‘Akila ed Sikato Iray Agawaan To’

NEN Mierkoles na kabuasan, Hunyo 9, 2010, anampot so bilay diad dalin nen Theodore Jaracz, a membro na Mananguley ya Ulop na saray Tasi nen Jehova. Sikatoy manedad na 84, tan diad loob na 53 a taon et akaiba toy asawa ton si Melita. Walay sakey ya agi ton bii, tan taloran kaanakan to.

Si Brother Jaracz et inyanak nen Setyembre 28, 1925, diad Pike County, Kentucky, U.S.A. Sikatoy nampabautismo nen Agosto 10, 1941, diad edad a 15. Sanen 17 to la, sikatoy nanregular payunir, tan satan lay gapoan na ngalngali 67 a taon na sigpot panaon ya impanlingkor to.

Nen 1946, sanen 20 años la nen Brother Jaracz, sikatoy akaiba ed komapiton klase na Watchtower Bible School of Gilead. Kayari impangraduar to, sikatoy niasain a manlingkor bilang ombiabiahen manangasikaso diad Cleveland, Ohio, U.S.A. Nen 1951, imbaki si Brother Jaracz ed Australia pian asikasoen so sangan opisina diman. Inkuan na 1983 Yearbook of Jehovah’s Witnesses ya “apabiskeg a maong [nen Brother Jaracz] iray agagi ed satan a bansa lapud seseg to ed teokratikon uksoyan tan maabig ya panangidaulo ed kimey.”

Kapawil to ed Estados Unidos, nankasal ira nen Melita Lasko nen Disyembre 10, 1956. Kayari kasal da, makulikuli iran nanlingkor ed maaw-awang a teritorya ra bilang manangasikaso na saray sirkito tan distrito diad Estados Unidos. Diad pansamposampot na 1974, naimbitaan si Brother Jaracz a magmaliw a membro na Mananguley ya Ulop na saray Tasi nen Jehova.

Agnalinglingwanan si Brother Jaracz bilang dedikado tan matoor a lingkor nen Jehova, a sigpot puson akasentroy imano to ed saray teokratikon kimey. Sikatoy maaro tan maasikason asawa, tan maespiritual a too ya mangiyuuna ed pankaabigan na arum. (1 Cor. 13:4, 5) Sayan panamabli to et apatnagan ed pirmin pilalek to a tratoen so amin diad patas tan mapangasin paraan. Niarum ni, say agmanguuman a panangaro tan panangiyansakit to ed totoo et anengneng ed inkaseseg to’d ministeryo.

Anggaman maermen tayon maong lapud impakaandi na makulikuli tan maaron membro na pamilyan Bethel tan sankamundoan ya impanaagi, panliketan tayoy matoor ya impanlingkor nen Brother Jaracz ed si Jehova diad dakel a dekada. Matalek itayo ya ‘apaneknekan toy katooran to anggad patey, tan inter ed sikato so korona na bilay.’ (Apo. 2:10) Makaseguro itayo met ya ‘akila ed sikato iray agawaan to.’​—Apo. 14:13.