Panumbok ed Kristo, say Ayadyarin Lider

SARAMAY ontutumbok ed totoon manuley et mabetbet a nadidismaya. Balet, aliwan ontan so nalilikna na saramay manpapasakop ed panangidaulo nen Kristo. Inkuan nen Jesus: “Dago kayo ed siak, amin yon mansasagpot tan nabebelatan, tan pampainawaen ta kayo. Sakbat yo so pakok tan manaral kayo ed siak, ta mauyamo ak tan mapaabeba ak, pian nainawaan iray kamarerwa yo.” (Mat. 11:28, 29) Say panangidaulo nen Jesus et makaparepresko tan makapabiskeg. Sikatoy interesadon maong ed saray nalalames tan napapairap, kanian iimbitaan to ran awiten so anlemew a pako to. Balet, anto so nalalanor ed panumbok ed panangidaulo nen Jesus?

“Si Kristo et nanirap parad sikayo,” so insulat nen apostol Pedro, “tan angitilak na ehemplo ed sikayo pian tumboken yon maapit iray bakat to.” (1 Ped. 2:21) Panon kaimportante ed sikatayo so panumbok ed bakat nen Jesus? Imadyin mo pan kaiba kad grupo ya ondalan ed lugar ya akataneman na saray bomba tan saksakey so kaiba yon mikabisado ed dalan ya agkayo narisgo. Agta maapit yon tumboken iray bakat to, ompan saray mismon bakat to so gatinan yo? Mipadpara, say maligen ya arapen tayo et akadependid maapit a pangalig tayo ed ehemplo nen Jesus diad bilay tayo. Kalaktip ed satan so idengel tan itulok ed sikato tan pikoopera ed saramay mangirerepresentad sikato.

Ondengel tan Ontulok

Diad pansamposampot na Sermon nen Jesus ed Palandey, inkuan to: “Balang sakey a makadngel ed sarayan salitak tan gawaen to iraya et niyaliling ed sakey a makabat a too, ya inletneg toy abung to diad abalbaleg a bato. Tan inmuran a maksil tan dinmelap tan binmasig so maksil a dagem ed satan ya abung, balet ag-akusbo lapud akaletneg itan diad abalbaleg a bato.”​—Mat. 7:24, 25.

Imbaga nen Jesus a say toon ondedengel tan ontutulok ed saray salita to et “makabat.” Kasin rerespetoen tan aapresyaen tayoy ehemplo nen Jesus diad panamegley na masimoon a katutulok, odino pipilien tayo labat iray ganggan ton mainomay ya unoren? Inkuan nen Jesus: “Gagawaen kon naynay iray makapaliket ed [Dios].” (Juan 8:29) Panggunaetan tayon aligen itan ya ehemplo.

Nen inmunan siglo, angipanengneng iray apostol na maabig ya ehemplo diad panagpasakop ed panangidaulo nen Kristo. Aminsan et inkuan nen Pedro ed si Jesus: “Nia! Tinaynan mi so amin a bengatla tan tutumboken mi ka la.” (Mar. 10:28) On, talagan pinabli na saray apostol so panangidaulo nen Jesus kanian mabulos dan tinaynan iray arum a bengatla pian sikatoy natumbok da.​—Mat. 4:18-22.

Mikoopera ed Saray Representanti nen Kristo

Antis na impatey to, sinalambit nen Jesus so sakey nin paraan a natumbok tayoy panangidaulo to. Inkuan to: “Samay mangaawat ed siopaman ya ibakik et mangaawat met ed siak.” (Juan 13:20) Diad tua, tinawag nen Jesus iray alanaan a representanti to bilang ‘agagi’ to. (Mat. 25:40) Sanen pinmawil lad tawen si Jesus kayari inkioli to, aturo iray ‘agagi’ to bilang embahador a “kasandi” ton mangimbita ed saray arum pian makapikareenan irad si Jehova a Dios. (2 Cor. 5:18-20) Lalanoren na pamidbir tayod panangidaulo nen Kristo so pampasakop tayod saray ‘agagi’ to.

 Maabig sirin no usisaen tayo no panoy ikikiwas tayod saray nipanpanaon a Makasulatan ya simbawa ed saray nibased Biblian publikasyon. Diad panaaral tayoy Biblia tan iyaatendid saray aral, nipapanonot ed sikatayo iray mensahe nen Kristo. (2 Ped. 3:1, 2) Nipanengneng tayoy impapuson apresasyon ed itataryan espiritual a naakan diad regular a pangan ed satan. Anto sirin so nepeg a reaksion tayo no say sakey a simbawa et panapanaon ya ipapanonot? Singa bilang, sisimbawaen na Biblia iray Kristiano a miasawa “dia labat ed Katawan.” (1 Cor. 7:39) Diad masulok lan sanlasus a taon, naynay iyan nipapaimano ed Say Panag-Bantayan. On, sinononot iray agagi nen Kristo ed espiritual a pankaabigan tayo diad pangipapalapag na saray artikulo nipaakar ed saya tan arum niran apuyanan a simbawa. No iikdan tayo na imano irayan panonot, nipapanengneng tayo a tutumboken tayoy ayadyarin Lider tayo, si Jesu-Kristo.

“Say basbas na matunong sikato so singa liwawa na kabuasan, ya onsinag ya onsinag angga ed nagnap ya agew,” so inkuan na Uliran 4:18. On, say panangidaulo nen Jesus et progresibo. Say sakey nin paraan a nipanengneng tayoy pikokoopera tayod saray ‘agagi’ nen Kristo et diad pangawat tayod antokaman a pananguman ed saray eksplinasyon na Makasulatan iran katuaan ya ipapalapag na “matoor tan makabat ya aripen.”​—Mat. 24:45.

Nipatnag tayo met so panagpasakop ed saray ‘agagi’ nen Kristo diad pikoopera tayod saray aturon manangasikaso ed Kristianon kongregasyon. Oniay inkuan nen apostol Pablo: “Matulok kayo komon ed saramay mangidadaulo diad limog yo tan mapasakop kayo komon, ta babantayan da iray kamarerwa yo.” (Heb. 13:17) Alimbawa, nayarin pasesegen itayo na sakey ya elder ed kaimportantiay pakawalaan na regular a Panagdayew na Pamilya odino mangiter na suhestion ed pigaran aspekto na ministeryo tayo. Nayarin mangiter so ombiabiahen manangasikaso na Makasulatan a simbawa ed espisipikon aspekto na bilay tayo bilang Kristiano. No mabulos tayon iyaaplika iratan, papaneknekan tayon tutumboken tayoy Jesus bilang Lider tayo.

Diad sayan mundo et anggapoy maabig a panangidaulo. Balet say itumbok ed maaron panangidaulo nen Kristo so makaparepresko! Sirin, tuloken tayoy Lider tayo tan mikoopera ed saramay uusaren to natan.

[Saray litrato ed pahina 27]

Kasin aawaten moy simbawad Biblia ya agmiasawa ed agmanananisia?