Siopa so Sankaimportantian ya Persona ed Bilay Mo?

“Sankatageyan ka a manuna nen say amin a dalin.”​—SAL. 83:18.

1, 2. No nipaakar ed kilalaban, akin et aliwan magenap so pangamta labat ed ngaran nen Jehova?

NAYARIN unonan anengneng mo so ngaran nen Jehova sanen walay angipabasad sika na Salmo 83:18. Ompan agmo iilaloan ya oniay nabasam ditan: “Pian saray totoo nakabatan da a sika, a say ngaran mo a bukbukor et Jehova, sankatageyan ka a manuna nen say amin a dalin.” Manlapu lad saman, seguradon inusar mo met iyan teksto pian nakabat na arum so maaron Dios tayo, si Jehova.​—Roma 10:12, 13.

² Importantin nakabatan na totoo so ngaran nen Jehova, balet agmagenap so pakaamta da labat ed satan. Imanoen no panon ya impabitar na salmista so sakey nin katuaan a kaukolan parad kilalaban tayo sanen imbaga ton: “Sankatageyan ka a manuna nen say amin a dalin.” Ipapatnag na saya a si Jehova so sankaimportantian a Persona ed interon uniberso. Sikato so Amalsa ed amin, kanian manepeg labat ya ilaloan ton sigpot a manpasakop ed sikato so amin a pinalsa. (Apo. 4:11) Nepeg tayo sirin ya tepetay sarili tayo, ‘Siopa so sankaimportantian ya persona ed bilay ko?’ Importantin usisaen tayon maong so ebat tayod sayan tepet!

Say Isyu Diad Hardin na Eden

3, 4. Panon ya apalikdo nen Satanas si Eva, tan antoy resulta?

³ Napatnagan so inkaseryoso na satan ya tepet diad saramay agawad hardin na Eden. Say rebelden anghel a tinawag ya Satanas a Diablo et tinukso toy unonan bii, si Eva, ya iyunay pilalek to imbes ya unoren so ganggan nen Jehova ya agkanen so bunga na sakey a kiew. (Gen. 2:17; 2 Cor. 11:3) Nampadaeg si Eva ed sayan tukso, a pakapatnagan ya anggapoy respeto tod soberanya nen Jehova. Agto binidbir si Jehova bilang say sankaimportantian ya Persona ed bilay to. Panon balet ya apalikdo nen Satanas si Eva?

⁴ Angusar si Satanas na agnaliklikas iran taktika diad samay impitongtong tod si Eva. (Basaen so Genesis 3:1-5.) Unona, agto tinukoy so personal a ngaran nen Jehova, noagta inusar to labat so terminon “Dios.” Midumaan itan ed ginawa na angisulat ed Genesis, ta sinalambit toy ngaran a Jehova diad unonan bersikulo na satan a kapitulo. Komadua, imbes ya tepeten toy nipaakar ed ‘imbilin’ odino ingganggan na Dios, say tinepet to et no antoy “inkuan” na Dios. (Gen. 2:16) Diad saya et papapawayen ton agtanton importante iman a ganggan. Komatlo, inusar toy salitan “yo” tan “kayo” anggano say katongtong to labat et si Eva. Diad satan a ginawa to et nanggunaetan ton ipalikna ya importante si Eva, kanian atagtagey laingey panmoria nen Eva ed sarili to​—a sarag ton isalitaay asawa to. Antoy resulta ey? Inuleyan nen Eva iray bengatla sanen oniay imbaga tod samay uleg: “Nayarian mi mangan na bunga na kakiewan na tanamanan.”

5. (a) Sinagyat nen Satanas si Eva ya ipokus so imano to ed anto? (b) Antoy nibaga tayon konklusyon ed impangan nen Eva diad samay isesebel ya bunga?

⁵ Pinikewet nen Satanas iray imbaga nen Jehova. Pinapaway ton agmakatunongan so Dios ta imbaga To kunod Adan tan Eva ya ‘ag-ira mangan ed anggan anto ya kiew na tanamanan.’ Insan, sinagyat nen Satanas si Eva ya say isipen to labat et say sarili to tan no panon ton naparakep kunoy kipapasey bilay to, ya magmaliw a ‘singa Dios.’ Diad saginonor, atukso si Eva ya ipokus so imano to ed samay kiew tan ed bunga  na satan, tan agto ninonot so relasyon tod samay Sakey ya angiter ed sikato na amin a bengatla. (Basaen so Genesis 3:6.) Diad impangan nen Eva ed samay bunga, makapaermen ta impanengneng ton aliwan si Jehova so sankaimportantian a Persona ed bilay to.

Say Isyu Diad Panaon nen Job

6. Panon a kinuestion nen Satanas so katooran nen Job, kanian anton pankanawnawa so inter ed si Job?

⁶ Kalabas na pigaran siglo, say matoor ya si Job et awalaan na pankanawnawan ipanengneng no siopay sankaimportantian a Persona ed bilay to. Sanen impaimano nen Jehova ed si Satanas so katooran nen Job, oniay matangas ya inyebat nen Satanas: “Si Job antakot ta ed Dios ya andi-kabaliksan?” (Basaen so Job 1:7-10.) Ag-ibabaga nen Satanas ya aliwan matulok si Job ed Dios. Imbes, say kinuestion to et say motibo nen Job. Singa to iyaakusa ya manlilingkor si Job ed si Jehova aliwan lapud aro, noagta lapud walay nagunggona tod satan. Si Job labat so makapangiter na ebat ed satan ya akusasyon, tan sikatoy inikdan na pankanawnawan paneknekan ya aliwan tua itan.

7, 8. Antoran subok so dinalan nen Job, tan antoy pinaneknekan to diad matoor ya impansungdo to?

⁷ Inabuloyan nen Jehova si Satanas ya ipasagmak ed si Job so nantutumbokan a trahedya. (Job 1:12-19) Antoy reaksion nen Job ed baleg ya impanguman na kipapasen to? Unong ed rekord et sikatoy “agnankasalanan, agto met impaakar a maatiw [so] Dios.” (Job 1:22) Balet siansian agtinmunda si Satanas. Oniay inrason to: “Baog [ed] baog, on, amin a say too wala ed sikato iter to nipaakar ed bilay to.” * (Job 2:4) Singa ibabaga nen Satanas ya no si Job lan mismo so manirap, ditan la mandesisyon ya aliwan si Jehova so sankaimportantian a Persona ed bilay to.

⁸ Amigmig so laman nen Job lapud makapadimlan sakit, insan ni dinesdes na asawa to ya ikaindan to lay Dios pian ompatey la. Diad saginonor, si Job et inakusaan na taloran kakaaro to a sikato kunoy dudusaen na Dios lapud kaugsan to. (Job 2:11-13; 8:2-6; 22:2, 3) Balet, diad amin ya impanirap nen Job et apansiansia toy katooran to. (Basaen so Job 2:9, 10.) Diad matoor ya impansungdo to et pinaneknekan ton si Jehova so sankaimportantian a Persona ed bilay to. Impanengneng met nen Job ya anggan diad limitadon paraan et sarag na agperpekton too a paneknekan ya aliwan tua iray akusasyon na Diablo.​—Ikompara so Uliran 27:11.

Say Perpekton Ebat nen Jesus

9. (a) Panon ya tinukso nen Satanas si Jesus no nipaakar ed pilalek na laman? (b) Antoy reaksion nen Jesus ed sayan tukso?

⁹ Kayarin tuloy na impanpabautismo nen Jesus, sikatoy tinukso nen Satanas ya unaen so pilpilalek na laman imbes ya say relasyon tod si  Jehova. Taloran klase na tukso so inusar na Diablo. Unona, sinambot toy impakaerasan nen Jesus, a tinukso ton pagmaliwen ya tinapay iray bato. (Mat. 4:2, 3) Kakkapanayunal nen Jesus ed loob na 40 ya agew kanian talagan natnarasan. Sinugsogan na Diablo ya usaren toy pakayari to pian agla naerasan. Antoy reaksion nen Jesus ey? Aliwan singa si Eva, say angipokusan nen Jesus na imano to et say Salita nen Jehova, tan tampol ton impulisay so tukso.​—Basaen so Mateo 4:4.

10. Akin et tinangguyor nen Satanas si Jesus ya ontaboy manlapud toktok na padir na templo?

¹⁰ Tinukso met nen Satanas si Jesus a say nonoten to labat et say reputasyon to. Tinangguyor toy Jesus ya ontaboy manlapud toktok na padir na templo. (Mat. 4:5, 6) Antoy labay nen Satanas ya nagawa? Unong ed si Satanas, napaneknekan nen Jesus ya sikatoy “sakey [ya] anak na Dios” no agnasakitan diad itaboy to. Mapatnag ya labay na Diablo ya pampagaan a maong nen Jesus so dilin reputasyon to, ya anggad ipangta to lay abilidad to. Amta nen Satanas ya say sakey a too et posiblin natangguyor ya manggaway aliwa lapud “pride” tan lapud agto labay so nabaingan. Aliwa ni ingey impangiyaplika nen Satanas ed sakey a teksto, balet ta impanengneng nen Jesus a sigpot so pakatalos To ed Salita nen Jehova. (Basaen so Mateo 4:7.) Diad impangipulisay nen Jesus ed satan ya tukso, pinaneknekan to lamet a si Jehova so sankaimportantian ya Persona ed bilay to.

11. Akin et impulisay nen Jesus so amin a panarian na mundo ya inyopresi na Diablo?

¹¹ Lapud desperado lay Satanas, diad kaunoran et inyopresi tod si Jesus so amin a panarian na mundo. (Mat. 4:8, 9) Impulisay itan a tampol nen Jesus. Amta ton no awaten to itan et singa to met la impulisay so soberanya nen Jehova​—say kanepegan na Dios bilang Sankatagyan. (Basaen so Mateo 4:10.) Diad kada impanukso nen Satanas et inmebat si Jesus panamegley na saray tekston wadman so ngaran nen Jehova.

12. Anton mair-irap a desisyon so kaukolan a gawaen nen Jesus sanen asingger lay panampot na bilay to diad dalin, tan antoy naaralan tayod mairap ya impandesisyon to?

¹² Sanen asingger lay panampot na bilay nen Jesus diad dalin, sikatoy kaukolan a manggawa  na mair-irap a desisyon. Legay ministeryo to, imbalikas to a sikatoy akaparaan a mangiyapay ed bilay to bilang bagat. (Mat. 20:17-19, 28; Luc. 12:50; Juan 16:28) Balet, amta nen Jesus ya sikatoy naakusaan tan nasentensiaan diad korte na saray Judio, tan pateyen lapud ibabaga ran sikatoy mansasalita sumpad Dios. Satan so akagonigonan ton maong. Impikasi to: “Amak, no nayari, ipaliis mo ed siak iyan kopa.” Balet ta oniay intuloy ton imbaga: “Ingen, aliwan unong ed linawak, noagta unong ed linawam.” (Mat. 26:39) On, say inkamatoor nen Jesus anggad patey so petepeteg ya amaneknek a si Jehova so sankaimportantian ya Persona ed bilay to!

Say Ebat Tayo ed Samay Tepet

13. Antoray naaralan tayo ed alimbawa nen Eva, Job, tan Jesu-Kristo?

¹³ Antoray naaralan tayo? No nipaakar ed si Eva, naaralan tayo a saramay manpapadaeg ed makasarili iran pilalek odino mapaatagey ya awawey et ipapanengneng dan aliwan si Jehova so sankaimportantian ya Persona ed bilay da. Diad impansiansian matoor balet nen Job, naaralan tayon sarag na anggan saray agperpekton totoo a paneknekan ya si Jehova so iyuuna ra no matoor dan susungdoan iray subok​—anggano agda sigpot a natatalosan so sengegan na saratan. (Sant. 5:11) Tan diad alimbawa nen Jesus et naaralan tayon nepeg ya akaparaan itayon sagmakey kababaingan tan agmasyadon pampagaay dilin reputasyon tayo. (Heb. 12:2) Balet panon tayon niyaplika irayan naaralan tayo?

14, 15. Antoy pandumaan na reaksion nen Jesus tan Eva ed tukso, tan panon tayon naalig si Jesus? (Komentoan so litrato ed pahina 18.)

¹⁴ Agbalot aabuloyan a lapud tukso et nalingwanan mo lay Jehova. Impokus nen Eva so imano to ed tukson walad arapan ton mismo. Anengneng to ya say bunga et “maong a pantagano, tan makapaliket ed saray mata, tan anengneng to so sakey a kiew a pampirawatan.” (Gen. 3:6) Nidumaduma balet so reaksion nen Jesus diad samay amitlon impanukso nen Satanas! Diad kada tukso et agto inisip so naala ton gunggona, noagta say sankanonot to et no antoy resulta na saray gawaen to. Sikatoy nanmatalek ed Salita na Dios tan inusar to met so ngaran nen Jehova.

¹⁵ Sano natutukso tayon manggaway bengatlan agmamaliket ed si Jehova, antoy nepeg a nonoten tayo? No say akapokusan tayo et samay tukso, mas onloor so mauges a pilalek tayo. (Sant. 1:14, 15) Kaukolan ya onkiwas tayon tampol pian ekalen itan a pilalek, anggano mair-irap so panggawad satan, ya aliling to et putoten so sakey a parte na laman tayo. (Mat. 5:29, 30) Singa si Jesus, say nepeg ya nonoten tayo et say resulta na saray gawaen tayo​—no antoy epekto na satan ed relasyon tayod si Jehova. Ipanonot tayod sarili tayo no antoy ibabaga na Salita to, say Biblia. No gawaen tayo irayan amin, ditan tayo labat napaneknekan a si Jehova so sankaimportantian a Persona ed bilay tayo.

16-18. (a) Antoray nayarin sengegan na ikakkapuy na liknaan tayo? (b) Antoy ontulong pian nasarag tayo ray makapagonigon ya kipapasen?

¹⁶ Agbalot aabuloyan a lapud saray trahedyan asagmak mo et tetelen moy Jehova. (Uli. 19:3) Diad panasingger na anggaan na sayan mauges a mundo, dakel ya lingkor nen Jehova so apektado na saray kalamidad tan makakasagmak na saray trahedya. Agtayo iilaloan so mamilagron proteksion diad sayan panaon. Balet singa si Job, nayarin onkakkapuy tayo sano inateyan tayoy inad-aro odino walaray dadalanen tayon kairapan.

¹⁷ Ag-atalosan nen Job no akin a walaray bengatlan inyabuloy nen Jehova ya nagawa, tan no maminsan et agtayo met natatalosan no akin a walaray nagagawan kaugsan. Nayarin abalitaan tayoy nipaakar ed saray matoor ya agagi ya inatey lapud yegyeg o arum nin kalamidad, a singa samay agawad Haiti. Odino ompan walay kabat tayon matoor ya agi ya biktima na karawalan o inatey lapud graben aksidente. Odino nayarin sikatayon mismo et walay dadalanen tayon mair-irap ya situasyon o biktima tayoy ag-inkahustisya. Lapud pakakagonigon tayo et nayarin oney-ey tayon: ‘Aman Jehova, anto ’yay nagagawa? Akin et siak ni? Antoy  ginawak ya aliwa?’ (Hab. 1:2, 3) Antoy ontulong ed sikatayo diad onia ran kipapasen?

¹⁸ Agtayo iisipen ya saratan et pakapatnagan ya ag-itayo aabobonan nen Jehova. Sayan punto et impabitar nen Jesus sanen tinukoy toy duaran trahedya ya agawa diad panaon to. (Basaen so Lucas 13:1-5.) Dakel ed saray kalamidad et resulta na “panaon tan ag-iilaloan a nagawa.” (Ecl. 9:11, NW) Antokaman so sengegan na gonigon tayo, nasarag tayo itan no kerewen tayoy tulong na “Dios na amin a ligliwa.” Ikdan to tayoy biskeg a nakaukolan pian makapantultuloy itayon matoor.​—2 Cor. 1:3-6.

19, 20. Antoy tinmulong ed si Jesus pian nasungdoan toy kababaingan, tan antoy ontulong ed sikatayon nagawaan met itan?

¹⁹ Agbalot aabuloyan a say manunan sankanonot mo et say pride o kababaingan mo. Lapud inkamapaabeba nen Jesus et asarag ton ‘taynan so amin a walad sikato tan inawat toy kipapasen na sakey ya aripen.’ (Fil. 2:5-8) Asungdoan toy dakel ya kababaingan lapud impanmatalek tod Jehova. (1 Ped. 2:23, 24) Diad satan ya ginawa nen Jesus et inyuna toy linawa nen Jehova, kanian sikatoy nitandoro ed mas atagey a posisyon. (Fil. 2:9) Sinimbawa nen Jesus iray disipulo to ya ontan met so gawaen da.​—Mat. 23:11, 12; Luc. 9:26.

²⁰ No maminsan, walaray subok ed pananisia tayo ya pansengegay kababaingan. Balet, nepeg a siansian matalek itayo a singa si apostol Pablo, ya angibagan: “Nisengeg ed saya et itetepel ko met irayan bengatla, balet agak ombabaing. Ta kabat ko imay papanisiaan ko, tan matalek ak a nayarian ton alwaran so inmatalek ko ed sikato anggad satan ya agew.”​—2 Tim. 1:12.

21. Anggano makasarili so awawey na totoo natan, antoy panggunaetan tayon gawaen?

²¹ Impasakbay na Biblia ya diad sayan panaon tayo, “saray totoo et magmaliw a maaro ed inkasikaran dili.” (2 Tim. 3:2) Agla sirin pankelawan a say iyuuna na maslak a totoo et say sarili da. Komon ta ag-itayon balot naalisan na ontan ya awawey! Balanglan nipapaarap tayod tukso, makakasagmak na trahedya, odino niiiyan ed kababaingan, komon ta determinado so balang sakey ed sikatayo a paneknekan a talagan si Jehova so sankaimportantian a Persona ed bilay tayo!

[Paimano ed leksab]

Antoy Naaralan Tayo Ed . . .

• impanukso nen Satanas ed si Eva?

• reaksion nen Job ed saray asagmak ton trahedya?

• no antoy sankaimportantian ed si Jesus?

[Tepetepet Parad Panagaral]

[Litrato ed pahina 17]

Agninonot nen Eva so relasyon tod si Jehova

[Litrato ed pahina 18]

Impulisay nen Jesus iray tukso nen Satanas tan inyuna toy linawa nen Jehova

[Saray litrato ed pahina 20]

Panagpulong diad saray tolda kayari yegyeg ed Haiti

Diad makapagonigon iran panaon, kerewen tayoy tulong na “Dios na amin a ligliwa”