Kasin Nanonotan Yo?

Nanggayagaan mo ta so impanbasa ed agano ni ran isyu na Say Panag-Bantayan tan The Watchtower? Salim pa sirin ya ebatan iray onggendan a tepet:

• Akin et makapanisia tayon talagan walay hardin na Eden nensaman?

Diad salaysay na Biblia, sayan hardin et literal ya lugar, a nabasa ditan iray detalye nipaakar ed lokasyon to. Duara ed saray ilog ya abitla ed satan a salaysay et wala ni anggad natan. Aliwan ontan so style na saray alamat odino fairy tale. Si Jesus, say napanmatalkan a maong ed amin a tasi, et tinukoy toy Adan tan Eva bilang totoo a talagan nambilay nensaman.​—1/1, pahina 5-6, 9.

• Kasin amta la na Dios ya mankasalanan si Adan tan Eva?

Andi. Inikdan ira nen Jehova na abilidad ya manisip tan manggawa na sarili dan desisyon, kanian sarag dan pilien no kasin ontulok ira odino andi. Sarag na Dios ya amtaen so nagawa’d arapen, balet ta agto lanang ya ikakana itan ya abilidad.​—1/1, pahina 13-15.

• Kasin uusaren na saray tuan Kristiano so ngaran na Dios bilang anting-anting?

Ipapasen na arum a totoo so sakey a bengatla odino simbolo bilang anting-anting o galing a manalimbeng ed sikara, balet aliwan ontan so panmoria na saray tuan Kristiano ed ngaran na Dios. Pasasalimbengan ira’d ngaran nen Jehova diad panmamatalek da’d sikato tan panggugunaet dan gawaey linawa to. (Sof. 3:12, 13)​—1/15, pahina 5-6.

• Diad Israel nensaman, sioparay agunggonaan ed kustombre na panagtudtor?

Amin. Saray mairap-bilay et apakiwas a mankuli, ta kaukolan day mantudtor. Agunggonaan met so arum ta apaseseg iran magmaliw a mabunlok tan manmatalek ed bendisyon na Dios.​—2/1-E, pahina 15.

• Akin et impulisay nen Jehova si Arin Saul?

Nepeg ya alagaren nen Saul so propeta na Dios a mangiyapay na bagat, balet ta ag-itan ginawa na ari, ta sikato lan mismo so angiyapay. Diad saginonor et agto inunor so ganggan ya pateyen so amin ya Amalekita.​—2/15, pahina 22-23.

• Panon tayon nipanengneng a bubusolen tayo so kaugsan?

Kontrolen tayoy kakainum na alak, paliisan tayoy mahiko, tan talinengey pasakbay nen Jesus nipaakar ed moralidad. Singa bilang, paliisan tayoy pornograpiya tan saray pantasya a nayarin pawalaen na satan. (Mat. 5:27, 28) Ontan met, agtayo miuulop ed saray adispelosip.​—2/15, pahina 29-32.

• Antoy makapainteres ed samay adiskobre na saray arkeologo a karaanan ya panagkomponian na bayaong (bee) diad Israel?

Akalmo iray arkeologo na masulok a 30 ya ubong na bayaong, ya unong ed tantiya na saray iskolar et tinaon ya mamapawala na kapalduan toniladan dilo. Ipapanengneng na saya a wala la ray manag-asikasoy bayaong nensaman diad samay dalin a kuan na Dios et “pana-agusan na gatas tan dilo.” (Exo. 3:8)​—3/1-E, pahina 15.

• Akin et nikompara si Jeremias ed kiew a “nitanem ed abay na saray danum, ya ikayat to so saray lamot to ed abay na ilog”? (Jer. 17:7, 8)

Sikatoy agbalot tinmundan nambunga, nisay nampaimpluensya ed saray mauges a managbalaw. Imbes, sikatoy nanmatoor ed Lapuan na manangiter-bilay a danum, ya impapuso ton amin so imbaga na Dios ed sikato.​—3/15, pahina 14.

• Antoy labay ya idanet nen Jesus sanen imbaga to’d Marta ya “daiset odino sakey labat so nakaukolan”? (Luc. 10:41, 42)

Agto papapawayen ya materyalistiko si Marta diad pampaparaan toy piga-pigaran putahi, tan agto met ibabagan anggapoy gunggona na pankikimey to. Imbes, impabitar nen Jesus no antoy nepeg ya iprayuridad. Asaew nen Marta so alay-abig ya pankanawnawan pabiskegey pananisia to.​—4/1, pahina 12-13.

• Antoray pigaran rason akin et nibagan ilegal imay bista ed si Jesus?

Anggapoy dinengel na korte ya argumento odino tasi a parad pakaabsuelto to. Tilatilan tasi so inusar diad bista. Agawa so bista diad labi. Ginmapo tan anampot itan diad saksakey ya agew.​—4/1, pahina 20.