Agni Atrasado Pian Manserbi

Diad Málaga, España, walay sanina a parehon Ana so ngaran da a nampabautismo nen Disyembre 19, 2009. Kaiba ira ed 2,352 ya nampabautismo diad España nen 2009. Balet ta walay nikadkaduma ed sayan sanina​—say edad da. Samay ina et 107 años to la tan samay anak et 83!

Panon iran akasabi’d sayan punto ya nampabautismo ira bilang simbolo na dedikasyon da’d si Jehova? Nen bandad gapo na 1970’s, walay kaabay dan Tasi a mangiimbita’d samay anak ya Ana diad Panagaral na Kongregasyon ed Libro a gagawaen diad mismon abung to. Sagpaminsan ya onaatendi si Ana, balet ta agla inmaligwas lapud trabaho to.

Kalabas na samploy taon, walaray anak nen Ana ya nanaral na Biblia tan nagmaliw iran lingkor nen Jehova. Sakey ed sikara et si Mari Carmen. Sinagyat to lamet so interes nen ina to diad Biblia tan inawat nen ina to so panagaral na Biblia. Say bai nen Mari Carmen, samay mas matatken ya Ana, et nanaral met na Biblia. Asabi panaon, samploran membro na pamilya so nampabautismo.

Malikeliket iyan duaran Ana diad agew na bautismo ra. “Maomaong ed siak si Jehova, ta inabuloyan ton sikatoy nakabat ko,” so kuan na 107 años ya Ana. “Antis na Paraiso, labay kon lingkoray Jehova, gawaey linawa to, tan ipulong so maong a balita ed anggaay nayarian ko,” so kuan met nen anak to.

Say lalon mamapaliket ed sayan saninan abalo la et say pipiaral. “Anggapoy sasaewen da anggan sakey ya aral,” kuan na sakey ya elder ed kongregasyon da. “Lanang iran akaparaan a mankomento ed Panagaral na Panag-Bantayan.”

Ipapanonot na maabig ya alimbawa na sayan sanina imay balo ya nabasa’d Biblia ya manngaran met na Ana “ya agbalot onsasaew ed templo tan agew-labin manlilingkor tekep na panag-ayunal tan masimoon a panagpikasi.” Tan lapud satan et sikatoy apribilehyoan a nanengneng so ugaw nin si Jesus. (Luc. 2:36-38) Say edad la ed saman nen Ana et 84, balet ta siansia nin manlilingkor ed si Jehova, singa ed duaran kangaranan to natan.

Wala tay kanayon mon interesado ed mensahe na Biblia? Odino wala tay akabat mon maedad la ya madengedengel sano pupulongan mo? Ompan magmaliw met iran singa sarayan duaran Ana. On, anggano maedad la, agni atrasado pian manserbi ed tuan Dios, si Jehova.

[Blurb ed pahina 25]

“Maomaong ed siak si Jehova”

[Blurb ed pahina 25]

“Antis na Paraiso, labay kon lingkoray Jehova”