Nabendisyonan Panamegley na Arin Igigiya na Espirituy Dios!

“Say espiritu nen Jehova manayam naani ed tapew to [“mansiansia ed sikato,” NW].”​—ISA. 11:2.

1. Anto so imbaga na arum nipaakar ed saray problema’d mundo?

“DIAD sayan mundon magulogulo so politika, totoo, tan kaliberliber, panon ni kasin makapambilay so totoo ed onsublay ya 100 taon?” Saya so intepet na astrophysicist a si Stephen Hawking nen 2006. Inkuan na dyurnal a New Statesman: “Agtayo asolusyonan so kairapan nisay apawala so kareenan ed dalin. Diad tua, singa baliktad so agawaan tayo. Aliwan say agtayo nansagpot. Sinali tayo lay amin a klase na gobierno, manlapud komunismo anggad kapitalismo; sinali tayo met lay angiletneg na Liga na Nasyones tan nanggawa na nuklear iran armas pian napaliisay guerra. Dakel lay akilabanan tayon ‘guerra pian panganggaen so guerra,’ say abaloan tayo et amta tayo no panon a napatunda itan.”

2. Panon ya ipanengneng nen Jehova a sikato so makanepegan a Soberano ed interon dalin?

² Agla pankelawan na saray lingkor nen Jehova so ontan iran komento. Ibabaga na Biblia ya agpinalsa so too pian uleyan so inkasikato. (Jer. 10:23) Si Jehova labat so makanepegan a Soberano tayo. Kanian, sikato labat so makapangiletneg na estandarte ya unoren tayo, makapangibaga no antoy gagala na bilay tayo, tan makapangigiya pian natumbok tayo itan a gagala. Niarum ni, magano to lan panganggaen so agmatalonan uley na too. Ontan met, deralen to so amin ya agmanpapasakop ed kanepegan ton manuley tan mangiimpluensya ni’d arum a manpaaripen ed kasalanan, ed ag-inkayadyari, tan ed “dios na sayan sistema na mundo,” si Satanas ya Diablo.​—2 Cor. 4:4.

3. Antoy impasakbay nen Isaias nipaakar ed Mesias?

³ Diad balon mundo a Paraiso, ipanengneng nen Jehova so maaron pananguley to’d totoo panamegley na Mesianikon Panarian. (Dan. 7:13, 14) Oniay impropesiya nen Isaias nipaakar ed Ari na satan a Panarian: “Ompaway naani simit a manlapu ed sengeg nen Isai [odino Jesse], tan say sanga a manlapu ed lamot to manbunga naani. Et say espiritu nen Jehova manayam naani ed tapew to, say espiritu na kakabatan tan pakatalos, say espiritu na pananimbawa tan pakapanyari, say espiritu na pikakabat tan say takot ed Jehova.” (Isa. 11:1, 2) Panon a tinulongan na masanton espiritu na Dios so ‘simit a manlapu ed sengeg nen Jesse’ pian magmaliw a kualipikadon manuley ed totoo? Antoray bendisyon a nagamoran lapud pananguley to? Tan antoy nepeg tayon gawaen pian naawat iratan a bendisyon?

Tinulongan na Dios Pian Magmaliw a Kualipikadon Manuley

4-6. Antoy akatulong ed si Jesus pian makapanlingkor bilang makabat tan maabagey ya Ari, Atagey a Saserdote, tan Ukom?

⁴ Labay nen Jehova a saray totoon sakop to et magmaliw a perpekto diad panangiwanwan na peteg a makabat tan maabagey ya Ari, Atagey a Saserdote, tan Ukom. Kanian, pinili na Dios si Jesu-Kristo, a panamegley na masanton espiritu et pinagmaliw ton kualipikado parad sankaimportantian iran responsabilidad. Pantongtongan tayo iray pigaran rason no akin a segseguradon nagawaan nen Jesus iray inter na Dios a betang to.

 ⁵ Kabkabat a maong nen Jesus so Dios. Anggapo lay mas akankabat ed Ama noag say bogbogtong ya Anak, ta akapanulop ira ed loob na binilyon a taon. Legan na saraman a panaon, si Jesus et akaaral a maong ed si Jehova kanian sikatoy deneskribe ya “kaulibay na agnanengneng a Dios.” (Col. 1:15) Inkuan a mismo nen Jesus a say “akanengneng ed siak et anengneng to met lay Ama.”​—Juan 14:9.

⁶ Onkokomadua ed si Jehova, si Jesus so walaay sankalaknaban a pikakabat ed saray amin a pinalsa, kaiba lay too. Oniay nabasa ed Colosas 1:16, 17: “Diad panamegley to [Anak na Dios] et apalsa so amin niran bengatlan walad tawen tan walad dalin, saray bengatlan nanengneng tan agnanengneng . . . Ontan met, sikatoy wala la antis na amin niran bengatla tan diad panamegley to et apalsa so amin niran bengatla.” Nonot yo pa labat! Bilang “uloen a komikimey” na Dios, kaiba si Jesus ed amin niran aspekto na impamalsa. Kanian, natatalosan to so amin ya detalye na interon uniberso, manlapud sankamelagan iran parte na atom ya anggad makapakelkelaw ya utek na too. On, talagan si Jesus so ayadyarin alimbawa na kakabatan!​—Uli. 8:12, 22, 30, 31.

7, 8. Panon a tinulongan na espiritu na Dios si Jesus diad ministeryo to?

⁷ Nilanaan si Jesus na masanton espiritu na Dios. Inkuan nen Jesus: “Walad siak so espiritu nen Jehova lapud nilanaan to ak a mangiyabawag na maong a balita ed saray mairap-bilay. Imbaki to ak pian mangipulong na kibulos ed saray akautibo tan kipawil na pakanengneng ed saray bulag, pian mangibulos ed saray napapairap, pian mangipulong na makapaliket a taon nen Jehova.” (Luc. 4:18, 19) Sanen abautismoan si Jesus, mapatnag ya impanonot ed sikato na masanton espiritu iray naaralan to antis a nagmaliw a too, pati say labay na Dios a gawaen to legan na ministeryo to diad dalin bilang Mesias.​—Basaen so Isaias 42:1; Lucas 3:21, 22; Juan 12:50.

⁸ Lapud pinabiskeg na masanton espiritu tan lapud perpekto so laman tan isip nen Jesus, sikatoy aliwa labat lan sankatalonggaringan a toon nambilay noagta sankamaongan met a Managbangat. Diad tua, “nikelawan iray totoo ed paraan na panagbangat to.” (Mat. 7:28) Naikdan toy imano iray sengegan na saray problema na katooan, salanti, say kasalanan, ag-inkayadyari, tan agpikabat ed Dios. Ontan met, nabasa toy walad puso ra kanian amta to ran pidenengan.​—Mat. 9:4; Juan 1:47.

9. Panon a lalon binmiskeg so talek mo ed si Jesus bilang Manuley diad impandalepdep mo’d saray ginawa to nen wadiad dalin?

⁹ Nambilay si Jesus bilang too. Baleg so nitulong na saray naeksperiensya to bilang too tan say maapit ya impiulop to’d aliwan perpekton totoo pian magmaliw a kualipikadon Ari. Insulat nen apostol Pablo: “[Si Jesus et] obligadon magmaliw a singa saray ‘agagi’ to diad amin a pamaakaran, pian sikatoy magmaliw a mapangasi tan matoor ya atagey a saserdote diad saray bengatlan nipaakar ed Dios, ta pian niyapay to so bagat a manakbong ed saray kasalanan na totoo. Lapud asali ton mismo so nanirap sanen nasusubok, nayarian toy onasingger pian tulongan to iramay nasusubok.” (Heb. 2:17, 18) Lapud ‘asubok’ si Jesus, sikatoy  mililikna ed saray nanairapan. Sankapatnagay panangabagey to sanen wadiad dalin legan na ministeryo to. Sikatoy mainomay ya asinggeran na saray mansasakit, walaay deperensya’d laman, napapairap, tan anggan saray ugugaw. (Mar. 5:22-24, 38-42; 10:14-16) Maasingger met ed si Jesus iray mauyamo tan manpipilalek ya nakabat so Dios. Balet, sikatoy impulisay, binusol, tan sinumpa na saray mapaatagey, arogante, tan ‘anggapoy panangaro ed Dios’ a totoo.​—Juan 5:40-42; 11:47-53.

10. Panon a pinaneknekan nen Jesus a talagan inaro to tayo?

¹⁰ Inter nen Jesus so bilay to parad sikatayo. Say sankabiskegan a paneknek ya si Jesus so matukotukoy a Manuley et say inkamabulos ton ompatey parad sikatayo. (Basaen so Salmo 40:6-10.) “Anggapo lay walaan na mas baleg a panangaro nen saya, a say sakey et iter toy bilay to nisengeg ed kakaaro to,” so kuan nen Kristo. (Juan 15:13) On, aliwan singa saray agperpekton manuley, ya masamsamit so bilay da lapud saray nanaala ra’d uuleyan da, insakripisyo nen Jesus so mismon bilay to parad totoo.​—Mat. 20:28.

Tinuron Mangiter ed Gunggona na Dondon

11. Akin et sigpot itayon makapanmatalek ed si Jesus bilang Mananondon tayo?

¹¹ Talagan matukotukoy a si Jesus, say Atagey a Saserdote, so mangidaulon mangiter ed saray gunggona na dondon bagat to! Diad tua, legan na ministeryo to diad dalin, impanengneng to no antoy gawaen to bilang Mananondon tayo legan na Sanlibon Taon ya Uley to. Tan nagamoran tayo itan no manmatoor tayo. Pinaabig to ray mansasakit tan walaay deperensya’d laman, amaoli na inaatey, amakan na nilibo, tan pinakalma to ni ingey bagyo. (Mat. 8:26; 14:14-21; Luc. 7:14, 15) Balet, agto iraya ginawa pian ilastog so autoridad tan pakapanyari to, noagta pian ipanengneng so panangabagey tan panangaro to. “Labay ko,” so inkuan to ed sakey ya akating a mikakasin napaabig komon. (Mar. 1:40, 41) Ontan met so panangasin ipanengneng nen Jesus legan na Milenyon Uley to​—diad interon mundo.

12. Panon a nasumpal so Isaias 11:9?

¹² Ituloy met nen Kristo tan saray kakaiba ton manuley so espiritual ya edukasyon a ginapoan to manga 2,000 taon lay apalabas. Kanian nasumpal so Isaias 11:9: “Say dalin napano naani ed pikakabat ed Jehova, singa saray danum sakbongan da so dayat.” Seguradon laktipen na satan ya edukasyon so instruksion no panoy pangasikaso ed dalin tan ed dakerakel a pinalsa, a singa ed samay ingganggan ed si Adan. Diad sampot na 1,000 taon, nasumpal so walad Genesis 1:28 a gagala na Dios, tan sigpot lan nipagamor so dondon bagat.

 Tinuron Mangukom

13. Panon ya impanengneng nen Jesus a pinabli toy inkatunong?

¹³ Si Kristo so “tinuro na Dios a magmaliw ya ukom ed saray mabilay tan inaatey.” (Gawa 10:42) Makapalikliket a naamtaan ya agnayarin nasugsogan si Jesus, aliling to et akabalkes ed awak to so inkatunong tan katooran! (Isa. 11:5) Kabusol toy agum, pansimpisimpitan, tan arum ni ran kaugsan. Kinondena to met iramay anggapoy panangasi ra’d saray maniirap. (Mat. 23:1-8, 25-28; Mar. 3:5) Niarum ni, sikatoy agnapalikdo ta ‘amta to no anto so walad puso na too.’​—Juan 2:25.

14. Panon ya ipapanengneng nen Jesus natan so panamabli to ed inkatunong tan inkahustisya, tan antoray nitepet tayo’d inkasikatayo?

¹⁴ Siansia nin napatnagan natan so panamabli nen Jesus ed inkatunong tan inkahustisya diad pangidadaulo to ed sankalaknaban a panagpulong tan panagbangat a kimey. Anggapoy too, gobierno na too, tan mauges ya espiritu a makapatunda ed pakasumpal na sayan kimey. Manampot labat iya sano ipasen la nen Jehova a magenap lay agawaan. Kanian, talagan makapanmatalek itayo a kayari na Armagedon, ontalona so inkahustisya na Dios. (Basaen so Isaias 11:4; Mateo 16:27.) Tepetan pay inkasika: ‘Mipara kasi’d si Jesus so panmoriak ed totoo diad ministeryo? Gagawaen ko kasi anggaay nayarian ko parad si Jehova anggano nalilimitaan ak lapud bunigas odino sirkumstansyak?’

15. Pian lalo itayon mansagpot a manlingkor ed Dios, antoy tandaan tayo?

¹⁵ No tandaan tayon say panagpulong a kimey et kimey na Dios, natulongan itayo a lalon mansagpot a manlingkor ed sikato. Ingganggan to itan; panamegley na Anak to iwawanwan to itan; tan panamegley na masanton espiritu et pabibiskegen to iray mibibiang ed satan. Kasin papablien moy pribilehyom a manlingkor bilang kakimeyan na Dios, a kaibay igigiya na espiritu ya Anak to? Pinakiwas nen Jehova so masulok a pitoran milyon a totoo, a maslak et ipapasen ya “abebay-aral tan ordinaryo,” a manginabang ed mensahe na Panarian diad 236 iran bansa. Wala ta ni arum a makagawa ed satan?​—Gawa 4:13.

Panamegley nen Kristo, Nabendisyonan Ka!

16. Anto so ipapanengneng na Genesis 22:18 nipaakar ed panamendisyon na Dios?

¹⁶ Inkuan nen Jehova ed si Abraham: “Dia ed binim seguradon bendisyonan na amin a nasyon ed dalin so inkasikara lapud dinengel mo so boses ko.” (Gen. 22:18, NW) Ipapanengneng na saya a talagan nailaloan na saray matoor a lingkor iray bendisyon na Mesianikon Bini. Tan sankanonot da irayan bendisyon legan ya aktibon manlilingkor.

17, 18. Antoy sipan nen Jehova a walad Deuteronomio 28:2, tan antoy kabaliksan na satan?

¹⁷ Oniay imbaga na Dios ed ilalak nen Abraham, say nasyon na Israel: “Amin iraya a bendisyones [a walad Ganggan a sipanan] onla ed sika naani, tan lingbosen to ka no talinengen mo naani so boses nen Jehova a Dios mo.” (Deu. 28:2) Onaplika met itan ed saray lingkor na Dios natan. No labay mon bendisyonan ka nen Jehova, kaukolan a lawas mon “talinengen” so boses to. Diad ontan, saray panamendisyon to et “onla ed sika naani, tan lingbosen to ka.” Balet, anto so kabaliksan na ‘italineng’?

¹⁸ Kaiba’d itatalineng so pangipapuso ed saray ibabaga na Salitay Dios tan ed espiritual a tagano ya itatarya to. (Mat. 24:45) Kabaliksan met na satan ya tuloken tayoy Dios tan say Anak to. Inkuan nen Jesus: “Aliwan balang sakey a mangibabaga ed siak na, ‘Katawan, Katawan,’ et makaloob ed panarian na tawen, noagta samay  manggagawa ed linawa nen Amak a walad tawen.” (Mat. 7:21) Tan say italineng ed Dios et mankabaliksay mabulos a pampasakop ed Kristianon kongregasyon ya inletneg to, a ditan et walaray tinuron mamatatken odino “langkap a lalaki.”​—Efe. 4:8.

19. Panon itayon nabendisyonan?

¹⁹ Kaiba ed “langkap a lalaki” iray membro na Mananguley ya Ulop, a mangirerepresenta ed interon Kristianon kongregasyon. (Gawa 15:2, 6) Diad tua, legan na baleg a kairapan, say pangukom ed sikatayo et akadepende na baleg ed no panoy pangipapasen tayo ed espiritual ya agagi nen Kristo. (Mat. 25:34-40) Kanian, say sakey a paraan pian nagamoran tayoy bendisyon et diad matoor a panuporta ed saray nilanaan na Dios.

20. (a) Antoy manunan responsabilidad na saray “langkap a lalaki”? (b) Panon tayon nipanengneng a papablien tayo irayan agagi?

²⁰ Kaiba met ed “langkap a lalaki” iray membro na Branch Committee, saray ombiabiahen manangasikaso, tan mamatatken ed kongregasyon​—ya amin da et tinuro na masanton espiritu. (Gawa 20:28) Manunan responsabilidad na sarayan agagi ya pabiskegen so totoo na Dios “anggad nadampot [na] amin so pankakasakey ed pananisia tan suston pikakabat ed Anak na Dios, a magmaliw itayon baleg lan too, a naabot tayoy suston kaatagey ya asabi nen Kristo.” (Efe. 4:13) Tua, singa sikatayo, agmet ira perpekto. Balet, nabendisyonan itayo no pablien tan unoren tayoy maaron panagpastol da.​—Heb. 13:7, 17.

21. Akin et maganat lan unoren tayo so Anak na Dios?

²¹ Magano lan deralen nen Kristo so marelmeng a sistema nen Satanas. Sano nagawa la itan, akadepende so bilay tayo ed si Jesus, lapud sikato so tinuro na Dios a mangigiya ed impasakbay a “baleg ya ulop” “diad saray subol na danum na bilay.” (Apo. 7:9, 16, 17) Gawaen tayo sirin so anggaay nayarian tayo natan a mabulos tan maapresyan manpasakop ed Arin igigiya na espiritu nen Jehova.

Antoy Naaralan Mo ed . . .

• Isaias 11:1-5?

• Marcos 1:40, 41?

• Gawa 10:42?

• Genesis 22:18?

[Tepetepet Parad Panagaral]

[Litrato ed pahina 17]

Napatnagan so panangabagey nen Jesus sanen pinaoli to so anak nen Jairo

[Saray litrato ed pahina 18]

Idadaulo nen Jesu-Kristo so sankalaknaban a panagpulong