Tepetepet na Saray Manbabasa

Akin et sinmanok si Moises ed saray ilalak nen Aaron a si Eleazar tan Itamar kayari impatey na saray kuya dan si Nadab tan Abihu, tan panon ya apakepay sanok to?​—Lev. 10:16-20.

Ag-abayag kayari impanuro na saserdote a manlingkor ed tabernakulo, pinatey nen Jehova so ilalak nen Aaron a si Nadab tan Abihu lapud angiyapay ira ed Sikato na “sananey a nengneng na apuy.” (Lev. 10:1, 2) Ingganggan nen Moises iray akeran ilalak nen Aaron ya agda panermenay impatey na saray kuya da. Balet kayari na saman, sinmanok si Moises ed si Eleazar tan Itamar lapud agda kinan so kanding ya apay parad kasalanan. (Lev. 9:3) Akin et ontan so reaksion nen Moises?

Diad saramay ganggan ya inter ed si Moises, espisipikon imbaga nen Jehova ya kaukolan a kanen na saserdoten mangiyapay so kabiangan na apay parad kasalanan diad arapan na tolda na duypo. Say panggawa’d satan et ipapasen ya panakbat ed saray kasalanan na angibagat. Balet, no say dala na bagat et inloob ed Masanton Pasen, say unonan silir na santuaryo, agnepeg a kanen so apay. Imbes, nepeg itan a poolan.​—Lev. 6:24-26, 30.

Lapud samay makapaermen ya agawa, sineguro nen Moises a natumbok so amin ya ingganggan nen Jehova. Sanen naamtaan ton apoolan la so kanding ya apay parad kasalanan, sikatoy asanokan ed si Eleazar tan Itamar. Tinepet to ra no akin et agda kinan itan unong ya niganggan, anta agda met inyapay so dala ed si Jehova diad Masanton Pasen.​—Lev. 10:17, 18.

Si Aaron so angebat ed tepet nen Moises, ta inunor labat na saray ilalak ton saserdote so imbaga to. Lapud impatey na duaran ilalak nen Aaron, ompan impasen ton agda kanepegan so mangan na apay parad kasalanan ed saman ya agew. Nayarin inisip ton agmakapaliket ed si Jehova so pangan da, anggano anggapo met so kasalanan da’d ginawa nen Nadab tan Abihu.​—Lev. 10:19.

Nagkalalo ed amin, nayarin minoria nen Aaron a diad samay sankaunaan ya impanggawa na pamilya to’d responsabilidad da bilang saserdote, inal-alwaran da komon a ginawa so anggan say sankamelagan a detalye pian napaliket so Dios. Balet, pinabanday di Nadab tan Abihu so ngaran nen Jehova, kanian pinatey to ra. Kanian nayarin ninonot nen Aaron a lapud kapamilya ra so nankasalanan, agda nayarin kanen so masanton apay.

Inawat nen Moises so ebat nen kuya to, ta oniay inkuan na kasulatan: “Akaliket si Moises nen nadngel to yan ebat nen Aaron.” (Lev. 10:20, Maung a Balita) Mapatnag, aliketan met si Jehova ed ebat nen Aaron.