Ipurek ed Ugugaw so Nipaakar ed Organisasyon nen Jehova

LABALABAY na ugugaw so makaaral. Isip yo pa labat iray nayarin intepet na Israelitan ugugaw diad samay labi na unonan Paskua ya sinelebraan da’d Ehipto: ‘Akin et pinatey yo ‘tay karnero?’ ‘Akin et pupuranisan nen Ama na dala so puerta tayo?’ ‘Iner so laen tayo?’ Napatnagan ed samay ingganggan nen Jehova ed kaamaan ya Israelita ya agto imbaliwala iray ontan a tepet. Oniay imbaga nen Jehova ed sikara nipaakar ed tinaon a panselebra day Paskua: “No tepeten ed sikayo na saray anak yo, ‘Antoy kabaliksan na sayan seremonya?’ ebatan yo ra, ‘Sikatoy bagat na Paskua a pamagalang ed Katawan, ta nilabsanan to ray kaabungan na saray Israelita nen wala ra’d Ehipto. Pinatey to ray Ehipsio, balet agto kami pinatey.’” (Exo. 12:24-27, Maung a Balita) Diad inlabas na panaon, pinanonotan nen Jehova iray Israelitan atateng ya importantin ebatan da iray tepet na ananak da nipaakar ed ‘saray totontonen tan ganggan’ nen Jehova.​—Deu. 6:20-25.

 Mapatnag sirin a labay nen Jehova a say tepetepet na ugugaw nipaakar ed dugan paraan na panagdayew et naebatan​—tan saratan ya ebat et mamakiwas ed sikaran aroen si Jehova bilang Dios tan Manangilaban da. Ontan met so labay nen Jehova ed saray ugugaw natan. Say sakey a paraan a nipaslep na atateng ed ananak da so impapuson aro ed Dios tan ed saray lingkor to et no tulongan da ran nakabkabat so organisasyon nen Jehova tan natalosan no panon iran nagunggonaan ed uksoyan na satan. Kanian konsideraen tayo pa so pigaran paraan pian natulongan iray ugugaw a naamtaan iray detalye nipaakar ed organisasyon na Dios.

Diad Kongregasyon Yon Mismo

Kaukolan a nakabkabat na saray ugugaw so kongregasyon yo. Pian nagawaan iya, ipila iray anak yo diad amin a Kristianon pantitipon. No ontan so gawaen yo, aaligen yo ray Israelita nensaman ya oniay ingganggan nen Jehova ed sikara: “Pantitipon mo naani totoo, saray lalaki tan bibii, tan saray angkelag . . . , ta pian narengel da tan natumbok da tan ontakot ira ed Jehova a Dios yo, tan sumpalen da a gawaen so saray amin a salsalita na kaptekan. Tan pian saray anak da ya ag-akaamta, narengel da tan naaralan da so ontakot ed Jehova a Dios yo.”​—Deu. 31:12, 13.

Sarag lan aralen na ananak so Salita nen Jehova manlapud inkaugaw. Oniay imbaga nen apostol Pablo nipaakar ed si Timoteo: “Manlapud inkaugaw mo et akabatan mo la iray masanton sulat.” (2 Tim. 3:15) Anggan saray angkekelag nin ugugaw et sarag da lan talosan iray aaralen ed Kingdom Hall tan kabisadoen iray kanta na Panarian. Ditan da met naaralan  ya usaren so Biblia tan saray literaturan base ed Biblia tan alwaran iratan. Sakey ni, diad saray aral et nalikna da so tuan aroan​—saya imay kualidad ya imbaga nen Kristo a pakabidbiran ed tuan papatumbok to. Imbaga nen Jesus: “Iter ko ed sikayo so sakey a balon ganggan, a manaaroan kayo; no panon so impangarok ed sikayo, ontan met so panaaroan yo. Diad saya et naamtaan na amin a sikayo iray disipulok, no manaaroan kayo.” (Juan 13:34, 35) Lapud sankalikna na ugugaw so tuan aroan tan kaligenan diad Kingdom Hall, labalabay day onatendi’d aral tan magmaliw la itan a kabiangay bilay da.

No iyugali yoy onsabin masakbay ed Kingdom Hall tan ag-onalis a tampol kayari aral, makapikaaro iray anak yo ed saray kakongregasyon yo. Imbes a paulyan yo ran kapara dan ugugaw labat so kaulop da, marakep no ikabat yo ra’d agagi a nandurumay edad da. No nakabat da ray maedad la, ditan da namoria a makaaral ira’d dakel a maliket ya eksperiensya tan karunongan na sarayan agagi. Si Zacarias nensaman et maabig ya impluensya ed ugaw nin ari na Juda a si Uzias bilang ‘mananimbawa to nipaakar ed itatakot ed Dios.’ Ontan met natan, saramay abayag lan matoor a manlilingkor ed si Jehova et mansasagpot pian magmaliw iran maabig ya impluensya ed saray kalangweran. (2 Awa. 26:1, 4, 5, MB) Legan yon walad Kingdom Hall, ipaliwawa yo met ed saray anak yo so usar na library, say information board, tan arum niran nanengneng ditan.

Say Sankamundoan ya Organisasyon

Kaukolan a natalosan na ananak a say kongregasyon yo et kabiangan na sankamundoan ya organisasyon a tugyopen na masulok a 100,000 kongregasyon. Ipaliwawa’d sikara iray nanduruman aspekto na sayan organisasyon, no panon iyan nipapakurang, tan no panon da iyan nasuportaan anggano ugugaw ni ra. Ipamoria ed sikara no akin a pitalaran yo ray asemblea, kombension, tan say ibisita na manangasikasoy sirkito.​—Nengnengen so kahon ya  “Saray Nayari Yon Konsideraen Diad Panagdayew na Pamilya,” diad pahina 28.

No walay pankanawnawa, imbitaan yo’d abung yo iray manangasikasoy sirkito tan distrito, misionero, Bethelite, tan arum nin walad sigpot-panaon. Agyo iisipen ya anggapoy panaon da para’d ugugaw. Panggugunaetan na sarayan walad sigpot-panaon ya aligey Jesus, ya angiganay panaon para’d ugugaw tan akitongtong ed sikara. (Mar. 10:13-16) No narengel na ananak yo iray eksperiensya na sarayan lingkor nen Jehova tan nalikna day liket da ed sagradon serbisyo, nayarin pilaleken da met so onloob ed sigpot-panaon diad ibaleg da.

Anto ni nagawaan yo bilang pamilya pian lalon nakabkabat na ananak yo so organisasyon nen Jehova? Nia ray pigaran suhestion: Gawa yon proyekto na pamilya yo so pambasa ed libron Jehovah’s Witnesses​—Proclaimers of God’s Kingdom. Idanet so debosyon, inkamapaabeba, tan katooran na saray lingkor nen Jehova. Ipaimano no panon iran inusar nen Jehova pian iyabawag so maong a balita diad sankamundoan. Manbantay kayo na saray video ya pinawala na organisasyon nen Jehova pian ibangat iray importantin leksion a naaralan ed saray lingkor nen Jehova nensaman anggad natan. No posible, man-tour kayo ed Bethel diad bansa yo odino ed arum a bansa ni ingen. Diad ontan et nipurek ed ananak yo no panon a say organisasyon nen Jehova diad dalin et naoorganisa diad panangidirehi na matoor tan makabat ya aripen pian nitaryay espiritual a naakan tan niwanwan iray agagi ed sankamundoan, a singa met nen inmunan siglo C.E.​—Mat. 24:45-47; Gawa 15:22-31.

Ikonsidera so Kapasidad na Kada Ugaw

Diad pambabangat yo’d saray anak yo, nonot yo imay paraan na impanbangat nen Jesus ed saray apostol to. Aminsan et oniay imbaga to’d sikara: “Dakel ni so ibagak ed sikayo, balet agyo ni natalosan iratan natan.” (Juan 16:12)  Agbinuntonan nen Jesus na impormasyon iray disipulo to. Imbes, daiset-daiset ton imbangat ed sikara iray importantin katuaan pian natalosan dan maong iratan. Kanian agyo met bubuntonay impormasyon iray anak yo. Napansiansia yoy interes da tan panliketan day makaaral nipaakar ed Kristianon kongregasyon basta regular so pangibabangat yo’d sikara, anggano sandaraiset. Diad ibabaleg da, nayarin ipanonot yo ray naaralan da la tan arum-aruman yo ni iratan.

Makatulong na baleg so Kristianon kongregasyon pian ombiskeg so espiritualidad na ananak, tan no maseseg iran mibiang ed kimey na kongregasyon et mas nasarag dan resistiay impluensya na mundo nen Satanas. (Roma 12:2) Matalek kamin panliketan yon maong so pangipurek yo’d ananak yo nipaakar ed organisasyon nen Jehova. Komon ta diad panamendisyon to et mansiansia iran matoor tan maapit ed satan tan ed maaron Dios a panlilingkoran tayo.

[Kahon/Litrato ed pahina 28]

 Saray Nayari Yon Konsideraen Diad Panagdayew na Pamilya

Nia ray pigaran bengatla nipaakar ed organisasyon nen Jehova a nayari yon konsideraen ed Panagdayew na Pamilya yo diad labi.

▪ Repasoen so inggapo na kongregasyon yo. Kapigan tan panon itan ya aporma? Dinan iran Kingdom Hall so inusar na kongregasyon? Marakep no imbitaan yo’d abung yo iray agagin abayag la’d kongregasyon yo a mangebat ed tepetepet na ananak yo.

▪ Ipaliwawa so gagala na nanduruman pantitipon na kongregasyon tan saray mas angkabaleg a pantitipon, tan no panon a minabang iray anak yo ed saratan.

▪ Aralen so gagala na nanduruman eskuelaan diad organisasyon nen Jehova. Mangisalaysay na saray eksperiensya a mangipapanengneng ed maabig iran kimey a nagagawaan na saramay nan-graduate ed sarayan eskuelaan.

▪ Tulongan iray anak yon namoria ya importante so pagmaliw a regular a manangipalapag na maong a balita. Ipanengneng ed sikara no antoy nagawaan da pian walay biang da met ed sankamundoan a report a walad Yearbook of Jehovah’s Witnesses.

▪ Konsideraen so nanduruman klase na sigpot-panaon a serbisyo a lukas ed saray kalangweran diad organisasyon nen Jehova. Say kapitulo 10 na libron Organisadon Manggawa na Linawa nen Jehova et maabig a napangalaay impormasyon nipaakar ed saya.

▪ Ipaliwawa ed ananak yo no akin a walaray espisipikon uksoyan a tutumboken diad kongregasyon. Ipaliwawa met no akin a nakaukolan iran manpasakop a naynay ed organisasyon nen Jehova, anggan diad angkekelag iran bengatla. Ipanengneng no panon iran makapitulongan ed pankakasakey na kongregasyon diad itumbok da’d panangidaulo na saray elder.

[Litrato]

Nagunggonaan iray anak yo no makapikaaro ira’d saray abayag lan lingkor nen Jehova

[Saray litrato ed pahina 26]

Singa diad Israel nensaman, panggugunaetan met natan na atateng ya ebatan iray tepet na ananak da nipaakar ed organisasyon nen Jehova