“Pasalimbengan ed Ngaran nen Jehova”

“Mangikera ak . . . na mapaabeba tan dukan totoo, tan sikaray pasalimbengan ed ngaran nen Jehova.”​—SOF. 3:12, NW.

1, 2. Anton simbolikon bagyo so magano lan ondapo ed katooan?

ASALIM ta lay sinmirom ed sakey ya alolong lapud makmaksil ya uran? No say onsasabi balet et maksil a bagyo odino alimbusabos, nayarin agka nasalimbengan na satan.

² Walay onsasabin duman klase na bagyo tan napepeligroy interon katooan. Saya et simbolikon “agew na kabagbag.” Sayan “baleg ya agew nen Jehova” et apektaen toy amin ya totoo. Anggaman ontan, naromog tayo so salimbeng a nakaukolan tayo. (Basaen so Sofonias 1:14-18.) Panon tayon nagawaan itan antis ya onggapo so “agew na sanok nen Jehova”?

“Bagyo” Sanen Panaon na Saray Israelita

3. Anton ‘mabiskeg a bagyo’ so sinmabi ed samploran tribu a panarian na Israel?

³ Say agew nen Jehova et onggapo diad kaderal na amin a palson relihyon ed dalin. Pian nasalimbengan, aralen tayo no antoray agawa ed saray totoo na Dios nensaman. Si Isaias, a nambilay nen koma-walon siglo B.C.E., et inyaliling to ed ‘mabiskeg a bagyo’ so panangukom nen Jehova ed samploran tribu a panarian na Israel tan agsarag na too ya amperen itan. (Basaen so Isaias 28:1, 2.) Satan ya propesiya et inmunan asumpal nen 740 B.C.E. sanen nilusob na Asirya so samploran tribu, a say Efraim so sankaprominentian ed sikara.

4. Panon a dineral na “baleg ya agew nen Jehova” so Jerusalem nen 607 B.C.E.?

⁴ Kayari na impangukom ed agmatoor ya Israel, sinmabi so “baleg ya agew nen Jehova” ed Jerusalem tan say panarian na Juda nen 607 B.C.E. Agawa itan lapud nagmaliw met ya apostata so totoo ed Juda. Inataki na saray taga Babilonia so Juda tan say kabisera to, say Jerusalem. Kinmerew ira na tulong ed ‘tila a salimbengan,’ say Ehipto a kaalyansa ra ed politika. Balet, singa say makaderal ya uran a kristal, sigpot ya dineral na Babilonia itan a “salimbengan.”​—Isa. 28:17.

5. Anto so nagawa ed totoo na Dios bilang grupo sano deralen la so amin a palson relihyon?

⁵ Say baleg ya agew nen Jehova ya aneral ed Jerusalem et pakapatnagan a wala ni mas malaknab a pangukom ed apostatan Kakristianoan ed panaon tayo. Ukomen met so arum nin kabiangan na “Makapanyarin Babilonia,” say sankamundoan ya empiryo na palson relihyon. Insan, saray akeran sakop na mauges a sistema nen Satanas et sigpot a deralen. Balet, makaliktar so totoo na Dios bilang grupo lapud pasasalimbengan ira ed si Jehova.​—Apo. 7:14; 18:2, 8; 19:19-21.

 Espiritual tan Pisikal a Salimbeng

6. Panon a naromog na saray totoo nen Jehova so salimbeng?

⁶ Panon a naromog na totoo na Dios so salimbeng natan la, legan na sayan panaon na anggaan? Naromog tayo so espiritual a salimbeng diad masimoon a ‘pannodnonot ed ngaran na Dios’ tan diad maseseg a panlingkor ed sikato. (Basaen so Malaquias 3:16-18.) Balet, agti labat basta nononoten so ngaran to. Oniay nabasa tayo: “Balang sakey ya ontatawag ed ngaran nen Jehova et nilaban.” (Roma 10:13) Walay pikonektaan na itawag ed ngaran nen Jehova tan say resultan panangiliktar to. Tan nibiig na matuan impapuson totoo so pandumaan na saray agmanlilingkor ed si Jehova tan saray tuan Kristiano, a masimoon a ‘mannononot ed ngaran to’ tan manlilingkor bilang Tasi to.

7, 8. Panon ya asalimbengan ed pisikal ya paraan iray inmunan siglon Kristiano, tan antoy piparaan na satan natan?

⁷ Balet, aliwa labat lan espiritual a salimbeng so ipapagamor ed sikatayo. Insipan met so pisikal a salimbeng ed totoo na Dios. Napatnagan tayo iya ed samay agawa nen 66 C.E. kayarin inataki na saray Romanon sundalo nen Cestius Gallus so Jerusalem. Impasakbay nen Jesus ya saray agew na satan a kairapan et “napatikeyan.” (Mat. 24:15, 16, 21, 22) Agawa itan sanen biglan inmatras iray Romanon sundalon mangukubkob ed syudad, diad ontan et “nisalba” so pigaran “laman,” salanti, saray tuan Kristiano. Imbatikan day syudad tan saray kabangibang a pasen. Binaliw na arum so Jordan tan nanayam ed kapalandeyan diad bandad bukig na satan ya ilog.

⁸ Walay piparaan na saraman ya Kristiano ed saray totoo na Dios natan. Nensaman, saray inmunan siglon Kristiano et nananap na salimbengan, tan ontan met so gagawaen na saray lingkor na Dios natan. Balet, diad sayan panaon, aliwan literal a pasen so batikan na saray tuan Kristiano, lapud sikaray walad nanduruman parte na mundo. Ingen ta bilang grupo, “saramay pinili” tan saray matoor a kakaiba ra et naliktaran da, ed pisikal a paraan, so kaderal na apostatan Kakristianoan lapud pasasalimbengan ira ed si Jehova tan ed singa palandey ya organisasyon to.

9. Sioparay natetel no akin ya alingwanan so ngaran nen Jehova? Mangiter na alimbawa.

⁹ Diad biek a dapag, kanepegan labat na Kakristianoan so onsasabin kaderal da lapud agda imbangat ed saray mimimisa so katuaan nipaakar ed Dios tan agda labay ya usaren so ngaran to. Nensaman, kabkabat so ngaran na Dios ed Europa. Nanengneng itan ed saray sinsilyo, arapan na abung, dakel a libro tan Biblia, tan anggan diad pigaran simbaan na Katoliko tan Protestanti. Satan a ngaran et irerepresenta na apatiran letra na Hebreo a tatawagen ya Tetragrammaton tan kaslakan lan YHWH (odino JHVH) so kapetekan to ed alpabeto tayo. Balet, diad agano ni ran panaon et eekalen day ngaran na Dios diad saray patalos na Biblia tan ed arum ni ran nepeg komon a pangusaran ed satan. Say sakey a pakanengnengan ed saya et samay Sulat ed saray Obispo diad Komperensya nipaakar ed ‘Ngaran na Dios,’ nen Hunyo 29, 2008, ya impaway na Kongregasyon na Vatican Parad Madibinon Panagdayew tan Estandarte na Saray Sakramento. Diad satan a sulat et imbilin na Romanon Katolikon Simbaan ya nepeg a salatan na “Katawan” so nanduruman patalos na Tetragrammaton. Ingganggan na Vatican a say ngaran na Dios et agnepeg ya usaren odino salambiten diad saray kanta tan dasal legan na misa na Katoliko. Tan saray lider na arum a relihyon, balanglan kabiangan na Kakristianoan odino andi, et inyamot da met ed minilmilyon a kamembro ra so nipaakar ed tuan Dios.

Nasalimbengan Iray Mamapasantos ed Ngaran na Dios

10. Panon a napapagalangan natan so ngaran na Dios?

¹⁰ Nidumaduma balet iray Tasi nen Jehova ed arum a relihyon lapud idadayew tan igogloria  ray ngaran na Dios. Papasantosen da itan diad mapagalang a pamibitla ed satan. Naliliketan si Jehova ed saramay manmamatalek ed sikato, tan sikatoy magmaliw ed antokaman a nakaukolan pian bendisyonan tan salimbengan so totoo to. “Amta to ray onapireng [odino manpapasalimbeng] ed sikato.”​—Nah. 1:7; Gawa 15:14.

11, 12. Sioparay amasantos ed ngaran nen Jehova ed Juda nensaman, tan sioparay mamapasantos ed ngaran to natan?

¹¹ Anggaman kaslakan ed saray totoo ed Juda nensaman et nagmaliw ya apostata, walaray pigaran ‘nampasalimbeng ed ngaran nen Jehova.’ (Basaen so Sofonias 3:12, 13.) On, sanen dinusa na Dios so andiay pananisian Juda, ya inabuloyan ton nasakop na Babilonia so dalin da tan nadakep ira, walaray pigaran akaliktar a singa si Jeremias, Baruc, tan Ebed-melec. Nambilay ira “ed pegley” na apostatan nasyon. Saray arum et nansiansian matoor legan ya adakep. Nen 539 B.C.E., diad uley nen Ciro et sinakop na Medo tan Persia so Babilonia. Ag-abayag et ingganggan nen Ciro a sarag la na nakekeraan ya Judio so ompawil ed dalin da.

¹² Nipaakar ed saramay nakaiba ed nipawil a dugan panagdayew, impasakbay nen Sofonias ya iliktar ira nen Jehova tan sikatoy naliketan ed sikara. (Basaen so Sofonias 3:14-17.) Agawa met iya ed panaon tayo. Kayarin niletneg so Panarian na Dios ed tawen, saray nakekeraan a matoor ya alanaan et imbulos nen Jehova manlapud espiritual ya impakadakep ed Makapanyarin Babilonia. Tan anggad natan et sikatoy naliliketan ed sikara.

13. Anton kibulos so naeeksperiensya na totoo ed amin a bansa?

¹³ Saramay walaan na ilalon manbilay ya andi-anggaan diad dalin et akapaway met ed Makapanyarin Babilonia tan nibulos la ra ed palson bangabangat na relihyon. (Apo. 18:4) Kanian, malaknab a nasusumpal ed panaon tayo so Sofonias 2:3: “Anapen yo si Jehova, sikayo ya amin a mauyamo ed dalin.” Saray mauyamo ed amin a bansa, balanglan walaan na ilalon manbilay ed tawen odino diad dalin, et pasasalimbengan la natan ed ngaran nen Jehova.

Aliwan Anting-Anting so Ngaran na Dios

14, 15. (a) Antoray inusar na arum a pinagka-anting-anting? (b) Antoy agnepeg ya usaren a galing?

¹⁴ Impasen na arum ya Israelita so templo a singa anting-anting a manalimbeng ed sikara ed saray kalaban. (Jer. 7:1-4) Antis na satan, impasen da met ya anting-anting so kaban na sipan a manalimbeng ed sikara diad guerra. (1 Sam. 4:3, 10, 11) Intatak nen Constantino ed samper na saray sundalo to so Griegon letra a khi tan rho, say unonan duaran letra na titulon “Kristo” diad Griego. Iilaloan ton nasalimbengan na satan iray sundalo to diad guerra. Tan si Arin Gustav Adolph II na Sweden, ya akilaban ed Talomplon Taon a Guerra, so nayarin angisulong na samper ed pagew ya nanengneng ed pahina 7. Sankaimano ed satan a samper so akatatak a ngaran ya Iehova.

¹⁵ Arum ed saray totoo na Dios ya inataki na demonyo et asalimbengan lapud maksil ya intawag da ed ngaran nen Jehova. Balet, say bengatlan akasulatan na ngaran na Dios et agnepeg ya ipasen ya anting-anting nisay usaren ya galing, a singano walay pakapanyari na saraya a manalimbeng. Aliwan ontan so kabaliksan na manpasalimbeng ed ngaran nen Jehova.

Pasalimbengan Natan

16. Panon itayon nasasalimbengan diad espiritual a paraan natan?

¹⁶ Say espiritual a kaligenan a panggagayagaan tayo bilang totoo na Dios so manasalimbeng ed sikatayo natan. (Sal. 91:1) Panamegley na “matoor tan makabat ya aripen” tan mamatatken ed kongregasyon, napapanonotan itayon manalerto ed saray kagagawa  na mundo a nayarin maneral ed satan a kaligenan. (Mat. 24:45-47; Isa. 32:1, 2) Isipen pa no panon kabetbet itayon napapasakbayan nipaakar ed materyalismo, tan imanoen no panon itayon atulongan na saratan a pasakbay pian agnaderal so espiritualidad tayo. Tan agta mapeligro met so inkakampante a manresulta ed pagmaliw tayon ag-aktibo’d panaglingkor ed si Jehova? Inkuan na Salita na Dios: “Nadederal iray totoon makulang-kulang lapud ag-ira mangaasikaso. Balet niyarawi’d kaatapan so siopaman ya ondengel ed siak. Mareen so pambilay to, ta anggapoy nepeg ton takotan.” (Uli. 1:32, 33, Maung a Balita) Makatulong met ed sikatayo so panggunaet a mansiansian malinis ed moral pian agnaandi so espiritual a kaligenan tayo.

17, 18. Antoy ontutulong ed minilyon a totoo pian pasalimbengan ed ngaran nen Jehova natan?

¹⁷ Nonoten met so panamaseseg na matoor ya aripen ya unoren so ganggan nen Jesus ya ipulong so maong a balita na Panarian diad sankamundoan. (Mat. 24:14; 28:19, 20) Impaimano nen Sofonias so pananguman a mamakiwas ed totoo a pasalimbengan ed ngaran na Dios. Nabasa tayo: “Saman la ipawil ko ed saray baley so malinis a pansasalita, pian sikara ya amin tawagan da komon so ngaran nen Jehova, pian manlingkor ira ed sikato a benebenek.”​—Sof. 3:9.

¹⁸ Anto iyan malinis a pansasalita? Say malinis a pansasalita et say katuaan nipaakar ed si Jehova a Dios tan saray gagala to a naromog ed pinuyanan a Salita to. Nibagan uusaren mo itan a pansasalita sano inanabang mo’d arum so dugan pakatalos nipaakar ed Panarian na Dios tan no panon ya napasantos na satan so ngaran to; sano idadanet moy kiyalangon na soberanya na Dios; tan sano maliket mon itotongtong so nipaakar ed agmangangga iran bendisyon a panggayagaan na matoor a totoo. Lapud karakel na mansasalita ed sayan lenguahe, ondarakel met so ‘ontatawag ed ngaran nen Jehova’ tan ‘manlilingkor ed sikato a benebenek.’ On, pasasalimbengan la ed si Jehova so minilyon a totoo ed interon mundo.​—Sal. 1:1, 3.

19, 20. Nen panaon na saray Israelita, panon ya anggapoy agawaan na nanmatalekan dan ‘tila a salimbengan’?

¹⁹ Saray totoo ed mundo et singa agmanunday problema ra. Lapud desperado iran mananap na solusyon, patutulongan ira’d kapara ran agperpekton totoo. Odino, maniilalo ira ed saray politiko. Anggan saray Israelita nensaman et kinmerew na tulong ed saray kaabay dan nasyon, tan akialyansa ed sikara. Balet, amta tayon agda atulongan so Israel. Tan agsigpot a nasolusyonan na anggan anton gobierno na too natan, nisay Nasyones Unidos, iray problema na too. Kanian akin et pasalimbengan so sakey ed gobierno na too? Tinawag iratan na Biblia ya ‘tila a salimbengan.’ Ipapasen tayo ran ontan lapud amin a totoon maniilalo ed sikara et segseguradon nadismaya.​—Basaen so Isaias 28:15, 17.

²⁰ Agmanbayag, ondapo la ed dalin so simbolikon bagyo na agew nen Jehova. Agmakapangiter  na proteksion iray paraan na too, ni saray amotan ed nuklear a panangataki odino kayamanan. Oniay ipapaimano na Isaias 28:17: ‘Say kristal ya uran panisen to naani so tila a salimbengan, tan saray danum delapen da naani so amotan a pasen.’

21. Anto so napanggayagaan tayo no unoren tayo so teksto ed taon 2011?

²¹ Diad sayan panaon tan diad arapen, napansalimbengan na matoor a totoo so Dios da, si Jehova. Sayan tuan napanamotan et ipapabitar na ngaran nen Sofonias, a mankabaliksan na “Si Jehova So Angiyamot.” Matukotukoy sirin so makabat a simbawa ed teksto tayo ed sayan taon 2011: “Pasalimbengan ed ngaran nen Jehova.” (Sof. 3:12, NW) Natan ni labat et sarag tayo, tan nepeg tayo a pasalimbengan ed ngaran nen Jehova, a sigpot a manmamatalek ed sikato. (Sal. 9:10) Agtayon balot komon lilingwanan iyan pinuyanan a panamaseguro: “Say ngaran nen Jehova sikato so mabiskeg ya ilang; say maptek ombatik ya onloob ed sikato, tan nilaban.”​—Uli. 18:10.

Nanonotan Mo Ni?

• Panon itayon pasalimbengan ed ngaran nen Jehova natan?

• Akin et nepeg ya agtayo manmatalek ed ‘tila a salimbengan’?

• Anton salimbeng so ipapaseguro ed sikatayo diad arapen?

[Tepetepet Parad Panagaral]

[Blurb ed pahina 6]

Say teksto ed sayan taon 2011 et: “Pasalimbengan ed ngaran nen Jehova.”​—Sofonias 3:12, NW.

[Picture Credit Line ed pahina 7]

Thüringer Landesmuseum Heidecksburg Rudolstadt, Waffensammlung “Schwarzburger Zeughaus”