“Pastolan Yo so Pulok na Dios a Walad Panangasikaso Yo”

“Pastolan yo so pulok na Dios a walad panangasikaso yo, ya agkayonapapasootan, noagta mabulbulos kayo.”​—1 PED. 5:2.

1. Antoray situasyon na saray Kristiano ed Roma sanen ginawa nen Pedro so inmunan sulat to parad sikara?

ANTIS a ginmapoy impamasegsegang nen Nero ed saray Kristiano ed Roma, ginawa nen apostol Pedro so inmunan sulat to parad sikara ta labay to ran pasesegen. Say Diablo et “siber-siber” a manaanap na buagen to. Pian nalabanan na saray Kristiano so impluensya to, kaukolan a ‘mantultuloy iran manlikas’ tan ‘manpaabeba ed silong na mabiskeg a lima na Dios.’ (1 Ped. 5:6, 8) Kaukolan met iran mansiansian nankakasakey. Nepeg iran manalwar ya ag-ira “mankeketketan tan manaakmonan,” ta manresulta itan ed ‘panuupotan da.’​—Gal. 5:15.

2, 3. Siopa so nepeg tayon pipuligesgesan, tan anto so pantongtongan tayo ed sayan nantumbokan ya artikulo?

² Ontan met so kipapasen tayo natan. Manaanap so Diablo na pankanawnawa pian buagen itayo. (Apo. 12:12) Tan diad asingger lan arapen et walay “baleg a kairapan ya agni agawa manlapud inggapo na mundo.” (Mat. 24:21) Singa saray Kristiano nen inmunan siglo, kaukolan tayon paliisay pankokolkol. Pian nagawaan itan, walaray pankanawnawan kaukolan tayoy tulong na saray kualipikadon elder.

³ Aralen tayo no panon ya mas lalon naapresya na saray elder so pribilehyo ran pastolan so ‘pulok na Dios a walad panangasikaso ra.’ (1 Ped. 5:2) Insan tayo pantongtongan so dugan paraan na panagpastol. Diad onsublay ya artikulo, aralen tayo no panon ya nipanengneng na kongregasyon so ‘respeto ed saramay mansasagpot tan mangidadaulo’ ed pulok. (1 Tes. 5:12) Say pangikonsidera ed sarayan bengatla et ontulong ed sikatayon nalabanan so manunan Kabusol tayo, ta amta tayon sikato so nepeg tayon pipuligesgesan.​—Efe. 6:12.

Pastolan so Pulok na Dios

4, 5. Antoy nepeg a panmoria na saray elder ed pulok? Iyilustra.

⁴ Pinaseseg nen Pedro iramay mamatatken nen inmunan siglo ya aligen da so panmoria na Dios ed pulok ya inmatalek tod sikara. (Basaen so 1 Pedro 5:1, 2.) Si Pedro et ipapasen a “lusek” na kongregasyon, ingen agto impalikna ed saray mamatatken a sikatoy atagey nen say sikara. Imbes, sinimbawa to ra bilang kapara ton mamatatken. (Gal. 2:9) Aaligen na Mananguley ya Ulop natan so paraan nen Pedro diad panisimbawad saray elder a panggunaetan day panumpal ed ambelat a responsabilidad a panagpastol ed pulok na Dios.

⁵ Insulat na apostol ed saray mamatatken a ‘pastolan da so pulok na Dios a walad panangasikaso ra.’ Nepeg dan bidbiren a say pulok et kayarian nen Jehova tan nen Jesu-Kristo. Walay eebatan dad Dios ed no panon dan aasikasoen iray karnero to. Isipen pan walay maapit a kaarom a kinerew tod sikan asikasoen mo ray anak to legan ya anggapo. Agta asikasoen mo ran maong tan agmo paulyay pankaukolan da? No walay mansakit, agta painumen moy tambal odino awiten mod doktor? Ontan met iray elder natan, ‘papastolan da so kongregasyon na Dios a sinaliw tod panamegley na dala na mismon  Anak to.’ (Gawa 20:28) Sankanonot dan say kada karnero et sinaliw panamegley na mabmablin dala nen Kristo-Jesus. Lapud amta ran walay eebatan da, papakanen, sasalimbengan, tan aasikasoen na saray elder so pulok.

6. Antoy responsabilidad na saray managpastol nensaman?

⁶ Isipen pay responsabilidad na saray managpastol nensaman. Kaukolan dan anosay petang no kaagwan tan say betel no labi. (Gen. 31:40) Iiyan da ni ingen ed kapeligroan so bilay da parad karnero da. Inyagel na ugaw nin managpastol a David so pulok to manlapud atap iran ayep, singa say leon tan oso. Nipaakar ed saya, inkuan nen David a ‘siningkat tod balbas so ayep tan pinatey to.’ (1 Sam. 17:34, 35, NW) Agaylay sibeg nen David! Impeligro toy bilay to! On, ginawa ton amin so nayarian to pian niyagel iray karnero to.

7. Panon ya aliling to et samsamen na saray elder iray karnero manlapud panga nen Satanas?

⁷ Diad panaon tayo, kaukolan met a salimbengan na saray elder so pulok manlapud singa leon iran panangataki na Diablo. Nayarin lalanoren na saya so aliling toy makpel a panamsam ed sakey a karnero manlapud panga na Diablo. Aliling to et singkaten dad balbas iyan atap ya ayep pian niyagel day karnero. Nayarin mikatunongan irad saray agmaalwar ya agagin nasasagyat ed patit nen Satanas. (Basaen so Judas 22, 23.) Siempre, ag-iya nagawaan na saray elder no anggapoy tulong nen Jehova. Maaro ran aasikasoen so aliling to et asugatan a karnero, a bebedberan tan tatambalen day sugat to panamegley na makapaabig a Salita na Dios.

8. Iner so pangigigiyaan na saray elder ed pulok, tan panon?

⁸ Iwawanwan met na saray managpastol so pulok da diad mabunan pastolan tan diad pasen a walay danum. Igigiya met natan na saray elder so kongregasyon, ya ipapaseseg day regular a piaral pian say pulok et napakan a maong tan makaawat na ‘naakan diad dugan panaon.’ (Mat. 24:45) Mas malaem a panaon so usaren na saray elder parad saray mansasakit ed espiritual pian napaseseg da ran patagano ed Salita na Dios. Ompan walay abalang a karnero a labay to lay ompawil ed pulok. Imbes a taktakoten so agi, maaron ipaliwawa na saray elder iray  Makasulatan a prinsipyo tan ipanengneng da no panon ton niyaplika iratan.

9, 10. Panon so pangasikaso na saray elder ed saray mansasakit ed espiritual?

⁹ No walay sakit mo, anton klase na doktor so labay mo? Samay ngalngali ag-ondengel ed sika, balet tamtampol a mangireseta pian nakatongtong to la may onsublay ya pasyente? Odino mas labay moy onkonsultad doktor ya mangiganay panaon ed sika, ipaliwawa toy sakit mo, tan ibaga to no antoray posiblin makapaabig ed sika?

¹⁰ Mipadpara, nepeg ya dengelen na saray elder so agin mansasakit ed espiritual, tan tulongan dan onabig, ya aliling to et “puyokan day larak diad ngaran nen Jehova.” (Basaen so Santiago 5:14, 15.) Singa ed samay balsamo diad Gilead, nainawaan so mansasakit panamegley na Salita na Dios. (Jer. 8:22; Eze. 34:16) Sano iyaplika na saray agagin kinmapuy ed espiritual so prinsipyo na Biblia, onseseg ira lamet ed panaglingkor. On, talagan maabig so nagawaan na saray elder sano dengelen day kapagaan na saray maletey ya agagi tan manpikasi a kaiba ra.

Agnapapasootan, Noagta Mabulbulos

11. Antoy mamapakiwas ed saray elder a mabulbulos a manpastol ed pulok na Dios?

¹¹ Say onsublay ya impanonot nen Pedro ed saray mamatatken et no panon so duga tan aliwan paraan na panagpastol. Nepeg a “mabulbulos” a pastolan na saray elder so pulok na Dios, ya ‘ag-ira napapasootan.’ Antoy mamapakiwas ed saray elder a manggawa ed saya? Bueno, antoy amakiwas ed si Pedro a pastolan tan pakanen iray karnero nen Jesus? Say sakey a manunan rason et say panangaro tod Katawan to. (Juan 21:15-17) Lapud satan a panangaro, saray elder natan et ‘agla manbilay parad inkasikaran dili, noagta parad samay inatey parad sikara.’ (2 Cor. 5:14, 15) Sayan aro, kaibay panangarod Dios tan ed agagi ra, so mamapakiwas ed saray elder a mansagpot tan usarey kaykayarian tan panaon da pian napanlingkoran so pulok. (Mat. 22:37-39) Mabulbulos dan gagawaen iya, ya ag-ira napapasootan.

12. Kaunongan kalaknab so sakripisyon ginawa nen apostol Pablo?

¹² Kaunongan kalaknab so sakripisyon gawaen na saray elder? Diad pangaasikaso rad saray karnero, aaligen day apostol Pablo, no panon ya inalig to met si Jesus. (1 Cor. 11:1) Lapud panamabli nen Pablo tan saray kakaiba to ed saray agagin taga Tesalonica, ‘aliwa labat a say maong a balita nipaakar ed Dios so nanliketan dan innabang ed sikara noagta say bilay da’ ya mismo. Ginawa ra itan tekep na kauyamoan, “a singa sakey a manpapasuson ina a maar-aro ed dilin ananak to.” (1 Tes. 2:7, 8) Amta nen Pablo no antoy liknaan na manpapasuson ina ed anak to. Gawaen na ina so amin, ya ombangon ni ingen anggan pegley labi pian pasusoen to.

13. Antoy nepeg ya balansien na saray elder?

¹³ Kaukolan ya seguroen na saray elder ya mansiansia ran balanse ed responsabilidad dan manpastol tan ed obligasyon dad pamilya ra. (1 Tim. 5:8) Say panaon ya uusaren na saray elder parad kongregasyon et panaon ya nakaiba da komoy pamilya ra. Say sakey a paraan pian nabalanse iyan duaran responsabilidad et no sagpaminsan iran mangimbitay arum diad Panagdayew na Pamilya ra. Alimbawa, iimbitaan na elder ed Japan a manngaray Masanao iray agagin andiay asawa tan saray ulilad espiritual diad panagaral na pamilya ra. Diad inlabas na panaon, arum ed sarayan tinulongan to et nagmaliw met lan elder tan inalig day maabig ya alimbawa to.

Agmanaanap na Napinabangan, Akaparaan a Naynay

14, 15. Akin et kaukolan a paliisan na saray elder so ‘pananap na nabang,’ tan panon dan naalig si Pablo ed saya?

¹⁴ Pinaseseg met nen Pedro iray mamatatken a no papastolan day pulok, ‘agda aanapen so napinabangan da, noagta akaparaan iran naynay.’ Mankaukolan na dakel a panaon so kimey na saray elder, ingen ta ag-ira manaalagar na upa. Amoria nen Pedro a kaukolan ton pasakbayan iray kapara ton mamatatken nipaakar ed tendensian pastolan so pulok lapud ‘walay napinabangan da.’ Sayan tendensia et sankapatnagan  ed maluhon panagbilay na saray lider na relihyon ed “Makapanyarin Babilonia” anta dakel balet ed saray membro ra et maniirap. (Apo. 18:2, 3) Kanian kaukolan a manalwar iray elder natan ed sayan tendensia.

¹⁵ Maabig so impanengneng nen Pablo ya alimbawa ed saray elder. Anggano sakey ya apostol, agnagmaliw a “pabelat” ed saray Kristiano ed Tesalonica, tan ‘agkinmerew na kanen ed anggan siopa.’ Imbes, ‘agew-labin nankimey tan nansagpot.’ (2 Tes. 3:8) Marakep met so ipapanengneng ya alimbawa na saray elder tan saray ombiabiahen manangasikaso natan. Papablien day panamarawes na agagi, balet ta ag-ira “pabelat” ed anggan siopa.​—1 Tes. 2:9.

16. Antoy kabaliksan na pagmaliw ya “akaparaan a naynay” diad panagpastol?

¹⁶ Saray elder et “akaparaan a naynay” a manpastol ed pulok. Sankapatnagan itan diad panagsakripisyo ran tulongan so pulok. Ingen, agkabaliksan na satan a paskaren da ray agagin manlingkor ed si Jehova, nisay ilagyat day panlalaslasan diad panaglingkor ed Dios. (Gal. 5:26) Amta na saray elder a walay pandurumaan na kada karnero. Ingen, akaparaan iran tulongan iray agagi pian maliket dan lingkoray Jehova.

Agpakakatawan ed Pulok, Noagta Magmaliw ya Ehemplo

17, 18. (a) Akin a walay pankanawnawan nairapan iray apostol nensaman a talosay bangat nen Jesus nipaakar ed inkamapaabeba? (b) Antoy naaralan tayod satan ya agawad saray apostol nensaman?

¹⁷ Singa apantongtongan tayo la, nepeg a sankanonot na saray elder ya agda gawa so papastolan dan pulok, noagta kayarian itan na Dios. Maalwar ira sirin ya ag-ira “pakakatawan ed saramay kayarian na Dios.” (Basaen so 1 Pedro 5:3.) Walaray pankanawnawan labay na saray apostol nen Jesus so nawalaay pribilehyo balet ta aliway motibo ra. Labay day nawalaan na prominentin posisyon, singa saray manuley ed saray nasyon.​—Basaen so Marcos 10:42-45.

¹⁸ Diad panaon tayo, maabig no saray agagin ‘manadampot ed betang na manangasikaso’ et usisaen day motibo ra no akin et labay day nawalaan na pribilehyo. (1 Tim. 3:1) Parad saramay elder la natan, nayarin usisaen day inkasikara no kasin pipilaleken day autoridad odino prominentin posisyon a singa arum ed saray apostol nensaman. No saray mismon apostol nensaman et nilabanan da iyan pilalek, nepeg met sirin a pansagpotan na saray elder natan a paliisan so antokaman a tendensian pakatawan ed arum.

19. Antoy nepeg a tandaan na saray elder sano sasalimbengan day pulok?

¹⁹ Walaray pankanawnawan nepeg ya usaren na saray elder so autoridad da pian mangiter na mapuersan simbawa. Say sakey ed saratan et sano sasalimbengan day pulok manlapud saray “masesebeg a lobo.” (Gawa 20:28-30) Imbaga nen Pablo ed si Tito ya itultuloy toy ‘mamaseseg tan mamaat unong ed niiter ed sikaton autoridad.’ (Tito 2:15) Ingen, anggan sano walay ipepetek dan agi, kaukolan a say pideneng dad sikato et siansia nin tekep na dignidad. Imbes a magmaliw iran makritiko, amta ran mas epektibo so maaron pikatunongan pian nasabi so puso na agi tan napaseseg a manggaway duga.

20. Panon ya naalig na saray elder so impangipanengneng nen Jesus na maabig ya ehemplo?

²⁰ Say maabig ya ehemplo nen Kristo so mamakiwas ed saray elder ya aroen so pulok. (Juan 13:12-15) Naliklikna tayoy panangaro to legan tayon babasaen no panon ton impasal iray disipulo to diad panagpulong tan panaggaway  babangatan. Say impanengneng ton inkamapaabeba et amakiwas ed saray disipulo to, tan apaseseg iran aligey alimbawa to ed pangipanengneng na ‘kaabebaay nonot, ya impasen dan mas atagey so arum nen say sikara.’ (Fil. 2:3) Napapakiwas met iray elder natan ya tumbokey ehemplo nen Jesus, tan labay da met so magmaliw ya “ehemplo ed pulok.”

21. Anton tumang so iilaloan na saray elder?

²¹ Sinampotan nen Pedro so simbawa tod saray mamatatken diad impanukoy tod sakey a sipan diad arapen. (Basaen so 1 Pedro 5:4.) Saray alanaan a manangasikaso et ‘makaawat na maglorian korona ya ag-onkupas’ a kaibay Kristo diad tawen. Saray katulongan a managpastol a kabiangan na ‘arum a karnero’ et napribilehyoan a pastolan so pulok na Dios ed dalin diad uley na “manunan managpastol.” (Juan 10:16) Pantongtongan ed ontumbok ya artikulo no antoray paraan a nipanengneng na saray membro na kongregasyon so suporta rad saramay aturon mangidaulo.

Bilang Repaso

• Akin et matukoy a simbawaen nen Pedro iray kapara ton matatken a pastolan so pulok na Dios ya inmatalek ed sikara?

• Panoy nepeg a pangasikaso na saray elder ed saray mansasakit ed espiritual?

• Antoy mamapakiwas ed saray elder ya pastolan so pulok na Dios ya inmatalek ed sikara?

[Tepetepet Parad Panagaral]

[Litrato ed pahina 21]

Singa saray managpastol nensaman, sasalimbengan na saray elder natan iray “karnero” ya inmatalek ed sikara