No Panon ya Intandoro nen Jesus so Inkatunong na Dios

“Si Kristo et intarya na Dios bilang apay parad pipupulangan diad panamegley na pananisia ed dala to. Ginawa iya na Dios ta pian ipanengneng toy inkatunong to.”​—ROMA 3:25.

1, 2. (a) Anto so ibabangat na Biblia nipaakar ed kipapasen na katooan? (b) Antoran tepet so naebatan ed sayan artikulo?

SAY salaysay na Biblia nipaakar ed impanrebelde diad hardin na Eden et kabkabat. Nalilikna tayon amin iray epekto na impankasalanan nen Adan. Oniay impangipaliwawa na Biblia ed satan: “Linmoob so kasalanan ed mundo lapud sakey a too tan say ipapatey lapud kasalanan, tan ompapatey so amin a totoo lapud nankasalanan iran amin.” (Roma 5:12) Anggan panon lay pamapasya tayon manggaway duga, siansia nin makakagawa itayoy lingo. Kanian, kaukolan tayoy panamerdona na Dios. Anggan si apostol Pablo et oniay inyey-ey to: “Say maong a labay ko et agko gagawaen, balet say mauges ya agko labay et gagawaen ko. Pakaskasi ak lan too!”​—Roma 7:19, 24.

² Lapud makasalanan itayon amin, makatunongan labat ya oniay nitepet tayo: Panon ya agawan ag-akatawir na kasalanan si Jesus a Nazareno, tan akin et nampabautismo? Panon ya intandoro na impanbilay nen Jesus so inkatunong nen Jehova? Nagkalalo ed amin, anto so agawaan na impatey nen Kristo?

Kinuestion so Inkatunong na Dios

3. Panon a pinalikdo nen Satanas si Eva?

³ Saray inmunan atateng tayon si Adan tan Eva et sililingon angipulisay ed pananguley na Dios tan nampasakop ed “daan ya uleg, samay tatawagen a Diablo tan Satanas.” (Apo. 12:9) Imanoen pa no panon iyan agawa. Kinuestion nen Satanas no kasin matunong so pananguley nen Jehova a Dios. Oniay intepet to ed si Eva: ‘Kasin inkuan na Dios ya agkayo mangan ed anggan anto a kiew na tanamanan?’ Imbaga nen Eva imay malinew a ganggan na Dios a walay sakey a kiew ya agda nayarin diwiten, ta no andi et ompatey ira. Diad saman et inakusaan nen Satanas a mantitila so Dios. “Agkayo ompatey,” so kuan na Diablo. Pinanisia toy Eva a walay maabig a bengatlan isisiblet na Dios. Tan no kanen kuno nen Eva so bunga na saman a kiew, sikatoy magmaliw a singa Dios, a naamtaan to so maong tan mauges.​—Gen. 3:1-5.

4. Panon a ginmapon inuleyan nen Satanas so katooan?

⁴ Sirin, papapawayen nen Satanas a mas maliket so too no agmanpasakop ed Dios. Imbes ya idepensa nen Adan so inkatunong na pananguley na Dios, dinengel toy asawa to tan angan met na isesebel a prutas. Kanian, abalang nen Adan so ayadyarin talindeg to ed si Jehova, tan inaripen itayo laingen na maruksan kasalanan tan ipapatey. Sakey ni, say katooan et ginmapon inuleyan nen Satanas, “say dios na sayan mundo.”​—2 Cor. 4:4, Maung a Balita; Roma 7:14.

5. (a) Panon ya asumpal so imbaga nen Jehova? (b) Anton ilalo so inter nen Jehova ed saray ilalak nen Adan tan Eva?

⁵ Talagan agaway imbaga nen Jehova, senentensiaan to na ipapatey si Adan tan Eva. (Gen. 3:16-19) Ingen ta agkabaliksan na satan ya sinmaew so gagala na Dios. Andin balot! Sanen senentensiaan nen Jehova si Adan tan Eva, inikdan toy ilalo so amin ya ilalaken da. Ginawa to itan diad impangipaamta ed gagala to ya mamawala na sakey ya “ilalak” odino bini a sugaten  nen Satanas ed mukor. Anggaman ontan, onabig so sugat na insipan a Bini tan ‘sugaten toy ulo nen Satanas.’ (Gen. 3:15) Tan lalon nilinew na Biblia iyan tema, oniay nibaga nipaakar ed si Jesu-Kristo: “Nisengeg ed saya et nipatnag so Anak na Dios, salanti, pian deralen to iray kimey na Diablo.” (1 Juan 3:8) Panon balet ya intandoro na kondukta tan impatey nen Jesus so inkatunong na Dios?

Say Kabaliksan na Bautismo nen Jesus

6. Panon tayon amta ya ag-akatawir si Jesus na kasalanan ed si Adan?

⁶ Sanen susto la’d edad si Jesus, sikatoy eksakton kasimbangan na samay datin perpekton too a si Adan. (Roma 5:14; 1 Cor. 15:45) Labay ya ibaga na satan ya inyanak si Jesus a perpekto. Panon itan ya agawa? Oniay malinew ya imbaga nen anghel Gabriel ed ina nen Jesus a si Maria: “Niwala ed sika so masanton espiritu, tan tarongan ka na pakayari na Sankatageyan. Lapud satan met, say nianak et natawag a masanto, Anak na Dios.” (Luc. 1:35) Sanen ugaw ni Jesus, maseguron impaamta ed sikato nen Maria iray pigaran detalye nipaakar ed inkianak to. Aminsan, sanen say kalangweran nin Jesus et nalmo di Maria tan Jose diad templo na Dios, oniay intepet to: “Agyo ta amta a nepeg a wala ak ed abung nen Amak?” (Luc. 2:49) Mapatnag ya manlapud inkaugaw et amta to lan sikatoy Anak na Dios. Talagan importante sirin ed sikato so pangitandoro ed inkatunong na Dios.

7. Antoray mablin kayamanan nen Jesus?

⁷ Malinew ya interesadon maong si Jesus ed saray espiritual a bengatla ta regular ton inatendian iray pantitipon parad panagdayew. Lapud ayadyari nonot to, seguradon atalosan to so amin a nadngel tan abasa to ed Hebreon Kasulatan. (Luc. 4:16) Wala ni sakey ya mablin kayamanan to​—say ayadyarin laman a nayarin ibagat parad katooan. Sanen abautismoan si Jesus, sikatoy nampikasi tan dinalepdep to imay propesiyan walad Salmo 40:6-8.​—Luc. 3:21; Basaen so Hebreos 10:5-10. *

8. Akin et aglabay nen Juan a Managbautismo a bautismoan si Jesus?

⁸ Nen unaan et aglabay nen Juan a Managbautismo a bautismoan si Jesus. Akin? Ta babautismoan nen Juan iray Judio bilang simbolo na panagbabawi ra’d impakasumlang ed Ganggan. Lapud maapit a sankanayon si Juan tan Jesus, amta nen Juan a matunong a too si Jesus, kanian agla kaukolan a magbabawi.  Pinaseguroan nen Jesus si Juan a Sikatoy matukoy ya bautismoan. Oniay inkuan to: “Ta manepeg a sumpalen ta so amin a matunong ed onian paraan.”​—Mat. 3:15.

9. Antoy isisimbolo na bautismo nen Jesus?

⁹ Lapud perpekton too si Jesus, seguradon amta to a singa si Adan et sarag toy nawalaan na perpekton ananak. Balet, agbalot pinilalek nen Jesus itan ta aliwan satan so linawa nen Jehova parad sikato. Imbaki na Dios si Jesus diad dalin pian magmaliw ya insipan a Bini odino Mesias. Tan kaukolan ton ibagat so ayadyarin bilay to bilang too. (Basaen so Isaias 53:5, 6, 12.) Siempre, duma imay bautismo nen Jesus ed bautismo tayo. Aliwa iman a dedikasyon ed si Jehova lapud kabiangan lay Jesus na dedikadon nasyon na Israel. Noagta, isisimbolo na bautismo nen Jesus so impangipresenta to ed inkasikato pian gawaen so linawa na Dios unong ya akasulat ed Biblia parad Mesias.

10. Antoray linawa na Dios a gawaen na Mesias, tan antoy panmoria nen Jesus ed saya?

¹⁰ Linawa nen Jehova ya ipulong nen Jesus so maong a balita na Panarian, manggawa na babangatan, tan iparaan iray disipulo to parad panaggaway babangatan. Sanen impresenta nen Jesus so inkasikato, lalanoren met na satan so mabulos a pansungdo to ed panamasegsegang tan ed maruksan ipapatey pian ipanengneng a susuportaan toy matunong ya pananguley nen Jehova a Dios. Ontan lay panangaro nen Jesus ed mangatatawen ya Ama to kanian nanliketan ton ginaway linawa na Dios tan mabulos ton impresentay laman to bilang bagat. (Juan 14:31) Panliketan to met ya naamtaan ya say balor na ayadyarin bilay to et nayarin iyapay ed Dios pian nadondon itayo ed panangaripen na kasalanan tan ipapatey. Sanen impresenta nen Jesus so inkasikato pian sakbaten irayan ambelat a responsabilidad, kasin inawat itan na Dios? On!

11. Panon ya impanengneng nen Jehova so panangabobon to ed si Jesus bilang insipan a Mesias, odino Kristo?

¹¹ Papaneknekan na amin ya apatiran managsulat na ebanghelyo a si Jehova a Dios et malinlinew ton imbalikas so panangabobon to ed si Jesus kayarin mismo na bautismo nen Jesus diad Ilog Jordan. “Anengneng koy espiritu ya onleleksab a singa sakey a malapati a nanlapud tawen,” kuan nen Juan a Managbautismo, “tan dinmapo itan ed [si Jesus] . . . Et anengneng ko itan, tan tinasian ko a sikato so Anak na Dios.” (Juan 1:32-34) Niarum ni, diad saman ya inkagawa et inyabawag nen Jehova: “Saya so Ana’ko, say inad-arok, ya inabobonan ko.”​—Mat. 3:17; Mar. 1:11; Luc. 3:22.

Matoor Anggad Patey

12. Kayari bautismo nen Jesus, anto so ginawa to ed loob na talora tan kapalduan taon?

¹² Diad loob na talora tan kapalduan taon, ginawa nen Jesus so anggaay nayarian ton ipulong ed totoo so nipaakar ed Ama to tan say matunong a pananguley To. Anggaman makapakesaw so inyakar to’d amin a parte na Insipan a Dalin, anggapoy akapatunda ed sikato ed sigpot ya pangipulong to ed katuaan. (Juan 4:6, 34; 18:37) Imbangat nen Jesus so nipaakar ed Panarian na Dios. Impanengneng to no anto so gawaen na Panarian parad katooan panamegley na mamilagron impanambal, impamakan ed narasan a totoo, tan anggan say impamaoli ed inaatey.​—Mat. 11:4, 5.

13. Antoy imbangat nen Jesus nipaakar ed pikakasi?

¹³ Imbes ya pairayew si Jesus lapud pambabangat tan panatambal to, sikatoy napanuliranan lapud mapaabeba ton inter so amin a dayew ed si Jehova. (Juan 5:19; 11:41-44) Imbangat met nen Jesus no antoray sankaimportantian ya ipikasi tayo. Kaukolan ya ipila ed pikakasi so kerew ya “napasanto komon” so ngaran na Dios a Jehova,  tan say kerew a salatan komon na matunong a pananguley To so marelmeng ya uley nen Satanas. Diad ontan et ‘nagawa so linawa To, a singa ed tawen, ontan met diad dalin.’ (Mat. 6:9, 10) Pinaseseg tayo met nen Jesus a manbilay unong ed saray ipipikasi tayo diad ‘pananap nin unona ed panarian tan ed inkatunong na Dios.’​—Mat. 6:33.

14. Anggaman perpekto si Jesus, akin et kaukolan ton pansagpotan a sumpalen so responsabilidad to?

¹⁴ Sanen asingger lay ipatey nen Jesus bilang bagat, sikatoy lalon nagogonigon lapud belat na responsabilidad to. Say gagala tan reputasyon na Ama to et akadepende ed pansungdo to’d agmakatunongan a bista tan maruksan ipapatey. Limay agew antis na ipatey to, impikasi to: “Natan et nagogonigon so kamarerwak, tan anto so ibagak? Ama, ilaban mo ak ed sayan oras. Balet, saya so makasengeg no akin a sinmabi ak ed sayan oras.” Kayari ton imbalikas iyan natural a nalilikna na sakey a too, agto la inisip so sarili to, say inimano to la et saray bengatlan mas importante, impikasi to: “Ama, igloriam so ngaran mo.” Tan tampol ya inmebat si Jehova: “Inggloriak itan tan igloriak lamet itan.” (Juan 12:27, 28) On, mabulos si Jesus a managmak na sankairapan lan subok ed katooran a nadalan na sakey a too. Balet sanen nadngel toy imbaga na mangatatawen ya Ama to, seguradon binmiskeg so linawa to a sarag ton itandoro tan iyalangon so inkasoberano nen Jehova. Tan peteg ya asarag to!

No Antoy Agawaan na Impatey nen Jesus

15. Antis na mismon impatey nen Jesus, akin et imbaga ton: “Asumpal la”?

¹⁵ Sanen manpapanabos lay Jesus diad panamairapan a kiew, inkuan to: “Asumpal la!” (Juan 19:30) Talagan makapadinayew iray agawaan nen Jesus diad tulong na Dios legan na talora tan kapalduan taon manlapud impanpabautismo anggad impatey to! Sanen inatey si Jesus, yinmegyeg na makmaksil, kanian samay opisyal na saray Romanon sundalo ya angidaulo’d impamatey et inkuan to: “Petepeteg a saya so Anak na Dios.” (Mat. 27:54) Anengneng na opisyal so impanmudmora ed si Jesus lapud imbaga ton sikatoy Anak na Dios. Anggaman agaylay impanirap nen Jesus, apansiansia toy katooran to tan pinaneknekan ton matilatila si Satanas. Onia so angat nen Satanas ed amin ya onsusuporta ed pananguley na Dios: “Amin a say too wala ed sikato iter to nipaakar ed bilay to.” (Job 2:4) Lapud katooran nen Jesus, impanengneng ton sarasarag komon di Adan tan Eva so manmatoor ta main-inomay so subok ed sikara. Nagkalalo ed amin, inggloria tan intandoro na impanbilay tan impatey nen Jesus so inkatunong na pananguley nen Jehova. (Basaen so Uliran 27:11.) Wala ta ni arum ya agawaan na impatey nen Jesus? On wala ni!

16, 17. (a) Akin et impasen nen Jehova a matunong iray lingkor to a nambilay antis a linma diad dalin si Jesus? (b) Panon a tinumangan nen Jehova so katooran na Anak to, tan anto ni itutultuloy a gagawaen nen Katawan a Jesu-Kristo?

¹⁶ Dakel ed saray lingkor nen Jehova so nambilay antis a linma diad dalin si Jesus. Impasen ira na Dios a matunong tan paolien to ra. (Isa. 25:8; Dan. 12:13) Balet, antoy legal a basiyan na masanton Dios, a si Jehova, pian pagamoran na marakdakep a bendisyon so makasalanan a totoo? Oniay impaliwawa na Biblia: “Si Kristo et intarya na Dios bilang apay parad pipupulangan diad panamegley na pananisia ed dala to. Ginawa iya na Dios ta pian ipanengneng toy inkatunong to diad impamerdona to ed saray kasalanan ya agawa ed apalabas legan a sikatoy mantetepel; ta pian ipanengneng to met so inkatunong to diad sayan peles a panaon, sano  iyaabawag ton matunong so toon walaay pananisia ed si Jesus.”​—Roma 3:25, 26. *

¹⁷ Tinumangan nen Jehova si Jesus diad impamaoli tan impangiter ed sikato na mas atagey nin posisyon nen say antis na inyakar to diad dalin. Si Jesus natan et imortal la, sikatoy sakey a maglorian espiritun pinalsa. (Heb. 1:3) Bilang Atagey a Saserdote tan Ari, itutultuloy a tutulongan na Katawan a Jesu-Kristo iray papatumbok to pian nitandoro da met so inkatunong na Dios. Tan agaylay pisasalamat tayo ta say Ama tayon walad tawen, si Jehova, so Mananumang ed amin a mangitatandoro tan matoor a manlilingkor ed sikato bilang panutumbok ed Anak to!​—Basaen so Salmo 34:3; Hebreos 11:6.

18. Anto so pantongtongan tayo ed onsublay ya artikulo?

¹⁸ Saray matoor a totoo manlapu la’d si Abel et awalaan na maapit a relasyon ed si Jehova lapud pananisia tan panagmatalek da ed insipan a Bini. Amta nen Jehova a sigpot a manmatoor so Anak To tan say ipatey to et mangitarya na ayadyarin sakbong ed “kasalanan na mundo.” (Juan 1:29) Say impatey nen Jesus et pakagunggonaan met na saray totoo natan. (Roma 3:26) Kanian, antoran bendisyon so ipagamor ed sika na dondon bagat nen Kristo? Satan so pantongtongan tayo ed onsublay ya artikulo.

[Saray paimano ed leksab]

Antoy Ebat Mo?

• Panon a kinuestion so inkatunong na Dios?

• Anto so isisimbolo na bautismo nen Jesus?

• Anto so agawaan na impatey nen Jesus?

[Tepetepet Parad Panagaral]

[Litrato ed pahina 9]

Antam kasi no antoy insimbolo na bautismo nen Jesus?