Igogloria na Pankakasakey na Saray Kristiano so Dios

‘Gawa yoy anggaay nayarian yon pansiansiaen so pankakasakey ed espiritu.’​—EFE. 4:3.

1. Panon ya inggloria na saray inmunan siglon Kristiano ed Efeso so Dios?

INGGLORIA na pankakasakey na Kristianon kongregasyon ed Efeso nensaman so tuan Dios a Jehova. Diad saman a maaligwas a sentro na komersyo, mapatnag ya arum ed saray agagi et mayayaman ya amo, saray arum balet et aripen tan nayarin agaylay irap na bilay da. (Efe. 6:5, 9) Saray arum et Judio ya akaamta ed katuaan legan na taloy bulan ya impanpaliwawa nen apostol Pablo ed sinagoga ra. Dati et mandadayew so arum ed si Artemis tan manmamahiko. (Gawa 19:8, 19, 26) Malinew, apantitipon na tuan Inkakristiano so totoo a nandurumay binalegan da. Amta nen Pablo ya nigloria si Jehova panamegley na pankakasakey na kongregasyon. Insulat to: “Sikato so nepeg a nigloria ed andi-anggaan diad panamegley na kongregasyon.”​—Efe. 3:21.

2. Antoy mamepeligro ed pankakasakey na saray Kristiano ed Efeso?

² Balet, apeligro so maliket a pankakasakey na kongregasyon ed Efeso. Oniay impasakbay nen Pablo ed saray mamatatken diman: “Diad limog yo et walaray lalakin ontalindeg tan mansalita na pikewet iran bengatla pian tangguyoren iray disipulo ya ontumbok ed sikara.” (Gawa 20:30) Ontan met, walaray agagin agda ni nakal iray ugalin makaderal ed pankakasakey, ya impasakbay nen Pablo ya “ipapatnag . . . na saray agmatulok.”​—Efe. 2:2; 4:22.

 Sulat a Mangidadanet ed Pankakasakey

3, 4. Panon ya idadanet na sulat nen Pablo ed saray taga Efeso so pankakasakey?

³ Amta nen Pablo a pian lawas makapantutunosan iray Kristiano, kaukolan a pansagpotan na amin a paeleten so pankakasakey. Pinuyanan na Dios si Pablo a sulatan iray taga Efeso, tan say tema to et pankakasakey. Singa bilang, insulat to so nipaakar ed gagala na Dios a “tiponen lamet so amin a bengatla diad Kristo.” (Efe. 1:10) Inyaliling to met iray Kristiano ed nanduruman bato ya inusar ed sakey a paalagey. “Say interon paalagey so niletneg pian magmaliw a masanton templo parad si Jehova.” (Efe. 2:20, 21) Niarum ni, impabitar nen Pablo so pankakasakey na saray Judio tan Gentil a Kristiano tan impanonot to met ed saray agagi a saksakey so amalsa ed sikara. Tinawag to si Jehova ya “Ama, a sikatoy angiter ed ngaran na balang pamilya ed tawen tan diad dalin.”​—Efe. 3:5, 6, 14, 15.

⁴ Legan tayon uusisaen so Efeso kapitulo 4, nanengneng tayo no akin a kaukolay pansagpot pian mankakasakey, no panon ya ontutulong si Jehova pian mankakasakey itayo, tan antoran ug-ugali so ontulong pian mansiansia itayon nankakasakey. Akin ta no basaen mo ni itan ya interon kapitulo pian lalo kan nagunggonaan ed sayan artikulo?

No Akin a Kaukolay Masimoon a Pansagpot Pian Mankakasakey

5. Akin et akapankakasakey iray anghel na Dios a manlingkor, balet akin a nayarin mairap itan ed sikatayo?

⁵ Binilin nen Pablo iray agagi ed Efeso a ‘gawaen day anggaay nayarian dan pansiansiaen so pankakasakey ed espiritu.’ (Efe. 4:3) Pian natalosan no akin a kaukolay pansagpot, imanoen pa iray anghel na Dios. Anggapo so mabilay a pinalsa ed dalin a sigpot a nampadpara, kanian makatunongan labat ya ipasen ya ontan met so impamalsa nen Jehova ed minilyon ya angheles. (Dan. 7:10) Anggaman nandurumay kualidad na saray matoor ya anghel, makapankakasakey iran manseserbi ed si Jehova lapud dedengelen tan gagawaen day linawa to. (Basaen so Salmo 103:20, 21.) Balet no nipaakar ed saray Kristiano, nandurumay kakapuyan da, kanian mairap da laingey mankakasakey.

6. Antoran ug-ugali so makatulong pian makapikoopera itayo ed agagin dumay kakapuyan da ed sikatayo?

⁶ Anggaman determinado iray agperpekton totoo a mitulongan, walan wala ray pakasubokan da. Alimbawa, panon to no say sakey ya agin mauyamo a lanang a naaatrasado et mikimeyan ed agin masakbay ya onsasabi ingen ta misasanok? Nayarin walay nabalaw da’d balang sakey, balet ompan agda naimano so dilin kakapuyan da. Panon iran mankimey a makapantunosan? Diad saray sinmublay ya imbaga nen Pablo, imanoen no panon a makatulong iray ug-ugalin impaseseg to. Insan nonoten no panon tayon napaelet so pankakasakey  diad pamayubo ed saratan ya ug-ugali. Insulat to: “Mikakasi [ak] ed sikayo ya onkiwas kayo komon a manepeg . . . a walaan kayo komon a naynay na kapaabebaan na nonot tan inkaulimek, andukey a panag-anos, ya itepel yoy balang sakey diad aro, a gawaen yoy anggaay nayarian yo pian napansiansia yo so pankakasakey ed espiritu diad bedber na kareenan.”​—Efe. 4:1-3.

7. Akin et importantin pansagpotan tayo so pikareenan ed arum nin agperpekto a Kristiano?

⁷ Importantin aralen na saray manlilingkor ed Dios so pikareenan ed arum nin agperpekto a totoo lapud saksakey so “laman” da. “Walay sakey a laman, tan sakey ya espiritu, unong a walay saksakey ya ilalo ya anawagan ed sikayo; sakey a Katawan, sakey a pananisia, sakey a bautismo; sakey a Dios tan Ama na amin.” (Efe. 4:4-6) Say espiritu tan saray bendisyon nen Jehova et ipapagamor to’d saksakey ya organisasyon ya uusaren to. No bilang ta apasyodot itayo na sakey ya agi, iner ni laen tayo? Anggapo lay arum a pakarengelan tayo ray salita a mangitonton ed andi-anggaan a bilay.​—Juan 6:68.

Papaeleten na “Langkap a Lalaki” so Pankakasakey

8. Antoy inter nen Kristo pian nalabanan iray makabuyak ed pankakasakey tayo?

⁸ Inusar nen Pablo so kaslakan a gagawaen na saray sundalo nensaman pian iyilustra no panon ya intarya nen Jesus “iray langkap a lalaki” pian mankasakey so kongregasyon. Say sundalon analo’d panlalaban et nayarin mangisempet na adakep, tan gawaen ton aripen ed abung pian katulongan na asawa to. (Sal. 68:1, 12, 18) Mipadpara, sanen tinalo nen Jesus so mundo, sikatoy akapangitarya na dakel a mabulos ya aripen. (Basaen so Efeso 4:7, 8.) Antoy ginawa to ed saray adakep to? “Inter toy arum bilang apostoles, say arum bilang propeta, say arum bilang ebanghelisador, say arum bilang managpastol tan managbangat, ta pian nipetek da iray masanto, pian gawaen day kimey a panaglingkor, pian pabiskegen day laman na Kristo, anggad nadampot tayon amin so pankakasakey ed pananisia.”​—Efe. 4:11-13.

9. (a) Panon ya ontutulong “iray langkap a lalaki” pian napansiansia so pankakasakey tayo? (b) Akin et nepeg ya mitulongan so balang membro na kongregasyon ed pankakasakey tayo?

⁹ Sarayan “langkap a lalaki,” odino maaron pastol, et ontutulong pian napansiansiay pankakasakey. Singa bilang, no naimano na sakey ya elder so duaran agi a ‘mangilalagyat na panlalaslasan,’ baleg so nitulong to ed pankakasakey na kongregasyon diad panimbawa to ed sikara ‘pian nipetek ira tekep na inkaulimek.’ (Gal. 5:26–6:1) Bilang managbangat, sarayan “langkap a lalaki” et ontutulong pian napabiskeg  so pananisia tayo base ed saray bangat na Biblia. Sirin et pankakasakeyen tan tutulongan da tayon ontatken ed espiritual. Insulat nen Pablo ya intarya iya “pian ag-itayo la magmaliw ya ugugaw, a singa iyaanor-anor na saray daluyon tan ipapalirpalir na amin a dagem na bangabangat diad panamegley na kasiliban na totoo, diad panamegley na katilaan a pinawala tekep na panagpalikdo.” (Efe. 4:13, 14) Nepeg ya mitulongan so balang Kristiano ed pankakasakey tayon sanaagi, a singa saray kabiangan na laman a mantutulongan pian iter so nakaukolan.​—Basaen so Efeso 4:15, 16.

Bayuboay “Balon Personalidad”

10. Panon a sarag a deralen na imoral iran kagagawa so pankakasakey tayo?

¹⁰ Kasin naimanom a diad kapitulo kuatro na sulat nen Pablo ed Efeso et nilinew ton say panangaro so paraan pian nawalaan itayo na pankakasakey bilang maespiritual a Kristianos? Insan impaliwawa to no antoy lalanoren na panangaro. Alimbawa, ipupulisay na panangaro so pilalawanan tan anggapoy-baing a kagagawa. Pinaseseg nen Pablo iray kaagian to ya ‘agla ra manbibilay a singa ed saray nasyon.’ Ta saray totoo ed nasyon et “agla ran balot makakalikna na kababaingan,” tan “inlebleb day inkasikara ed anggapoy-baing a kagagawa.” (Efe. 4:17-19) Napepeligro so pankakasakey tayo lapud sayan imoral a mundon panaayaman tayo. Say pilalawanan et ilulurey, kakansionen, labalabay ya bantayan, tan maamot o parungtalan a gagawaen. Balet anggan say pikakarinyoan, a singano walay panggustom ed sakey balet ta agmo met lanlamang piasawaan o asawaen, et niyarawi to ka ed si Jehova tan ed kongregasyon. Akin? Lapud main-inomay itan a mansumpal ed pilalawanan. Sakey ni, say pikakarinyoan na walaay asawa a manresulta ed pikakalugoran et nayarin mamuyak ed pamilya. Talagan makaderal na pankakasakey! Agla pankelawan ya insulat nen Pablo: “Aliwan ontan so naaralan yo nipaakar ed Kristo”!​—Efe. 4:20, 21.

11. Antoy ipapaseseg na Biblia ya umanen na saray Kristiano?

¹¹ Indanet nen Pablo ya nepeg tayon ekalen iray makapuy a panagnonot. Imbes et bayuboan iray ugalin ontulong pian makapitunosan ed arum. Inkuan to: “Nepeg yon lakseben so daan a personalidad a mitunosan ed datin kabibilay yo, a nadederal lapud mapalikdo iran pilalek na satan [daan a personalidad]; . . . itultuloy yon pasimbaloen so puersa a mamapakiwas ed kanonotan yo, tan nepeg yon isulong so balon personalidad ya apalsa unong ed linawa na Dios tan mitunosan ed saray kakaukolanen na tuan inkatunong tan katooran.” (Efe. 4:22-24) Panon a ‘napasimbalo so puersa a mamapakiwas ed kanonotan tayo’? No maapresya tayon dalepdepen iray naaralan tayo’d Salita na Dios tan ed saray maabig ya ehemplo na maespiritual iran Kristiano, tekep na pansagpot et nabayuboan tayo so balon personalidad ya “apalsa unong ed linawa na Dios.”

Pasimbaloey Pananalita

12. Panon a paeleten na pangibagay tua so pankakasakey, tan akin a naiirapan so arum a magmaliw a matua?

¹² Importante so pangibaga na tua diad pamilya tan kongregasyon. Say prangka, matua, tan maabig a pananalita so ontulong pian napaapit ed balang sakey. (Juan 15:15) Balet panon to no tilaan na sakey so agi to? No naamtaan itan na agi to, nayarin naekal so talek to’d sikato. Kanian, natalosan mo no akin ya insulat nen Pablo: “Mansalita na katuaan ed kapara [yon] too, lapud kabiangan itayo na sakey a laman.” (Efe. 4:25) No say sakey et apasalan toy  mantila manlapu la nen ugaw, ompan mairap ton gapoay magmaliw a matua. Balet ta apresyaen nen Jehova so sagpot ton manguman tan sikatoy tulongan to.

13. Panon tayon naekal so ansakit a pananalita?

¹³ Ibabangat itayo nen Jehova a manrerespetoan tan mankakasakey diad kongregasyon tan pamilya panamegley na istrikton pangontrol ed dila tayo. “Ag-ompaway komon ed sangi yo so abulok a salita . . . Naekal komon ed sikayo so amin a paneem-em na sakit na linawa tan pasnok tan sanok tan paneeyagan tan makapasakit a salita pati say amin a kaugsan.” (Efe. 4:29, 31) Say sakey a paraan pian agmakaopende so pananalita tayo et diad pamayubo na mas marespeton pidedeneng ed arum. Singa bilang, say lakin ansasakit so panagsalita to ed akulaw to et nepeg ton panggunaetan ya umaney pidedeneng to ed sikato, lalo la lapud naaaralan to a papagalangan nen Jehova so bibii. Nilanaan na Dios ni ingen na masanton espiritu so arum a bibii, kanian walay ilalo ran manuley bilang arari a kaiba nen Kristo. (Gal. 3:28; 1 Ped. 3:7) Ontan met, no say sakey a bii et eeyag-eyagan toy masiken to, kaukolan toy manguman, lalo la lapud mitunosan itan ed naaaralan to a pinokpokan nen Jesus so inkasikato sanen pasasanoken.​—1 Ped. 2:21-23.

14. Akin a mapeligro so pangibesngaw na sanok?

¹⁴ Say ansakit a pananalita et baleg so pikonektaan to ed agnakontrol a sanok. Nabuyak met na saya so ulopan. Say sanok et singa apoy. Mainomay itan ya ombaleg tan aliwliway pansumpalan. (Uli. 29:22) Anggaman makatunongan labat ya ibalikas so impakadismaya, kaukolan a kontrolen so “petang na ulo” pian agnaderal so maabig ya ulopan. Nepeg a pansagpotan na saray Kristiano so pagmaliw a manamerdona, agmanem-em na sakit na linawa, tan agla ‘itongtongtong imay agawa.’ (Sal. 37:8; 103:8, 9; Uli. 17:9, NW) Oniay insimbawa nen Pablo ed Efeso: “Onsanok kayo, ingen ta agkayo mankakasalanan; agkomon onselek so agew a wala ni pasnok yo, tan agyo met iikdan na pankanawnawa so Diablo.” (Efe. 4:26, 27) No agnakontrol na sakey so sanok to, iikdan to na pankanawnawa so Diablo a buyaken tan pankokolkolen ni ingen iray mankakakongregasyon.

15. Antoy epekto no alaen tayoy agtayo kayarian?

¹⁵ Say panrespeto ed kaykayarian na arum et mamaelet ed pankakasakey na kongregasyon. Oniay nabasa tayo: ‘Say matakew et agla komon mantakew.’ (Efe. 4:28) Saray totoo nen Jehova et walay talek da ed balang sakey. Kanian no alaen na agi so agto kayarian, dederalen to so maliket a pankakasakey.

Pankakasakeyen Itayo na Panangaro ed Dios

16. Panon a makatulong so makapabiskeg a pananalita pian napaelet so pankakasakey tayo?

¹⁶ Lapud panangaro ed Dios, maaron tratratoen na amin ya agagi so balang sakey, kanian walay pankakasakey na kongregasyon. Say apresasyon tayo’d kaabigan nen Jehova so mamakiwas ed sikatayon masimoon a mansagpot ya iyaplika iyan simbawa: “Salitaen yo so antokaman a maabig pian napabiskeg so arum unong a nakaukolan, ta pian nagunggonaan iray ondedengel ed satan. . . . Ipanengneng yoy kaabigan ed balang sakey, magmaliw kayon maabagey, a mabulos kayon manpeperdonaan no panon a sikayoy mabulos met a pinerdona na Dios diad panamegley nen Kristo.” (Efe. 4:29, 32) Maaron peperdonaen nen Jehova iray aliwan perpekton totoo a singa sikatayo. Agta nepeg labat a perdonaen tayo met so kalilingoan na arum?

17. Akin a nepeg tayon masimoon a panggunaetan a paeletey pankakasakey?

¹⁷ On, nigogloria si Jehova lapud pankakasakey na totoo to. Papakiwasen tayo na espiritu to diad nanduruman paraan pian napaelet so pankakasakey. Seguradon agtayo labay ya ipulisay so panangiwanwan na espiritu. Insulat nen Pablo: “Agyo papaermenen so masanton espiritu na Dios.” (Efe. 4:30) Say pankakasakey et kayamanan a nepeg a salimbengan. Maliket so amin ya walaan na ontan a pankakasakey, tan nigloria si Jehova. “Kanian, alig yo so Dios, bilang inad-aro ton ananak, tan mantultuloy kayon mankurang ed aro.”​—Efe. 5:1, 2.

Antoy Ebat Mo?

• Antoran ug-ugali so mamapaelet ed pankakasakey na saray Kristiano?

• Panon a naderal na imoral a kagagawa so pankakasakey tayo?

• Panon ya ontulong so pananalita tayo pian makapantutunosan?

[Tepetepet Parad Panagaral]

[Litrato ed pahina 17]

Anggaman nandurumay nanlapuan da, nankakasakey ira

[Litrato ed pahina 18]

Natatalosan mo kasi a mapeligro so pikakarinyoan?