Pinabiskeg Pian Nalabanay Tukso tan Nasungdoay Inkadismaya

“Makaawat kayo na pakayari sano onsabi ed sikayo so masanton espiritu.”​—GAWA 1:8.

1, 2. Anton tulong so insipan nen Jesus ed saray disipulo to, tan akin et kaukolan da itan?

AMTA nen Jesus ya no diad dilin biskeg labat na saray disipulo to, agda nasarag ya unoren so amin ya ingganggan to. No imanoen so kalaknab na kimey dan panagpulong, kabiskeg na saray onsusumpa’d sikara, tan kaleteyan na laman da, malinew a kaukolan day mas mabiskeg nen say too a pakayari. Kanian antis a sinmegep si Jesus ed tawen, pinaseguroan to ray disipulo to: “Makaawat kayo na pakayari sano onsabi ed sikayo so masanton espiritu, tan mantasi kayo nipaakar ed siak diad Jerusalem tan ed interon Judea tan Samaria tan diad sankaarawian a pasen na dalin.”​—Gawa 1:8.

² Ginmapon asumpal itan a sipan nen Pentecostes 33 C.E. sanen pinabiskeg na masanton espiritu iray papatumbok nen Jesu-Kristo pian pulongan so interon Jerusalem. Anggapoy isusumpan akapatunda ed satan. (Gawa 4:20) Diad “amin ya agew anggad sampot a panaon na mundo,” saray matoor a papatumbok nen Jesus, kaiba ti’ la, et mankakkaukolan met ed satan a biskeg manlapud Dios.​—Mat. 28:20.

3. (a) Anto so pandumaan na masanton espiritu tan pakayari? (b) Antoy nitulong ed sikatayo na pakayari nen Jehova?

³ Insipan nen Jesus ed saray disipulo to a ‘makaawat ira na pakayari sano onsabi ed sikara so masanton espiritu.’ Say salitan “pakayari” tan “espiritu” et mandumaay kabaliksan. Say espiritu na Dios odino say aktibon puersa to, et enerhiyan iiter tan uusaren to’d totoo odino ed bengatla pian nasumpal so gagala to. Balet, say pakayari et say “abilidad ya onkiwas odino mamawalay epekto.” Nayarin mansiansia itan ya inaktibo ed siopaman odino antokaman anggad sano nakaukolan itan pian mamawala na resulta. Kanian, say masanton espiritu et nayarin iyaliling ed kuryente a mamapagana ed rechargeable a baterya, bangta say pakayari et singa enerhiya ya atipon ed baterya. Say pakayarin ipapagamor nen Jehova ed saray lingkor to panamegley na masanton espiritu so mamapabiskeg ed sikatayo pian nasumpal tayo so dedikasyon tayo bilang Kristiano, tan sano nakaukolan, pian nipulisay iray negatibon impluensya.​—Basaen so Miqueas 3:8; Colosas 1:29.

4. Anto so pantongtongan tayo ed sayan artikulo, tan akin?

⁴ Panon ya napatnagan so pakayarin inter ed sikatayo na masanton espiritu? Anto so ikiwas odino reaksion tayo lapud impluensya na satan? Legan itayon matoor a manlilingkor ed Dios, dakel iray makasbel​—balanglan manlapud si Satanas, manlapud marelmeng a sistema to, odino lapud agtayo inkayadyari. Importantin talonaan tayo iratan a makasbel pian makapantultuloy itayo bilang Kristiano, regular a makapibiang ed ministeryo, tan napansiansiay maabig a relasyon ed si Jehova. Pantongtongan tayo no panon a makatulong so masanton espiritu ed sikatayo pian nalabanay tukso, tan nasungdoay kesaw tan inkadismaya.

 Pinabiskeg Pian Nalabanay Tukso

5. Panon itayon napabiskeg na pikakasi?

⁵ Imbangat nen Jesus iray papatumbok to a manpikasi: “Agmo kami aabuloyan a napelag ed tukso, noagta iliktar mo kami ed samay sakey a mauges.” (Mat. 6:13) Agpaulyanan nen Jehova iray matoor a lingkor to ya onkekerew ed saya diad pikakasi. Diad sakey nin inkagawa, imbaga nen Jesus ya “say Ama ed tawen et . . . mangiter na masanton espiritu ed saramay onkekerew ed sikato.” (Luc. 11:13) Talagan makapaseseg so sipan nen Jehova ya iter to’d sikatayo so espiritu to pian nagawaan tayo so duga! Siempre, aglabay ya ibaga na saya ya ipaliis ti’ la nen Jehova ed tukso. (1 Cor. 10:13) Balet no nipapaarap tayo ed tukso, lalon kaukolan tayoy manpikasi a masimsimoon.​—Mat. 26:42.

6. Antoy angibasiyan nen Jesus na ebat to’d tukso nen Satanas?

⁶ Sanen inebatan nen Jesus iray tukso na Diablo, walaray tekston inusar to. Malinlinew ed isip to so Salita na Dios sanen inkuan to: “Walan nisulat . . . Nisulat met . . . Arawi ka, Satanas! Ta walan nisulat, ‘Si Jehova a Dios mo so nepeg mon dayewen, tan sikato labat so nepeg mon panlingkoran.’” Say panangaro ed si Jehova tan ed Salita to so amakiwas ed si Jesus ya ipulisay iray panasagyat na Mananukso. (Mat. 4:1-10) Kayari na aminpigan impangipulisay nen Jesus ed tukso, sikatoy tinaynanan nen Satanas.

7. Panon itayon natulongan na Biblia pian naresistian so tukso?

⁷ No si Jesus et nanmatalek ed Kasulatan pian nalabanan iray tukso na Diablo, mas nagkalalo la sirin ed sikatayo! Tua, pian naresistian tayoy Diablo tan saray alipores to, kaukolan ya amtaen ti’ nin unona iray estandarte na Dios tan sigpot ya unoren iratan. Dakel a totoo so apakiwas a manbilay unong ed saray estandarte na Biblia sanen naaralan day Kasulatan tan naapresyay kakabatan tan inkatunong na Dios. On, “say salita na Dios” et mabisbiskeg a mangibiig ed saray “kanonotan tan getma na puso.” (Heb. 4:12) No kapigan lalon babasaen tan dadalepdepen na sakey so Kasulatan, ditan mas nawalaan na ‘pakatalos ed katuaan nen Jehova.’ (Dan. 9:13, NW) Kanian, maabig no dalepdepen tayo iray teksto ya ontukoy ed saray mismon kakapuyan tayo.

8. Panon itayon nawalaan na masanton espiritu?

⁸ Alabanan nen Jesus so tukso lapud, likud ed kabisado toy Kasulatan, sikatoy “napno na masanton espiritu.” (Luc. 4:1) Pian nawalaan tayo met na ontan a biskeg tan abilidad, kaukolan tayoy onapit ed si Jehova diad sigpot a panganamot ed amin ya probisyon ya inter to pian napano tayo na espiritu to. (Sant. 4:7, 8) Kaiba’d saraya so panagaral na Biblia, pikakasi, tan pililimog ed saray kaagian. Agunggonaan met so dakel ed pagmaliw dan okupado’d saray Kristianon aktibidad, ya ontutulong pian nisentroy nonot ed makapabiskeg iran espiritual a bengatla.

9, 10. (a) Antoray kaslakan a tukso ed saray Kristiano? (b) Panon kan napabiskeg na panagdalepdep tan pikakasi pian nalabanay tukso anggano nakekesawan ka?

⁹ Antoran pakatuksoan so lalabanan mo? Atukso ka la kasin mikarinyoan ed agmo asawa? No anggapoy asawam, aliknam la kasin singa labay moy mi-date ed sakey ya agkapananisiaan? No manbabantay na TV odino man-iinternet so sakey ya agi, ompan biglan naayat ya onnengneng ed bengatlan marutak. Asalim ta la itan? Antoy ginawam? Makabat so pandalepdep ed no panon a say sakey a lingo et mangitonton ed sakey nin lingo anggad magmaliw lan seryoson kasalanan. (Sant. 1:14, 15) Nonot mo pa labat so sakit a nalikna nen Jehova, na kongregasyon, tan na pamilyam no agka manmatoor. Balet no pansiansiaen moy katooran mo ed prinsipyo na Dios, nawalaan kay malinis a konsiensia. (Basaen so Salmo 119:37; Uliran 22:3.) Kapagno nipaarap ka’d ontan iran subok, nepeg a pansagpotan moy manpikasi tan onkerew na biskeg pian nalabanan iratan.

¹⁰ Wala ni nepeg tayon tandaan nipaakar ed  samay impanukso na Diablo. Kayari 40 agew ya impanayunal nen Jesus ed kalawakan, sikatoy inasinggeran nen Satanas. Seguradon ninonot na Diablo ya saya so “maabig a pankanawnawa” pian subokey katooran nen Jesus. (Luc. 4:13) Manaanap met si Satanas na maabig a pankanawnawa pian subokey katooran tayo. Importante sirin ya mansiansia tayon mabiskeg ed espiritual. Kaslakan lan onaataki si Satanas sano amta to a say pupuntiryaen to et maletletey. Kanian sano nakekesawan odino nadidismaya tayo, kaukolan a mas lalo tayon determinado ya onkerew ed si Jehova na proteksion tan masanton espiritu to.​—2 Cor. 12:8-10.

Pinabiskeg Pian Nasungdoay Kesaw tan Inkadismaya

11, 12. (a) Akin et dakel so nadidismaya natan? (b) Anto so mamabiskeg ed sikatayo pian nasungdoay inkadismaya?

¹¹ Lapud ag-inkayadyari, sagpaminsan et nadidismaya tayo. Tan nagkalalo la natan lapud say panaon ya pambibilayan tayo et talagan makapa-stress. Nayarin saya la so sankairapan a panaon ya naeksperiensya na katooan. (2 Tim. 3:1-5) Legan a manasingger so Armagedon, mas onloloor so problema ed ekonomya, emosyon, tan arum niran desdes. Kanian, agla pankelawan ya lalon naiirapan so arum a manumpal ed responsabilidad dan pangasikaso tan panlegpet ed pamilya ra. Sikaray nakekesawan, nabebelatan, nababanalan, tan aliling day naeerep a kandila. No ontan so naliliknam, antoy gawaen mo?

¹² Tandaan, pinaseguroan nen Jesus iray disipulo to ya ikdan to ira na mananulong​—say masanton espiritu na Dios. (Basaen so Juan 14:16, 17.) Saya so sankabiskegan a puersa ed uniberso. Iiter nen Jehova so “mas nagkalalo ni” a biskeg ya nakaukolan tayo pian nasungdoan so antokaman a subok. (Efe. 3:20) Inkuan nen apostol Pablo ya no manmatalek tayo’d saya, naawat tayo so “pakayari a mas mabiskeg nen say pakayari na too,” anggano “nadedetdetan [tayo] ed amin a paraan.” (2 Cor. 4:7, 8) Ag-isisipan nen Jehova ya ekalen toy pakakadetdetan tayo, balet ipapaseguro to a diad panamegley na espiritu to et ikdan to tayo na biskeg pian nasungdoan itan.​—Fil. 4:13.

13. (a) Panon ya apabiskeg ed mairap a kipapasen so sakey ya kalangweran? (b) Kasin walay antam ya ontan iran eksperiensya?

¹³ Imanoen pay eksperiensya nen Stephanie, sakey a regular payunir a manedad na 19. Sanen 12 años to, na-stroke tan nalmoan ya walay tumor to’d utek. Manlapu la’d saman,  amidua lan naoperaan, nampa-radiation, tan na-stroke lamet na amidua, kanian ngalngali agto nigalaw so kawigin parte na laman to tan kinmapuy so mata to. Kaukolan ya ireserba nen Stephanie so biskeg to parad saray ipapasen ton mas importante, a singa say pipiaral tan panagpulong. Tan nalilikna toy panutulong nen Jehova ed sikato pian nasungdoay dakel a bengatla. Saray base’d Biblian publikasyon a pakabasaan na saray eksperiensya na agagi so mamapabiskeg ed sikato sano naeermenan. Sikatoy liligliwaen na saray agagi diad panusulat odino pamapaseseg da’d sikato antis tan kayari aral. Ipapanengneng met na saray interesadon totoo so panangapresya ra’d ibabangat nen Stephanie diad iyaakar da’d abung to pian paiyaralan na Biblia. Lapud sarayan amin, pisalsalamatan nen Stephanie si Jehova. Say paborito ton teksto et Salmo 41:3, a papanisiaan ton tinmua ed sikato.

14. Antoy paliisan tayo sano nadidismaya, tan akin?

¹⁴ Sano nakekesawan odino nadedesdes, agtayon balot komon ikakatunongan a pian nainawaan et bawasan tayoy espiritual a kimkimey tayo. Baleg itan a lingo. Akin? Lapud say panagaral na Biblia bilang indibidual tan pamilya, say panagpulong, tan say pipiaral so paraan pian naawat tayo so makapabiskeg a masanton espiritu. Saray kimkimey tayo ran Kristiano et lawas a makaparepresko. (Basaen so Mateo 11:28, 29.) Mabetbet a sano saray agagi et onsabi’d aral a naksawan, onsempet iran apabiskeg, a singano akargaan lamet so espiritual a baterya ra!

15. (a) Kasin isisipan nen Jehova ya main-inomay so pagmaliw a Kristiano? Ipaliwawa base’d Kasulatan. (b) Anto so isisipan na Dios ed sikatayo, tan antoy nitepet tayo?

¹⁵ Siempre, agto labay ya ibagan main-inomay so pagmaliw a Kristiano. Kaukolan tayoy mansagpot pian magmaliw a matoor a Kristiano. (Mat. 16:24-26; Luc. 13:24) Anggaman ontan, panamegley na masanton espiritu, ikdan nen Jehova na biskeg so nakekesawan. “Saray manalagar ed Jehova pasimbaloen to so biskeg da; mamaatagey ira naani ya akapayak a singa say agila; ombatik ira naani, tan ag-ira nakesawan; manakar ira naani, tan ag-ira onkapuy,” so insulat nen propeta Isaias. (Isa. 40:29-31) No ontan sirin, maabig no tepetan tayoy sarili tayo, Anton talagay rason no akin et liknaen tayon makapabelat iray Kristianon aktibidad?

16. Antoy gawaen tayo pian naekal iray posiblin sengegan na kesaw odino inkadismaya?

¹⁶ Papasesegen itayo na Salita nen Jehova ya “seguroen iray mas importantin bengatla.” (Fil. 1:10) Inkompara nen apostol Pablo so kabibilay na Kristiano ed lumbay batik, tan sikatoy pinuyanan a mamilin: “Ekalen tayo met . . . so amin a pakabelatan . . . , tan anosan tayoy ombatik ed lumba a niiyan diad arapan tayo.” (Heb. 12:1) Say labay ton ibaga et nepeg tayon paliisan iray agnakaukolan ya aktibidad, saray makapabelat a bengatla, a mamakesaw ed sikatayo. Ompan dakdakel so isasalet tayo’d okupado lan eskedyul tayo. Kanian no naynay kan nakekesawan tan nadedesdes, makatulong ed sika so pangusisa ed no kaunongay nasarag mo’d trabaho, kabetbet na pambakasyon mo’d arawi, tan pamapasyam ed isports odino arum niran panagligliwaan. Nepeg a say inkamakatunongan tan inkamapaabeba so mamakiwas ed sikatayon amin a mamidbir ed limitasyon tayo tan mamawas ed agmet nakaukolan iran aktibidad.

17. Akin et nadidismaya so arum, balet anto so ipapaseguro nen Jehova?

¹⁷ Ompan saray arum ed sikatayo et nadidismaya met lapud agni sinmabi so iilaloan tayon  anggaan na sayan sistema na bengabengatla. (Uli. 13:12) No oniay nalilikna tayo, napaseseg itayo na Habacuc 2:3: “Say pasingawey sikato ni nipaakar ed nigeter a panaon, tan mansiglat ya onarap ed anggaan, et agnaani mantila. Anggan manabala, sikato so alagden mo; ta petepeteg ya onsabi, ya agmanbayag.” Papaseguroan itayo nen Jehova ya say anggaan na sayan sistema na bengabengatla et onsabi’d eksakton eskedyul to!

18. (a) Antoran sipan so mamapabiskeg ed sika? (b) Panon a makatulong ed sikatayo so ontumbok ya artikulo?

¹⁸ Seguradon al-alagaren na amin ya matoor a lingkor nen Jehova so agew sano naandi lay kesaw tan inkadismaya, sano panggayagaan la na amin so “kaugawan” odino kaksilan. (Job 33:25) Anggan natan et napapabiskeg so “inkatoo tayo ed loob” lapud tulong na masanton espiritu legan itayon mibibiang ed makaparepresko iran espiritual ya kimkimey. (2 Cor. 4:16; Efe. 3:16) Agmo aabuloyan so banal a mangamper ed sikan mangawat ed saray magnayon a bendisyon. Amin ya subok​—balanglan lapud tukso, kesaw, odino inkadismaya—​et mangangga met lanlamang, no aliwan natan, diad balon mundo na Dios. Diad ontumbok ya artikulo, usisaen tayo no panon a papabiskegen na masanton espiritu iray Kristiano pian nitepel day panamasegsegang, nadaeg so makapuy ya desdes na kalimog, tan nasungdoay arum niran problema.

Antoy Ebat Mo?

• Panon itayon napabiskeg na panagbasay Biblia?

• Panon itayon napabiskeg na pikakasi tan panagdalepdep?

• Panon mon naekal iray posiblin sengegan na inkadismaya?

[Tepetepet Parad Panagaral]

[Litrato ed pahina 24]

Saray aral et mamapabiskeg ed espiritualidad tayo