Kasin Nanonotan Yo?

Nanggayagaan mo ta so impanbasa ed agano ni ran paway na Say Panag-Bantayan tan The Watchtower? Salim pa sirin ya ebatan iray onggendan a tepet:

• Panon yon napabaleg a responsable iray anak yo?

Kaukolan a ‘mangitilak kayo na aligen’ dan ehemplo. (Juan 13:15) Nepeg a makatunongan iray iilaloan yo. Legan na ibabaleg da, mas napanmatalkan la ra no nipaakar inkamapalinis, kasasabi’d dugan oras, tan asainmin ed eskuelaan. Mangiter na espesipiko iran instruksion pian nipasal so ananak yon manakbat ed saray responsabilidad da.​—5/1-E pahina 19-20.

• Akin et agdinusa na Dios si Aaron sanen nanggawa na talintaon kilaw a baka?

Sinumlang nen Aaron so ganggan na Dios nipaakar ed idolatriya. (Exo. 20:3-5) Balet, impikasi nen Moises si Aaron ed si Jehova tan “mabisbiskeg so epekto” na pikakasi to. (Sant. 5:16) Abayag lan manmamatoor si Aaron ed Dios. Tan anggaman pinilit na totoo si Aaron a manggaway balitok a kilaw a baka, apaneknekan ed saginonor ya agto ra aabobonan. Napatnagan tayo iya lapud sikatoy akila ed saray anak nen Levi a dinmapag ed si Jehova. (Exo. 32:25-29)​—5/15, pahina 21.

• Iner so kawalaan na Ofir a sinalambit na Biblia a pangaalaan na balitok?

Pian naala nen Solomon iray balitok ed Ofir, sikatoy nanggawa na saray barko diad Ezion-geber. (1 Ara. 9:26-28) Satan a pier et walad tagey na Aqaba Gulf ya asingger natan ed Elat tan Aqaba, diad Ambalangan Dayat. Mapatnag a say Ofir sirin et diad Arabia ya asingger ed Ambalangan Dayat odino diad saray baybay na Aprika o India.​—6/1-E, pahina 15.

• Anto so natutukoy a “balsamo ed Galaad”? (Jer. 8:22)

Say larak a balsamo et ambalingit tan magket a larak na nanduruman tanaman diad Galaad odino Gilead, bukig na Ilog Jordan. Lapud makapaabig, ipupuyok itan ed saray sugat. Pakaskasi kipapasen na Israel kanian nepeg komon a sikatoy ‘manpatambal,’ balet ta agto labay. (Jer. 8:9)​—6/1-E, pahina 21-22.

• Anto so makatulong ed sakey a Kristiano pian nasarag to so impikalugoran na asawa to?

No tutumboken na samay matoor ya asawa iray prinsipyo na Biblia, anggapoy nepeg ton pakakonsiensiaan ed impikalugoran na asawa to. Amta nen Jehova a kaukolan moy ligliwa tan panamaseseg. Nayari to kan ligliwaen panamegley na saray agagi.​—6/15, pahina 30-31.

• Panon mon natulongan so sakey a mansasakit?

Dengel kan maong. (Ecl. 3:1, 7) Milikna tan ipanengneng so konsiderasyon. (Roma 12:15) Pabiskeg moy liknaan to tan tulong ka. (Col. 4:6; 1 Juan 3:18) Mansiansia kan maapit a kaaro. (Uli. 17:17)​—Hul-Set, pahina 10-13.

• Panon tayon amta ya anggapoy gapoan na Dios?

Impaimano iya nen Moises diad pikakasi to. (Sal. 90:2.) Manepeg labat sirin a natawag si Jehova ed nikabkabiig a titulon “Ari ed andi-anggaan.” (1 Tim. 1:17) ​—Hul-Set, pahina 28.

• Panon yon nipurek ed ananak yo so kablian na panagbasa tan panagaral?

Kaukolan ya ipanengneng yoy panangaro tan maong ya ehemplo pian nipurek ed ananak yoy kablian na panagbasa. Kaukolan met ya ikdan yo ra na libro ra. Basaan yo ra na maksil. Pibiangen ira tan pantongtongan yoy binasa yo. Pasesegen iran basaan tan tepetan da kayo.​—7/15, pahina 26.

• Akin et agtampol nila nen Jesus si Lazaro pian napaabig?

Sanen akasabi si Jesus, apat agew lan inatey si Lazaro. Lapud impanalagar nen Jesus, sikatoy lalon akapangiter na maabig a pantasi nipaakar ed Ama to. Kanian, dakel so anisia. (Juan 11:45)​—8/1-E, pahina 14-15.

• Anto iramay ‘atagey a paspasen’?

Kaslakan lan ontutukoy iraman ed saray kapukdolan odino arum nin pasen parad palson panagdayew. No maminsan, walaray ipapaalagey ditan ya altar, sagradon seklang odino poste, tan arum ni ran relihyoson dekorasyon pian gawaen iray kokondenaen na Dios. (Num. 33:52)​—8/1-E, pahina 23.