Imbitado Ka!

IMBITADO ed anto? Pian bisitaen so sakey ed saray sangan opisina na saray Tasi nen Jehova, a tatawagey Bethel. Walay 118 a sangan opisina ed nanduruman bansa. Saray ombibisita et mabetbet ya mangibabalikas na impapuson apresasyon ed saray naiimatonan da’d Bethel.

Lapud pandinayew na sakey a tobonbalon iyaaralan na Biblia ed saray makukuli tan maliliket a manseserbi’d si Jehova diad sangan opisina ed Mexico, intepet to: “Antoy gawaen ko pian makapanayam tan makapantrabaho ak dia?” Oniay inkuan ed sikato: “Unona, manpabautismo ka ni. Insan, maong no manpayunir ka.” Tinumbok na sayan tobonbalo so suhestion ed sikato, tan kayari duay taon et sikatoy naimbitaan a manlingkor ed Bethel diad satan a bansa. Sikatoy manlilingkor la ditan diad apalabas lan 20 taon.

Anto so Bethel?

Diad Hebreon lenguahe, say “Bethel” et mankabaliksay “Abung na Dios.” (Gen. 28:19) Saray pasilidad ed nanduruman sangan opisina et nauusar parad panag-imprinta tan panangibunog na saray Biblia tan arum niran literatura, tan ontutulong ed masulok a 100,000 kongregasyon na saray Tasi nen Jehova ed sankamundoan. Ngalngali 20,000 a lalaki tan bibii so mankikimey ed Bethel, a nandurumay kipapasen da’d bilay tan kultura. Mabulbulos iran manlilingkor a sigpot-panaon ed si Jehova tan ed saray kaagian da. Saramay abayag la’d sayan Makristianon kimey et manseserbi kaiba iray maligligsan tobonbalo. Diad saray labi tan sampot-simba, malikeliket a mililimog iray membro na pamilyan Bethel ed saray kongregasyon na saray Tasi nen Jehova diad aral tan Kristianon ministeryo. Walay panaon da met parad panagaral na Biblia, panagligliwaan, tan pangasikaso’d saray personal a bengatla.

Saray membro na pamilyan Bethel et binulan a makakaawat na melag a reimbursement. Panliliketan day mananam tan masustansian panangan, ontan met ed malinis tan komportable iran kuarto. Agdenisinyo iray ayaman a Bethel a singa mabmabli iran hotel. Noagta simpli labat iraya. Say pandinayewan na saray ombibisita’d Bethel et aliwa labat a saray naasikason maong a bilding, kaliberliber, tan mauksoy a panagkimey, noag pati say kaabigan tan kooperasyon ya sankaimano ditan. Anggaman makulikulin mankikimey so amin, sarag da nin abrasaen iray bisita. Diad Bethel et anggapoy panangibiig lapud kipapasen ed bilay na sakey. Anggapo met so mangipapasen ed inkasikato a mas atagtagey nen say arum lapud  klase na kimey to. Amin a kimey et importante, balanglan panlinis, pangasikasoy tantanaman, panluto, pantrabaho’d panag-imprintaan odino opisina. Saray Bethelite, a tawag ed saray manlilingkor ed Bethel, et nankakasakey a mantratrabaho pian suportaan so kimey na saray Tasi nen Jehova.​—Col. 3:23.

Kabaten so Arum a Bethelite

Kabaten tayo pa iray pigaran kabiangan ed sayan internasyonal a pamilya. Akin et nilabay day manlingkor ed Bethel? Laen tayo pan alimbawa si Mario. Sanen sikatoy nagmaliw a Tasi nen Jehova, sikatoy mantratrabaho’d sakey a kabkabat a kompanyay luluganan diad Germany. Atagey so sueldo to tan sarag to komoy onyaman ni. Balet, ag-abayag kayari impampabautismo to, namboluntaryon manlingkor a sakey simba ed Bethel. Sikatoy inyasain a mankimey ed printery. Anengneng nen Mario so baleg a pandumaan na saray akatrabaho to’d Bethel tan ed saramay katrabaho to’d kompanya. Kanian nanaplay parad sigpot-panaon a panlingkor ed Bethel. Anggaman mairap a natalosan na saray kakanayon tan katrabaho nen Mario so desisyon to, siansia nin sikatoy malikeliket a manlilingkor natan diad Bethel ed Germany.

Walaray manlilingkor ed Bethel ya agmet atagey so aral da odino walaay nikaduman abilidad. Singa bilang si Abel, ya 15 taon lan walad Bethel ed Mexico. Inkuan to: “Dakel so naaralan ko’d Bethel. Naaralan koy mangusar na komplikado tan moderno iran makinan panag-imprintaan. Amtak a no usaren ko iyan naaralan ko diad paway na Bethel et onyaman ak, balet ta anggapo’d siak iray panliliketan ko natan​—maligen, makapnek a bilay ya anggapoy kapagaan tan kompetensiaan a walad maslak a pantratrabahoan. Parad siak et saya so sankaabigan a klase na edukasyon a naawat ko, a tinmulong pian onaligwas ak ed espiritual tan kanonotan. Agkon balot nagamoran irayan espiritual a gunggona anggan diad sankamaongan lan unibersidad.”

Makapaseseg so Ibisita’d Bethel

Say ibisita labat ed Bethel et makagunggonan maong ed espiritualidad na sakey a too. Napaneknekan tayo iya ed si Omar a taga Mexico.  Imbangat ed sikato nen nanay to iray katuaan ed Biblia. Balet diad edad ton 17, sikatoy tinmunda lan miaral tan agla mimilan manpulong. Ag-abayag et naaralan to ray nanduruman bisyo tan materyalistiko lay panagbilay to. Aminsan, sanen mantratrabaho’d sakey a kompanyay telepono, sikatoy kaiba ed grupon binmisita’d Bethel ed Mexico pian idemostray pangusar ed pigaran kagawaan. Oniay inkomento nen Omar: “Kayari impandemostra mi, in-tour da kami ed saray pasilidad. Say mismon anengneng ko tan maong ya impitoo da’d sikami et amakiwas ed siak ya usisaen koy lalaen na bilay ko, ya arawi ed si Jehova. Akiaral ak lamet tan nanaral na Biblia. Anem bulan kayari na imbisitak ed Bethel et abautismoan ak. Misalsalamat ak ed si Jehova ta talagan apaseseg ak ed saman ya imbisitak ed Bethel.”

Si Masahiko, a taga Japan, et binmaleg met ed Tasin pamilya. Anggaman ontan, inisip ton masyadon istrikto so pambilay bilang Kristiano. Sikatoy nagmaliw ya okupado ed eskuelaan tan tinmunda lan miaral tan manpulong. Oniay nanonotan nen Masahiko: “Aminsan, namplanon man-tour ed Bethel so pamilyak tan pigaran kakaaron Tasi. Lapud pinilit ak na pamilyak, akila ak. Diad saman ya impan-tour mi’d Bethel et agko inilaloan ya napaseseg ak a maong. Say maliket ya impilimog ko’d saray Tasi legan na biahe et agko nin balot naeksperiensya ed saray kakaarok ya aliwan Tasi. Lapud satan et pinilalek ko lay manbilay bilang Kristiano, tan nandesisyon ak a manaral na Biblia.” Manlilingkor la natan si Masahiko bilang sigpot-panaon a ministro diad kongregasyon to.

Walay sakey a Tasin taga France ya inmalis ed Moscow pian diman mantrabaho. Lapud saya, nitunda toy milimog ed saray Tasi tan kinmapuy so espiritualidad to. Sikatoy makakapanggawa lay mauges tan ag-abayag et akiasawa’d aliwan Tasi. Aminsan, sikatoy nila na sakey ya agin bii a taga France, tan nambiahe ra paonla’d St. Petersburg, Russia, pian bisitaen so Bethel. Oniay insulat to: “Alikliknak so maaron impangabrasa’d sikami diad Bethel. Maligeligen diman tan talagan wadman so masanton espiritu nen Jehova. Alingolingo ak ed inyarawik ed organisasyon nen Jehova! Kayari na saman ya imbisitak ed Bethel, nampikasi ak ed si Jehova a tulongan to ak. Mas determinado ak met lan bangatan iray ana’ko nipaakar ed Biblia.” Likud ed arum nin espiritual a tulong a naawat na sayan Tasi a datin makapuy ed espiritual, sikatoy talagan apabiskeg ed imbisita to’d Bethel kanian inmaligwas a maong.

Anto met so nagawaan na ibisita’d Bethel na saramay aliwan Tasi nen Jehova? Nen 1988, binmisita’d Bethel ed Brazil si Alberto ya aktibon maong ed politika. Agaylay pandinayew to ed inkalinis, inkauksoy, tan nagkalalo la’d agpangiyaamot ed kimey. Ontan lay pandinayew nen Alberto ta antis ya nan-tour ed Bethel, sikatoy binmisita ed seminaryo a kawalaay bayaw ton pari. Kanian anengneng toy pandumaan. Inkuan to: “Amin ya gagawaen da ed seminaryo et sekreto.” Ag-abayag kayari imbisita to’d Bethel et inawat toy panagaral na Biblia, inmekal ed politika, tan manlilingkor la natan bilang elder ed kongregasyon.

Pasyar Ka’d Bethel!

Dakel so mansasagpot a maong pian nabisita ray sangan opisina diad bansa ra. Singa bilang, sikara di Paulo tan Eugenia a taga Brazil et nantipon ya apat taon pian nabisita ray Bethel ed satan a bansa. Say kaarawi na satan et 3,000 kilometro tan nambiahe iran duay agew panamegley na bus. Oniay inkuan da: “Abawbawi mi ray sagpot mi. Mas linmaknab natan so panmoria mi’d organisasyon nen Jehova. Sano ipapaliwawa mi kimey ed Bethel ed saray iyaaralan mi na Biblia, nitetepet da no maminsan, ‘Akakar ki’ la’d man?’ Natan et naebatan mi la ray on.”

Wala ta’y sangan opisina tan Bethel ed bansan kawalaan mo odino diad asingger ed bansam? Iimbitaan mi kan ombisita ed sarayan pasilidad. Seguradon naabrasa ka tan nagunggonaan kan maong ed espiritual diad ibisitam ed Bethel.

[Litrato ed pahina 18]

Mario

[Litrato ed pahina 18]

Abel

[Litrato ed pahina 18]

Germany

[Litrato ed pahina 18]

Japan

[Litrato ed pahina 18]

Brazil