Say Ngaran a Nanengneng ed Lawak

ST. MORITZ. Pamilyar ka’d saya? Kabkabat iyan bakasyonan a walad Lawak na Engadine, Switzerland. Balet say St. Moritz et sakey labat ed saray lugar a papasyaren na totoo diad Lawak na Engadine ya apaliberan na kapalandeyan ed abalaten-bukig a parte na Switzerland, asingger ed ketegan na Italya. Wadman met so Swiss National Park, a kawalaan na marakdakep tan nanduruman tantanaman tan ayayep a mangidadayew ed Matalonggaring a Manamalsa tayo, si Jehova. (Sal. 148:7-10) Balet makapadinayew met so tradisyon da’d man ya ginmapo ni diad kapegleyan na koma-17 a siglo.

No wadman ka, seguradon naimanom so nikadkaduman detalye’d dakel a kaabungan ed saman a lawak. Kaslakan lan nanengneng ed arap na kaabungan so akaukit a ngaran na Dios, a singa diad tagey na puerta. Diad apalabas iran siglo, niyugali da lay mangiyan na inskripsion ed paway na abung, ya ipipinta ed dingding,  itatatak ed palitada, odino iyuukit ed bato. Nanengneng mo’d leksab so litrato na sakey ya abung diad baryo na Bever. Say kabaliksan na akasulat et: “Diad sayan taon 1715. Si Jehova so gapoan, tan si Jehova so anggaan. Amin et nasumpal lapud Dios, tan amin et anggapo no aliwan lapud sikato.” On, amiduan sinalambit ed sayan daan ya inskripsion so ngaran na Dios.

Wala ni ingey nanengneng mon mas daan ya inskripsion diad baryo na Madulain. Oniay nabasa’d satan: “Salmo 127. Noag si Jehova so mangipaalagey na abung, saray manangipaalagey mansagpot ira ya andi kakanaan. Lucius Rumedius. Diad taon 1654.”

Akin et ipaparungtal na saray totoo ed sayan lawak so ngaran na Dios? Nen panaon na Repormasyon, impalapag so Biblia ed Romansh, salitan base ed Latin ya uusaren ed Engadine. Diad tua, sankaunaan iman a libron impatalos ed satan a lenguahe. Lapud abasa na totoo so Salitay Dios, maslak ed sikara et agda labat inyukit so kangaranan da noagta pati teksto ed Biblia a pakabasaay ngaran na Dios.

On, anggad natan, ya apalabas lay pigaran siglo manlapu la nen insulat irayan inskripsion ed kaabungan, siansia nin iyaabawag tan idadayew na saraya so ngaran nen Jehova. Iimbitaan iray bisita tan manaayam ed sayan lawak ya aralen a nagkalalo so nipaakar ed alay abig a Dios, si Jehova, panamegley na ibisita ed sananey nin bilding a kawalaan na ngaran to​—say Kingdom Hall na saray Tasi nen Jehova diad Bever.

[Picture Credit Line ed pahina 7]

© Stähli Rolf A/age fotostock