Tepetepet na Saray Manbabasa

Imbaga nen Jesus: “Magmaliw kayo . . . ya ayadyari, unong a say Ama yon walad tawen et ayadyari.” Panon a ‘magmaliw ya ayadyari’ so totoo natan?​—Mat. 5:48.

Pian naebatan itan, kaukolan tayon talosan no panon ya inusar iray salitan “ayadyari” tan “inkayadyari” diad Biblia. Aliwan amin ya indeskribe na Biblia ya “ayadyari” et perpekto ed amin ya aspekto. Siempre, si Jehova et sigpot ya ayadyari. Balet, nayari met ya nibagan ayadyari iray totoo odino bengabengatla diad relatibo odino limitadon paraan labat. Saray Hebreo tan Griegon salita diad Biblia ya impatalos ya “ayadyari” et kaslakan lan mankabaliksan na “anggapoy pankulangan,” odino “andiay pakabalawan” base ed estandarte na sakey a walad pakauley.

Si Adan tan Eva et pinalsan ayadyari ed moral, espiritual, tan pisikal. Perpekto ira base ed estandarte na Amalsa ed sikara. Lapud insunggay da, agda atumbok iyan estandarte tan sirin et abalang so inkaperpekto a parad sikara tan saray ilalak da. Kanian, impatawir nen Adan so kasalanan, ag-inkayadyari, tan patey ed totoo.​—Roma 5:12.

Balet, unong ya impalinew nen Jesus diad Sermon to ed Palandey, anggan say ag-ayadyarin totoo et nayarin magmaliw ya ayadyari diad relatibon paraan. Diad satan ya paliwawa, inletneg toy estandarte parad ayadyarin panangaro. Saya so klase na aro ya impanengneng na Dios ed totoo. Inkuan nen Jesus: “Itultuloy yon aroen iray kabusol yo tan ipikasi iramay mamapasegsegang ed sikayo, ta pian napaneknekan yo a sikayo iray ananak na Ama yon walad tawen, lapud papasinagen to so agew to ed saray mauges tan maong a totoo tan papepelagen to so uran ed saray matunong tan agmatunong.” (Mat. 5:44, 45) No ipanengneng na saray disipulo nen Jesus iyan klase na panangaro, aaligen day ayadyarin ehemplo na Dios.

Natan, panggugunaetan na saray Tasi nen Jehova ed interon mundo a pansiansiaen so ontan ya nikadkaduman panangaro ed arum. Pilalek dan tulongan so amin a totoo a mangamta ed susto tan tuan ibabangat na Biblia antokaman so binalegan, poli, tan relihyon na saraya. Diad 236 a bansa, saray Tasi et mangiyaaral na Biblia ed masulok a 7,000,000 ya interesadon totoo.

Intepet nen Jesus: “No saramay mangaaro labat ed sikayo so aaroen yo, anto so tumang yo? Agta ontan met so gagawaen na saray managsingil na buis? Tan no saray agagi yo labat so ibabano yo, wala ta so nikadkaduman gagawaen yo? Agta ontan met so gagawaen na saray totoo na nasyones?” (Mat. 5:46, 47) Saray tuan Kristiano et agmanangidumaduma ed totoon abebay aral da tan dumay poli ra; nisay aaroen da labat iramay mangaaro ed sikara. Imbes, tutulongan da ray mairap bilay tan mansasakit, ugaw tan matatken. Diad ontan et naaalig day panangaro nen Jehova tan sirin et ayadyari ra diad relatibon paraan.

Kasin nipawil ni so inkayadyarin abalang nen Adan? On, panamegley na pananisia ed dondon bagat nen Jesus, magmaliw a sigpot ya ayadyari so matulok a totoo legan na Sanlibon Taon ya Uley nen Kristo, sano ‘deralen la na Anak na Dios iray kimey na Diablo.’​—1 Juan 3:8.