Masimoon ya Anapey Panamendisyon nen Jehova

“Tumangan [na Dios] iramay masimoon a manaanap ed sikato.”​—HEB. 11:6.

1, 2. (a) Antoy gagawaen na dakel a totoo pian naawat day panamendisyon na Dios? (b) Akin a nagkalalo lan interesado itayon naawat so panamendisyon nen Jehova?

“BLESS you!” Anganko et narerengel mon ibabaga iya na totoo sano walay ombasis. Wala ray papari a bebendisyonan da ray totoo, ayayep, tan arum ni ran bengatla. Tan wala ray turistan nasasagyat ya onla’d lugar ya ipapasen a sagrado pian nabendisyonan. Lanang a kekerewen na saray politiko a bendisyonan komon na Dios so bansa ra. Diad padesir mo, duga kasi iratan a kerew? Dengelen kasi iratan na Dios? Siopan talagay bendisyonan na Dios, tan akin?

² Impasakbay nen Jehova a diad kaunoran iran agew et walay malinis tan mareen a totoo to manlapud amin a nasyon. Ipulong da so maong a balita na Panarian anggad kasampotan na dalin anggaman bubusolen tan susumpaen ira. (Isa. 2:2-4; Mat. 24:14; Apo. 7:9, 14) Sikatayo ran angawat ed responsabilidad a magmaliw a kabiangan na totoo na Dios et labay tan kaukolan tayo so panamendisyon To. Ta no anggapo itan, ag-itayon balot ontalona. (Sal. 127:1) Balet, panon tayon naawat so panamendisyon na Dios?

Seguradon Nabendisyonan Iray Matulok

3. No tinmulok labat iray Israelita, anto komoy nansumpalan?

³ Basaen so Uliran 10:6, 7. Antis a tuloy na inloob na saray Israelita diad Insipan a Dalin, impaseguro nen Jehova a sigpot ya oninaway bilay da tan nasalimbengan ira no ontulok ira’d sikato. (Deu. 28:1, 2) On, segseguradon bendisyonan nen Jehova iray matulok.

4. Anto so tuan katutulok?

 ⁴ Anton klase na katutulok so kakaukolanen ed saray Israelita? Inkuan na Ganggan na Dios a no agmanlingkor iray totoo to “ed liket tan liga na puso,” sikatoy napaermen. (Basaen so Deuteronomio 28:45-47.) Agkanepegan nen Jehova so paspasaray a katutulok ed saray espisipikon ganggan to, ta anggan saray ayayep tan demonyo et sarag da ’tan a gawaen. (Mar. 1:27; Sant. 3:3) Say tuan katutulok ed Dios et balikas na panangaro. No say sakey et nanlapud pusoy katutulok to, sikatoy maliket ta papanisiaan ton saray ganggan nen Jehova et aliwan makapabelat tan “tumangan [nen Jehova] iramay masimoon a manaanap ed sikato.”​—Heb. 11:6; 1 Juan 5:3.

5. Panon ya ontulong so panagmatalek ed sipan nen Jehova pian natumbok so ganggan ed Deuteronomio 15:7, 8?

⁵ Imanoen tayo pa no panon a napatnagan so ontan a katutulok sano uunoren so ganggan a walad Deuteronomio 15:7, 8. (Basaen.) Say itumbok ed sayan ganggan, ingen ta napipilitan, et nayarin samet a pakainawaan na saray mairap-bilay. Balet, kasin napaelet na satan so ulopan tan aroan na totoo na Dios? Nagkalalo ed amin, nipanengneng kasi na satan so panagmatalek ed pakayari nen Jehova a taryaan iray lingkor to? Nipanengneng met kasi na satan ya naaapresya’y pankanawnawan aligen so inkamabunlok to? Seguradon andi! Naiimano nen Jehova so puso na saray tuan mabunlok a totoo tan insipan ton bendisyonan to so amin a kimey da. (Deu. 15:10) Say panmatalek ed satan a sipan so mamakiwas ed sakey, tan manresulta ed dakel a bendisyon.​—Uli. 28:20.

6. Antoy ipapaseguro ed sikatayo na Hebreos 11:6?

⁶ Nilikud ni’d panmamatalek ed si Jehova bilang Mananumang, ipapabitar na Hebreos 11:6 so sananey nin kualidad a kaukolan pian bendisyonan to itayo. Imanoen a tutumangan nen Jehova iray “masimoon a manaanap ed sikato.” Diad orihinal a lenguahe, say salitan inusar ed saya et mankabaliksan na impasyan sagpot tan pangiteen ed imano. Kanian no mansagpot itayo, segseguradoy panamendisyon to. Talagan makapaseseg itan a sipan! Say makapangiter ed satan et say alenleneg a tuan Dios “ya agmantila.” (Tito 1:2, Maung a Balita) Apaneknekan la’d dakerakel a taon a talagan totooren to ray sipan to. Agbalot onsasaew iray imbaga to; lawas iratan a nasusumpal. (Isa. 55:11) Kanian no peteg a manmamatalek itayo ed sikato, andi-duaruwan tumangan to itayo.

7. Panon itayon nabendisyonan panamegley na “bini” nen Abraham?

⁷ Si Jesu-Kristo so manunan kabiangan na “bini” nen Abraham. Saray alanaan a Kristiano et onkokomaduan kabiangan na satan ya impasakbay a “bini.” Sikaray ingganggan pian “iyabawag . . . ed amin a pasen iray alay abig a kualidad na samay anawag ed [sikara] manlapud kabilungetan tan angawat ed [sikara] ed makapakelaw a liwawa to.” (Gal. 3:7-9, 14, 16, 26-29; 1 Ped. 2:9) Agtayo nawalaan na maabig a relasyon ed si Jehova no agtayo dengelen iray tinuro nen Jesus a mangasikaso ed kaykayarian to. Tan no anggapoy tulong na “matoor tan makabat ya aripen,” agtayo sigpot a natalosan so nababasa tayo ed Salita na Dios, nisay niyaplika iratan. (Mat. 24:45-47) Tandaan, no iyaaplika tayo iray nanaaralan tayo’d Kasulatan, seguradon bendisyonan itayo na Dios.

Iyapasakey so Nonot ed Linawa na Dios

8, 9. Panoy impansagpot nen Jacob pian nagamoray kerew to?

⁸ No nipaakar ed pansagpot a maong pian naawat so panamendisyon na Dios, nayarin nanonotan tayo si Jacob. Agto amta no panon a nasumpal so sipan na Dios ed si Abraham, balet ta panisiaan ton parakelen a maong nen Jehova so ilalak na laki to. Tan magmaliw a baleg a nasyon so kapolian nen Abraham. Kanian, nen 1781 B.C.E., linma si Jacob ed Haran pian mananap na asawaen. Say labay ton naasawa et aliwa labat lan sakey a maong a kaiba, noagta maespiritual a lingkor nen Jehova tan magmaliw a maasikason ina ed ananak to.

⁹ Akabat nen Jacob so kanayon ton si Raquel.  Naad-aro toy Raquel tan akipakna a mankimey ed ama nen Raquel a si Laban, diad loob na pitoy taon pian naasawa to. Aliwa itan a basta romantikon istoryan agnalingwanan. Seguradon amta nen Jacob so sipan na Makapanyarin-amin a Dios ed si laki ton Abraham tan ed ama ton si Isaac. (Gen. 18:18; 22:17, 18; 26:3-5, 24, 25) Insan, inkuan nen Isaac ed ilalak ton si Jacob: “Bendisyonan komon na Dios a Makapanyarin-amin so pangasawam tan ikdan to ka komoy amayamay ya anak, pian magmaliw kan ama na amayamay a bansa. Bendisyonan to ka komon tan saray kabiangay boleg mo, a singa samay impamendisyon to’d kinen Abraham, tan nakayarian mo komon yan dalin a panaayaman mo tan sikatoy dalin ya inter na Dios ed kinen Abraham!” (Gen. 28:3, 4, MB) Say impansagpot sirin nen Jacob a makapananap na dugan naasawa tan makapanpamilya so mangipapatnag a panmamatalkan toy imbaga nen Jehova.

10. Akin et benendisyonan nen Jehova si Jacob?

¹⁰ Say sankanonot nen Jacob et say sipan nen Jehova ed kapolian to, aliwan say kayamanan a manlegpet ed pamilya to. Say angiyapasakeyan toy imano to et say pakasumpal na linawa nen Jehova. Determinado si Jacob a gawaey anggaay nayarian to pian naawat so bendisyon na Dios anggano wala ray makaamper. Ag-anguman si Jacob anggad inmasiken to, tan lapud satan et sikatoy benendisyonan nen Jehova.​—Basaen so Genesis 32:24-29.

11. Mitunosan ed imparungtal na Dios a linawa to, antoy nepeg tayon pansagpotan?

¹¹ Singa si Jacob, agtayo amta so amin a detalye no panon a susumpalen nen Jehova so gagala to. Balet, no aaralen tayo so Salita na Dios, nawalaan itayo na ideya no antoy nagawa ed “agew nen Jehova.” (2 Ped. 3:10, 17) Alimbawa, agtayo amta so eksakton isabi na satan ya agew, balet amta tayo ya asingger la itan. Panisiaan tayo so ibabaga na Salita na Dios a no sigpot tayon manpulong diad sayan nakekeran antikey a panaon, nilaban tayoy inkasikatayo tan saray ondengel ed sikatayo.​—1 Tim. 4:16.

12. Anto so naseseguro tayo?

¹² Amta tayo ya anggan anton oras et onsabi anggaan. Agla kaukolan ya alagaren nen Jehova a napulongan so amin ya too antis ton idapoy panangukom to. (Mat. 10:23) Sakey ni,  makakaawat tayo na maabig a panangiwanwan no panon a nagawaan so epektibon panagpulong. Tekep na panagmatalek, gagawaen tayoy anggaay nayarian tayon mibiang ed sayan kimey tan uusarey antokaman a walad sikatayo. Kasin dakel a totoo ed teritorya tayo so onkiwas ed mensahen ipupulong tayo? Agtayo nibaga. (Basaen so Eclesiastes 11:5, 6.) Tandaan, say kimey tayo et say pampulong, a manmamatalek ya bendisyonan itayo nen Jehova. (1 Cor. 3:6, 7) Naseseguro tayon nanenengneng to so pansasagpot tayo, tan panamegley na masanton espiritu to, itarya toy nakaukolan tayon espisipiko a panangiwanwan.​—Sal. 32:8.

Kerewen so Masanton Espiritu

13, 14. Anto so pakapatnagan ya ontutulong so masanton espiritu na Dios ed saray lingkor to?

¹³ Panon to no liknaen tayon agtayo nayarian so manpulong odino sumpalen so sakey ya asainmin? Nepeg a kerewen tayo ed si Jehova so masanton espiritu to pian napaaligwas so abilidad tayo. (Basaen so Lucas 11:13.) Antokaman so apalabas ya sirkumstansya odino eksperiensya na sakey, sarag na espiritu na Dios a sikatoy pabiskegen parad kimey odino pribilehyo. Singa bilang, kaalis mismo na saray Israelita ed Ehipto, tinulongan na espiritu na Dios iray pastol tan ariripen pian taloen iray kalaban da anggaman anggapoy eksperiensya ra ed pibabakal. (Exo. 17:8-13) Ag-abayag, satan lanlamang ya espiritu so tinmulong ed si Besaleel tan Oholiab pian nagawaan so marakdakep a desinyon inter na Dios parad pangipaalagey ed tabernakulo.​—Exo. 31:2-6; 35:30-35.

¹⁴ Diad modernon panaon, satan a mabisbiskeg ya espiritu so tinmulong ed saray lingkor na Dios pian naasikaso iray pankaukolan na organisasyon sanen kapilitan a gapoan da lan bukor so man-imprinta. Diad sulat nen Brother R. J. Martin, say datin manangasikaso na panag-imprinta, impaliwawa to no anto so agawaan nen 1927. “Dugarugay impangiter na Katawan na bendisyon; akasaliw kami na baleg a rotary [press], anggano agmi kabisadoy inkagawa na satan tan no panon a paandaren. Balet, andi-duaruwan amta na Katawan a pataremey nonot na saramay mabulos a mankimey parad sikato. . . . Dia labat ed pigaran simba, ayarian min apaandar so [rotary] press, tan anggad natan et onaandar ni. Anggan saray nandesinyo’d saya et agdan balot inilaloan so nasarag na saya a gawaen.” Anggad natan et bebendisyonan ni nen Jehova so ontan a masimoon a sagpot.

15. Panon a napaseseg na Roma 8:11 iramay nipapaarap ed tukso?

¹⁵ Say espiritu nen Jehova et ontutulong ed  nanduruman paraan. Satan ya espiritu et nayarin niiter ed amin a lingkor na Dios, tan satan so ontutulong ed sikatayo pian natalonaan so mair-irap iran subok. Panon to balet no liknaen tayon agtayo nasarag iray tukso? Samay imbaga nen Pablo a walad Roma 7:21, 25 tan 8:11 so mamabiskeg ed sikatayo. On, say “espiritu na samay amaoli ed si Jesus manlapud inaatey” et ontulong ed sikatayo, pian nayarian tayon labanan iray pilalek na laman. Satan a teksto et parad saray alanaan a Kristiano, balet say prinsipyo na satan et onaplika met ed amin a lingkor na Dios. Amin tayo et makagamor na bilay no walaan tayoy pananisia ed Kristo, no mansagpot pian napatey iray makapuy a pilpilalek, tan no manbilay unong ed panangiwanwan na espiritu.

16. Panon tayon naawat so masanton espiritu na Dios?

¹⁶ Ipagamor kasi na Dios so aktibon puersa to no agtayo mansagpot? Andi. Nilikud ni’d pangerew ed satan, kaukolan a makuli tayon usisaen so pinuyanan a Salita na Dios. (Uli. 2:1-6) Niarum ni, say espiritu na Dios et walad Kristianon kongregasyon. No regular tayon onaatendi ed saray pantitipon, napatnagan so pilalek tayon ‘ondengel ed ibabaga na espiritu ed saray kongregasyon.’ (Apo. 3:6) Ontan met, kaukolan a mapaabeba tayon iyaplika iray nanaaralan tayo. Bibilinen itayo na Uliran 1:23: “Ompawil kayo ed pamaat ko. Nia, ikalbok so espirituk ed sikayo.” Peteg ya iiter nen Jehova so masanton espiritu to “ed saramay manguunor ed sikato bilang manuley.”​—Gawa 5:32.

17. Iner tayo niyaliling so panamendisyon na Dios ed pansasagpot tayo?

¹⁷ Anggaman kaukolan so masimoon a pansagpot pian naawat so bendisyon na Dios, tandaan ya melag labat iratan no ikompara’d dakdakel a maabig a bengatlan ipapagamor nen Jehova ed totoo to. Say panamendisyon to ed pansasagpot tayo et niyaliling ed saray gunggona diad pangan na masustansian kakanen. Say Dios so nandesinyo ed laman tayo pian panggayagaay naakan tan onkasil tayo. Sikato ni so angitarya na naakan. Agtayo sigpot a natalosan no panon a makakala na sustansia so tagano. Tan agnipaliwawa na maslak ed sikatayo no panon ya onkakasil so laman tayo lapud kakanen. Say amta ti’ labat et onggagana iyan proseso kanian mamangan tayo. No masustansiay kakanen tayo, mabunigas itayo. Mipadpara, si Jehova so angiter na saray kakaukolanen pian nagamoray bilay ya andi-anggaan, tan sikato ni ontutulong pian natumbok iratan. Malinew, kanepegan nen Jehova so panangidayew tayo ta agaylay kabaleg na agawaan to. Kaukolan sirin a mikoopera tayo ed sikato, a manbilay unong ed linawa to, pian naawat so panamendisyon.​—Ag. 2:18, 19.

18. Antoy pansagpotan mon gawaen, tan akin?

¹⁸ Kanian, masimoon a sumpalen so kada asainmin ya inter ed sika. Lanang a patulongan ed si Jehova pian ontalona. (Mar. 11:23, 24) Diad ontan, napaseguroan kan “balang sakey a manaanap et makaromog.” (Mat. 7:8) Saray alanaan et nabendisyonan na “korona na bilay” diad katawenan. (Sant. 1:12) Saray ‘arum a karnero’ nen Kristo ya mansasagpot pian makaawat na bendisyon panamegley na bini nen Abraham, et maliket a makarengel ed ibaga Ton: “Gali dia, sikayoran benendisyonan nen Amak, tawir yoy panarian ya imparaan ed sikayo manlapu la’d inkiletneg na mundo.” (Juan 10:16; Mat. 25:34) On, “saray benendisyonay [Dios] et nakayarian day dalin, . . . tan panayaman da ya anggad angga.”​—Sal. 37:22, 29, MB.

Kasin Nipaliwawam?

• Anto so tuan katutulok?

• Antoy nakaukolan pian naawat so bendisyon na Dios?

• Panon tayon nagamoray masanton espiritu na Dios, tan antoy nitulong na satan ed sikatayo?

[Tepetepet Parad Panagaral]

[Saray litrato ed pahina 9]

Akibalsakan si Jacob ed sakey ya anghel pian bendisyonan nen Jehova.

Ontan met kasi pansasagpot mo?

[Litrato ed pahina 10]

Tinulongan na masanton espiritu na Dios si Besaleel tan Oholiab pian magmaliw ya eksperto