyam, sarag mo nin siansian salien a palaknaben so pibibiang mo ed panag-ani. Nagawaan mo itan no pagmaliwen mon mas mabunga so ministeryom. Singa bilang, sano iyaplikam iray praktikal a suhestion na sinimban Pantitipon Parad Panagserbi, napaaligwas moy abilidad mon manpulong tan makalmo kay arum nin paraan na panagpulong. (2 Tim. 2:15) Ontan met, no posible, nayarin dia la’d arum a panaon mo gawaen iramay agmet importantin bengatla odino ekal mo la’d eskedyul mo itan pian regular mon nasuportaan so kapapaway na kongregasyon yo.​—Col. 4:5.

13. Anto so manunan makatulong pian nabayuboan tan napansiansia so inkakuli?

¹³ Tandaan a say inkakuli et manlalapud maapresyan puso. (Sal. 40:8) Samay komatlon aripen ya asalambit ed parabolo nen Jesus et antakot toy katawan to, a minoria ton mapeget tan agmakatunongan. Kanian, imbes ya inyanap to so talenton walad sikato, inkotkot to laingen itan. Pian agtayo naalig so ontan ya inkamapaulyan, kaukolan tayon bayuboan tan pansiansiaen a maapit so relasyon tayo ed si Jehova, say Katawan na panag-ani. Mangigana kay panaon parad panagaral tan panagdalepdep ed saray alay abig a kualidad to a singa say aro, anos, tan panangasi. Diad ontan et napakiwas so pusom a gawaey anggaay nayarin mon manlingkor ed sikato.​—Luc. 6:45; Fil. 1:9-11.

“Nepeg a Masanto Kayo”

14. Antoy importantin kakaukolanen a kaukolan a nadampot na saramay malabay a magmaliw a manag-ani?

¹⁴ Sanen inaon nen apostol Pedro so Hebreon Kasulatan, imbaga to imay imbalikas na Dios a linawa To parad saray lingkor To diad dalin: “Magmaliw kayon masanto diad amin a kagagawa yo, a singa samay Masanton Dios ya anawag ed sikayo, ta walan nisulat: ‘Nepeg a masanto kayo, lapud masanto ak.’” (1 Ped. 1:15, 16; Lev. 19:2; Deu. 18:13) Ipapabitar na saya a saray manag-ani et nepeg a malinis ed moral tan espiritual. Satan ya importantin kakaukolanen  et nadampot tayo no gawaen tayo ray kundang pian nalinisan itayo diad simbolikon paraan. Panon tayon nagawaan itan? Diad tulong na tuan salita na Dios.

15. Antoy nagawaan ed sikatayo na tuan salita na Dios?

¹⁵ Say tuan salita na Dios et inyaliling ed danum a makalinis. Singa bilang, insulat nen apostol Pablo ya say ulop na alanaan a Kristiano et malinis diad pakanengneng na Dios, a singa masimpit a nobya nen Kristo “a lilinisan tan uurasan toy danum na salita na Dios . . . [pian] masanto tan andian na pakabalawan” itan. (Efe. 5:25-27) Antis na satan, sinalambit met nen Jesus so nipaakar ed inyabawag ton salita na Dios. Inkuan to ed saray disipulo to a walay pakayari na satan a manlinis: “Malinis kayo la lapud salitan imbagak ed sikayo.” (Juan 15:3) Kanian, walay pakayari na tuan salita na Dios a manlinis ed moral tan espiritual. Naabobonan labat so panagdayew tayo ed Dios no palinisan itayo ed salita to diad onian paraan.

16. Panon itayon makapansiansian malinis ed espiritual tan moral?

¹⁶ Kanian, pian onkualipika itayon magmaliw a manag-ani na Dios, kaukolan ya ekalen tayo nin unona so amin a kagagawan ipapasen na Dios a marutak. On, pian mansiansia itayon kualipikado ed sayan pribilehyo, nepeg a napanuliranan itayo diad panutumbok ed atagey iran estandarte nen Jehova ed moral tan espiritual. (Basaen so 1 Pedro 1:14-16.) No panon a lanang itayon mapalinis ed pisikal, ontan met, kaukolan a regular itayon palinisan ed tuan salita na Dios. Kabaliksan na saya a kaukolan tayon basaen so Biblia tan atendian iray aral. Kabaliksan to met a masimoon tayon pansagpotan ya iyaplika iray panonot na Dios. No gawaen tayo iya, nalabanan tayo ray dilin kakapuyan tayo tan nipulisay so makaderal ya impluensya na sayan mundo. (Sal. 119:9; Sant. 1:21-25) Talagan makaligliwan naamtaan a diad tulong na tuan salita na Dios et nayarin “naurasan” itayo ed anggan saray seryoson kasalanan tayo!​—1 Cor. 6:9-11.

17. Pian makapansiansian malinis, antoran simbawa na Biblia so kaukolan tayon tuloken?

¹⁷ Labay mo ta’y palinisan ed tuan salita na Dios? Singa bilang, antoy reaksion mo sano sinimbawa ka nipaakar ed makapuy a panagligliwaan? (Sal. 101:3) Kasin lilimitaan moy pipiulop ed saray aliwan agagi a kaeskuelam odino katrabahom? (1 Cor. 15:33) Kasin saray kakapuyan mo, a nayarin pansengegan na pagmaliw mon marutak ed pakanengneng nen Jehova, et pampepelengan mon talonaan? (Col. 3:5) Sigpot mo ta’n papaliisan so magulon politika tan say pagmaliw a nasyonalistiko a sankaimano’d dakel a kompetisyon ed isports?​—Sant. 4:4.

18. Panon itayon natulongan na pagmaliw a malinis ed moral tan espiritual pian mabunga itayo ed panag-ani?

¹⁸ Talagan maabig so pansumpalan no matoor mon unoren iratan. Oniay inkuan nen Jesus sanen inyaliling to ray alanaan a disipulo to ed sangasanga na ubas: “Eekalen [na Amak so] balang sanga ed siak ya agmanbubunga, tan lilinisan toy balang sakey a manbubunga, ta pian manbunga itan na mas dakel.” (Juan 15:2) Sano palinisan ka ed danum na katuaan a walad Biblia, makapawala ka na mas dakel a bunga.

Saray Bendisyon Natan tan Diad Arapen

19. Panon ya abendisyonan so impansagpot na saray disipulo nen Jesus bilang manag-ani?

¹⁹ Saramay matoor a disipulo ya angiyaplika ed impangipasal nen Jesus et akaawat na  masanton espiritu nen Pentecostes 33 C.E. pian magmaliw a tasi “diad sankaarawian a pasen na dalin.” (Gawa 1:8) Nanlingkor ira bilang membro na mananguley ya ulop, misionero, odino ombiabiahen mamatatken. Baleg so agawaan da pian nipulong so maong a balita “ed amin a pinalsa diad silong na tawen.” (Col. 1:23) Agaylan bendisyon so naawat da, tan aliketan met so dakel lapud tulong da!

20. (a) Antoran bendisyon so naawat mo lapud sigpot a pibibiang ed espiritual a panag-ani? (b) Antoy pansagpotan mon gawaen?

²⁰ On, no magmaliw itayon mapaabeba, makuli, tan no tumboken tayo iray atagey ya estandarte na Salita na Dios, mas dakel so nagawaan tayo diad baleg ya espiritual a panag-ani a nagagawa natan. Legan a naiirapan tan nadidismaya so dakel a totoo diad sayan materyalistiko tan nigalet ed likeliket a mundo, nalilikna tayo so tuan liket tan inkakontento. (Sal. 126:6) Nagkalalo ed amin, ‘say pansasagpot tayo parad Katawan et aliwan andi-kakanaan.’ (1 Cor. 15:58) Magnayon itayon bendisyonan nen Jehova a Dios, say Katawan na panag-ani, lapud ‘gawa tan aro ya impanengneng tayo parad ngaran to.’​—Heb. 6:10-12.

[Paimano ed leksab]

Kasin Nanonotan Mo?

Legan mon panggugunaetan so sigpot a pakapibiang ed panag-ani . . .

• akin et importante ya ipanengneng so kapaabebaan?

• panon mon nabayuboan tan napansiansia so inkakuli?

• akin et importante so pansiansian malinis ed moral tan espiritual?

[Tepetepet Parad Panagaral]

[Litrato ed pahina 17]

Ontulong ed sikatayo so kapaabebaan pian manbilay a simpli tan akasentro ed Panarian