Anamot Moy Pagmaliw ya Andiay Asawa

“Siopaman a makayarin mangawat ed saya, awaten to iya.”​—MAT. 19:12.

1, 2. (a) Antoy impangipasen di Jesus, Pablo, tan arum ni ed pagmaliw ya andiay asawa? (b) Akin et ag-ipapasen na arum a regalo itan?

TALAGAN sakey ed saray mabmablin regalo na Dios so panangasawa. (Uli. 19:14) Balet, maliket tan makapnek met so bilay na dakel ya Kristianon andiay asawa. Oniay inkuan nen Harold a manedad na 95 ya agbalot angasawa: “Anggaman panliliketan kon nakaibay arum tan mamaparawes ak, agak balot naeermenan anggan sano bukbukor ko. Nibagak ya talagan regalo’d siak so pansiansian andiay asawa.”

² Diad tua, tinukoy di Jesu-Kristo tan apostol Pablo a say pagmaliw ya andiay asawa, singa met say panangasawa, et “regalo” odino ‘inter’ na Dios. (Basaen so Mateo 19:11, 12; 1 Corinto 7:7.) Amta tayo balet ya walaray anggapoy asawa, aliwan lapud pinili da itan. Imbes, lapud sirkumstansya ra et mairap day makalmo na matukoy a kapareha. Odino kayari pigay taon, walaray ag-iilaloan a naandiay asawa lapud diborsyo odino impakabalo. Panon sirin a nibagan regalo so pagmaliw ya andiay asawa? Tan panon a naanamot na saray andiay asawa so situasyon da?

Nikadkaduman Regalo

3. Antoray bentahan panliliketan na saray Kristianon andian na asawa?

³ Say sakey a walad kasuloan et mas dakel so panaon tan kawayangan ton gawaen so labay  to, nen say walay asawa. (1 Cor. 7:32-35) Baleg irayan bentaha pian napalaknab toy ministeryo to, ninatnat to ni panangaro to’d arum, tan lalon onapit ed si Jehova. Kanian, dakel a Kristiano so angapresya ed gunggona na walad kasuloan tan nandesidin “mangawat ed saya” diad loob na pigaran panaon. Saray arum et nayarin agda implano nen inmuna so pagmaliw ya andiay asawa, balet sanen anguman so sirkumstansya ra, sipipikasi ran inusisay situasyon da tan amoria ran diad tulong nen Jehova et ‘desidido la ed puso ra.’ Kanian, inawat day anguman a sirkumstansya ra tan say pagmaliw ya andiay asawa.​—1 Cor. 7:37, 38.

4. Akin et liknaen na saray Kristianon andiay asawa a nagnap so serbisyo ra ed Dios?

⁴ Amta na saray walad kasuloan ya agda kaukolay mangasawa o miasawa pian abobonan tan apresyaen ira nen Jehova tan say organisasyon to. Inaro na Dios so balang sakey ed sikatayo. (Mat. 10:29-31) Anggapoy siopaman o antokaman a makapangisian ed sikatayo ed aro na Dios. (Roma 8:38, 39) Balanglan walay asawa tayo odino anggapo, walan walay rason tayon liknaen a nagnap so serbisyo tayo’d Dios.

5. Antoy nakaukolan pian saray andiay asawa et sigpot ya nagunggonaan?

⁵ Siempre, no panon a say regalon inkadunong ed musika odino isports et mankaukolay pansagpot pian lalon onaligwas, ontan met ed regalon pagmaliw ya andiay asawa. Kanian, panon a naanamot na saray Kristianon andiay asawa natan so situasyon da​—agagin lalaki o bibii man ira, tobonbalo man odino maedad la, pinili da man itan odino lapud sirkumstansya ra? Pantongtongan tayo so pigaran alimbawa na inmunan Kristianon kongregasyon tan no antoy naaralan tayo.

Walad Kasuloan a Tobonbalo

6, 7. (a) Anton pribilehyo so naawat na saray mamarikit nen Felipe? (b) Panon ya inusar nen Timoteo so inkabalolaki to ed dugan paraan, tan panon ya abendisyonan lapud mabulos a nanlingkor legan a tobonbalo ni?

⁶ Si Felipe ya ebanghelisador et walaay apatiran mamarikit a kapara ton maseseg ed panag-ebanghelyo. (Gawa 21:8, 9) Say panagpropesiya et sakey ed saray regalo na masanton espiritu tan inusar na sarayan tobonbalo itan a regalo, ya kasumpalan na walad Joel 2:28, 29.

⁷ Si Timoteo et sakey ya tobonbalon dugay angusaran to’d pagmaliw ton walad kasuloan. Manlapu la’d inkaugaw et imbangat ed sikato nen nanay ton si Eunice tan bai ton Loida “iray masanton sulat.” (2 Tim. 1:5; 3:14, 15) Balet nayarin nagmaliw labat iran Kristiano legan na unonan dalaw nen Pablo ed ayaman da diad Listra, manga 47 C.E. Kayari duay taon, diad samay komaduan indalaw nen Pablo, nayarin  man-20 odino masulok lan 20 nen Timoteo. Anggano sikatoy tobonbalo ni tan ugaw ni’d katuaan, “alay abig so ibabaga” na saray Kristianon mamasiken ed Listra tan Iconio. (Gawa 16:1, 2) Kanian, intagar nen Pablo si Timoteo diad panagmisionero. (1 Tim. 1:18; 4:14) Agtayo segurado no kasin angasawa si Timoteo. Balet amta tayo ya sanen tobonbalo ni, mabulos ton inawat so imbitasyon nen Pablo, tan kayari pigay taon, sikatoy maliket a nanlingkor bilang balolakin misionero tan manangasikaso.​—Fil. 2:20-22.

8. Antoy amakiwas ed si Juan Marcos a nawalaan na espiritual iran kalat, tan antoray naawat ton bendisyon lapud satan?

⁸ Maabig met so impangusar nen Juan Marcos ed panaon na inkatobonbalo to. Sikato tan say ina ton si Maria, ontan met ed say kapinsan ton si Bernabe, et kabiangan na inmunan membro na kongregasyon ed Jerusalem. Nayarin mainaway bilay na pamilya nen Marcos ta walay abung da’d syudad tan walay aripen da. (Gawa 12:12, 13) Balet anggaman balibali bilay na sayan tobonbalo, agnagmaliw a makasarili. Nisay nankontento la’d komportablen bilay tan nampamilya. Say impiulop to’d saray apostol so seguradon amakiwas ed sikato a manmisionero met. Kanian, malikeliket ya akila’d si Pablo tan Bernabe diad inmunan impanmisionero ra tan nanlingkor bilang katulongan. (Gawa 13:5) Diad saginonor, sikatoy akiulop ed si Bernabe, tan ag-abayag et nanlingkor a kaiba nen Pedro diad Babilonia. (Gawa 15:39; 1 Ped. 5:13) Agtayo amta no kaunongan kabayag nansiansian balolaki si Marcos. Balet, sikatoy akabkabat a mabulos ya akitulongan ed arum tan nansagpot a nanlingkor ed Dios.

9, 10. Antoray pankanawnawa natan na saray kalangweran a Kristiano pian napalaknab day ministeryo ra? Mangiter na alimbawa.

⁹ Dakel a kalangweran ed kongregasyon natan so mabulos met a manguusar ed inkamarikit o inkabalolaki ra pian mas napanlingkoray Dios. Singa si Marcos tan Timoteo, amta ra a say andiay asawa et bulos a ‘makapanlingkor ed Katawan ya anggapoy makasbel.’ (1 Cor. 7:35) Talagan bentaha iya. Dakel so lukas a pankanawnawa​—pampayunir, panlingkor ed lugar a mas kaukolan so manangipulong ed Panarian, panaral na arum a lenguahe, pitulongan ed pampaalagey na Kingdom Hall odino sangan opisina, panaral ed Ministerial Training School, tan panlingkor ed Bethel. No tobonbalo ka ni tan andiay asawa, kasin aanamoten mo irayan pankanawnawa?

¹⁰ Si Mark et ginmapon nampayunir antis a man-20, insan nanaral ed Ministerial Training School, tan nandurumay naawat ton asainmin diad dakel a bansa. No iisipen toy agawa ed loob na 25 taon ya sigpot panaon a serbisyo, oniay nikuan to: “Nansagpotan kon pasesegen iray agagi ed kongregasyon, miuulop ak ed sikara diad ministeryo, dadalawen ko ra, iimbitaan ko ran mangan, tan mangiyuuksoy ak na saray pantutuyaw a makapabiskeg ed espiritual. Amin iraya et nanliketan ko.” Nanengneng tayo’d imbaga nen Mark a say sankaliketan ed bilay et say pangiter, tan dakel so pankanawnawa na saray walad sigpot panaon a serbisyo a mangiter ed arum. (Gawa 20:35) Antokaman so paninteresan mo, abilidad mo, odino eksperiensyam ed bilay, bilang kalangweran et dakel so nagawaan mo ed kimey na Katawan.​—1 Cor. 15:58.

11. Antoray pigaran bentaha na agpanapuran pangasawa o piasawa?

¹¹ Anggaman dakel ed saray tobonbalo et mangasawa odino miasawa ed arapen, walaray maabig a rason pian agmanapura. Papasesegen nen Pablo iray tobonbalo ya manalagar ni anggad ‘aliwa la ran kalangweran,’ sano say seksual a pilalek da et aliwa lan mabisbiskeg. (1 Cor. 7:36) Kaukolay panaon pian natalosan moy sarilim tan nawalaay eksperiensya ed bilay ya makana ed pakapampilim na maong ya  kapareha. Say paknaan ed panangasawa et seryoson desisyon, a nepeg a mansiansia sanlegay bilay.​—Ecl. 5:2-5.

Wala la’d Edad ya Andiay Asawa

12. (a) Panon ya inarap nen abalon Ana so anguman ya sirkumstansya to? (b) Antoy naawat ton pribilehyo?

¹² Si Ana, ya asalambit ed Ebanghelyo nen Lucas et nanermen ya maong sanen ag-inilaloan ya inatey so masiken to kayari labat na pitoy taon ya impanamong da. Agtayo amta no walay anak da odino ninonot to kasi miasawa lamet. Balet ibabaga na Biblia a sanen 84 nen Ana et balo nin siansia. Base ed Biblia, nibaga tayon inusar toy anguman ya sirkumstansya to pian lalon onapit ed si Jehova. Sikatoy “agbalot onsasaew ed templo tan agew-labin manlilingkor tekep na panag-ayunal tan masimoon a panagpikasi.” (Luc. 2:36, 37) Kanian, say panagdayew ed Dios so sankaimportantian ed bilay to. Mankaukolan itan na pirmin determinasyon tan sagpot, balet sikatoy talagan abendisyonan. Sikatoy apribilehyoan a nanengneng so ugaw a si Jesus tan impaamta to’d arum so kibulos a nasumpal panamegley na sayan magmaliw ya Mesias.​—Luc. 2:38.

13. (a) Antoy mangipapanengneng ya matulong ed kongregasyon si Dorcas? (b) Panon ya abendisyonan so kaabigan tan kamaongan to?

¹³ Si Dorcas, odino Tabita, et taga’d Joppe, a daongan nensaman ed amianen-sagur na Jerusalem. Lapud anggapoy asalambit na Biblia ya asawa to, nayarin agni akiasawa ed saman. “Dakdakel so agawaan ton kaabigan tan inter ton regalo lapud panangasi.” Inggawaan to na dakel ya kawes iray bibiin balo ya mairap bilay, tan lapud saya et apaapit ira ed sikato. Kanian sanen biglan nansakit tan inatey, impatawag na kongregasyon si Pedro pian kerewen ya paolien ed bilay so inad-aro ran agi. Sanen akabatan ed interon Joppe so impamaoli ed sikato, dakel so nagmaliw a mananisia. (Gawa 9:36-42) Lapud makapadinayew ya kaabigan nen Dorcas, nayarin pigara ed sikara et atulongan to.

14. Akin et lalon onaapit so liknaan na saray andiay asawan agagi ed si Jehova?

¹⁴ Singa si Ana tan Dorcas, diad saray kongregasyon natan et walaray wala la’d edad ya andiay asawa. Nayarin saray arum et ag-akaromog na matukoy a kapareha. Walaray arum ya akidiborsyo odino abalo. Lapud anggapoy asawan napangibagaan day nalilikna ra, lalon naaaral day manmatalek ed si Jehova. (Uli. 16:3) Si Silvia, a 38 taon lan manlilingkor ed Bethel, et impasen ton bendisyon so inkamarikit. Oniay inkuan to: “Walay panaon ya onkakapuy ak met. Iisipen ko, ‘Siopa met kasi mamaseseg ed siak?’” Balet oniay inyarum to: “Lapud manmamatalek ak ya mas amta nen Jehova so pankaukolan ko, atulongan ak ya lalon onapit ed sikato. Tan lanang ya walay panamaseseg, no maminsan et manlalapud saray agko iilaloan.” Sano lalo tayon onapit ed si Jehova, sikatoy lawas ontulong diad maaro tan makaligliwan paraan.

15. Panon a ‘ninatnat’ na saray andiay asawan agagi so panangaro ra?

¹⁵ Sano say sakey et walad kasuloan, mas walay pankanawnawa ton “inatnat” so panangaro to. (Basaen so 2 Corinto 6:11-13.) Inkuan nen Jolene, sakey a marikit a sigpot panaon ya nanlingkor ed loob na 34 a taon: “Nanggunaetan koy mikaaro aliwa labat a diad saray kaedaran ko, noag ontan met ed amin ya klase na totoo. Talagan say pagmaliw ya marikit et pankanawnawan makapangiter ed si Jehova, pamilya, agagi, tan kakaabay. Legan kon ontatatken, mas panliliketan koy pagmaliw ya walad kasuloan.” Seguradon apresyaen na saray maedad la, makapuy, mansosolon ateng, kalangweran, tan arum ni’d kongregasyon so maaron suporta na sarayan walad kasuloan. On, no aaroen tayoy arum, balibali liknaan tayo. Kasin ‘ninatnat’ mo met so panangarom ed arum?

 Walad Kasuloan Sanlegay Bilay

16. (a) Akin et agbalot angasawa si Jesus? (b) Panon ya inanamot nen Pablo so pagmaliw ton andiay asawa?

¹⁶ Si Jesus et ag-angasawa; kaukolan ton iparaan tan sumpalen so ministeryon inmatalek ed sikato. Nambaroy ed ararawi, nankimey manlapud palbangon anggad aralem lan labi, tan diad kaunoran et insakripisyo toy bilay to. Baleg a bentaha ed sikato so pagmaliw a balolaki. Si apostol Pablo et nambiahe na ararawi tan mair-irap iray asagmak to diad ministeryo. (2 Cor. 11:23-27) Anggaman dati et nayarin walay asawa to, sanen nagmaliw lan apostol et pinili toy agla mangasawa. (1 Cor. 7:7, 8; 9:5) Lapud ministeryo, pinaseseg di Jesus tan Pablo so arum a mangalig ed ehemplo ra anggad posible. Balet, agda ginawan kakaukolanen parad saray ministro so agpangasawa.​—1 Tim. 4:1-3.

17. Panon ya inalig na arum natan so ehemplo nen Jesus tan Pablo, tan panon tayon amta ya papablien nen Jehova iray manggagawa na ontan ya panagsakripisyo?

¹⁷ Natan, saray arum et nandesisyon met a mansiansian andiay asawa pian mas niyunay ministeryo ra. Si Harold ya asalambit ed gapo et malikeliket a manlilingkor ed Bethel diad loob la na 56 taon. Inkuan to: “Sanen samploy taon ko la’d Bethel, naobserbaan koy dakel a sanasawa ya ompapaway ed Bethel lapud sakit odino lapud pangasikaso ed maedad lan ateng da. Anggapo la ray atateng ko. Balet inad-arok so Bethel kanian agko labay ya naandi pribilehyok diad pangasawa.” Onia met so nikuan nensaman nen Margaret ya abayag lan payunir: “Walaray pankanawnawan makapiasawa ak komon, balet agko itan inikdan na imano. Imbes, inusar koy malaem a panaon tan kawayangan ko bilang marikit pian magmaliw ya okupado ed ministeryo, tan talagan nanliketan ko iya.” Seguradon agbalot lingwanan nen Jehova so siopaman ya manggaway ontan ya mabulos a panagsakripisyo parad dugan panagdayew.​—Basaen so Isaias 56:4, 5.

Anamot Moy Sirkumstansyam

18. Panon a napaseseg tan natulongan na arum iray andiay asawan Kristiano?

¹⁸ Amin ya andiay asawan Kristiano a mansasagpot a manlingkor ed si Jehova et makanepegan na masimoon ya komendasyon tan panamaseseg tayo. Inaro tayo so balang sakey ed sikara, papablien tayo ray maabig a kualidad da, tan pisalsalamatan tayo so baleg a nitutulong da ed kongregasyon. Ag-iran balot naermenan no ipanengneng tayon sikatayoy peteg ya espiritual ya agagin “lalaki tan bibii tan kainaan tan ananak.”​—Basaen so Marcos 10:28-30.

19. Antoy gawaen mo pian naanamot moy pagmaliw ya andiay asawa?

¹⁹ Wala ka man ed kasuloan lapud pinilim itan odino lapud sirkumstansyam, komon ta saray apantongtongan tayon alimbawa nensaman tan natan et mamaseguro ed sika a sarag moy nawalaan na maliket tan makabaliksan a bilay. Saray arum a regalo et maliket a tatalaranan, bangta saray arum et talagan ag-iilaloan. Arum ed saratan et naapresyan tampol, walaray arum balet ya naapresya labat kayari pigay taon. Kanian, baleg so nagawaan na panmoria tayo. Antoy gawaen mo pian naanamot moy pagmaliw ya andiay asawa? Onapit a nagkalalo ed si Jehova, naynay komon a dakel so gagawaen mo ed kimey na Katawan, tan inatnat moy panangarom ed arum. Singa diad panangasawa, makapnek met so pagmaliw ya andiay asawa no aligen tayoy panmoria na Dios tan no usaren ed dugan paraan iyan regalo.

Nanonotan Mo Ni?

• Panon a nibagan regalo so pagmaliw ya andiay asawa?

• Akin et bendisyon ed saray kalangweran so pagmaliw a walad kasuloan?

• Antoran pankanawnawa so lukas ed saray andiay asawan Kristiano pian lalon onapit ed si Jehova tan ninatnat day panangaro ra?

[Tepetepet Parad Panagaral]

[Saray litrato ed pahina 18]

Kasin aanamoten moy pankanawnawam a makapanlingkor ed Dios?