Talaga Kasin Panliliketan Moy Salita na Dios?

“SANEN ginapoan kon basaey Biblia a regular, liknaen kon pabelat itan, aliwan makapaliket,” so inkuan nen Lorraine. “Mairap a talosan, kanian ontitikyab so nonot ko.”

Inkuan na arum ya agmet ira naliliketan sanen kagapogapo ran basaey Biblia. Ingen, intuloy da itan lapud amta ra a kaukolan a basaey Biblia. Inkuan nen Marc: “Mairap a paliisan iray makaabalad panagbasay Biblia tan personal a panagaral. Naynay kon impikasi tan ginawak so anggaay nayarian ko pian makapanbasa ak na Biblia ya inagew-agew.”

Antoy gawaen mo pian napaaralem moy apresasyon mod nisulat a Salitay Dios, say Biblia? Panon kan naliketan ed pambasam ed satan? Imanoen iray onggendan a suhestion.

Saray Kalat tan Paraan

Gapoan moy pambasa na Biblia panamegley na pikakasi tan pangiyapasakey ed nonot mo. Onkerew na tulong ed si Jehova pian nabayuboan moy seseg ed panaral na Salita to. Ipikasim a lukasan toy nonot tan pusom pian mas natalosan moy karunongan to. (Sal. 119:34) No agmo iya gawaen, magmaliw a rotina labat so panagaral moy Biblia, tan magmainomay kan onsawa. Inkuan nen Lynn: “No maminsan et pepelesan koy manbasa tan agko la iimanoen iray mararakep a punto. Mabetbet ya agko natatalosay babasaen ko. Ingen, impikasik a nawalaan ak na kontrol ed sarilik, tan akatulong iya pian agmanyatawyataw so nonot ko.”

Pablien iray nanaaralan mo. Tandaan a no natatalosan tan niyaaplikam iray katuaan ed Biblia, nagamoran moy bilay. Kanian, panggunaetan mon anapen iray praktikal a punto tan iyaplikam iratan. “Aanapen ko ray tekston makatulong pian nibiig ko ray lingon kagagawak tan motibok,” so inkuan nen Chris. “Makakaliket ak ta dakel so naroromog kon impormasyon ed Biblia tan ed saray publikasyon tayo a dugaruga ed siak, anggano agak kabat na saramay nansulat.”

Mangiletneg na kalat a mainomay ya dampoten. Arumay antam lan impormasyon nipaakar ed saray karakter ed Biblia. Makaromog ka na makapainteres iran detalye nipaakar ed sikara diad tulong na Insight on the Scriptures odino Watch Tower Publications Index. Legan mon nanaaralan so inkatoo ra, kalaktip lay personalidad tan liknaan da, mas nagunggonaan ka ed ehemplo ra.

Mananap na balon paraan na panagkatunongan based Kasulatan. (Gawa 17:2, 3) Ontan so gagala nen Sophia ed panaaral to. Inkuan to: “Labay koy makaaral na saray balon paraan na panagkatunongan a nausar kod ministeryo tan diad arum a pankanawnawa, pian malinew kon nipasabi iray katuaan ed Biblia. Baleg so nitulong na Panag-Bantayan pian nagawaan iya.”​—2 Tim. 2:15.

Bilayen ed nonot iray salaysay ed Biblia. “Say salita na Dios et mabilay,” so kuan na Hebreos 4:12. Legan mon babasaey Kasulatan, imadyin mo no antoy nenengnengen na saray karakter pian magmaliw a mabilabilay ed nonot mo so mensahe na Dios. Salim a dengelen no antoy dedengelen da tan liknam no antoy nalilikna da. Ikonektam iray eksperiensya ra ed mismon  kipapasen mo. Manaral ed no panon dan inarap iray situasyon. Makatulong iya pian mas natalosan tan natandaan mo iray salaysay ed Biblia.

Ipanaon so panaral ed saray mairap a teksto tan eksplinasyon na saratan pian natalosan mon maong iratan. Mangigana na malaglaem a panaon parad panaral mo. Nayarin walay naabet mon makapainteres a tepet a mankaukolay kaaruman a pan-research. Anapen iray agpamilyar a salita, konsideraen iray footnote, tan nengnengen iray cross-reference diad Biblia. No mas natatalosan tan niyaaplikam iray nababasam, mas napanliketan mo so nisulat a Salita na Dios. Singa say salmista, nibalikas mo lad satan: “Inawat ko ray panonot mo [Jehova] a pinagkatawir ko ed andi-anggaan, ta panliliketan iratan na pusok.”​—Sal. 119:111, NW.

Agmo aapuraey panaral mo. Magmaliw a makatunongan ed karakel na panaon ya iganam parad personal a panagaral. Ibalansim iya ed panaon ya uusaren mod panagparaan parad saray pantitipon ed kongregasyon. Oniay inkuan nen Raquel: “Singa ak tensyonadon naynay tan agak maka-concentrate, kanian mas epektibo no magano labat so panaral ko. Akatulong iya pian mas minabang ak ed panaaral ko.” Inaksobi nen Chris: “No manaapura ak, nakokonsiensia ak ta dagdaiset so natandaan ko. Ag-onsasabid pusok iray aaralen ko.” On, mas maabig no agka manaapura.

Paaralemen so pampilalek mo ed salitay Dios. Inkuan nen apostol Pedro: “Singa saray kapangiyanak ya ugugaw, nawalaan kayo komon na pampilalek ed ag-alaokan a gatas a manlalapud salita na Dios, pian ombaleg kayo parad kilalaban.” (1 Ped. 2:2) Agla kaukolan ya aralen na saray kapangiyanak so pampilalek ed gatas, ta natural la itan ed sikara. Ingen, ipapaimano na Kasulatan a kaukolan tayon pawalaey pampilalek ed salita na Dios. No manbasa kay anggan sakey a pahina na Biblia kada agew, nasabi panaon, niwalad sika itan ya pampilalek. Samay singa mairap ed gapo et magmaliw a makapalikliket.

Dalepdepen iray teksto ed Biblia. Minabang ka met a maong no dalepdepen moy abasam. Saya so ontulong pian napankokonektaan mo iray teman inaral mo. Agmanbayag, makatipon kay espiritual a perlas na karunongan​—sakey ya alay dakep a kayamanan.​—Sal. 19:14; Uli. 3:3.

 Makabat a Pangusar na Panaon

Tua, mankaukolan na sagpot so pamasiansia na maabig ya ugali ed panagaral, ingen ta say bendisyon et agnasabsabaan. Seguradon onaralem so pakatalos mo ed Kasulatan. (Heb. 5:12-14) Say pakatebek tan karunongan a nagamoran mod pinuyanan a Kasulatan so mangiter na liket tan kareenan. Say karunongan a walad pinuyanan a Salita na Dios et “kiew na bilay” parad saramay manaanap tan mangiyaaplika ed satan.​—Uli. 3:13-18.

Say maseet a panaral ed Salitay Dios et mamawala na puson makatalos. (Uli. 15:14) Ontulong itan pian makapangiter kay masimoon a simbawa ya nibased Biblia. No manpaigiya kad saray nababasam ed Biblia tan ed saray publikasyon na “matoor tan makabat ya aripen” sano manggawa kay desisyon, naliknam so makaparepresko tan makapabiskeg ya epekto na pinuyanan a Salita nen Jehova. (Mat. 24:45) Magmaliw kan mas positibo tan maespiritual. Niarum ni, amin a gawaen mo pian paeletey relasyon mod Dios et ontalona.​—Sal. 1:2, 3.

No say pusom et napno na panangarod Dios, napakiwas kan manginabang ed pananisiam. Mangiter met iya na inkapnek. Panggugunaetan nen Sophia so pangipatlep tan pangusar na nanduruman teksto pian naalay interes na saray unabung tan magmaliw ya epektibo tan makapaliket so ministeryo to. Inkuan to: “Makapalikliket a nanengneng so reaksion na totoo ed mensahe na Biblia.”

Say sankaabigan a gunggona diad panliket ed Salita na Dios et say pakawalaan na maapit a relasyon ed si Jehova. Diad panaral moy Biblia, naamtaan mo iray estandarte to tan napablim so aro, inkamabunlok, tan hustisya to. Anggapo lay arum a kalat a mas importante odino mas makagunggona. Gawam a kabiangay bilay mo so panaral na Salitay Dios. Saya so sankaabigan a pangusaran moy panaon mo.​—Sal. 19:7-11.

[Kahon/Saray litrato ed pahina 5]

PANAGBASA NA SALITAY DIOS: SARAY KALAT TAN PARAAN

▪ Gapoan moy pambasa na Biblia panamegley na pikakasi tan pangiyapasakey ed nonot mo.

▪ Pablien iray nanaaralan mo.

▪ Mangiletneg na kalat a sarag mon dampoten.

▪ Mananap na balon paraan na panagkatunongan based Kasulatan.

▪ Bilayen ed nonot iray salaysay ed Biblia.

▪ Ipanaon so panaral ed saray mairap a teksto tan eksplinasyon na saratan pian natalosan mon maong iratan.

▪ Agmo aapuraey panaral mo.

▪ Paaralemen so pampilalek mo ed salitay Dios.

▪ Dalepdepen iray teksto ed Biblia.

[Litrato ed pahina 4]

Sano manbabasa kay salaysay ed Biblia, ipasen mon wala kad miparan situasyon