“Maomaong a Manangasikaso tan Pinabpablin Kaaro”
“Maomaong a Manangasikaso tan Pinabpablin Kaaro”
NEN Disyembre 4, 2010 anampot so bilay ed dalin nen John (Jack) Barr, membro na Mananguley ya Ulop na saray Tasi nen Jehova. Sikatoy 97 años. Sikatoy kabkabat bilang “maomaong a manangasikaso tan pinabpablin kaaro.”
Si Brother Jack Barr et nianak ed Aberdeen, Scotland. Sikato so sankaugawan ed taloran sanaagi. Parehon alanaan iray atateng to. Mabetbet ya iyiistorya nen Brother Barr so nipaakar ed impanugaw to; sikatoy misalsalamat ed alay abig ya ehemplon impanengneng na inad-aro ton ama tan ina.
Sanen manbalbalolaki si Jack, mabaing a maong kanian ngalngali agmakapitongtong ed arum. Ingen ta nanggunaetan ton tinalonaan itan, tan diad sakey a Simba na ngarem nen 1927, diad edad a 14, imbaga tod si ama to a sikatoy akaparaan lan mila ed panagkabkaabungan a kimey. Satan so gapoan. Manlapud satan ya agew anggad impatey to, nansiansian maseseg a managpulong na maong a balita si Brother Barr.
Lapud makapasinagem ya aksidentin ngalngali inateyan nen ina to, apakiwas so kalangweran a Jack a seryoson nonoten no anto so gagala na bilay, tan nen 1929 indedika toy bilay tod si Jehova, tan insimbolo to itan diad unonan pankanawnawa, nen 1934. Insan nen 1939, sikatoy nagmaliw a membro na pamilyan Bethel diad London, England. Saya so gapoan na sigpot panaon a serbisyo to ya inmabot na 71 taon.
Nen Oktubre 29, 1960, linmoob si Brother Barr ed tatawagen ton “espisyal tan pinabpablin relasyon” sanen inkasal toy Mildred Willett, sakey ya abayag lan maseseg a payunir tan misionera. Kabkabat ira di Brother tan Sister Barr bilang napanuliranan, matoor a sanasawa, tan pinansiansia da itan anggad impanampot na bilay nen Mildred ed dalin nen Oktubre 2004. Sikaran duay saniban manbabasa na Biblia kada agew legan na impaniba ra.
Parad saramay makapikabat ed sikato, ipapanonot na ngaran ya Jack Barr so sakey ya brother a mangiiter na makaaron simbawa—lawas asimbang, masimoon, tan nibased Biblia. Sikatoy makulikuli, makonsidera, maaron manangasikaso tan matoor a kaaro. Napatnagan ed saray komento, paliwawa, tan pikakasi to so kaaralem na panangaro tod katuaan tan say kaapit na relasyon tod si Jehova.
Anggaman il-iliwen tayoy inadaron Brother Barr, mililiket tayod sikato diad impangawat toy regalon imortalidad—sakey a pribilehyon inilaloan to tan naynay ton itotongtong. Satan so lawas a pirawat to.—1 Cor. 15:53, 54. *
[Paimano ed leksab]
^ par. 8 Parad istorya na bilay nen John E. Barr, nengnengen so Hulyo 1, 1987 ya The Watchtower, pahina 26-31.
