Tepetepet na Saray Manbabasa

Akin et sarag la nen Jesus ya ibaga ed samay biin kabkabat a managkasalanan ya aperdona la iray kasalanan to?​—Luc. 7:37, 48.

Legan ya akarungo si Jesus ed pananganan diad abung na sakey a Fariseon manngaran na Simon, walay sakey a bii ya “linma ed benegan, diad salian nen Jesus.” Sikatoy “nanakis tan binasa to na lua to iray sali nen Jesus tan pinunasan to iratan na buek to.” Insan to inangoban tan pinuyokan na ambalingit a larak so sali nen Jesus. Saman a bii et “kabkabat ed syudad bilang managkasalanan,” kuan na salaysay na Ebanghelyo. Siempre, amin ya agperpekton too et makasalanan. Balet, sayan termino et kaslakan lan uusaren na Kasulatan pian ideskribe so toon balitado odino kabkabat a makasalanan. Mapatnag a saman a bii et paabang. Tan diad ontan a totoo so pangibabagaan nen Jesus na, “Aperdona la iray kasalanan mo.” (Luc. 7:36-38, 48) Antoy labay ya ibaga nen Jesus? Panon ton makaperdona, anta agni inyapay ed saman so dondon bagat?

Kayarin binasa tan pinuyokan na bii so sali nen Jesus, angisalaysay ni si Jesus na ilustrasyon antis ton pinerdona so bii pian ipaliwaway importantin punto ed si Simon ya anangkaili ed sikato. Inyaliling nen Jesus so kasalanan ed balbaleg ya utang ya agnasarag a bayaran, oniay inkuan to’d Simon: “Walay duaran laki ya akautang ed sakey a managpabayes. Samay sakey et akautang na limanlasus a denario, balet samay sakey et limamplo. Sanen anggapon balot so nibayar dan dua, mabulos to iran pinerdona. Siopa sirin ed sikara so mas mangaro ed sikato?” Inmebat si Simon: “Say nibagak et samay pinerdona to a mas baleg so utang to.” Et inkuan to ed sikato: “Dugay ebat mo.” (Luc. 7:41-43) Say katutulok et utang tayon amin ed Dios, kanian sano sikatoy agtayo tuloken tan mankasalanan, agtayo nababayaran so kanepegan to. Sirin et ombabaleg so utang tayo. Balet, si Jehova et singa sakey a managpabayes a mabulos ya agla manpabayar. Kanian pinaseseg nen Jesus iray papatumbok to a manpikasi tan kerewen ed Dios: “Perdonam iray utang mi, no panon a pinerdona mi met iray akautang ed sikami.” (Mat. 6:12) Sarayan utang et tinukoy na Lucas 11:4 bilang kasalanan.

Panon a pinerdona na Dios iray kasalanan nensaman? Kakaukolanen na ayadyarin hustisya to so dusa na kasalanan, say patey. Kanian, say bayar na kasalanan nen Adan et say bilay to. Balet, diad Ganggan ya inter na Dios ed nasyon na Israel, naperdona so kalilingoan na sakey no mangibagat na ayep ed si Jehova. Inkuan nen apostol Pablo: “Diad Ganggan, amin lawarin bengatla et nalilinisan ed panamegley na dala, tan no anggapo so niibung a dala, agnaperdona iray kasalanan.” (Heb. 9:22) Satan so alenleneg a paraan ya amta na saray Judio pian nagamoray panamerdona na Dios. Kampegan agmipakna iramay akadngel ed imbaga nen Jesus ed bii. Oniay inkuan na saramay karungo nen Jesus: “Siopa iyan too ta anggan saray kasalanan et peperdonaen to?” (Luc. 7:49) Kanian, antoy basiyan pian naperdona iray kasalanan na saman a bii?

Samay sankaunaan ya imbalikas a propesiya kayari impanrebelde di Adan tan Eva et nipaakar ed gagala nen Jehova a mamawala na “ilalak” a sugaten ed mukor nen Satanas tan saray “ilalak” to. (Gen. 3:15) Agawa iya sanen si Jesus et pinatey na saray mamubusol ed Dios. (Gal. 3:13, 16) Say niyibung a dala nen Kristo et kinmanan dondon a mangibulos ed katooan diad kasalanan tan patey. Anggapoy makapatunda’d panumpal nen Jehova ed gagala to kanian sanen imbalikas to imay akarekord ed Genesis 3:15, diad panmoria to et abayaran la so dondon. Sarag to la sirin a perdonaen iramay walaan na pananisia ed sipasipan to.

Antis na impanbilay na saray Kristiano, dakel la ray impasen nen Jehova a matunong ya totoo.  Kaiba’d saratan si Enoc, Noe, Abraham, Rahab, tan Job. Papanisiaan tan iilaloan na saraya so kasumpalan na sipasipan na Dios. Oniay insulat nen disipulo a Santiago: “Si Abraham et anisia ed si Jehova, tan sikatoy impasen a matunong lapud satan.” Onia ni inkuan nen Santiago nipaakar ed Rahab: “Diad ontan met a paraan, agta niyabawag met a matunong si Rahab a balangkantis lapud saray gawa?”​—Sant. 2:21-25.

Si David, ya ari na Israel nensaman, et aminpigan akagawa na seryoson kasalanan. Balet, mabiskeg so pananisia to ed tuan Dios tan angipatnag na peteg a panagbabawi. Niarum ni, inkuan na Kasulatan: “Si Kristo et intarya na Dios bilang apay parad pipupulangan diad panamegley na pananisia ed dala to. Ginawa iya na Dios ta pian ipanengneng toy inkatunong to diad impamerdona to ed saray kasalanan ya agawa ed apalabas legan a sikatoy mantetepel; ta pian ipanengneng to met so inkatunong to diad sayan peles a panaon, sano iyaabawag ton matunong so toon walaay pananisia ed si Jesus.” (Roma 3:25, 26) Base ed dondon bagat nen Jesus ya itarya ni labat, sarag la nen Jehova a perdonaen iray kasalanan nen David ingen ta ag-ikompromiso so mismon kakaukolanen To parad hustisya.

Mapatnag ya mipadpara’d satan so situasyon na samay biin amuyok na larak ed sali nen Jesus. Tua, imoral so panagbilay to balet ta sikatoy nagbabawi. Binidbir to a kaukolay karondon ed saray kasalanan to tan napatnagan ed kiwas to ya talagan aapresyaen toy toon intarya nen Jehova a panondon. Anggaman dia ni’d arapen so pangitarya ed bagat, segseguradon nagawa itan, sirin et sarag lan nausar so balor na bagat ed saray totoo a singa samay bii. Kanian, inkuan nen Jesus ed sikato: “Aperdona la iray kasalanan mo.”

Malinlinew ya ipapanengneng na sayan salaysay ya ag-aarawian nen Jesus iray makasalanan. Sikatoy nanggawa na maabig ed sikara. Niarum ni, mabulos si Jehova a mamerdona ed saray magbabawi’d kasalanan da. Talagan makapalikliket tan makapaseseg itan a panamaseguro parad sikatayo ran aliwan perpekto!

[Litrato ed pahina 7]

Impasen iran matunong