Nayari La Kasin Manpabautismo Anggan Ugaw Ni?

“MALIKELIKET ak ta say anakon bii et sakey lan lingkor nen Jehova, tan amtak a sikatoy maliket met,” so inkuan nen Carlos, * sakey a Kristianon ama diad Pilipinas. Insulat na sakey ya ama a tagad Gresya: “Malikeliket kami nen asawak ta anggan ugaw ni ray taloran ananak mi et abautismoan la ran Tasi nen Jehova. Onaaligwas irad espiritual tan maliket iran manlilingkor ed si Jehova.”

Talagan malikeliket iray Kristianon atateng sano manpabautismo iray ananak da, balet no maminsan say liket da et atekepay panagpaga. “Malikeliket ak, balet ta mapagpaga ak,” so inkuan na sakey ya ina. Akin et ontay nalilikna to? “Amtak a wala lay eebatan na anako ed si Jehova.”

Say panlingkor ed si Jehova bilang bautismadon Tasi to et sakey a kalat ya nepeg a dampoten na amin ya kalangweran. Balet, nayarin isipen na saray matakot ed Dios ya atateng, ‘Amtak ya onaaligwas so anako, balet nayarian to la kasin labanay desdes na panggaway imoral tan mansiansian malinis ed imaton nen Jehova?’ Nayarin itepet na arum ed sarili da, ‘Sano walay opresin yamanan, napansiansia to ni kasi liket tan seseg tod panaglingkor ed Dios?’ Kanian, antoran simbawad Biblia so makatulong ed atateng a naamtaan no kasin akaparaan la ray anak da a manpabautismo?

Pagmaliw a Babangatan​—Manunan Kakaukolanen

Anggapoy imbaga na Biblia ya espisipikon edad pian nabautismoan, noagta say espiritual a kipapasen na saramay onkualipikad bautismo. Ingganggan nen Jesus ed saray papatumbok to: “Ibangat yo iray totoo ed amin a nasyones pian magmaliw iran disipulok, a bautismoan yo ra.” (Mat. 28:19) Kanian, say bautismo et parad saramay babangatan la nen Kristo.

Anto so babangatan? Unong ed Insight on the Scriptures: “Sayan termino et manunan onaaplika ed saramay aglabat manisia ed saray bangat nen Kristo noagta maapit ya ontutumbok ed saratan.” Sarag kasi na anggan saray ugugaw ni so magmaliw a tuan babangatan nen Kristo? Sakey a misioneran nanlingkor ed Latin America diad  masulok ya 40 taon so nansulat nipaakar ed sikato tan ed duaran bibiin agagi to: “Wala kami lad suston edad pian desidien so panlingkor ed si Jehova tan manayam ed Paraiso. Akatulong so dedikasyon mi pian nasarag mi ray tukson kaslakan ed saray kalangweran. Agmi pagbabawian so impangidedika mi na bilay mi ed Dios sanen ugugaw kami ni.”

Panon mon naamtaan no kasin say anak mo et sakey lan babangatan nen Kristo? Inkuan na Biblia: “Anggan say ugaw ipakabat to so inkasikato ed panamegley na saray gawa to, no say kimey to sikato so malinis, tan no sikato so maptek.” (Uli. 20:11) Konsideraen tayo so pigaran pakapatnagan a say ugaw et ‘nipapanengneng toy iyaaligwas’ to bilang sakey a babangatan.​—1 Tim. 4:15.

Pakapatnagan na Pagmaliwa Babangatan

Kasin ontutulok ed sika so anak mo? (Col. 3:20) Kasin gagawaen to ray kimey a pagagawad sikato diad abung? Oniay inkuan na Biblia nipaakar ed 12 años ya Jesus: ‘Sikatoy nantultuloy a nampasakop ed atateng to.’ (Luc. 2:51) Siempre, anggapo so ugaw ya perpekton makatumbok ed atateng to. Balet kaukolan na saray tuan Kristiano ya ‘tumboken a maapit iray bakat nen Jesus.’ Kanian saray ugugaw a labay da lay manpabautismo et nepeg a kabkabat ya matulok ed saray atateng da.​—1 Ped. 2:21.

Konsideraen irayan tepet: Kasin ‘aanapen nin unona na anak mo so Panarian’ diad ministeryo? (Mat. 6:33) Kasin sikatoy mabulos a manginanabang na maong a balita ed arum, odino kaukolan mo nin bagaan ya onlan manpulong tan mitongtong ed totoo? Kasin manonot ed saray responsabilidad to bilang agbautismadon manangipalapag? Kasin papawilen to iramay nalmo ton interesado diad teritorya? Kasin ipapaamta tod saray maestra tan kaeskuela to ya sikatoy sakey a Tasi nen Jehova?

Kasin importantid sikato so iyatendi ed saray aral? (Sal. 122:1) Kasin panliliketan toy mankomentod Panagaral na Panag-Bantayan tan Panagaral na Kongregasyon ed Biblia? Kasin maseet ton gagawaen iray parte tod Teokratikon Eskuelaan Parad Ministeryo?​—Heb. 10:24, 25.

Kasin pansasagpotan na anak moy mansiansian malinis ed moral diad ipapaliis tod mauges iran kaulop diad eskuelaan tan anggan inerman? (Uli. 13:20) Komusta iray pipilien ton musika, pelikula, programad TV, video games, tan say panguusar tod Internet? Kasin nanengneng ed saray salita tan gawa to ya labay ton tumboken iray estandarte ed Biblia?

Dakel la kasi amta na anak mod Biblia? Nibalikas to kasid dilin salita to iray naaralan to legan na Panagdayew na Pamilya yo? Nipaliwawa to kasi iray manunan katuaan ed Biblia? (Uli. 2:6-9) Labalabay to kasin basaen so Biblia tan aralen iray publikasyon na matoor tan makabat ya aripen? (Mat. 24:45) Kasin mantetepet nipaakar ed saray bangat na Biblia tan teksto?

 Nayarin makatulong iratan a tepet pian naamtaay espiritual ya iyaaligwas na anak mo. Kayari pangonsiderad saratan, nayarin nibagam a wala ni kaukolan ton paaligwasen antis ya manpabautismo. Balet, no bilang ta nanengneng ed kabibilay to so pagmaliw a babangatan tan indedika to lay bilay tod Dios, nibagam a sarag to lay manpabautismo.

Sarag na Anggan Saray Ugugaw Ni a Dayewen si Jehova

Dakel ya lingkor na Dios so angipanengneng na katooran sanen kalangweran ni ra odino mas asasakbay ni. Isip mo pay Jose, Samuel, Josias, tan Jesus. (Gen. 37:2; 39:1-3; 1 Sam. 1:24-28; 2:18-20; 2 Awa. 34:1-3; Luc. 2:42-49) Ontan met ed apatiran mamarikit nen Felipe a nampropesiya, a maseguron nipasal a maong manlapud inkaugaw.​—Gawa 21:8, 9.

Inkuan na sakey ya agi ed Gresya: “Abautismoan ak sanen manedad ak na 12. Agkon balot pagbabawiay desisyon ko. Diad inlabas na 24 taon manlapu lad saman, 23 taon so inusar kod sigpot panaon a serbisyo. Say panangarok ed si Jehova so lawas tinmulong ed siak pian natalonaan ko ray subok bilang kalangweran. Diad edad ya 12, dagdaiset so amtak ed Kasulatan no ikomparak natan. Balet, inarok si Jehova tan sikatoy labay kon panlingkoran ed andi-angga. Misalsalamat ak ta tinulongan to ak a makapantultuloy a manlingkor ed sikato.”

Ugaw man o maedad la, siopaman ya mangipatnag na pagmaliw a tuan babangatan et nepeg a manpabautismo. Insulat nen apostol Pablo: “Diad puso na sakey et ipapatnag toy pananisia a mangitonton ed inkatunong, balet diad sangi na sakey et maparungtal ton iyaabawag so pananisia a mangitonton ed kilalaban.” (Roma 10:10) Sano nampabautismoy sakey ya ugaw nin babangatan nen Kristo, agawaan to so sakey ya importantin kundang ed bilay, ontan met na atateng to. Anggapo komoy makapangekal ed liket a manatalaran ed sikayo tan ed ananak yo.

[Paimano ed leksab]

[Kahon ed pahina 5]

Dugan Panmoria ed Bautismo

Ipapasen na arum ya atateng a say pampabautismo na ananak da et makanan kundang a walay katekep ton peligro​—singa pangala na driver’s license. Balet, talaga ta’n ipepeligro na bautismo tan sagradon serbisyo so marakep ya arapen na sakey? Say ebat na Biblia et andi. Onia so ibabagay Uliran 10:22: “Say bendisyon nen Jehova makapayaman, tan agmangarum na ermen.” Tan oniay insulat nen Pablo ed kalangweran a Timoteo: “Diad tua et baleg a pakagunggonaan so maridios a debosyon daput no pasaragen tayo no antoy walad sikatayo.”​—1 Tim. 6:6.

Tua, aliwan mainomay so panlingkor ed si Jehova. Dakel ya subok so asagmak nen Jeremias ed asainmin to bilang propeta na Dios. Ingen, oniay insulat to nipaakar ed panagdayew tod tuan Dios: “Saray salitam sikara nensaman ed siak so sakey a liket tan gayaga na pusok; ta natawag ak ed panamegley na ngaran mo, O Jehova, Dios na saray ehersito.” (Jer. 15:16) Binidbir nen Jeremias a say panlingkor ed Dios so lapuan na liket to. Say mundo balet nen Satanas so lapuan na kairapan. Kaukolan sirin a tulongan na atateng iray ananak da a nibiig itan ya pandumaan.​—Jer. 1:19.

 [Kahon/Litrato ed pahina 6]

Nepeg Kasin Ipaleen Ni na Anakoy Pampabautismo?

No maminsan, anggano kualipikado la ray ananak parad bautismo, nayarin desidien na atateng ya ipaleen ni itan. Anto kasi rason da?

Napapagaan ak ya no nabautismoan lay anako, ompan diad saginonor et sikatoy makagawa na seryoson kasalanan tan nadispelo. Makatunongan kasi so pangibaga a no ipaleen ni na sakey ya ugaw so pampabautismo to et anggapoy eebatan tod Dios ed kondukta to? Onia so imbilin nen Solomon ed saray ugugaw: “Amtaen mo, a lapu ed [saray kiwas mo] say Dios yakar to ka ed kaukom.” (Ecl. 11:9) Tan antokaman so edad, oniay impasakbay nen Pablo: “Kada sakey ed sikatayo et mikuentaan ed Dios parad sikaton dili.”​—Roma 14:12.

Parehon walaan na eebatan ed Dios iray bautismado tan agbautismadon managdayew. Tandaan met a sasalimbengan nen Jehova iray lingkor to diad ‘agto pangiyabuloy a nipaarap ira ed tukso ya agda nitepel.’ (1 Cor. 10:13) No ‘mantultuloy iran manlikas’ tan labanan day tukso, nailaloan day tulong nen Jehova. (1 Ped. 5:6-9) Oniay insulat na sakey a Kristianon ina: “Sano bautismado la ray ananak, mas panggunaetan day onarawid saray mauges a bengatla na mundo. Binidbir na anakon laki ya abautismoan ed edad ya 15 a say bautismo et sakey a proteksion. ‘Agmo nonotey manggawa na sumlang ed ganggan nen Jehova,’ so inkuan to. Baleg a tulong so bautismo ed panggaway inkatunong.”

No say katutulok mod si Jehova et ipapanengneng mod salita tan ehemplo, nasegurom ya ontan met so itultuloy a gawaen na ananak mo sano abautismoan la ra. Ibabaga na Biblia: “Say matunong et manaakar ed dalan na kaptekan. Maliket iray anak to a manumtumbok ed sikato.” (Uli. 20:7, NW)

Labay kon naabot ni na anakoy pigaran kalat. Kaukolan nin naaralan na ugugaw so mantrabaho pian diad arapen et sarag dan suportaay inkasikara. Balet mapeligro so pangipaseseg a mas importanti so edukasyon tan marakep a trabaho imbes ya iyunay tuan panagdayew. Nipaakar ed samay “bini,” odino salita na Panarian ya agbinmaleg, oniay inkuan nen Jesus: “Nipaakar ed samay nitanem ed kasabitan, saya imay onderengel ed salita, balet saray kapagaan ed sayan mundo tan say mapalikdon pakayari na kaykayamanan so mangamper ed ibaleg na salita, tan sikatoy agmakapambunga.” (Mat. 13:22) No nipaseseg ed anak so pangiyunad minumundon kalat nen say espiritual iran bengatla, nayarin nabalang so pilalek ton manlingkor ed Dios.

Parad saray ugugaw ya kualipikado lan manpabautismo balet ta agni onabuloy so atateng da, oniay inkuan na eksperiensyadon elder: “No ipaleen ni pampabautismo na sakey ya ugaw, nayarin naekal so seseg to tan diad saginonor et nadismaya.” Oniay insulat na sakey ya ombiabiahen manangasikaso: “Ompan naekalan lay interes ed espiritual iran bengatla so ugaw. Nayarin diad sayan mundo to la isentroy bilay to.”

[Litrato]

Unaen ni kasi pangala na atagey ya edukasyon?

[Litrato ed pahina 3]

Sarag na ugaw ya ipatnag so pagmaliw a babangatan

[Saray litrato ed pahina 3]

Pamparaan tan pibiang ed saray aral

[Litrato ed pahina 4]

Itulok ed ateng

[Litrato ed pahina 4]

Pibiang ed ministeryo

[Litrato ed pahina 4]

Pampikasin bukor