Panagbaraan​—Antoy Panmoria nen Jehova ed Satan?

“SAY bii ya inter mo ya ibak, inikdan to ak na bunga, et angan ak,” so inkuan na laki. “Say uleg pinalingo to ak, et angan ak,” so inyebat na bii. Sarayan balikas na inmunan atateng tayo, si Adan tan Eva, so sankaunaan ed abayag lan rekord na panagbaraan na totoo.​—Gen. 3:12, 13.

Ginagala nen Adan tan Eva so ag-ontulok ed si Jehova, kanian dinusa to ra, tan napatnagan ed saya ya agto inawat iray rason da’d sikato. (Gen. 3:16-19) Labay kasin ibaga na saya a parad si Jehova et panagbaraan labat so amin a panagrason? Odino walaray makatunongan met a rason? Pian naebatan itan, amtaen tayo no akin a manggagaway baraan so sakey.

Manggagaway baraan so sakey no walay ginawa ton aliwa, walay agto agawaan, odino no walay agto labay a gawaen. Aliwa iyan makatunongan a basiyan pian say sakey et naperdona. Singa ed samay ginawa di Adan tan Eva, manbabaraan so arum pian niyamot so tuan motibo ra. Tan wala met so arum a labay dan paliisay makapuy a resulta na ginawa ra kanian igagawaan day baraan.

Seguroen tayon ag-itayo manbabaraan no say nalalanor et say panaglingkor tayo ed Dios. Agtayo ‘papalikdoey inkasikatayo lapud palson panagkatunongan.’ (Sant. 1:22) Aralen tayo pa sirin iray alimbawa tan prinsipyo diad Biblia ya ontulong ed sikatayon ‘seguroen a naynay no antoy makapaliket ed Katawan.’​—Efe. 5:10.

No Antoy Iilaloan na Dios a Gawaen Tayo

Nabasa tayo ed Salita na Dios iray espisipikon ganggan a kaukolan tayon unoren bilang lingkor nen Jehova. Alimbawa, samay instruksion nen Kristo ya ‘onla kayo tan bangatan iray totoo ed amin a nasyones’ et siansia nin nepeg ya unoren na amin a tuan patumbok to. (Mat. 28:19, 20) Diad tua, ontan la kaimportante so pangunor ed satan kanian oniay imbaga nen apostol Pablo: “Pakaskasi ak no agko inyabawag so maong a balita!”​—1 Cor. 9:16.

Balet, walara imay abayag tayo lan iyaaralan na Biblia a natatakot odino nababaingan ni a mangipulong ed maong a balita na Panarian. (Mat. 24:14) Wala met iramay dati lan manpupulong balet ta tinmunda ra. Antoray kaslakan ya irarason na sarayan indibidual? Antoy reaksion nen Jehova ed saramay lingkor to nensaman a nambaraan sanen walaray espisipikon ingganggan to ed sikara?

Saray Maslak ya Ibabaraan na Arum

“Mair-irap.” Singa mair-irap so pampulong lalo la no say sakey et sipor lan mabaing odino matakot. Nengnengen tayo pa balet no antoy naaralan tayo’d alimbawa nen Jonas. Sikatoy naikdan na asainmin a parad sikato et mair-irap​—ingganggan nen Jehova ya iyabawag to so asingger lan kaderal na Ninive. Say Ninive et kabisera na Asirya, tan saray Asiryano et kabkabat a marukruksa. Kanian agla pankelawan no akin a natatakot si Jonas ya onla’d Ninive. Nayarin naisip ton, ‘Panon ko kasin pasakbayan irayan totoo? Ompan anto ni gawaen da’d siak.’ Imbatikan to laingen so asainmin to. Balet ta ag-inawat nen Jehova so baraan nen Jonas.  Imbes, sikatoy ingganggan lamet nen Jehova a pulongan iray taga Ninive. Diad sayan pankanawnawa et makpel lan sinumpal nen Jonas so asainmin to, tan benendisyonan nen Jehova so kimey to.​—Jon. 1:1-3; 3:3, 4, 10.

No iisipen mon mair-irap so manpulong, tandaan mon “amin a bengatla et posible ed Dios.” (Mar. 10:27) Makaseguro ka a pakasilen nen Jehova so linawam no itultuloy mon kerewen so tulong to tan bendisyonan to ka no makpel mon sumpalen so ministeryom.​—Luc. 11:9-13.

“Agko labay.” Panon to balet no anggapo’d pusom so pampulong? Nonot mon sarag nen Jehova ya iter ed sika so pampilalek. Oniay imbaga nen Pablo: “Say Dios so mamapabiskeg ed sikayo, ya iiter to ed sikayo so pampilalek tan pakayarin manggaway panlabayan to.” (Fil. 2:13) Kanian sarag mon kerewen ed si Jehova a tulongan to ka pian labayen moy panggaway linawa to. Ontan so ginawa nen Arin David. Oniay pikakasi to’d si Jehova: “Ibangat mo ak pan manlingkor ed sika diad interon pusok.” (Sal. 86:11, Maung a Balita) Magunaet mo sirin ya ipikasi ed si Jehova a pakiwasen to kan pilaleken so panggawa na makapaliket ed sikato.

Tua, no maminsan, lapud naksawan odino walay pakakadismayaan tayo et kaukolan tayon pilitey sarili tayon miaral odino manpulong. Labay kasin ibaga na saya ya agtayon talaga inaroy Jehova? Andi. Nensaman et nansagpot pa met a maong iray lingkor na Dios pian nagawaan day linawa to. Alimbawa, imbaga nen Pablo a singa to ‘pepekpekey laman to’ pian naunor toy ganggan na Dios. (1 Cor. 9:26, 27) Kanian anggan no maminsan et piliten tayoy sarili tayo ed ministeryo, seguradon bendisyonan itayo nen Jehova. Akin? On ta gagawaen tayoy linawa na Dios lapud dugan rason​—inaro tayoy Jehova. No ontan so gagawaen tayo, papaneknekan tayon matila si Satanas diad samay imbaga ton agmanmatoor iray lingkor na Dios sano nasusubok ira.​—Job 2:4.

“Busy ak.” No agka makakapanpulong lapud lanang a dakel so gagawaen mo, importantin usisaen mo lamet iray prayuridad mo. “Itultuloy yo sirin ya anapen nin unona so panarian,” kuan nen Jesus. (Mat. 6:33) Pian niyaplikam itan a prinsipyo, nayarin kaukolan mon pasimpliey bilay mo odino bawasan moy oras na panagrelaks tan usar mo itan ed ministeryo. Siempre, kaukolan tayo met so manrelaks tan manliket ed bilay, balet aliwa iratan a makatunongan a rason pian agtayo la manpulong. Anggapo lay mas manunaan ed bilay na sakey a lingkor na Dios noag say Panarian.

“Agko sarag.” Ompan isipen mo ya agka kualipikadon mangipulong ed maong a balita. Inisip na pigaran lingkor nen Jehova nensaman ya agda sarag a sumpalen so asainmin ya inter nen Jehova ed sikara. Say alimbawa ed saya et si Moises.  Sanen inikdan nen Jehova na asainmin, oniay imbaga to: “Katawan, . . . aliwa ak a marunong a mansalita, . . . Makapuy ak a mansalita tan ata-ata ak.” Anggano impaseguro nen Jehova a tulongan to, onia nin siansiay ebat nen Moises: “Aliwan siak, Katawan, so ibakim. Say sananey pa lan too.” (Exo. 4:10-13, MB) Antoy reaksion nen Jehova?

Si Moises nin siansia so imbaki to. Balet ta tinuro toy Aaron pian tulongay Moises ed asainmin to. (Exo. 4:14-17) Diad inlalabas na taon, sinuportaan nen Jehova si Moises tan inter Toy antokaman a nakaukolan to pian nasumpal to ray kimey a pagagawa na Dios. Kanian makapanmatalek ka met natan a pakiwasen nen Jehova iray kapananisiaan mo pian natulongan kan sumpalen so ministeryom. Nagkalalo’d amin, papaseguroan itayo na Salita na Dios a si Jehova a mismo so manggawa ed sikatayon kualipikado pian nasumpal tayoy kimey ya ingganggan to.​—2 Cor. 3:5; nengnengen so kahon ya  “Sankaliketan Iran Taon na Bilay Ko.”

“Asakitay liknaan ko.” Walaray tinmunda lan manpulong odino miaral lapud asakitan na arum so liknaan da. Iisipen dan anggano ombetel ira’d espiritual et natalosan nen Jehova ta makatunongan met so rason da. Tua, makapadismaya no asakitan na arum so liknaan tayo. Balet ta makatunongan kasi itan a rason pian ontunda tayo la’d espiritual iran aktibidad? Nayarin asakitay liknaan di Pablo tan Bernabe sanen walay agda nampaknaan a sengegay ‘impansangsangan da.’ (Gawa 15:39) Kasin lapud  satan et tinmunda la ra’d ministeryo ra? Andin balot!

Ontan met natan. No bilang ta asakitan ka na kapananisiaan mo, tandaan mon say kalaban mo et aliwan say agperpekton agim, noag si Satanas, a labay to kan “buagen.” Balet ag-itan nagawaan na Diablo no ‘ontalindeg ka sumpad sikato, a pabiskegen moy pananisiam.’ (1 Ped. 5:8, 9; Gal. 5:15) No mabiskeg so pananisiam, sarasarag mon labanay impakadismaya.​—Roma 9:33.

Panon To No Limitado Lay Nagawaan Tayo?

Diad sarayan kaslakan a baraan a kinonsidera tayo et mapatnag ya anggapoy Makasulatan a rason pian agtayo unoren iray espisipikon ganggan nen Jehova, kaiba lay panagpulong na maong a balita. Anggaman ontan, nayarin walay makatunongan a rason no akin a limitadoy nagagawaan tayo’d ministeryo. Ompan wala ni ray arum a Makasulatan a responsabilidad tayo kanian nalilimitaan so panaon a nigagana tayo’d panagpulong. Tan ompan no maminsan et nababanalan odino mansasakit itayo kanian anggano labay tayon malaem ni komoy nagawaan tayo et agtayo sarag. Balet, papaseguroan itayo na Salita na Dios ya amta nen Jehova so walad puso tayo tan ikokonsidera to iray limitasyon tayo.​—Sal. 103:14; 2 Cor. 8:12.

Agtayo sirin uukomen so sarili tayo odino say arum no nipaakar ed sayan bengatla. Insulat nen apostol Pablo: “Siopa ka a mangukom ed lingkor ed abung na arum? Balanglan sikatoy onalagey odino natumba, say katawan to so makauley ed satan.” (Roma 14:4) Imbes ya ikompara tayoy sirkumstansya tayo ed arum, nepeg tayon tandaan a “kada sakey ed sikatayo et mikuentaan ed Dios parad sikaton dili.” (Roma 14:12; Gal. 6:4, 5) Komon ta “malinis so konsiensia” tayo sano diad pikakasi et ibaga tayo’d si Jehova iray rason tayo.​—Heb. 13:18.

No Akin a Makapaliket so Panlingkor ed si Jehova

Amin tayo et maliket a makapanlingkor ed si Jehova ta saray pagagawa to et makatunongan tan sarag tayon gawaen​—antokaman ni sirkumstansya tayo. Panon tayon nibaga itan?

Ibabaga na Salita na Dios: “Agmo abalaen so maong ed saray kanepegan to, sano wala ed pakayari na limam so panggawa.” (Uli. 3:27) Antoy naaralan mo ed sayan teksto nipaakar ed saray pagagawa nen Jehova? Ag-igaganggan nen Jehova a paraan moy pakayari na lima na kaagian mo. Imbes, labay nen Jehova a sikatoy lingkoran mo unong ed “pakayari na limam.” On, balang sakey ed sikatayo​—makapuy man o mabiskeg so lima to​—et makapanlingkor ed si Jehova diad interon puso.​—Luc. 10:27; Col. 3:23.

[Kahon/Litrato ed pahina 14]

 “Sankaliketan Iran Taon na Bilay Ko”

Anggano walay sakit tayo odino problema ed emosyon, agtampol iisipen ya agtayo la sigpot a makapibiang ed ministeryo. Konsideraen tayo pay alimbawa na agin taga Canada a si Ernest.

Walay deperensya nen Ernest ed panagsalita tan mabapbaing. Sanen walay agawan aksidente a naapektoay beneg to, agla makapantrabaho bilang construction worker. Anggaman ontan, lapud saya et sarag to lan padaakey ministeryo to. Sikatoy apakiwas sanen diad aral et impaseseg so pan-auxiliary payunir. Balet ta inisip ton agkualipikado ed satan.

Pian napaneknekan nen Ernest ya agto nayariay man-auxiliary payunir, nan-aplay bilang auxiliary payunir a sakey bulan. Kalabas na sakey bulan, agmakapanisian asarag to. Inisip to balet ya, ‘Agko la ‘ya nagawaan lamet.’ Pian napaneknekan itan et nan-aplay lamet ed tinmumbok a bulan, tan asarag to lamet!

Sakey taon ya nan-auxiliary payunir si Ernest, balet imbaga ton, “Segsegurado ak ya agko nayariay man-regular payunir.” Pian napaneknekan lamet ya agto itan nayarian, nan-aplay bilang regular payunir. Aglamet makapanisia ta akapan-regular payunir na sakey taon. Nandesisyon ya itultuloy to itan, tan nanliketan toy duay taon ya impanlingkor to bilang regular payunir, anggad impatey to lapud komplikasyon ed samay impakaaksidente to. Antis balet na impatey to, oniay lanang ton ibabaga tekep na lua ed saray ombibisita ed sikato, “Saramay taon ya nanlingkor ak ed si Jehova bilang payunir so sankaliketan iran taon na bilay ko.”

[Litrato ed pahina 13]

Sarag tayon lampasan so antokaman a makasbel ed sikatayo diad ministeryo

[Litrato ed pahina 15]

Naliliketan si Jehova no interon kamarerwa so panlilingkor tayo, a gagawaen tayoy anggaay nayarian tayo