Peteg Kasin Aapresyaen Yo Iray Bendisyon Yo?

SANEN inliktar na Dios iray Israelita ed panangaripen na Ehipto, nen unona et panliketan da ta bulos la ran mandayew ed si Jehova. (Exo. 14:29–15:1, 20, 21) Balet ag-abayag, angumay panmoria ra. Ginmapo iran nanreklamo ed kipapasen da. Akin? Lapud imbes ya isentro day imano da ed impangiliktar nen Jehova ed sikara, say ninonot da et say irap na kipapasen da’d kalawakan. Oniay imbaga da’d Moises: “Anto so akasengeg na angipawayan mo ed sikami’d man ed Ehipto pian ompatey kami dia ed kalawakan? Ta anggapo so naakan tan anggapo so danum; et say linawa mi atama la ed saya so anlemew a tinapay [mana].”​—Num. 21:5.

Kalabas na pigaran siglo, inkanta na ari na Israel nensaman a si David: “Balet ta nanmatalek ak ed panangabagey mo; say pusok manggayaga ed panangilaban mo. Kantaan ko la si Jehova, nisengeg ed bulos na maong a linawa to ed siak.” (Sal. 13:5, 6) Agnilingwanan nen David iray gawa na maaron-kaabigan nen Jehova ed sikato. Imbes, mabetbet ton dinalepdep iratan. (Sal. 103:2) Maomaong met si Jehova ed sikatayo, tan makabat itayo no agtayo ibaliwala iray ginawa to parad sikatayo. Konsideraen tayo pa so arum ed saray bendisyon na Dios ya panliliketan tayo natan.

“Pikakaaro ed Jehova”

Oniay inkanta na salmista: “Say pikakaaro ed Jehova wala ed saray ontakot ed sikato.” (Sal. 25:14) Bilang ag-ayadyarin totoo, baleg ya pribilehyo so pakawalaan na maapit a personal a relasyon ed si Jehova! Balet, panon to no magmaliw itayo lan masyadon okupado ed inagew-agew a kabibilay kanian daiset lay panaon tayon manpikasi? Isipen pa no antoy nagawa ed maong a relasyon tayo’d si Jehova. Bilang kaaro tayo, iilaloan nen Jehova ya manmatalek itayo ed sikato tan ibesngaw so walad  puso tayo diad pikakasi, ibaga tayo iray pakatatakotan, pipilaleken, tan pampapagaan tayo. (Uli. 3:5, 6; Fil. 4:6, 7) Maabig sirin no imanoen tayo so kalidad na saray pikakasi tayo.

Sanen ninonot na kalangweran a Tasi a manngaran na Paul iray pikakasi to, amoria ton walaray kaukolan ton paaligwasen. * Imbaga ton, “Parepareho lay ibabagak sano manpipikasi ak ed si Jehova.” Nan-research si Paul nipaakar ed satan diad Watch Tower Publications Index, tan naamtaan ton walay manga 180 a pikakasin akarekord ed Biblia. Diad saratan, imbalikas na saray lingkor nen Jehova nensaman no antoy walad puso ra. Inkuan nen Paul: “Lapud impandalepdep ko’d saratan ya alimbawa ed Kasulatan, naaralan ko’y magmaliw ya espisipiko ed saray pikakasik. Tinmulong iya pian ibalikas koy liknaan ko’d si Jehova. Naliliketan ak la natan ya onapit ed sikato diad pikakasi.”

“Naakan Diad Dugan Panaon”

Say sakey nin bendisyon ya iiter nen Jehova ed sikatayo et say dakerakel ya Makasulatan a katuaan. Legan a panggagayagaan tayo so daakan ya espiritual a naakan, walay rason tayon ‘mankanta a nisengeg ed liket na puso.’ (Isa. 65:13, 14) Balet, manalwar tayo ed makapuy iran impluensya, pian ag-onletey so inkaseseg tayo’d katuaan. Singa bilang, no ondengel itayo ed propaganda na saray apostata, nayarin naapektoay panag-isip tayo tan agtayo la naimanoy kablian na espiritual a ‘naakan diad dugan panaon’ ya itatarya nen Jehova panamegley na “matoor tan makabat ya aripen.”​—Mat. 24:45-47.

Si André, ya abayag lan manlilingkor ed si Jehova so awalaan na makapaermen ya eksperiensya nen naimpluensiaan na apostatan kaisipan. Inisip ton say inengneng labat a magano ed Web site na saray apostata et aliwa met a mapeligro. Oniay nanonotan to: “Nen unaan, asagyat ak ed ipapasen a katuaan na saray apostata. No lalon uusisaen koy ibabaga da, lalon naiisip kon singa makatunongan ya taynan koy organisasyon nen Jehova. Balet ta nen inusisak so argumento na saray apostata sumpa’d saray Tasi nen Jehova, diman ko naamtaan so inkasilib na saratan ya palson managbangat. Say ipapasen dan ‘mabiskeg ya ebidensya’ sumpa’d sikatayo et base ed impormasyon ya aliwan sustoy inkipasabi to. Kanian ginapoan ko lamet so manbasa na saray publikasyon tayo tan onatendi ed aral. Insan ko amoria ya dakel la manayay asaew ko.” Makapaliket ta pinmawil si André ed kongregasyon.

“Amin ya Agagi”

Sakey a bendisyon a nanlapud si Jehova so maaro tan nankakasakey ya impanaagi tayo. (Sal. 133:1) Tekep na maabig a rason, insulat nen apostol Pedro: “Aro yo so amin ya agagi yo.” (1 Ped. 2:17) Bilang kabiangan na Kristianon impanaagi, panliliketan tayoy maaron panusuporta na saray espiritual ya kaamaan, kainaan, tan agagi tayo ed pananisia.​—Mar. 10:29, 30.

 Anggaman ontan, saray nanduruman sirkumstansya so nayarin mangapekta no maminsan ed relasyon tayo ed saray agagi. Singa bilang, magmainomay so onsyodot ed saray lingo na sakey tan magmaliw ya makritiko ed sikato. No onia so nagawa, agta makatulong no nonoten tayon aaroen nen Jehova iray lingkor to anggaman ag-ira ayadyari? Sakey ni, “no ibaga tayon: ‘Anggapoy kasalanan tayo,’ papalikdoen tayoy inkasikatayo tan anggapo ed sikatayo so katuaan.” (1 Juan 1:8) Agta nepeg tayon manseet ya ‘mantultuloy a manaanosan tan mabulos a manpeperdonaan’?​—Col. 3:13.

Sakey a kalangweran a manngaran na Ann et akasagmak ni nanmadmaran to antis ton apabli so Kristianon panlilimog. Sikatoy nagmaliw a singa samay managdarak ya anak ed ilustrasyon nen Jesus, tinaynan toy Kristianon kongregasyon. Sinmabi panaon, amoria toy lingo to tan pinmawil ed katuaan. (Luc. 15:11-24) Antoy naaralan nen Ann ed sayan eksperiensya to? Inkuan to: “Natan ta akapawil ak la ed organisasyon nen Jehova, papablien koy amin ya agagik anggaman ed agda inkayadyari. Nensaman, makritiko ak ed sikara. Balet natan et determinado ak lan agko abuloyan so antokaman a mangamper ed saray bendisyon a panliliketan ko diad limog na saray agagi. Talagan anggapoy nagunggona ed sayan mundo a nayarin kasalat na espiritual a paraiso a kawalaan tayo.”

Lawas a Pisalamatan Iray Bendisyon Yo

Say ilalo tayo ed Panarian na Dios bilang solusyon ed amin a problema na too et mabmablin kayamanan. Sanen pilpilimero tayon naamtaan iyan ilalo, say kapusoan tayo so manleppua ed apresasyon! Say liknaan tayo et singa samay negosyante ed parabolo nen Jesus ya ‘angilakon tampol ed amin a walad sikato’ pian nasaliw toy “sakey a mabmablin perlas.” (Mat. 13:45, 46) Ag-imbaga nen Jesus ya naandi so apresasyon na samay negosyante ed saman a perlas. Ontan met, agkomon naandi so apresasyon tayo ed alay abig ya ilalo tayo.​—1 Tes. 5:8; Heb. 6:19.

Konsideraen so alimbawa nen Jean, ya masulok lan 60 taon a manlilingkor ed si Jehova. Inkuan to: “Say akatulong ed siak pian sankanonot kon lanang so Panarian na Dios et say pangitongtong ed satan ed arum. No nanenengneng koy reaksion da sano natatalosan da no anto so Panarian, maabig so epekto to ed siak. Tan no nanenengneng kon papasimbaloen na katuaan na Panarian so kabibilay na iyaaralan na Biblia, napakiwas ak a manisip, ‘Agaylan abig na sarayan katuaan ya inanabang ko ed arum!’”

Walaan itayo na maabig a rason pian misalamat ed dakel ya espiritual a bendisyon a panggagayagaan tayo. Anggaman nayarin naapektoan itayo na saray subok a singa say isusumpa, sakit, itatatken, depresyon, inkaandi na inad-aro ed bilay, tan problema ed ekonomya, amta tayon temporaryo labat iratan. Diad Panarian na Dios, likud ed espiritual a bendisyon tayo et niarum so pisikal iran bendisyon. Antokaman ya kairapan a susungdoan tayo natan et naandi la diad balon mundo.​—Apo. 21:4.

Diad kaplesan, pisalamatan tayo iray espiritual a bendisyon tan ipatnag so apresasyon a singa ed salmista ya angikanta: “Amayamay ira, O Jehova a Dios ko, so saray makapakelaw a gawam a ginawam, tan saray nonot mo nipaakar ira ed sikami: ag-ira nisalaysay a mauksoy ed sika: no komon ta ipaliwawak tan salitaen ko ra, dakel ni ra nen saray nayari a bilangen.”​—Sal. 40:5.

[Paimano ed leksab]

[Litrato ed pahina 18]

Nabebendisyonan itayo na espiritual a tulong sano nasusubok