Respetoen so Regalo na Dios a Panangasawa

“Sikato ya sirin so makasengeg no akin et taynan na laki so ama to tan say ina to tan mikasakey ed asawa to, et magmaliw iran saksakey a laman.”​—GEN. 2:24, MAUNG A BALITA.

1. Akin et kanepegan nen Jehova so respeto tayo?

SI Jehova a Dios, say Manangigapo na panangasawa, et seguradon mankanepegay respeto tayo. Lapud sikato so Manamalsa, Soberano, tan mangatatawen ya Ama tayo, manepeg labat a sikatoy deskribien bilang Manangiter na “amin a maong a regalo tan amin ya ayadyarin langkap.” (Sant. 1:17; Apo. 4:11) Saya so sakey a pakapatnagan na pirmin panangaro to. (1 Juan 4:8) Amin ya imbangat to ed sikatayo, amin ya kakaukolanen to ed sikatayo, amin ya inter to ed sikatayo et parad pankaabigan tan pakagunggonaan tayo.​—Isa. 48:17.

2. Antoray instruksion nen Jehova ed unonan sanasawa?

² Ipaparungtal na Biblia a say panangasawa et sakey ed saray “maong” a regalo na Dios. (Rut 1:9; 2:12) Sanen ginawa nen Jehova so unonan kasal, inikdan toy sanasawan si Adan tan Eva na espisipiko iran instruksion no panon iran ontalona. (Basaen so Mateo 19:4-6.) No inunor da komon so bilin na Dios, lawas ira komon a nagmaliw a maliket. Balet, makulangkulang dan imbaliwala so ganggan na Dios tan teribli iray nansumpalan.​—Gen. 3:6-13, 16-19, 23.

3, 4. (a) Antoy mangipapanengneng ya dakel natan so agmanrerespeto ed panangasawa tan ed si Jehova a Dios? (b) Antoran alimbawa so aralen ed sayan artikulo?

³ Singa say unonan sanasawa, sano mandedesisyon ed panangasawa so dakel a totoo natan, ngalngali agda ikonsidera odino agdan talaga ikokonsidera iray bilin nen Jehova. Walaray manaamong ya agkasal, saray arum balet et mangaasaway kapara ran laki o bii pian labat penekey pilpilalek da. (Roma 1:24-32; 2 Tim. 3:1-5) Agda ipapasen ya regalo na Dios so panangasawa, tan lapud agda rerespetoen itan a regalo, agda met sirin rerespetoen so Angiter, si Jehova a Dios.

⁴ No maminsan, anggan saray totoo na Dios et nalilingwanan day panmoria nen Jehova nipaakar ed panangasawa. Walaray Kristianon sanasawa a mansisian, odino mandidiborsyo anggano anggapoy Makasulatan a basiyan. Panon iyan napaliisan? Panon a makatulong so bilin na Dios ed Genesis 2:24 pian napaelet so panamaley da? Tan panon a makapanparaan iray manpaplanon mangasawa o miasawa? Imanoen tayo natan so taloran matalonan panangasawa diad Biblia a mangipapanengneng a say panagrespeto ed si Jehova so manunan makatulong pian agnabuyak so panamaley.

Bayuboan so Katooran

5, 6. Anton situasyon so akasubokan nen Zacarias tan Elizabeth, tan panon ya atumangan so katooran da?

⁵ Si Zacarias tan Elizabeth et nanggawa na susto iran desisyon tan nanmatoor. Parehon say pinili ran asawa et maespiritual ya lingkor nen Jehova. Matoor a sinumpal nen Zacarias iray kimey to bilang saserdote, tan ginawa ray anggaay nayarian da ya unoren so Ganggan na Dios. Seguradon dakel so pisalamatan da. Balet, no akaonla ka komon ed abung da diad Juda, nayarin naimanom ya walay kulang. Anggapoy anak da. Agmakaanak si Elizabeth, tan maedad la ra.​—Luc. 1:5-7.

 ⁶ Diad Israel nensaman, importantin maong ed sikara so pakawalaay ananak, tan kaslakan et baleg iray pamilya. (1 Sam. 1:2, 6, 10; Sal. 128:3, 4) Tan walaray Israelitan lalaki a mapalikdon mangididiborsyo ed kaasawaan da ya agmakaanak. Si Zacarias balet et nanmatoor ed si Elizabeth tan agto tinaynanan. Agto nanggaway paraan pian makalukpos, tan ontan met nen akulaw to. Anggano maermen ira lapud anggapoy anak da, siansia nin matoor iran nanlingkor ed si Jehova a saniba. Asabi panaon, mamilagron tinumangan ira nen Jehova, sikaray akaanak ni anggano maedad la ra.​—Luc. 1:8-14.

7. Anto ni sakey a paraan a pinaneknekan nen Elizabeth so katooran to ed masiken to?

⁷ Impanengneng nen Elizabeth so makapadinayew a katooran to ed sakey nin paraan. Sanen inyanak si Juan, agmakasalita si Zacarias lapud agto sinisia so anghel na Dios. Kanian, nanggaway paraan si Zacarias pian nipaliwawa’d akulaw to so imbaga ed sikato na anghel nen Jehova a say ingaran ed ugaw et “Juan.” Say labay na saray kakaabay tan kakanayon da et “Zacarias” met lay ingaran ed ugaw. Balet, matoor a sinuportaan nen Elizabeth so imbaga nen masiken to. Inkuan to: “Andi! Ta say panawag ed sikato et Juan.”​—Luc. 1:59-63.

8, 9. (a) Panon a napaelet na katooran so panamaley? (b) Antoray espisipikon paraan a nipanengneng na sanasawa so katooran da ed sakey tan sakey?

⁸ Singa si Zacarias tan Elizabeth, saray sanasawa natan et nadidismaya tan napoproblema met. Say panangasawan anggapoy katooran et ag-ontalona. Say pikakarinyoan, pornograpiya, pikakalugoran, tan arum niran kapeligroan so nayarin mangekal ed talek, a mairap lan napapawil. Tan sano anggapo lay talek da’d sakey tan sakey, ombetel met lay aroan. Say katooran sirin et pinagka-alar a manprotekta ed pamilyan walad loob na abung no wala ray mauges ya totoo tan pakapeligroan. Kanian, no matoor ed balang sakey so sanasawa, marakep so ulopan da, nibalikas day nalilikna ra’d sakey tan sakey, tan mas onaralem so aroan da. On, importante so katooran.

⁹ Imbaga nen Jehova ed si Adan: “Taynan na laki so ama to tan say ina to tan mikasakey ed asawa to.” (Gen. 2:24, MB) Antoy kabaliksan na satan? Say pipiulop ed kakaaro tan kapamilya et manguman. Kaukolan ya say unonan ikdan la na panaon tan atension na sanasawa et say balang sakey. Agda nayarin paulyanay asawa ra pian niyunay kakaaro tan kakanayon da. Tan agda met nepeg ya abuloyay atateng da a mibabali ed saray desisyon odino problema ra. Kaukolan lan mankasakey ira. Satan so bilin na Dios.

10. Antoy makatulong ed sanasawa pian nabayuboan day katooran?

¹⁰ Anggan diad saray pamilyan nandumaay relihyon, makatulong na baleg so katooran. Oniay inkuan na agin bii ya aliwan Tasi masiken to: “Misalsalamat ak ed si Jehova ta imbangat to ak a manpasakop tan manrespeton maong ed asawak. Say katooran mi so nanresulta ed 47 taotaon ya impaniba, a napnoy aro tan respeto.” (1 Cor. 7:10, 11; 1 Ped. 3:1, 2) Kanian pankimeyan mon ipalikna’d asawam a sikatoy inad-arom. Diad salita tan kiwas, lanang mon ipaseguro a parad sika, sikato so sankaimportantian a too diad interon mundo. Komon ta agmo aabuloyan so siopaman o antokaman a maneral ed relasyon yo. (Basaen so Uliran 5:15-20.) Oniay imbaga nen Ron tan Jeannette, a masulok lan 35 taon a kasal: “Lapud matoor min susumpalen so kakaukolanen na Dios, maliket tan matalona so panamaley mi.”

Napaelet na Pankakasakey so Panamaley

11, 12. Panon ya nantulongan si Aquila tan Priscila diad (a) abung, (b) anapan, tan (c) ministeryo?

¹¹ Maapit a kakaaro nen apostol Pablo si Aquila tan Priscila. Kada no sasalambiten toy Aquila, kaiban kaibay Priscila. Sayan sanasawan maapit ed balang sakey et ehemplo ed labay ya ibaga na Dios sanen inkuan ton say asawan laki tan bii et nepeg a magmaliw ya ‘saksakey a laman.’ (Gen. 2:24) Naynay iran  saniban nankimey ed abung, anapan, tan ministeryo. Alimbawa, sanen kasabisabi nen Pablo ed Corinto, sikatoy inimbitaan di Aquila tan Priscila a miayam ed sikara, tan nayarin ditan so temporaryo a pinagkasentro na kimey to. Diad saginonor, sanen wala ra’d Efeso, impausar day abung da pian panaralan na kongregasyon tan tinulongan dan sanasawa iray balo ni, a singa si Apolos, pian onaligwas ed espiritual. (Gawa 18:2, 18-26) Insan, sayan maseseg a sanasawa et linma’d Roma, tan mabulos da lamet ya impausar so ayaman da parad saray pantitipon na kongregasyon. Asabi panaon, pinmawil ira’d Efeso tan pinabiskeg da iray agagi.​—Roma 16:3-5.

¹² Wala met so pankanawnawan akaiba di Aquila tan Priscila si Pablo ed anapan dan panaggaway tolda. Ditan et saniba lamet iyan sanasawa, sikaray nantulongan tan agnanlaslasan odino nankolkol. (Gawa 18:3) Balet, seguradon say impaniba ra’d Kristiano iran aktibidad so manunan tinmulong ed sikara pian mansiansian malet tan maliket so panamaley da. Balanglan diad Corinto, Efeso, odino Roma, kabkabat iran ‘kaiba a komikimey ed si Kristo Jesus.’ (Roma 16:3) Inerman so nanlingkoran da, nantulongan ira pian nasuportaan so kimey a panangipulong ed Panarian.

13, 14. (a) Antoray makasbel ed pankasakey na sanasawa? (b) Antoray nayarin gawaen na sanasawa pian napaelet so ulopan da bilang “saksakey a laman”?

¹³ On, no parehoy kalat na sanasawa tan saniba ran mankimey, onelet so panamaley da. (Ecl. 4:9, 10) Balet, makapaermen ta ngalngali anggapo lay panaon na dakel a sanasawa ed sakey tan sakey. Likud ed andukey ya oras ed trabaho, nandumaan ni trabaho ra. Saray arum et nititilak day kaasawaan da lapud arawi trabaho ra odino lapud mana-abroad ira pian walay nipawit da. Wala met balet iramay sanasawan singa aglanlamang saniba ed abung ta say panaon da et walad TV, isports, video games, odino Internet. Kasin nagagawa itan ed pamilyam? No ontan, kasin ni-adjust moy eskedyul mo pian mas walay panaon mo ed asawam? Agta maabig no mantulongan kayo’d saray kimkimey a singa say panluto, panuras na plato, odino pantanem? Nayari ta’n mantulongan kayon mangasikaso ed ananak odino maedad lan atateng yo?

¹⁴ Sankaimportantian ed amin, kaukolan a regular kayon maniba ed saray kimey parad panagdayew ed si Jehova. Say pangusisa ed inagew-agew a teksto tan panagdayew na pamilya so sankaabigan a pankanawnawa pian mansiansian nankakasakey so kanonotan tan kalat na pamilya. Ontan met, saniban mibiang ed ministeryo. No nayari, manpayunir kayon dua, anggano sakey bulan labat odino sakey taon no satan so nasarag yo. (Basaen so 1 Corinto 15:58.) Oniay inkuan na sakey ya agin bii a nampayunir kaibay asawa to: “Say ministeryo so sakey a paraan pian makapanulop tan talagan makapantongtong kami. Lapud parehoy kalat min tulongan so arum ya naamtaay katuaan, aliknak ya talagan san-partner kami. Mas apaapit ak ed sikato aliwa labat lan bilang asawa, noagta bilang maong a kaaro.” No saniba kayo ed makagunggonan kimkimey, kalkalnan manpara la ray interes,  prayuridad, tan ugali yo ya anggad magmaliw kayo lan “saksakey a laman” diad panag-isip, liknaan, tan kakikiwas, a singa si Priscila tan Aquila.

Iyuna Yoy Espiritual Iran Bengatla

15. Anto so manunan makatulong pian matalona so panangasawa? Ipaliwawa.

¹⁵ Amta nen Jesus ya importantin iyuna so Dios ed panamaley. Anengneng ton ginawa nen Jehova so sankaunaan a kasal. Naimano ton malikeliket si Adan tan Eva sanen tutumboken da ni bilin na Dios. Tan naimatonan toy impakagonigon da sanen imbaliwala ra itan. Kanian sanen nambangat, inulit toy instruksion nen Ama to a nabasa ed Genesis 2:24. Tan oniay inyarum to: “Say impankasakey na Dios, agnepeg a pansianen na too.” (Mat. 19:6) Kanian, say aralem a respeto ed si Jehova so siansia nin manunan makatulong pian maliket tan matalona so panangasawa. Diad saya et talagan napanuliranan so atateng nen Jesus, a si Jose tan Maria.

16. Panon ya impatnag di Jose tan Maria ya inyuna day espiritual iran bengatla ed pamilya da?

¹⁶ Si Jose et maomaong tan marespeto ed si Maria. Sanen naamtaan ton malukon si Maria, labay ton pidenengan ed mapangasin paraan, anggan sanen agni impaliwawa na anghel na Dios no antoy agawa ed si Maria. (Mat. 1:18-20) Bilang sanasawa, inunor day ganggan nen Cesar tan say Mosaikon Ganggan. (Luc. 2:1-5, 21, 22) Tan anggaman lalaki labat so obligadon onatendi ed saray manunan relihyoso a piesta diad Jerusalem, tinaon ya inmatendi si Jose tan Maria, kaibay ananak da. (Deu. 16:16; Luc. 2:41) Dakel so pakapatnagan a nanggunaetan na sayan maridios a sanasawa a napaliket si Jehova tan impanengneng day aralem a respeto ed espiritual iran bengatla. Agpankelawan sirin ya pinili ira nen Jehova a mangasikaso ed si Jesus legan na ibabaleg to.

17, 18. (a) Antoray paraan a niyuna na sanasawa so espiritual iran bengatla ed pamilya da? (b) Panon iyan makagunggona ed sikara?

¹⁷ Iyuuna met kasi na pamilyam iray espiritual iran bengatla? Alimbawa, no manggawa kayo na importante iran desisyon, kasin i-research yo nin unona iray prinsipyo ed Biblia, ipikasi itan, tan onkerew na tulong ed agin matatken ed espiritual? Odino kasin uunoren yoy dilin panmoria yo odino say ibabaga na pamilya tan kakaaro yo? Kasin pansasagpotan yon iyaplika iray praktikal ya suhestion na matoor ya aripen nipaakar ed panangasawa tan bilay na pamilya? Odino mas naiimpluensyaan kayo na saray tradisyon odino simbawa na kabkabat iran totoo? Regular kayo kasin manpipikasi tan manaaral a saniba, manggagawa na espiritual iran kalat, tan mantotongtong nipaakar ed saray prayuridad na pamilya?

¹⁸ Oniay inkuan nen Ray, a 50 taon lan maliket a kasal: “Anggapon balot so probleman agmi ayarian, lapud si Jehova so kabiangan na ‘tinalo a lubir’ mi.” (Basaen so Eclesiastes 4:12.) Miabobon ed satan si Danny tan Trina. Inkuan da: “Legan min saniban manlilingkor ed Dios, mas oneelet so panamaley mi.” Sikaray masulok lan 34 taon a maliket a kasal. No lanang yon iyuna si Jehova ed panamaley yo, tulongan to kayon ontalona tan bendisyonan to kayo.​—Sal. 127:1.

Itultuloy Yon Respetoen so Regalo na Dios

19. Akin et intarya na Dios so regalon panangasawa?

¹⁹ Parad dakel natan, say importante labat ed sikara et say dilin panliketan da. Balet, aliwan  ontan iray lingkor nen Jehova. Amta ran intarya na Dios so panangasawa bilang regalo pian nasumpal so gagala to. (Gen. 1:26-28) No nirespeto komon nen Adan tan Eva itan a regalo, nagmaliw komon a paraiso so interon dalin, a napno na maliket tan matunong a lingkor na Dios.

20, 21. (a) Akin et nepeg tayon ipasen a sagrado so panangasawa? (b) Anton regalo so aralen tayo no onsublay ya simba?

²⁰ Nagkalalo ed amin, ipapasen na saray lingkor na Dios so panangasawa a pankanawnawan nigloria si Jehova. (Basaen so 1 Corinto 10:31.) Unong a naaralan tayo, say katooran, pankakasakey, tan espiritualidad so maridios iran kualidad a mamabiskeg ed panamaley. Kanian balanglan manpaparaan, pabibiskegen, odino panggugunaetan tayon pansiansiaen so panangasawa, kaukolan a natatalosan tayon unona no anton talagay panangasawa: sakey ya uksoyan a sagrado tan nanlapu ed Dios. No tandaan tayo itan, napakiwas itayon gawaey anggaay nayarian tayon mandesisyon ed panangasawa base ed Salitay Dios. Diad ontan et nipanengneng tayoy respeto aliwa labat a diad regalon panangasawa, noag ontan met ed Angiter ed satan a regalo, si Jehova a Dios.

²¹ Siempre, aliwa labat lan panangasawa so inregalo nen Jehova. Tan aliwan satan labat so paraan pian magmaliw a maliket. Diad onsublay ya artikulo, pantongtongan tayo so sananey nin mabli a regalo na Dios​—say regalon pagmaliw ya walad kasuloan.

Antoy Ebat Mo?

• Antoy nagawaan na katooran ed panamaley na saray Kristiano?

• Akin a say pankimey a saniba et mamaelet ed panamaley?

• Antoray paraan a niyuna na sanasawa so espiritual iran bengatla?

• Panon tayon nipanengneng so respeto ed si Jehova, say Manangigapo na panangasawa?

[Tepetepet Parad Panagaral]

[Saray litrato ed pahina 15]

Ontulong ed sanasawa so pankimey a saniba pian mansiansia ran mankasakey