‘Say Pangunor et Magmaong nen say Bagat’

SAY inmunan ari na Israel nensaman et si Saul. Anggaman sikatoy pinili na tuan Dios, sinmabi panaon et nagmaliw ya agmatulok.

Antoray agawaan nen Saul ya lingo? Posible kasin apaliisan to komon iratan? Antoran leksion so naaralan tayo ed nansumpalan to?

Impakabat nen Jehova so Pinili Ton Ari

Antis a nagmaliw ya ari si Saul, si propetan Samuel so representanti na Dios ed Israel. Balet natan et masiken lay Samuel, tan saray anak to et agmatoor. Sakey ni, kaskasian so Israel ed saray Filisteo. Kanian kinerew na saray mamatatken na Israel a manuro si Samuel na ari a magmaliw ya ukom da tan mangidaulo ed sikara diad bakalan. Ingganggan nen Jehova so propeta ya lanaan si Saul bilang lider tan oniay inkuan To: “Ilaban to so baley ko ed lima na saray Filisteo.”​—1 Sam. 8:4-7, 20; 9:16.

‘Wala ni’d kalangweran si Saul tan guakguapo.’ (1 Sam. 9:2, Maung a Balita) Balet, aliwan satan labat so maabig a naimano ed sikato. Mapaabeba met ya too. Nibaga tayo so ontan ta oniay intepet to’d Samuel: “Aliwa ak ta a sakey a Benjamita, ed kamelmelagan ed saray poli na Israel, tan say pamilyak so kauno-unoran ed saray amin a pamilya na Benjamin? Akin sirin a mansalita ka ed siak [na ontan]?” Abebay pakanengneng nen Saul ed sarili to tan ed pamilya to, anggano say ama ton si Cis et “makapanyari a laki.”​—1 Sam. 9:1, 21.

Imanoen pa met so reaksion nen Saul sanen kuan lan ipakabat nen Samuel ed saray Israelita no siopay pinili nen Jehova ya ari. Antis to iya et nilanaan la nen Samuel si Saul a siksikara labat, tan binilin to: ‘Gawaen mo so antokaman a naromog na limam; ta say Dios wala ed sika.’ Kayari na saya, impantitipon na propeta iray totoo pian ipakabat so arin pinili nen Jehova. Sanen anapen day Saul, agda naromog. Manaya et inmamot ta nababaingan. Balet ta imbaga nen Jehova no iner so kawalaan to, tan diad saman la improklama nen Samuel ya ari lay Saul.​—1 Sam. 10:7, 20-24.

Diad Bakalan

Walaray nanleglemew ed kanepegan nen Saul a magmaliw ya ari, balet ag-abayag et pinaneknekan ton alingo-lingo ira. Sanen nilusob na saray Amonita so sakey a baley ed Israel, ‘say espiritu na Dios linma ed si Saul.’ Tekep na autoridad et tinipon tan inorganisa to iray bumabakal na Israel, tan analo ira. Balet ta binidbir nen Saul a say impanalo ra et lapud tulong  na Dios, ya inkuan to: “Natan ya agew si Jehova nanggawa na panangilaban dia ed Israel.”​—1 Sam. 11:1-13.

Maabig iray kualidad nen Saul, tan sikatoy benendisyonan na Dios. Binidbir to met so pakayari nen Jehova. Balet, say panamendisyon nen Jehova ed Israel tan ed ari da et akadepende’d sakey ya importantin bengatla. Oniay imbaga nen Samuel ed saray Israelita: “No antakot kayo ed Jehova, tan sikato so panlingkoran yo, tan pakadengelen yo so boses to, tan agkayo onalagey sumpa ed ganggan nen Jehova, tan sikayo tan say ari met a manari ed sikayo manpadpara a . . . manangunor ed Jehova a Dios yo, maong.” Antoy nailaloan na saray Israelita no mansiansia iran matoor ed Dios? “Si Jehova agto ikaindan so baley to nipaakar ed baleg a ngaran to,” so kuan nen Samuel, “lapu ed makapaliket ed si Jehova so panggawa to ed sikayo a baley [a parad] sikato lanlamang.”​—1 Sam. 12:14, 22.

Importante sirin so katutulok pian nagamoray panangabobon na Dios, tan anggad natan et ontan nin siansia so estandarte to. Sano uunoren na saray lingkor nen Jehova iray ganggan to, bebendisyonan to ra. Panon balet no agda unorey Jehova?

“Nanggawa Ka na Kabaglan”

Say sinmublay a ginawa nen Saul sumpa’d saray Filisteo et amasanok ed sikara. Kanian nantitipon so armada ra ‘a say karakel to et singa buer ed gilig na dayat’ pian milaban ed Israel. Amoria na saray Israelita ya ‘pakaskasi kipapasen da,’ kanian inmaamot ira’d “saray ungib, tan diad saray abot, diad nanleleetan na saray angkakabaleg a bato, tan diad saray araralem ya abot, tan saray bobon.” (1 Sam. 13:5, 6, MB) Anto kasi gawaen nen Saul?

Antis to iya et imbaga nen Samuel ed si Saul a manbana ira’d Gilgal, a ditan et mangiyapay na bagat so propeta. Nanalagar si Saul, balet ta naatrasadoy Samuel. Sanen anengneng nen Saul ya ataytayak lay armada to, nandesisyon a sikato lan mismo so mangiyapay na saray bagat. Kasumpal ton angibagat et sinmabi si Samuel. Sanen naamtaan toy ginawa nen Saul, inkuan to’d ari: “Nanggawa ka na kabaglan; agmo inunor so ganggan nen Jehova a Dios mo, ya ingganggan to ed sika; ta natan si Jehova inletneg to komon so panarian mo ed Israel lawas. Balet natan say panarian mo agmagnayon; si Jehova nananap . . . na laki ya unong ed dili a puso to, tan sikato so tinuro nen Jehova a prinsipe ed baley to, lapu ed agmo inunor so ingganggan nen Jehova ed sika.”​—1 Sam. 10:8; 13:8, 13, 14.

Lapud anggapoy pananisia nen Saul, agto inunor so instruksion na Dios ya alagaren si Samuel a mangiyapay ed bagat. Duman tuloy iya ed ginawa nen Gideon, a datin komandante na armada na Israel! Ingganggan nen Jehova si Gideon a bawasan so armada to, manlapud manga 30,000 et magmaliw labat lan 300, tan tinmulok si Gideon. Akin ey? On ta walay pananisia to’d si Jehova. Diad tulong na Dios et tinalo toy 135,000 a kalaban. (Uko. 7:1-7, 17-22; 8:10) No tinmulok komon si Saul, tinulongan met nen Jehova. Balet lapud ag-inmunor, inyabuloy Ton puersaan ya nasamsaman na saray Filisteo iray Israelita.​—1 Sam. 13:17, 18.

Sano walaray problema, panon itayon mandedesisyon? Parad saramay andiay pananisia, singa mas praktikal so agpangunor ed saray prinsipyo na Dios. Lapud anggapo ni Samuel, nayarin inisip nen Saul a duga imay desisyon to. Balet, parad saramay determinadon gamoray abobon na Dios, say duga labat ya desisyon et say pangunor ed saray prinsipyo ed Biblia ya onaplika ed situasyon da.

Impulisay nen Jehova si Saul

Akagawa lamet si Saul na graben lingo sanen akibakal ira’d saray Amalekita. Sanen nibulos so Israel ed Ehipto, nilusob ira na saray Amalekita diad dalan anta anggapoy sengeg nguro. (Exo. 17:8; Deu. 25:17, 18) Tan sanen panaon na saray Ukom, kaiba lamet so Amalek ed saray bansan inmataki ed Israel. (Uko. 3:12, 13; 6:1-3, 33) Kanian parad si Jehova, manepeg labat  a nadusa iray Amalekita, tan ingganggan toy Saul ya ipaakseb iyan panangukom to.​—1 Sam. 15:1-3.

Imbes ya unoren nen Saul so ganggan nen Jehova ya pateyen so amin ya Amalekita tan deralen iray kayarian da, agpinatey nen Saul so ari da tan kinawaen to ray maong a klase na ayayep. Antoy reaksion nen Saul sanen binaat nen Samuel ed sayan ginawa to? Impasa nen Saul so tetel ed saray totoo, ya inkuan to: ‘Kinawaen na saray totoo iray sankamaongan a karnero tan baka pian ibagat ed Jehova.’ Anggano iyan lan ginetma nen Saul ya iyapay iray ayayep, sinumlang to nin siansia so ganggan na Dios. ‘Aliwa lan melag so pakanengneng nen Saul ed sarili to.’ Kanian impamoria nen Samuel ed sikato ya sinumlang toy Dios. Oniay inkuan nen Samuel: ‘Walaan kasi si Jehova na baleg a liket dia ed bagbagat a singa ed panangunor ed boses to? Nia, say pangunor et magmaong nen say bagat.’ Intuloy ni nen Samuel: “Lapu ed pinaulyan mo so salita nen Jehova, sikato met [paulyan] to ka ed inkaarim.”​—1 Sam. 15:15, 17, 22, 23.

Sanen anggapo la’d si Saul so masanton espiritu nen Jehova tan agto la bebendisyonan, “mauges ya espiritu” la so napatnagan ed sikato. Nagmaliw lan mainap tan maimon ed si David, say lakin pinili nen Jehova ya onsublay ya ari. Aliwa labat lan aminsan ya sinalin pateyen nen Saul si David. Ibabaga na Biblia ya “si Jehova wala ed David,” kanian ‘sikatoy binusol nen Saul.’ Nanamot-amot laingen si David, balet ta nanggunaetan nen Saul ya impaanap, tan impilanor to ni ingen ya impapatey so 85 saserdote tan arum ni. Agla sirin pankelawan ya impulisay nen Jehova si Saul!​—1 Sam. 16:14; 18:11, 25, 28, 29; 19:10, 11; 20:32, 33; 22:16-19.

Sanen nilusob lamet na saray Filisteo so Israel, desperado lay Saul kanian kinmerew na tulong ed espiritista. Diad sinmublay ya agew, pinasyay laban kanian sikatoy graben asugatan tan mas nilabay to lan pateyen so inkasikato. (1 Sam. 28:4-8; 31:3, 4) Oniay ibabaga na Kasulatan nipaakar ed agmatulok ya inmunan ari na Israel: “Si Saul inatey lapu ed inkatunganga to a ginawa to sumpa ed Jehova, lapu ed salita nen Jehova ya agto inunor; tan lapu ed inkerew to na simbawa ed mangkukulam.”​—1 Awa. 10:13.

Ipapanengneng na mauges ya alimbawa nen Saul a say pangunor ed si Jehova et magmaong nen say pangiyapay ed sikato na saray bagat. “Saya so kabaliksan na panangaro ed Dios,” so insulat nen apostol Juan, “ya unoren tayo iray ganggan to; tan aliwan makapabelat iray ganggan to.” (1 Juan 5:3) Komon ta agtayon balot ibaliwala iyan importantin katuaan: Say agmanganggan pikakaaro ed Dios et akadepende ed pangunor tayo’d sikato.

[Litrato ed pahina 21]

Diad gapo et mapaabeban lider si Saul

[Litrato ed pahina 23]

Akin et imbaga nen Samuel ed si Saul a ‘say pangunor et magmaong nen say bagat’?