Nodnonoten Iray Ginawa nen Jehova Parad Sika

AG-ABAYAG kayarin pinaoli si Jesus, duara ed saray disipulo to so nanlapud Jerusalem a mamapaarap ed Emaus. “Legan iran mantotongtong,” so kuan na Ebanghelyo nen Lucas, “inmasingger si Jesus tan akiulop ed sikaran manakar; balet sikatoy agda abidbir.” Insan inkuan nen Jesus ed sikara: “‘Anto irayay pansasangsangan yon dua legan a manaakar kayo?’ Tan tinmunda ra a maer-ermen so lupa ra.” Akin et maer-ermen ira? Lapud iilaloan da ya iliktar ira nen Jesus manlapud impanakop na saray Gentil, balet ta ag-itan agawa. Imbes, si Jesus et pinatey. Kanian, agaylay ermen da.​—Luc. 24:15-21; Gawa 1:6.

Impaliwawa nen Jesus ed duaran disipulo to so “amin a bengatlan walad Kasulatan a nipaakar ed sikato, manlapud saray sulat nen Moises tan amin a Propeta.” On, dakel so importante tan makapabiskeg pananisian agawgawa legan na ministeryo nen Jesus! Legan a dedengelen na duaran disipulo so ipapaliwawa nen Jesus, asalatan na liket so ermen da. Sanen labi la, inkuan da: “Agta singa onaapoy so puso ta sanen sikatoy mitotongtong ed sikata diad dalan, legan ton ipapaliwawa ed sikata so Kasulatan?” (Luc. 24:27, 32) Antoy naaralan tayo ed reaksion na duaran disipulo nen Jesus?

Panon to no Ag-agawa Iray Iilaloan Tayo?

Maer-ermen imay duaran disipulo legan dan mamapaarap ed Emaus lapud ag-agawa iray iilaloan da. Alikna da imay walad Uliran 13:12: “Say ilalo a nitantan pabeblayen to so puso.” Mipadpara, iisipen na arum ed sikatayo, a pigaran dekada lan matoor a manlilingkor ed si Jehova, a diad sayan panaon et abayag la komon ya asumpal so “baleg ya irap.” (Mat. 24:21; Apo. 7:14) Natural labat ya nayarin naermenan tayo ta agni agawa itan ya iilaloan tayo.

Tandaan balet ya nagmaliw lamet a maliket so duaran disipulo sanen impanonot nen Jesus iray asumpal lan propesiya, pati saramay mismon agawa ed panaon da. Mipadpara, sarag tayo met a napansiansiay liket tayo tan natalonaan iray pakakadismayaan. Oniay inkuan nen Michael, ya abayag  lan elder: “Agmo iimanoen iray agni ginawa nen Jehova. Say imanom et saramay agawaan to la.” Talagan maabig itan a simbawa!

No Antoy Agawaan la nen Jehova

Imanoen so pigara’d saray makapadinayew ya agawaan la nen Jehova. Inkuan nen Jesus: “Samay mangipapatnag na pananisia ed siak et gawaen to met iray kimey a gagawaen ko; tan gawaen to iray kimey a babaleg nen saraya.” (Juan 14:12) Natan, nasusumpal na saray lingkor nen Jehova so sankalaknaban a kimey na saray Kristiano ed kapiganman. Masulok a pitoran milyon so maniilalo a makaliktar ed baleg ya irap. Nonot mo pa, agnin balot agawan walay ontan karakel a matoor ya lingkor nen Jehova a makulikulin mankikimey ed dakerakel a bansa diad interon mundo! On, sinumpal nen Jehova imay impasakbay nen Jesus ya “kimey a babaleg nen saraya.”

Anto ni arum a ginawa nen Jehova parad sikatayo? Tinulongan to ray matuan impanpuson totoo ya taynan so marelmeng a mundo, tan onloob ed simbolikon espiritual a paraiso ya pinalsa to. (2 Cor. 12:1-4) Ipanaon yoy pandalepdep ed pigaran aspekto na sayan paraiso ya walad sikatayo. Alimbawa, pinengneng yo pa ray karga na librarya yo odino librarya na Kingdom Hall. Bukay yoy Watch Tower Publications Index, odino lukasan yoy Watchtower Library. Dengel yoy inrekord ya Bible drama. Bilay yo’d isip yo iray anengneng tan nadngel yo’d agano ni ran kombension. Niarum ni, nonot yo pay maliket a pililimog ed saray agagi. Talagan mabunlok ya angitarya si Jehova na dakel ya espiritual ya tagano tan maaron impanaagi. Peteg ya espiritual a paraiso itan!

Inkuan nen salmistan David: “Amayamay ira, O Jehova a Dios ko, so saray makapakelaw a gawam a ginawam, tan saray nonot mo nipaakar ira ed sikami.” (Sal. 40:5) On, no nodnonoten tayo iray makapakelaw a ginawa nen Jehova parad sikatayo tan dalepdepen so panangaro to ed sikatayo, napasimbaloy biskeg tayo. Diad ontan et matoor itayon makapansungdo diad sigpot puson panaglingkor ed mangatatawen ya Ama tayo, si Jehova.​—Mat. 24:13.

[Litrato ed pahina 31]

Tinulongan nen Jesus iray disipulo to a nodnonoten so ginawa nen Jehova parad sikara

[Saray litrato ed pahina 32]

Bilay yo’d isip yo iray anengneng tan nadngel yo’d agano ni ran kombension