“Tinmulong Iya Pian Nasabik so Puso na Totoo”

WALAY agawan international conference nipaakar ed nanduruman isyu ed interon mundo diad syudad ed Brazil a Porto Alegre. Nilibon totoo a nanlalapud 135 a bansa so inmatendi. Legan na saray intermision, inasinggeran na saray Tasi diad kongregasyon ed Porto Alegre iray delegado pian ipulong ed sikara so mensahe na Panarian. Panon iran akapitalosan?

“Inusar mi so bokletan Good News for People of All Nations,” so kuan na sakey a payunir a si Elizabete. Inyarum to ni: “Dakel ed saramay delegado et natan da labat naamtaan so nipaakar ed maong a balita na Panarian balet ta madengedengel ira’d mensahe tayo. Akapitongtong kami’d saray delegadon taga Bolivia, China, Pransya, India, Israel, tan Nigeria. Walaray awit min literaturan base ed Biblia diad lenguahe na arum ed saray delegado tan malikeliket dan inawat iratan.”

Diad Mexico, inusar met na sakey a payunir a si Raúl iyan bokleta tan marakep so resulta. Aminsan et inasinggeran to so 80 años ya Arabo a kakkapatey na asawa to. Kayarin binasa na samay laki so pahina ya pakabasaay mensahe na Panarian diad lenguahen Arabic, sikatoy akaakis ed liket. Akin? Atenyeg so liknaan to sanen abasa to’d sarili ton lenguahe imay sipan na Dios ya naandi lay ipapatey, unong ed Apocalipsis 21:3, 4. Wala met imay pankanawnawa a sanen mani-informal witnessing si Raúl et akabat to so sakey a lakin Portuguese ya inateyan na anak a laki. Impabasa nen Raúl ed sikato imay bokleta diad pahina na lenguahen Portuguese. Kayari ton binasa, imbaga na saman a laki a labay to ni makaaral a maong nipaakar ed Biblia, tan inawat toy panangiyaral na Biblia.

Inusar nen Raúl so Good News for People of All Nations pian napulongan to iray mansasalita na Armenian, Chinese, Ingles, Pranses, German, Hindi, Korean, Mixe, Persian, Russian, tan Zapotec. Oniay kuan nen Raúl: “Apaneknekan kon mausa-usar iyan bokleta diad ministeryok. Tinmulong iya pian nasabik so puso na totoo anggano agak makapansalita na lenguahe ra.”

Ondarakel lan ondarakel so oonla tan manaayam ed arum a bansa, kanian mas dakel so pankanawnawan makaabet itayo na totoon mansasalita na arum a lenguahe. Nipulong tayo’d sikara so mensahe na Panarian no usaren tayo so bokletan Good News for People of All Nations. Kasin awit mon lanang itan?

[Saray litrato ed pahina 32]

Uusaren nen Raúl so bokleta pian nasabi toy puso na totoo