Kasin Idadaulo Yoy Pangigalang ed Kaagian?

“Diad aroan na sanaagi, ipatnag yoy aralem a panamabli ed balang sakey. Idaulo yoy pangipanengneng na galang ed balang sakey.”​—ROMA 12:10.

1, 2. (a) Antoy imbilin nen Pablo diad sulat to ed saray taga Roma? (b) Antoran tepet so pantongtongan tayo?

DIAD sulat nen apostol Pablo ed saray taga Roma, indanet to ya importantin ipanengneng tayo ran Kristiano so panangaro ed loob na kongregasyon. Pinanonotan to itayon say aro tayo et nepeg ya “andian na pansimpisimpitan.” Sinalambit to met so “aroan na sanaagi” tan inkuanton satan ya aroan et nepeg a tekepay “aralem a panamabli.”​—Roma 12:9, 10a.

² Siempre, say aro ed kaagian et aliwa labat lan puros liknaan, noagta kaukolan met ya ipatnag. Ta no agtayo ipalikna so panangaro tayo, agda itan naamtaan. Kanian, onia ni imbilin nen Pablo: “Idaulo yoy pangipanengneng na galang ed balang sakey.” (Roma 12:10b) Antoy kabaliksan na panangigalang? Akin et importantin idaulo tayo so pangigalang ed kaagian? Panon tayon nagawaan itan?

Anto so Galang?

3. Diad orihinal iran lenguahe ed Biblia, antoy kabaliksan na salitan “galang”?

³ Say manunan Hebreon salita parad “galang” et literal a mankabaliksay “inkabelat.” Say toon igagalang et ipapasen ya ambelat odino importante. Tan satan lanlamang a Hebreon salita et ipapatalos ed Kasulatan bilang “gloria,” a mangipapanengneng ya dederlengen imay toon igagalang. (Gen. 45:13, NW) Say Griegon salitan nipatalos a “galang” diad Biblia, et mankabaliksay balor, kana, inkamabli. (Luc. 14:10) On, papablien tayo iray igagalang tayo.

4, 5. Anto so kabaliksan na pangigalang ed arum? Iyilustra.

⁴ Antoy kabaliksan na pangigalang ed arum? Say panamagalang ed agagi et agto labat lalanorey pangipanengneng ed satan. Anggaman napatnagan so panamagalang diad pidedeneng tayo ed arum, diad tua et onggagapo itan ed no panoy pangipapasen tayo ed agagi.

⁵ Panon a nipanengneng na sakey a Kristiano so tuan panangigalang ed saray kaagian to no ag-itan nanlapu ed puso? (3 Juan 9, 10) Singa say tanaman ya ombuna tan agbastabasta ompatey no akatanem ed maong a dalin, ontan met, say galang et puro tan agbastabasta naandi no akatanem ed puso. Lapud say kunkunwarin panangigalang et agmanlalapud puso, agmanbayag et naandi lanlamang. (Gawa 5:1-5) Kanian, antis ya animbawa si Pablo nipaakar ed panangigalang et onia ni prangkan imbaga to: “Say aro yo komon et andian na pansimpisimpitan.”​—Roma 12:9.

Igalang Iray Pinalsan “Kaulibay na Dios”

6, 7. Akin et kaukolan tayon respetoen so arum?

⁶ Lapud say masimoon ya respeto et manlalapud puso, nepeg ya agtayon balot lilingwanan iray Makasulatan a rason no akin ya igagalang tayo so amin ya agagi. Aralen tayo pa sirin so duara ed saratan a rason.

 ⁷ Aliwan singa saray arum a pinalsa diad dalin, saray totoo et pinalsan “kaulibay na Dios.” (Sant. 3:9) Kanian, walad sikatayo iray maridios a kualidad a singa say aro, karunongan, tan inkahustisya. Imanoen pa no anto ni naawat tayo ed Manamalsa tayo. Inkuan na salmista: “O Jehova, . . . ya angipasen na galang mo ed tagey na saray tawen! . . . Ginawam [so too], tan sikato so binalangetan mo na gloria tan galang.” (Sal. 8:1, 4, 5; 104:1) * Saray totoo et binalangetan odino inikdan na Dios na dignidad, gloria, tan galang. No igagalang tayo sirin so arum, bibidbiren tayo so Lapuan na kagalangan na too, si Jehova. Kanian no walay makatunongan a rason pian respetoen iray arum a totoo, mas nagkalalon respetoen tayo ray kaagian!​—Juan 3:16; Gal. 6:10.

Kabiangan na Saksakey a Pamilya

8, 9. Anto so imbaga nen Pablo a rason pian respetoen iray kaagian?

⁸ Sinalambit nen Pablo so sakey nin rason no akin a manrerespetoan itayo. Antis a tuloy na impamilin to nipaakar ed panangigalang, onia ni inkuan to: “Diad aroan na sanaagi, ipatnag yoy aralem a panamabli ed balang sakey.” Say Griegon balikas ya impatalos ya “aralem a panamabli” et ontutukoy ed malet a bedber na pamilyan manaaroan tan mansusuportaan. Kanian sanen inusar nen Pablo itan a termino, idadanet ton nepeg a malet tan maaro so ulopan ed loob na kongregasyon a singa nankasakey a pamilya. (Roma 12:5) Niarum ni, tandaan a say sinulat nen Pablo et saray alanaan a Kristiano, a tinagibi na saksakey ya Ama, si Jehova. Kanian talagan kabiangan ira na saksakey a pamilya. Wala siri’ mabiskeg a rason na saray alanaan a Kristiano nen panaon nen Pablo a respetoen so balang sakey. Ontan met so ipapanengneng tan gagawaen na saray alanaan natan.

⁹ Saray ‘arum a karnero’ balet ey? (Juan 10:16) Anggaman agni ra tinagibi na Dios, matukoy a tawagen dan agi so sakey tan sakey lapud kabiangan ira na nankakasakey a Kristianon pamilya diad interon mundo. (1 Ped. 2:17; 5:9) Kanian, no talagan natatalosan na arum a karnero so pangibabaga ray “brother” o “sister,” wala met siri’ mabiskeg a rason da pian masimoon a respetoen iray kaagian da.​—Basaen so 1 Pedro 3:8.

Akin et Talagan Importante?

10, 11. Akin et talagan importante so pangipanengneng na masimoon a respeto?

¹⁰ Akin et talagan importante so pangipanengneng na masimoon a respeto? Lapud saya: No igalang tayo iray agagi, baleg so nitulong tayo pian ombiskeg tan mankasakey so interon kongregasyon.

¹¹ Siempre, amta tayo a say maapit a relasyon ed si Jehova tan say suporta na espiritu to so sankabiskegan a lapuan na tulong ed sikatayo bilang tuan Kristiano. (Sal. 36:7; Juan 14:26) Ontan met, sano sikatayoy aapresyaen na agagi, napaseseg itayo. (Uli. 25:11) Napabiskeg itayo no walay masimoon a mangapresya tan manrespeto ed sikatayo. Niarum ni, lalo itayon onligsa tan mansagpot a manakar ed dalan na bilay. Seguradon aliknam la iya.

12. Panon a nipanengneng na balang sakey ed sikatayo so aroan ed kongregasyon?

¹² Lapud amta nen Jehova a sipor lan kaukolan tayoy narespeto, papasesegen to itayo panamegley na Salita to a ‘manuunaan itayon mangiter na dayew [odino respeto] ed sakey tan sakey.’ (Roma 12:10, Maung a Balita; basaen so Mateo 7:12.) No amin a Kristiano et ipapuso ra iyan alay abig a simbawa, mas onelet so ulopan da. Kanian, maabig no tepetan tayoy inkasikatayo:  ‘Kapigan may unor ya impanengneng koy masimoon ya panagrespeto ed saray agagi diad kongregasyon?’​—Roma 13:8.

Espisipikon Betang na Amin

13. (a) Siopay nepeg a mangidaulo’d pangipanengneng na galang? (b) Antoy ipapabitar na sulat nen Pablo a naromog ed Roma 1:7?

¹³ Siopay nepeg a mangidaulo’d pangipanengneng na galang? Diad sulat nen Pablo ed saray Hebreo, deneskribe to iray elder bilang “mangidadaulo diad limog yo.” (Heb. 13:17) Tua, dakel so kimkimey ya idadaulo da. Balet, bilang pastol na pulok, kaukolan met ya idaulo day pangipanengneng na galang ed saray kaagian​—kaiba lay kapara ran elder. Singa bilang, no manmiting ira pian pantongtongan iray espiritual a pankaukolan na kongregasyon, igagalang day balang sakey diad italineng a maong ed saray komento na anggan siopa a kapara ran elder. Ontan met, nipapanengneng day galang no ikokonsidera da iray panmoria tan ideya na amin ya elder sano mandedesisyon. (Gawa 15:6-15) Balet, nepeg tayon tandaan ya samay sulat nen Pablo ed Roma et aliwa labat a parad saray elder, noagta parad interon kongregasyon. (Roma 1:7) Sirin, say bilin ya idauloy pangipanengneng na galang et onaaplika met ed sikatayon amin natan.

14. (a) Iyilustra so pandumaan na pangipanengneng na galang tan idauloy pangipanengneng na galang. (b) Antoray nayarin itepet tayo’d sarili tayo?

¹⁴ Imanoen pa met iyan aspekto na bilin nen Pablo. Pinaseseg to iray kaagian to ed Roma ya aglabat ipanengneng so galang, noagta idaulo day pangipanengneng na galang. Antoy pandumaan na saya? Nonoten pa iyan alimbawa. No marunong lan manbasa so grupo na estudyante, ibangat ni kasi ira na maestra a manbasa? Siempre andi, ta amta da lay manbasa. Imbes, tulongan to ran onaligwas ed panagbasa ra. Mipadpara, igagalang tayo lay balang sakey lapud papakiwasen tayo na aro, a pakabidbiran na saray tuan Kristiano. (Juan 13:35) Balet, no panon a saray estudyanten makabasa la et napaaligwas da ni panagbasa ra, ontan met, onaligwas itayo ni no idaulo tayoy pangipanengneng na galang. (1 Tes. 4:9, 10) Satan ya espisipikon betang et inter ed balang sakey ed sikatayo. Nayarin tepetan tayoy sarili tayo, ‘Kasin gagawaen ko itan? Idadaulok ta so panangigalang ed saray agagi’d kongregasyon?’

 Igalang Iray “Duka”

15, 16. (a) Siopay agtayo nepeg a lingwanan ya igalang, tan akin? (b) Antoy pakanengnengan ya masimoon tayon rerespetoen so amin ya agagi?

¹⁵ Diad kongregasyon, siopay agtayo nepeg a lingwanan ya igalang? Oniay inkuan na Salitay Dios: “Say walaan na panangasi ed duka pautangen to si Jehova, et say maong a gawa to ipawil to ed sikato a bayaran.” (Uli. 19:17) Antoy epekto ed sikatayo na sayan prinsipyo legan tayon manggugunaet ya idauloy pangipanengneng na galang?

¹⁶ Seguradon mipakna ka a say igagalang na maslak ya totoo et saray walad mas atagey a posisyon, ingen ta nayarin agda nigagalang iramay walad mas abeban posisyon. Balet, aliwan ontan si Jehova. Oniay inkuan to: “Saray mangigalang ed siak igalang ko.” (1 Sam. 2:30; Sal. 113:5-7) Igagalang nen Jehova so amin a manlilingkor tan mangigagalang ed sikato. Agto ibabaliwala iray “duka.” (Basaen so 1 Samuel 2:8; 2 Awa. 16:9) Siempre, kaliktan tayon aligen si Jehova. Kanian, no labay tayon naamtaan no kasin napapaaligwas tayo lay tuan panamagalang ed arum, maabig no tepetan tayoy inkasikatayo: ‘Panon kon tatratoen iray aliwan prominente, odino anggapoy responsabilidad o betang ed kongregasyon?’ (Juan 13:14, 15) Say ebat mo ed saya so pakanengnengay kaaralem na respetom ed arum.​—Basaen so Filipos 2:3, 4.

Nipanengneng so Galang no Iter Tayoy Panaon Tayo

17. Anto so manunan paraan ya idadaulo tayoy panangigalang, tan akin?

¹⁷ Anto so manunan paraan ya idadaulo tayoy pangigalang ed amin diad kongregasyon? Panamegley na pangiter na panaon tayo ed sikara. Akin? Bilang Kristiano, okupado itayo, tan dakel so importantin kimkimey tayo ed kongregasyon a mangaalay panaon. Kanian, ipapasen tayon mabmabli so panaon. Amta tayo met ya agtayo nepeg a paskaren iray agagi ya igana ray dakel a panaon da ed sikatayo. Ontan met balet, aapresyaen tayo no saray kakongregasyon tayo et agda tayo oobligaen ya iter so panaon tayo’d sikara.

18. Unong ya ipapanengneng na litrato ed pahina 18, panon tayon nipatnag a mabulos tayon iter so panaon tayo ed agagi?

¹⁸ Anggaman ontan, amta tayo met (lalo la iray manlilingkor bilang pastol ed kongregasyon) a no mabulos tayon itunda iray kimey tayo pian naikday panaon iray agagi, nipapanengneng tayon rerespetoen tayo ira. Akin et oniay nibaga tayo? Lapud no ipireg tayon magano so kimkimey tayo parad kaagian, singa tayo ibabagan, ‘Mabmabli ka’d siak, kanian mas unaen ta ka ni nen sayay gagawaen ko.’ (Mar. 6:30-34) Duma balet so nalikna na agi no agtayo naarap, nayarin nipalikna tayon sikatoy agtanton importante. Siempre, natalosan met a no maminsan et wala ray isasambot ya agnayarin itunda. Balet, say pagmaliw a mabulos odino masuyat a mangiganay panaon parad agagi so pakapatnagan no panon kaaralem so respeto tayo ed sikara.​—1 Cor. 10:24.

 Determinadon Mangidaulo

19. Nilikud ni’d pangiter na panaon tayo, panon tayon nigalang iray agagi?

¹⁹ Wala ni arum ya importantin paraan pian nigalang tayo iray agagi. Singa bilang, sano iiter tayoy panaon tayo’d sikara, nepeg ya iter ti’ met so atension tayo. Diad saya et napanuliranan lamet si Jehova. Inkuan nen salmistan David: “Saray mata nen Jehova wala ra ed matunong a too, tan saray layag to akalukas ira ed saray akis da.” (Sal. 34:15) Panggugunaetan tayon aligen si Jehova diad sigpot a pangimano tan idengel ed saray agagi tayo, lalo la iramay onkekerew na tulong. Diad ontan et nigagalang tayo ira.

20. No nipaakar ed panangigalang, antoran panonot so tandaan tayo?

²⁰ Unong a naaralan tayo, tandaan tayo komon no akin et nepeg a masimoon tayon respetoen iray agagi. Ontan met, magmaliw itayo komon a maimano ed saray pankanawnawan sikatayoy unonan mangipanengneng na galang ed amin, pati ed saray duka. No gawaen tayo iraya, napaelet tayoy aroan tan pankakasakey ed kongregasyon. Kanian, agti labat komon basta mangigalang, noagta nagkalalo ed amin et itultuloy tayon idauloy pangipanengneng na galang ed balang sakey. Kasin determinado kan gawaen itan?

[Paimano ed leksab]

Nanonotan Mo Ni?

• Anto so galang?

• Antoray rason no akin et kaukolan tayon igalang iray kaagian?

• Akin et importantin igalang so balang sakey?

• Antoray paraan a nipanengneng tayoy panangigalang ed saray kaagian?

[Tepetepet Parad Panagaral]

[Litrato ed pahina 18]

Panon tayon nigalang iray kaagian?