Dedengelen nen Jehova so Akis na Naeermenan

NAOBSERBAAN nen Solomon, say ari ed Israel nensaman, a say “panaon tan ag-iilaloan a nagawa et nasasagmak [tayon] amin.” (Ecl. 9:11, NW) Nayarin walay naeksperiensya tayon trahedya odino mairap a subok. Singa bilang, say biglan ipatey na kapamilya et mair-irap ya awaten. Kalabas na pigaran simba o bulan, nayarin pinasyay ermen na sakey. Ompan lapud sobran pakakagonigon et ipasen ton agto kanepegay manpikasi ed si Jehova.

Diad ontan a situasyon, kaukolan toy panamabiskeg, konsiderasyon, tan panangaro. Oniay panamaseguron inkanta nen salmistan David: “Si Jehova sampaten to so saray amin a niparukol, tan itagey to so saray amin a naruknot [odino, nituek].” (Sal. 145:14) Ibabaga na Biblia ed sikatayo a ‘saray mata nen Jehova et ombatik dia tan diman ed amin a dalin, pian mabiskeg ya ontulong ed saray ayadyari puso ra ed sikato.’ (2 Awa. 16:9) Sikatoy wala ed saray “napapairap tan niyabeba ed espiritu, pian pakasilen . . . so liknaan na saray mapaabeba tan pakasilen . . . so puso na saramay napapairap.” (Isa. 57:15, NW) Panon ya susuportaan tan liligliwaen nen Jehova iray napapairap tan niyabeba ed espiritu?

‘Salita ed Manepeg a Panaon’

Say sakey a paraan ya iiter nen Jehova so tulong diad dugan panaon et panamegley na saray kaagian. Bibilinen iray Kristiano ya ‘ligliwaen da iramay maneermen.’ (1 Tes. 5:14) Say panangiyansakit tan panangaron ibabalikas na mapangasin agagi et makaligliwa ed toon nagogonigon tan naeermenan. Baleg so nagawaan na anggan say antikey labat a panamaseseg pian onligsa iray nadi-depress. Nayarin manlapu itan a mapangasin panamaseseg ed sakey ya dinmalan la’d ontan iran impakagonigon, odino diad marundunong ya obserbasyon na sakey ya eksperiensyadon kaaro. Panamegley na sarayan praktikal a tulong, napabiskeg nen Jehova so naeermenan.

Alaen pan alimbawa so situasyon na kapankasal ya elder a si Alex. Agto inilaloay impatey na asawa to lapud sakit ya agla natambal. Sikatoy pinaseseg na sakey a mapangasin ombiabiahe a manangasikaso. Sayan manangasikaso et abalo met balet ta akiasawa lamet. Inistorya to’d si Alex ya talagan nilikna toy impakaandi nen akulaw to. Imbaga ton sano kalimog to ray agagi diad ministeryo tan aral, onlelemew so liknaan to. Balet, no akasempet la tan ikapot to lay puerta,  begtebegtew lamet. Oniay inkuan nen Alex: “Akakkainawa ak sanen naamtaan kon normal labat manayay dadalanen ko tan naeeksperiensya met iya na arum.” On, ‘say salita ed manepeg a panaon’ et talagan makaligliwa ed saray nagogonigon.​—Uli. 15:23.

Wala ni sakey ya elder ya amaseseg ed si Alex. Lapud wala ray kabat na sayan elder ya inateyan met na asawa, masimpatya tan maad-aro ton imbaga ed si Alex ya amta nen Jehova so nalilikna tan nakaukolan to. “No kalabas na pigay bulan tan taon et kaukolan moy kapareha, say maaron probisyon nen Jehova natan et say pangasawa lamet,” so kuan na elder. Siempre, anggano labay na sakey so mangasawa lamet, walaray agla angasawa lapud nanduruman rason. Balet lapud samay imbaga na agi, inkuan nen Alex: “Sanen nipanonot ed siak ya probisyon itan manaya nen Jehova, nakal so negatibon panagnonot ko ya agak manmamatoor ed asawak odino diad uksoyan nen Jehova a panangasawa no mangasawa ak lamet diad arapen.”​—1 Cor. 7:8, 9, 39.

Oniay inkuan nen salmistan David, ya akaeksperiensyan mismo na dakel a subok tan kairapan: “Saray mata nen Jehova wala ra ed matunong a too, tan saray layag to akalukas ira ed saray akis da.” (Sal. 34:15) Seguradon ebatan nen Jehova so akis na maneermen, diad dugan panaon, panamegley na makabat tan makatebek iran panamaseseg na mapangasi tan maespiritual ya agagi. Satan a probisyon et makanakana tan praktikal.

Tulong Panamegley na Kristianon Pantitipon

No maer-ermen so sakey, mainomay toy mannonot na aliwa tan iyarawi to laingey sarili to. Kanian, oniay bilin na Uliran 18:1: “Say onsian anapen to so dili a pilalek to, tan misangsangan sumpa ed amin ya aralem a kakabatan.” Inamin nen Alex: “Sano naandian kay asawa, puros negatiboy onseksek ed nonot mo.” No maminsan et itetepet to’d sarili to: “‘Wala kasi agko agawaan? Kulang ak kasi na konsiderasyon?’ Agko labay so manbukbukor. Labay ko walay kaibak. Mair-irap  kon kontroley nonot ko ta inagew-agew a nipapanonot ed siak ya bukbukor ko.”

Nagkalalo lan nakaukolan na sakey a pinasyan nagogonigon so makapabiskeg a panlilimog. Itatarya iya diad saray aral ed kongregasyon. Naaawat tayo ditan so positibo tan makapabiskeg iran simbawa na Dios.

Tutulongan itayo na pantitipon pian balanse panmoria tayo’d situasyon tayo. Legan tayon tatalinengen tan dadalepdepen iray teksto ed Biblia, niyaapasakey so nonot tayo, aliwan diad saray pakakagonigonan ti’ labat, noagta diad saray isyu ya talagan importante. Salanti, say kiyalangon na inkasoberano nen Jehova tan say kirayewan na ngaran to. Niarum ni, legan ya makakaawat tayo na espiritual iran bilin, napapaseseg tayo ta anggan ag-amta na arum so pakakagonigon tayo odino agda natatalosay nalilikna tayo, seguradon amta tan natatalosan itan nen Jehova. Amta to a “lapu ed ermen na puso say espiritu nabuyak.” (Uli. 15:13) Labay itayon tulongan na tuan Dios, tan saya so mamapaligsa tan mamapabiskeg ed sikatayo pian makapan-anos.​—Sal. 27:14.

Sanen si Arin David et dinesdes a maong na saray kalaban to, inyugaog to’d Dios: “Say espirituk nalmay dia ed loob ko; say pusok dia ed loob ko ataynan.” (Sal. 143:4) Makapakapuy a tua iray mair-irap a problema, a singa agmakalikna ingey puso tayo. Nayarin naproblema tayo lapud sakit odino ag-onaabig a beblay na laman. Balet, makapanmatalek tayo ya tulongan itayo nen Jehova a makapansungdo. (Sal. 41:1-3) Anggaman agmamilagron mamapaabig so Dios natan, iikdan to na karunongan tan pakpel so maniirap pian nayarian toy situasyon to. Tandaan a sanen nairapan si David ed saray subok, sikatoy nampatulong ed si Jehova. “Nanodnonotan ko so saray inmuna ya agew; manumameng ak ed amin a gawagawam; mantaltaliwa ak ed gawa na limalimam,” so inkanta to.​—Sal. 143:5.

Sarayan pinuyanan a balikas et inabuloyan nen Jehova ya nilaktip ed Salita to, say Biblia. Pakapatnagan itan a natatalosan toy nalilikna tayo. Garantiya itan ya dedengelen to ray ey-ey tayo. No patulongan tayo’d si Jehova, aliling to et “bembenan” to itayo.​—Sal. 55:22.

‘Mikasi ya Andi Tunda’

Inkuan na Santiago 4:8: “Onapit kayo ed Dios, tan sikatoy onapit ed sikayo.” Say sakey a paraan pian makaasingger tayo ed Dios et panamegley na pikakasi. Bibilinen itayo nen apostol Pablo ya ‘mikasin andi tunda.’ (1 Tes. 5:17) “Say espiritu a mismo so ontulong ed sikatayo anggano agtayo amta so ibalikas tayo ed saray ey-ey tayo.” (Roma 8:26, 27) Seguradon natatalosan nen Jehova so nalilikna tayo.

Sakey si Monika ed saray walaan na ontan ya maapit a relasyon ed si Jehova, inkuanto: “Panamegley na pikakasi, panagbasay Biblia, tan personal a panagaral, aliknak a nagmaliw a sankaapitan a Kaarok si Jehova. Lapud sikatoy nagmaliw a tudtua ed siak, sankaliknak ya agto ak papaulyanan. Naliligliwa ak ya anggano agko nibalikas so naliliknak, natatalosan to ak. Amtak ya saray kaabigan tan panamendisyon to et agmangangga.”

Awaten tayo sirin so maaro tan makaligliwan panamaseseg na saray kaagian, iyaplikay mapangasin simbawa tan makapabiskeg iran panonot a narerengel tayo ed aral, tan diad pikakasi et ibalikas ed si Jehova so walad puso tayo. Sarayan nipanpanaon a probisyon et paraan nen Jehova pian nipanengneng toy panangiyansakit to’d sikatayo. Oniay inkuan nen Alex base’d eksperiensya to: “No anamoten tayo iray intarya nen Jehova a Dios pian mansiansia itayon mabiskeg ed espiritual, nawalaan itayo na ‘pakayari a mas mabiskeg nen say pakayari na too’ pian nasungdoan so antokaman a subok.”​—2 Cor. 4:7.

[Kahon/Litrato ed pahina 18]

Ligliwa ed Naeermenan

Dakel so nabasa tayo ed salmo nipaakar ed liknaan na too tan nipaakar ed aminpigan panamaseguro nen Jehova a dedengelen toy akis na maneermen lapud pinasyan gonigon. Imanoen pa irayan teksto:

“Dia ed kairapan ko tinawag ko si Jehova, tan inmakis ak ed Dios ko. Sikato nadngel to so boses ko ed paway na templo to, tan say akis ko sinmabi ed saray layag to.”​—Sal. 18:6.

“Si Jehova asingger ed saray wala ed kipapasen na sakey a nabtagan na puso; tan ilaban to so totoo a wala ed sakey a kamarerwa a masakit ed panagbabawi.”​—Sal. 34:18.

“Sikato [Jehova] paabigen to so saray binmetag ed puso, tan bedberen to so sugasugat da.”​—Sal. 147:3.

[Litrato ed pahina 17]

Talagan makaligliwa so ‘manepeg a salita’ diad panaon na gonigon!