Kasin Papabiskegen Moy Arum Diad Aral?
Kasin Papabiskegen Moy Arum Diad Aral?
“Sano mantitipon kayo, . . . gawa yon amin so bengatla pian pabiskegen so balang sakey.”—1 COR. 14:26.
1. Unong ed 1 Corinto kapitulo 14, anto so importantin gagala na Kristianon pantitipon?
‘APABISKEG ak ed aral!’ Asalim ta lan imbaga iya kayarim ya akiaral? Seguradon asalim la! Saray aral ed kongregasyon et talagan makapaseseg. Balet, agti’ la ‘tan pankelawan ta singa ed saray inmunan Kristiano, say importantin gagala na saray aral tayo natan et pian pabiskegen ed espiritual so amin ya onaatendi. Diad inmunan sulat nen apostol Pablo ed Corinto, impaimano to itan ya espisipikon gagala na saray Kristianon pantitipon. Aminpiga ton imbaga ed interon kapitulo 14 ya amin a parte na pantitipon et ontan so gagala to. On, “pian napabiskeg so kongregasyon.”—Basaen so 1 Corinto 14:3, 12, 26. *
2. (a) Say makapabiskeg ya pantitipon et resulta na anto? (b) Anton tepet so pantongtongan tayo?
2 Manuna’d amin, amta tayo a say makapabiskeg tan makaibangat a pantitipon et lapud impluensya na espiritu na Dios. Kanian, igagapo tayo’d masimoon a pampikasi ed si Jehova so kada aral ed kongregasyon. Kekerewen ti’d Ama tayon walad tawen a bendisyonan to komon iray pantitipon tayo panamegley na masanton espiritu to. Balet, amta tayo met ya walay nitulong na amin a membro na kongregasyon pian makapabiskeg iray programa’d aral. Anto sirin iray kaukolan a gawaen na balang sakey pian naseguron lawas a makaparepresko tan makapaseseg iray sinimban aral?
3. Panon kaimportante so aral?
3 Pian naebatan itan, usisaen tayo so pigaran aspekto’d aral a kaukolan a tandaan na saray mangidadaulo ed saratan. Pantongtongan tayo met no panon a makatulong so interon kongregasyon pian magmaliw a makapabiskeg so aral parad amin ya onatendi. Interesado tayo’d saraya lapud sagradon pantitipon so aral. Talagan importantin kabiangan na panagdayew ed si Jehova so iyaatendi tan pibibiang ed aral.—Sal. 26:12; 111:1; Isa. 66:22, 23.
Parte na Aral ya Indesinyon Nausisa so Biblia
4, 5. Anto so gagala na Panagaral na Panag-Bantayan?
4 Labay tayon amin so sigpot a nagunggonaan ed sinimban Panagaral na Panag-Bantayan. Kanian, pian natalotalosan tayo so manunan gagala na satan, repasoen tayo so arum ed saray pananguman ed magasin a Panag-Bantayan tan saray aaralen ya artikulo.
5 Manlapu la’d samay sankaunaan a panaralan ya edisyon na Say Panag-Bantayan, isyu na Enero 15, 2008, walay importantin detalye ya inyarum ed arap ya apis. Naimanom? Pinengneng mo pa. Diad leksab na tore et walay akalukas a Biblia. Satan ya kaaruman a detalye et ipapamoria to no akin a walay Panagaral na Panag-Bantayan. Say rason et pian aralen so Biblia diad tulong na sayan magasin. On, diad sinimban Panagaral na Panag-Bantayan, ‘nipapaliwawa’ tan ‘niiiter so belas’ odino kabaliksan na Salita na Dios, a singa nen panaon nen Nehemias.—Neh. 8:8; Isa. 54:13.
6. (a) Anton pananguman so ginawa ed Panagaral na Panag-Bantayan? (b) Antoy nepeg tayon tandaan sano walaray “basaen” a teksto?
6 Lapud say Biblia so manunan libro tayo, walay ginawan pananguman ed Panagaral na Panag-Bantayan. Walaray pigaran insitas a teksto diad aaralen iran artikulo ya imbagan “basaen.” Sano babasaen iratan a teksto, napapaseseg itayon tumboken itan diad mismon Biblia tayo. (Gawa 17:11) Akin? Lapud no nabasa ti’d mismon Biblia tayo so simbawa na Dios, baleg so epekto na satan ed sikatayo. (Heb. 4:12) Kanian, antis ya ibasa iratan, ikdan na mangikokonduktay panagaral so amin ya inmatendi na magenap a panaon pian naromog da iratan a teksto tan makatumbok ira legan ya ibabasa.
Dinakelay Panaon Parad Panangibalikas na Pananisia
7. Anto so pankanawnawa tayo legan na Panagaral na Panag-Bantayan?
7 Say sakey nin pananguman diad saray aaralen ya artikulo ed Panag-Bantayan et say karukey na saratan. Diad agano ni ran taon, pinatikey iratan. Kanian, legan na Panagaral na Panag-Bantayan, daiset lay nauusar a panaon diad panagbasay parapo, balet mas dakel so panaon parad panagkomento. Mas dakel lay pankanawnawa natan na kongregasyon a mangibalikas na pananisia ra diad pangebat ed niimprintan tepet, diad pankomento no panon ya onaplika so sakey a teksto, diad pangiter na antikey ya eksperiensya a mangipapanengneng a makabat so panumbok ed saray prinsipyo na Biblia, tan arum ni ra. Kaukolan met ya ikday panaon so pankomento ed saray litrato.—Basaen so Salmo 22:22; 35:18; 40:9.
8, 9. Anto so betang na mangikokondukta na Panagaral na Panag-Bantayan?
8 Balet, sayan kaaruman a panaon parad nanduruman komento legay Panagaral na Panag-Bantayan et dugay pakausar to no antikey labat iray komento na saray onebat tan no paliisan na mangikokondukta so lanang ton pankomento. Kanian, pian napabiskeg so amin ed panagaral, anto so ontulong ed mangikokondukta pian natantya toy komento to tan na kongregasyon?
9 Pian naebatan itan, imanoen pay sakey ya ilustrasyon. Say Panagaral na Panag-Bantayan ya balibali impakakondukta et singa impaniiban rosas a marakdakep a nengnengen. Singa say baleg a kumpol na nanduruman rosas, ontan met, say Panagaral na Panag-Bantayan et tugyopen na nanduruman komento. Tan singa sarayan rosas a nandurumay kabaleg tan kolor da, ontan met, nandurumay dukey tan komento na saray oneebat ed panagaral. Antoy betang na mangikokondukta? Say sagpaminsan ya pankomento to et singa pigaran bulobulong ya maal-alwar ya inyarum ed kumpol na rosas. Sarayan bulobulong et agmanakbong, noagta bilayen toy kolor tan dakep na saray rosas. Mipadpara, kaukolan a tandaan na mangikokondukta a say betang to et aliwan say mandomina, noagta pian suportaan so ibabalikas na kongregasyon a panangidayew. On, no marundunong ya paniibaen iray nanduruman komento na agagi tan say pigaran matukoy ya komento na mangikokondukta, natuop so marakdakep iran balikas a mamabiskeg ed amin ya akiaral.
“Naynay Itayo Komon a Mangiyapay ed Dios na Bagat a Panangidayew”
10. Antoy impangipasen na saray Kristiano nensaman ed saray pantitipon diad kongregasyon?
10 Diad 1 Corinto 14:26-33, deneskribe nen Pablo so Kristianon pantitipon nen inmunan siglo. Makatulong itan ed sikatayo pian naamtaan no panon iraman ya inkondukta. Bilang komento ed sarayan bersikulo, oniay insulat na sakey ya iskolar ed Biblia: “Diad saray pantitipon na kongregasyon nensaman, sankaimano a maslak ed saray onaatendi et ipapasen dan pribilehyo tan obligasyon so pibiang. Say sakey et ag-oonla pian ondengel labat, noagta pian manginabang.” Peteg ya ipapasen na saray Kristiano nensaman a saray pantitipon ed kongregasyon et pankanawnawan nibalikas so pananisia ra.—Roma 10:10.
11. (a) Anto so baleg a makatulong pian makapabiskeg so aral, tan akin? (b) Pian onaligwas so panagkomento tayo ed aral, antoran suhestion so iyaplika tayo? (Nengnengen so paimano’d leksab.)
11 Say pangibalikas na pananisia diad aral et makatulong na baleg “pian napabiskeg so kongregasyon.” Seguradon mipakna ka ya anggano pigay taon mo lan mimiaral et siansia nin labalabay mon dengelen iray komento na agagi. Natetenyeg so liknaan tayo ed impapuson ebat na sakey a maedad lan matoor ya agi; napapabiskeg tayo ed alay abig ya obserbasyon na maaron elder; tan makaimis tayon makaimis ed natnatural a komento na sakey ya ugaw legan ton ibabalikas so masimoon a panangaro to ed si Jehova. Malinew, no mankomento itayo, makakatulong itayon amin pian magmaliw a makapabiskeg so aral. *
12. (a) Antoy naamtaan tayo nipaakar ed si Moises tan Jeremias? (b) Anto so nitulong na pikakasi pian makapankomento tayo?
12 Balet, no say sakey et mabaing, ompan nairapan a mankomento. No bilang ta ontan ka, nayarin makatulong no nonoten mon agmo bukbukor. Diad tua, anggan saray matoor a lingkor na Dios nensaman a si Moises tan Jeremias et imbaga ran agda nayariay mansalita ed arap na totoo. (Exo. 4:10; Jer. 1:6) Balet, tinulongan ira nen Jehova pian sikatoy nidayew da ed publiko. Ontan met natan, tulongan ka na Dios pian niyapay mo so bagat a panangidayew. (Basaen so Hebreos 13:15.) Panon kan tulongan nen Jehova pian natalonaan moy takot ya mankomento? Unona, manparaan a maong parad aral. Insan, antis kan onla’d Kingdom Hall, manpikasi ka ni ed si Jehova tan espisipikon kerewen ed sikato ya nayarian mo komoy mankomento. (Fil. 4:6) Lapud say kekerewen mo et “unong ed linawa to,” makapanmatalek ka ya ebatan to so pikakasim.—1 Juan 5:14; Uli. 15:29.
Pantitipon a ‘Mamabiskeg, Mamaseseg, tan Manligliwa’
13. (a) Antoy nepeg ya epekto na pantitipon tayo ed saray inmatendi? (b) Anton tepet so nagkalalo lan imanoen na saray elder?
13 Imbaga nen Pablo a say importantin gagala na pantitipon et pian ‘napabiskeg, napaseseg, tan naligliwa’ iray inmatendi. * (1 Cor. 14:3) Panon a naseguro na saray elder natan a saray betang da ed aral et makapabiskeg tan makaligliwa ed agagi? Pian naebatan itan, pantongtongan tayo pa imay pantitipon ya inyuksoy nen Jesus ag-abayag kayari inkioli to.
14. (a) Antoray agawa antis na samay pantitipon ya inyuksoy nen Jesus? (b) Akin et nainawaan iramay apostol sanen “inmasingger si Jesus tan [akitongtong] ed sikara”?
14 Unona, imanoen pa iray agawa antis na satan a pantitipon. Sakbay a tuloy na impatey nen Jesus, “sikatoy tinaynan [na saray apostol] tan batik ira,” tan unong ya impasakbay, ‘binmatik ira ed dilin abung da.’ (Mar. 14:50; Juan 16:32) Insan, kayari inkioli to, impatawag to ray maer-ermen ya apostol to ya onatendi’d espisyal a pantitipon. * Kanian, “saray labinsakey a disipulo et linma ed Galilea diad samay palandey ya imbaga nen Jesus a laen da.” Kasabi ra’d man, “inmasingger si Jesus tan [akitongtong] ed sikara.” (Mat. 28:10, 16, 18) Seguradon akakkainawa iray apostol sanen sikaray inasinggeran lan unona nen Jesus! Tan antoy imbaga to?
15. (a) Anto so sinalambit tan agsinalambit nen Jesus? (b) Antoy epekto na satan a pantitipon ed saray apostol?
15 Ginapoan to so pantitipon diad impangiyanunsio: ‘Amin a pakauley et niiter la ed siak.’ Insan to ra inikdan na asainmin: “Onla kayo sirin tan ibangat yo iray totoo.” Diad kaunoran, maaro to iran pinaseguroan: “Wala ak ed sikayo ed amin ya agew.” (Mat. 28:18-20) Balet, naimanom ta no antoy agto ginawa? Agto nantamian iray apostol to; agto met inusar itan a pantitipon pian kuestioney motibo ra, nisay pinaloor so pakakakonsiensia ra diad impanalambit ed inkapuy na pananisia ra. Imbes, pinaseguroan to ra a sikaray inaro to tan na Ama to diad impangiter ed sikara na baleg ya asainmin. Anto so epekto na satan ed saray apostol? Sikaray apabiskeg, apaseseg, tan aligliwan maong. Kanian ag-abayag kayari na satan a pantitipon, sikara lamet so ‘nambangat tan angiyabawag ed maong a balita.’—Gawa 5:42.
16. Panon ya aaligen na saray elder natan so ehemplo nen Jesus sano idadaulo da iray makaparepreskon aral?
16 Bilang pangalig ed si Jesus, ipapasen na saray elder natan iray aral bilang pankanawnawa pian napaseguroan iray agagi ed agmanguuman a panangaro nen Jehova ed totoo to. (Roma 8:38, 39) Kanian, diad saray betang da ed aral, say iimanoen na saray elder et say kaabigan na agagi, aliwan say kakapuyan da. Agda kukuestionen iray motibo na agagi. Imbes, napatnagan ed ibabalikas da ya momoriaen da ray agagi bilang totoon mangaaro ed si Jehova tan malabay a manggaway duga. (1 Tes. 4:1, 9-12) Siempre, no maminsan et kaukolan a simbawaen na saray elder so interon kongregasyon, balet no pigaran agagi labat so kaukolan ya ipetek, maabig no saramay nalalanor labat so personal dan katongtongen. (Gal. 6:1; 2 Tim. 2:24-26) Sano bibilinen da so kongregasyon, panggugunaetan day mangomenda no matukoy. (Isa. 32:2) Lapud pansasagpotan day mansalita na maabig, kayari na aral et nainawaan tan apabiskeg so amin ya inmatendi.—Mat. 11:28; Gawa 15:32.
Maligen a Pasen
17. (a) Akin a nagkalalo lan importante natan a saray pantitipon et makaligliwa? (b) Antoy nagawaan mo pian makapabiskeg so aral? (Nengnengen so kahon ya “Samploran Paraan Pian Napabiskeg Ka tan Saray Arum Diad Aral.”)
17 Legan a lalon onuuges so mundo nen Satanas, kaukolan tayon seguroen a saray pantitipon et lapuay kaligenan, a pakaligliwaan na amin. (1 Tes. 5:11) Walay sakey a sanasawan dinmalan ed mair-irap a subok diad loob na pigaran taon. Oniay inkuan na asawan bii: “No wala kami’d Kingdom Hall, singa kami aampopoen nen Jehova. Sanlegan min wadman kaiba ray agagi, say pakalikna mi et singa sasakbaten nen Jehova iray pakakabelatan mi, tan magmamaliw kamin kalmado.” (Sal. 55:22) Komon ta napaseseg tan naligliwa met so amin ya onatendi ed aral tayo. Pian ontan so nagawa, itultuloy tayon sumpalen so betang tayon pabiskegey arum ed aral.
[Saray paimano ed leksab]
^ par. 1 Arum ed saray kabiangan na inmunan siglo a Kristianon pantitipon et impasakbay ya naandi. Alimbawa, agtayo la natan ‘mansasalita na nanduruman lenguahe’ odino “manpropropesiya.” (1 Cor. 13:8; 14:5) Anggaman ontan, tutulongan itayo na saray bilin nen Pablo no panon ya idaulo natan iray Kristianon pantitipon.
^ par. 11 Pian napaaligwas tayoy panagkomento tayo ed aral, nengnengen iray suhestion ed Say Panag-Bantayan, Setyembre 1, 2003, pahina 19-22.
^ par. 13 No nipaakar ed pandumaan na “pamaseseg” tan “panligliwa,” impaliwawa na Vine’s Expository Dictionary of Old and New Testament Words a say Griegon salita ya impatalos a “panligliwa” et manutukoy ed “mas aralem ya panangiyansakit nen say [panamaseseg].”—Ikompara so Juan 11:19.
^ par. 14 Nayarin saya ‘may inkagawa ya tinukoy nen Pablo ed saginonor sanen inkuan ton “nampanengneng [si Jesus] ed masulok a limanlasus.”—1 Cor. 15:6.
Antoy Ebat Mo?
• Panon kaimportante iray aral?
• Akin a saray komento ed aral et makatulong na baleg “pian napabiskeg so kongregasyon”?
• Antoy naaralan tayo ed samay inyuksoy nen Jesus a pantitipon?
[Tepetepet Parad Panagaral]
[Kahon/Saray litrato ed pahina 22, 23]
SAMPLORAN PARAAN PIAN NAPABISKEG KA TAN SARAY ARUM DIAD ARAL
Manparaan. Sano masakbay mo lan aralen so materyal a pantongtongan ed Kingdom Hall, mas magmaliw kan interesado ed aral tan agmo itan bastabasta nalingwanan.
Regular ya onatendi. Lapud mas napaseseg so amin ya presente no dakel so miaral, baleg so nagawaan na iyatendim.
Onsabi’d dugan oras. No akayurong ka la sakbay ya onggapoy aral, makapibiang ka ed panlukas a kanta tan pikakasi, a kabiangan na panagdayew ed si Jehova.
Awiten iray nakaukolan. Awit moy Bibliam tan saray publikasyon ya usaren ed pantitipon pian natumbok moy aaralen tan mas natalosan mo itan.
Agmanpapaabala. Singa bilang, dia la’d kayari aral so pambasam ed saray text message, aliwan legan na aral. Diad ontan et iiyan mo’d dugan pasen iray personal ya aktibidad mo.
Mibiang. No mas dakel so komento, mas dakel met so napaseseg tan napabiskeg ed nanduruman balikas na pananisia.
Mankomenton antikey. Naikdan na pankanawnawa so mas dakel ni a makapankomento.
Gawaen iray asainmin. No walay betang mo ed Teokratikon Eskuelaan Parad Ministeryo odino Pantitipon ed Panagserbi, iparaan a maong, masakbay lan ipasal, tan anggad posible et agmo kakanselaey asainmin mo.
Mangomenda. Ibagam ed saray walaan na parte ed aral odino ed saray nankomento ya aapresyaen moy sagpot da.
Milimog. Say makaaron panangibano tan makapabiskeg ya pantotongtong, antis tan kayari aral, et sakey nin lapuan na liket tan pakagunggonaan na saray inmatendi.