Pinabiskeg Pian Natalonaay Antokaman a Subok

“Diad amin a bengatla et ombibiskeg ak diad panamegley na samay mangiiter ed siak na pakayari.”​—FIL. 4:13.

1. Akin et dakel so naeeksperiensyan problema na saray totoo nen Jehova?

SIKATAYO ran totoo nen Jehova et makakaeksperiensya na nanduruman problema. Arum ed saratan a subok et lapud ag-inkayadyari odino lapud mauges a sisteman pambibilayan tayo. Saray arum et lapud pamubusol ed sikatayo na saray agmanlilingkor ed Dios. (Gen. 3:15) Manlapu la nensaman, tutulongan na Dios iray matoor a lingkor to pian nitepel day panamasegsegang, nadaeg so mauges a pananesdes na kalimog, tan nasungdoay arum nin problema. Say masanton espiritu to so mamabiskeg ed sikatayo pian nagawaan met iraya.

Tinulongan Pian Nitepel so Panamasegsegang

2. Anto so gagala na panamasegsegang, tan antoray klase na satan?

² Say panamasegsegang et panamagyaw odino inggagalan panangataki ed totoo lapud pananisia ra. Gagala na satan a patundaen so sakey a relihyon, amperey kikayat na satan, odino buyakey pananisia na saray membro. Saray arum a panamasegsegang et nayarin parungtalan, saray arum balet et agnaliklikas. Diad Biblia, inyaliling so panangataki nen Satanas ed leon tan kobra.​—Basaen so Salmo 91:13.

3. Anto so singa leon tan singa kobra a panamasegsegang?

 ³ Singa say masibeg a leon, mabetbet ya say panangataki nen Satanas et direkta odino parungtalan, panamegley na panamairap, panangipriso, odino pananebel. (Sal. 94:20) Naromog ed Yearbook tayo so dakel a salaysay na saray Tasi nen Jehova ya akasagmak na ontan iran pakana. Saray mauges a grupo na totoo, ya idadaulo na arum a papari odino panatikon politiko so amairap ed totoo na Dios ed dakel a pasen. Sarayan singa leon a panangataki so amatunda’d arum a manlingkor ed si Jehova. Singa say kobra, masilib met ya onaataki so Diablo pian samalay kanonotan tan palikdoey totoo a manggawa’d panlabayan to. Sayan panangataki et mamakapuy odino maneral ed espiritualidad tayo. Balet, diad panamegley na masanton espiritu na Dios, nadaeg tayo iratan a panamasegsegang.

4, 5. Antoy sankaabigan a gawaen pian makapanparaan ed panamasegsegang, tan akin? Mangiter na alimbawa.

⁴ Agtayo la kaukolan ya nodnonoten iray posiblin panamasegsegang ed arapen pian makapanparaan tayo. Agtayo amta no antoy nagawa ed arapen, kanian anggapoy nitulong na panaburido’d saray bengatlan nayarin agbalot nagawa. Balet, walay sarag tayon gawaen. Maslak ed saray akapansungdo ed panamasegsegang et atulongan na impandalepdep da ed katooran na saray lingkor nen Jehova ya akarekord ed Biblia, ontan met ed saray bangabangat tan ehemplo nen Jesus. Akatulong iya ed sikara pian napaaralem day panangaro ra’d si Jehova. Tan satan a panangaro so amakiwas ed sikaran daegey antokaman a subok.

⁵ Imanoen tayo pay eksperiensya na duaran agagi tayon bibii diad Malawi. Pian napilitan iran mangaliw na kard na sakey a partido na politika, sikaray pinekpek, nilakseban, tan tinaktakot ya i-rape. Tinilaan da ra ya anggan saray membro na Bethel et angaliw la. Antoy inyebat da ey? “Anggapo lay arum a panlingkoran mi noag si Jehova a Dios labat. Kanian no angaliw iramay walad sangan opisina, wala la’d sikara ‘tan. Agkami mikompromiso, anggano pateyen yo kami!” Lapud inkakpel da, imbulos da la ra.

6, 7. Panon ya papabiskegen nen Jehova iray lingkor to pian arapen so panamasegsegang?

⁶ Inkuan nen apostol Pablo ya inawat na saray Kristiano ed Tesalonica so katuaan “diad dakel a kairapan,” balet “tekep na liket, a manlalapud masanton espiritu.” (1 Tes. 1:6) On, dakel ya Kristiano, nensaman tan natan, ya akasagmak tan akatalona ed panamasegsegang, so mangibabagan legan na saramay sankairapan a parte na subsubok ed sikara et awalaan ira na deen, sakey ya aspekto na bungay masanton espiritu na Dios. (Gal. 5:22) Tan satan ya deen so tinmulong pian nasalimbengay puso tan nonot da. Peteg ya uusaren nen Jehova so aktibon puersa to pian pabiskegen iray lingkor to. Diad ontan et nasungdoan da iray subok tan makapandesisyon na duga sano walay kairapan. *

⁷ Pandinayewan na saray akaobserba so pansasagpot na saray totoo na Dios a mansiansian matoor anggan sano maruksan papasegsegangen. Singano walay mas ni nen say toon biskeg na saray Tasi, tan tuan mabiskeg ira. Oniay impaseguro ed sikatayo nen apostol Pedro: “No papabandayen kayo nisengeg ed ngaran nen Kristo, maliket kayo, ta walad sikayo so maglorian espiritu, salanti, say espiritu na Dios.” (1 Ped. 4:14) Say panamasegsegang lapud panutumbok tayo’d maptek ya estandarte so pakapatnagan ya aabobonan itayo na Dios. (Mat. 5:10-12; Juan 15:20) Talagan makapalikliket iyan paneknek na panamendisyon nen Jehova!

Tinulongan Pian Nadaeg so Desdes na Kalimog

8. (a) Antoy akatulong ed si Josue tan Caleb a nadaeg so desdes na kalimog? (b) Antoy naaralan tayo ed alimbawa ra?

⁸ Say mas agnaliklikas a klase na isusumpa  ya kaukolan a sungdoan na saray Kristiano et say mauges a desdes na kalimog. Balet, lapud say espiritu nen Jehova et mas mabiskeg nen say espiritu na mundo, sarag tayon sumpaen so totoon mamabalaw ed sikatayo, a mangikakayat na katilaan nipaakar ed sikatayo, odino mamipilit ed sikatayon mialig ed sikara. Alimbawa, akin et agnaimpluensyaan si Josue tan Caleb a mipakna ed panmoria na saramay samploran kaiba ra a nan-espiya ed dalin na Canaan? Lapud pinakiwas ira na masanton espiritu a nawalaan na duman “espiritu,” odino panmoria.​—Basaen so Numeros 13:30; 14:6-10, 24.

9. Akin et nepeg a mabulos iray Kristiano a magmaliw ya duma ed karaklan?

⁹ Say masanton espiritu met so amabiskeg ed saray apostol nen Jesus pian say tuloken da et say Dios imbes a saramay bibidbiren na karaklan a managbangat na tuan relihyon. (Gawa 4:21, 31; 5:29, 32) Mas labay na karaklan so mila’d agos, a singa panangibaga, pian napaliisay pisangsangan odino pialaay salita. Diad saray tuan Kristiano balet, kaukolan day onsuba ed agos pian gawaen so amta ran duga. Ingen ta lapud biskeg ya iiter na aktibon puersa na Dios, agda tatakotay pagmaliw a duma. (2 Tim. 1:7) Pantongtongan tayo pay sakey a klase na desdes na kalimog ya nepeg tayon daegen.

10. Anton problema so nadadalan na arum a Kristiano?

¹⁰ Walaray kalangweran a naproblema no naamtaan dan akagaway mauges so kaaro ra. Ompan isipen da a no onkerew iray tulong ed saray elder et naderal so pankakaaro ra. Kanian lapud lingon katooran, agda labay ya ibaga itan. Ompan piliten ni ingen na samay nankasalanan so kaaro to ya isekreto itan. Tua, say onian problema et nagagawa ed saray kalangweran. Anggan saray arum ya adulto la et mairap dan ibaga’d saray elder so lingon agawaan na sakey a kaaro odino kapamilya ra. Balet, antoy nepeg ya gawaen na saray tuan Kristiano ed ontan a desdes?

11, 12. Antoy maabig a gawaen no walay kakongregasyon mon agto labay a paibagay kasalanan to, tan akin?

¹¹ Niay sakey a situasyon. Alimbawa et naamtaan na sakey a kalangweran a si Alex ya say kaaro to’d kongregasyon a si Steve et niyugali to lay manbantay na pornograpiya. Imbaga nen Alex ed si Steve a sikatoy naaaburidon maong ed gagawaen to. Balet, imbaliwala labat itan nen Steve. Sanen kinombinsi nen Alex so kaaro to ya ipatua itan ed saray elder, inkuan nen Steve ya, “no talagan sankaaro ta, agmo ak idalem ed saray elder.” Kasin antakot si Alex a napabarong so kaaro to? Ompan isipen to no siopa kasi panisiaan na saray elder no ag-aminen nen Steve so kasalanan to. Balet, tandaan ya no manpareen labat si Alex, onloor so situasyon. Ompan nabalang nen Steve so relasyon to ed si Jehova. Kanian, maabig no nodnonoten nen Alex ya “say takot [ed] too mantarok na kalot; balet anggan siopa ya ipasen to so ilalo to ed Jehova nilaban.” (Uli. 29:25) Anto ni nayarin gawaen nen Alex? Nayarin  maaro ton laen lamet si Steve tan pantongtongay problema. Kaukolan nen Alex so manpakpel. Ompan diad sayan pankanawnawa et labay la nen Steve a pantongtongan itan. Nepeg a kombinsien lamet nen Alex si Steve a mitongtong ed saray elder tan ibaga to ya no ag-itan gawaen nen Steve ed magenap a panaon, sikato lay mangibaga ed saray elder.​—Lev. 5:1.

¹² No asalim lay onian situasyon, nayarin diad gapo et agnagustoan na kaarom so pansasagpot mon ontulong. Balet nayarin namoria to lanlamang a para itan ed pankaabigan to. No awaten na nankasalanan so tulong, nayarin lawas ton pisalamatan so pakpel tan katooran mo. Diad biek a dapag, no onsyodot ed sika, ontan kasin kaaro so labay mo? Say pamaliket ed sankamaongan a Kaaro tayo, si Jehova, so lawas dugan gawaen. No sikatoy iyuna tayo, pablien itayo na saray arum nin mangaaro ed sikato lapud katooran tayo tan magmaliw itayon tuan sankakaaro. Nepeg ya agtayon balot iikdan na pankanawnawa so Diablo a maneral ed loob na kongregasyon. Ta no andi et napaermen tayoy masanton espiritu nen Jehova. Balet, onkikiwas itayo a mitunosan ed satan no pansasagpotan tayon pansiansiaen a malinis so kongregasyon.​—Efe. 4:27, 30.

Pinabiskeg Pian Nasungdoay Nanduruman Problema

13. Antoran problema so nasasagmak na totoo nen Jehova, tan akin et kasmak iratan natan?

¹³ Nandurumay klase na probleman nasasagmak tayo. Nayarin lapud pinansyal, impakaandi trabaho, kalamidad, impatey na inad-aro, sakit, tan arum ni. Lapud manbibilay itayo ed “mair-irap a panaon,” amta tayon walan walaray subok a nasagmak tayo. (2 Tim. 3:1) No nagawa itan, kaukolan ya agtayo natataranta. Pabiskegen itayo na masanton espiritu pian nasungdoan tayo so antokaman a problema.

14. Antoy amabiskeg ed si Job pian nasungdoan iray nanduruman problema?

¹⁴ Nantutumbokay asagmak nen Job a problema. Naandi ray kaykayarian, ananak, kakaaro, tan bunigas na laman to, tan naandi talek na asawa to ed si Jehova. (Job 1:13-19; 2:7-9) Balet, sikatoy niligliwa nen Elihu. Say imbaga nen Elihu, tan say mensahe nen Jehova ed si Job et: “Mandeen ka, tan isipen mo so saray makapakelaw a gawa na Dios.” (Job 37:14) Antoy akatulong ed si Job pian nasungdoay subsubok? Tan antoy makatulong met ed sikatayo? Makatulong so pannodnonot tan pandalepdep ed nanduruman pakapatnagan na masanton espiritu tan pakayari nen Jehova. (Job 38:1-41; 42:1, 2) Ompan walaray nanonotan mon eksperiensyam ya apaneknekan mon mismoy panangiyansakit na Dios ed sika. On, sikatoy mangiyaansakit nin siansia ed sikatayo.

15. Antoy amabiskeg ed si apostol Pablo pian nasungdoay subsubok?

¹⁵ Dakel so sinungdoan nen apostol Pablo ya ir-irap tan inrisga to ni ingey bilay to lapud pananisia to. (2 Cor. 11:23-28) Panon ton apansiansiay inkakalmado tan inkabalanse diad saraman a mairap ya kipapasen? Akatulong so pikakasi tan panagmatalek ed si Jehova. Sanen nasusubok, a nayarin nansumpal ed impamatey da’d sikato, insulat to: “Walad  abay ko so Katawan tan pinabiskeg to ak, pian diad panamegley ko et sigpot a nasumpal so panagpulong tan narengel itan na amin a nasyones; tan inliktar to ak ed sangi na leon.” (2 Tim. 4:17) Kanian, lapud mismon eksperiensya nen Pablo, sarag ton paseguroan iray kaagian to ya agda nepeg a ‘pampagaan so antokaman.’​—Basaen so Filipos 4:6, 7, 13.

16, 17. Mangiter na alimbawa ed no panon a papabiskegen nen Jehova so totoo to pian naarap so nanduruman problema natan.

¹⁶ Apaneknekan na sakey a payunir a manngaray Roxana a tataryaan nen Jehova so totoo to. Sanen sikatoy onkekerew na bakasyon ed amo to pian makaatendi’d kombension tayo, mapaspasnok ya inmebat so amo to ya no ontuloy si Roxana et nasisanti. Linma nin siansia si Roxana, balet masimsimoon ton impikasi ya agkomon nasisanti. Kayari na satan et linmigen so liknaan to. Kasabi Lunes kasumpal na kombension, sinisanti da ya tua. Mapagpaga si Roxana. Kaukolan to iman a trabaho ta anggano melag so sueldo, makakatulong ed pamilya to. Sikatoy nampikasi lamet, tan ninodnonot to ya ataryaan na Dios so espiritual ya pankaukolan to diad kombension, kanian seguradon nataryaan To met so pankaukolan to’d pisikal. Legan a manaakar pasempet, anengneng nen Roxana so sakey a karatulan say akaiyan et “Wanted” diad sakey a pabrikan mankaukolay maong a managdait. Sikatoy nan-aplay. Naamtaan na manedyer ya anggapoy eksperiensya to balet sikatoy inawat to nin siansia, tan ngalngali doble ni ingey sueldo to kompara’d samay dati. Alikna nen Roxana ya naebatay pikakasi to. Balet, say sankaabigan ya bendisyon ed sikato et ninabang toy maong a balita ed dakel ya katrabaho to. Tan limara ed sikara, kaibay manedyer, so angawat ed katuaan tan nampabautismo.

¹⁷ No maminsan, ompan liknaen tayon agtampol naeebatan iray pikakasi tayo odino say ebat et aliwan samay iilaloan tayo. Maseguron walay maabig ya rason. Amta itan nen Jehova, balet nayarin natalosan tayo labat itan diad panakar na panaon. Nia so segurado tayo​—agpaulyanan na Dios iray matoor a lingkor to.​—Heb. 6:10.

Tinulongan Pian Natalonaan Iray Subok tan Tukso

18, 19. (a) Akin et agti’ pankelawan a walan walaray nasagmak tayon subok tan tukso? (b) Panon tayon natalonaan iray subok?

¹⁸ Amta na saray totoo nen Jehova ya walan walaray nasagmak dan pakatuksoan, pakadismayaan, panamasegsegang, tan desdes na kalimog. Kabusol itayo na sayan mundo. (Juan 15:17-19) Balet, tulongan itayo na masanton espiritu ed antokaman ya subok a nadalan tayo diad panaglingkor ed Dios. Ag-itayo abuloyan nen Jehova a nipaarap ed tukso ya agtayo nitepel. (1 Cor. 10:13) Agto itayon balot taynanan nisay paulyanan. (Heb. 13:5) Say katutulok ed pinuyanan ya Salita to so manalimbeng tan mamabiskeg ed sikatayo. Niarum ni, pakiwasen na masanton espiritu na Dios iray kaagian tayo pian ontulong sano kakkaukolan tayo itan.

¹⁹ Komon ta itultuloy tayon amin ya kerewey masanton espiritu panamegley na pikakasi tan panagaral na Biblia. Tan komon ta mantultuloy itayon ‘napabiskeg a maong unong ed maglorian biskeg na Dios ta pian sigpot itayon makapansungdo tan maliket a makapan-anos na andukey.’​—Col. 1:11.

[Paimano ed leksab]

Antoy Ebat Mo?

• Antoy sankaabigan a gawaen mo pian makapanparaan ed panamasegsegang?

• Antoy gawaen mo no walay agmalabay a paibagay kasalanan to?

• Akin et makapanmatalek ka ya nasarag moy antokaman a problema?

[Tepetepet Parad Panagaral]

[Litrato ed pahina 28]

Antoy naaralan tayo’d si Josue tan Caleb?

[Litrato ed pahina 29]

Panon mon natulongay kaarom ya akagaway kasalanan?