Tepetepet na Saray Manbabasa

Diad Genesis 6:3 et oniay nabasa tayo: “Say espirituk aglawas misumpaan ed too, ta sikato so laman met; ingen ta saray agew to naani sanlasus tan duamplo a taon ira.” Kasin diad sayan teksto et inggeter nen Jehova a say pambilay na too et 120 taon labat, tan ontan kasi kabayag so impanpulong nen Noe nipaakar ed onsabin Delap?

Say ebat ed saratan ya tepet et andi.

Antis na Delap, dakel a totoo so nambilay na pigaran siglo. Say edad nen Noe sanen sinmabi Delap et 600, tan asabi to ni 950. (Gen. 7:6; 9:29) Arum ed saray nianak kayari Delap et nambilay na masulok a 120 taon. Singa bilang, asabi nen Arfajad so 438 tan si Selah et 433. (Gen. 11:10-15) Balet, nen panaon nen Moises say maslak ya bilay na too et anggad manga 70 odino 80 taon labat. (Sal. 90:10) Kanian, ag-ipapabitar na Genesis 6:3 ya say pambilay na too et anggad 120 taon.

No ontan sirin, kasin diad satan a bersikulo et ibabaga na Dios ed si Noe ya kaukolan ton pasakbayan iray totoo diad loob na 120 taon nipaakar ed onsabin kadederal? Andi. Tua, dakel so pankanawnawan akitongtong so Dios ed si Noe. Oniay nabasa tayo’d ontumbok iran bersikulo: “Say Dios inkuan to ed Noe, Say anggaan na amin a laman sinmabi ed arapan ko; ta say dalin napno na karawalan.” Diad tinmumbok iran taon, sanen asumpal la nen Noe so baleg ya kimey a panagpaalagey na biong, oniay nabasa tayo: “Si Jehova inkuan to ed Noe, Loob ka ed biong a pati amin ya [sankaabungan] mo.”  (Gen. 6:13; 7:1) Wala met ni ray arum ya pankanawnawa ya imbaga nen Jehova ed si Noe so pigaran impormasyon.​—Gen. 8:15; 9:1, 8, 17.

Balet, duma so Genesis 6:3. Agnabasa ditan ya katongtong na Dios si Noe, tan ag-ingen tinukoy na satan a teksto si Noe. No ontan sirin, diad satan et ibabalikas labat na Dios so gagala to. (Ikompara so Genesis 8:21.) Diad tua, diad rekord na saray agawgawa antis nin pinalsay Adan, walaray nabasa tayon balikas ya: “Inkuan na Dios.” (Gen. 1:6, 9, 14, 20, 24) Diad saratan ya balikas et mapatpatnag ya agmitotongtong si Jehova ed too diad dalin, ta agni pinalsay too.

Makatunongan sirin ya ibagan diad Genesis 6:3 et ibabalikas labat na Dios so desisyon ton panganggaen lay mauges ya sistema na bengabengatla diad dalin. Nandesisyon ya gawaen to itan kayari 120 taon, tan ag-itan amta nen Noe. Balet, akin et palabasen to ni taotaon? Akin et agto la ginawan tampol?

Oniay imbaga nen apostol Pedro ya rason: “Impatnag na Dios so panag-anos to diad panaon nen Noe, legan ya ipapaalagey so biong, ya akasalbaan ed delap na pigaran totoo, salanti, waloran kamarerwa.” (1 Ped. 3:20) Sanen nandesisyon so Dios ya palabasen to ni 120 taon, wala ni ray kaukolan ya nagawa. Kalabas na manga 20 taon, awalaan na ananak si Noe tan say asawa to. (Gen. 5:32; 7:6) Binmaleg iray ananak da, angaasawa ra, kanian walora la ran amin ed pamilya ra. Insan kaukolan dan ipaalagey so biong, ya aliwan mainomay ya gawaen lapud balbaleg itan. Sakey ni, pigpigara iran manpaalagey. On, lapud impan-anos na Dios ed 120 taon, asumpal irayan amin tan nisalba so waloran matoor ya totoo.

Ag-ibabaga na Biblia so eksakton taon ya impaamta nen Jehova ed si Noe ya walay onsabin Delap. No ikonsidera tayoy panaon na impakawalaan toy ananak, tan say imbaleg tan impangasawa ra, posiblin impaamta itan nen Jehova ed sikato 40 odino 50 taon ni antis na Delap. Insan diad satan la imbaga nen Jehova ed si Noe: “Say anggaan na amin a laman sinmabi ed arapan ko.” Ingganggan toy Noe ya manpaalagey na baleg ya biong tan onloob ditan kaibay pamilya to. (Gen. 6:13-18) Diad nakekeraan iran dekada antis na Delap, aglabat impatnag nen Noe ed kabibilay to a sikatoy maabig ya ehemplo ed inkatunong, noagta sikatoy “managpulong [met] na inkatunong.” Diretsaan ton pinasakbayan iray totoo nipaakar ed gagala na Dios ya panganggaen iray agmanguunor ed Sikato ed saman a panaon. Anggaman abayag antis ya naamtaan nen Noe no kapigan itan nagawa, amta ton onsabin onsabi itan. Tan talagan sinmabi itan.​—2 Ped. 2:5.