Impanalo ed Abaybayag a Kaso!

GINMAPO itan nen 1995 tan anampot kayari 15 taon. Legan na satan a panaon, saray tuan Kristiano ed Russia et aatakien na saray onsusumpad relihyon da. Determinado irayan sumusumpa ya sebelan iray Tasi nen Jehova ed Moscow tan ed arum a lugar. Anggaman ontan, tinumangan nen Jehova so katooran na saray agagi tayod Russia diad impanalo ed kaso. Anto balet so sengegan na sayan amin?

KAWAYANGAN​—AGAMORAN A SIANSIA!

Manlapud 1991 anggad 1995, nipawil so kawayangan na saray agagi tayod Russia ya naandi nen 1917. Sikaray inaprobaan na gobiernoy Soviet Union bilang sakey ya relihyon nen 1991. Sanen abuyak so Soviet Union, nirehistro iray Tasi nen Jehova ed Russian Federation. Ontan met, inaksobi na gobierno a saray Tasi ya pinasegsegang na akadkauna iran gobierno et biktima na ag-inkahustisya. Nen 1993, inrehistro na Department of Justice na Moscow so Moscow Community of Jehovah’s Witnesses, say legal ya tawag ed saray Tasi diman. Diad satan lanlamang a taon, impaakseb met so balon konstitusyon na Russia a mangigagarantiya ed kanepegan na sakey a manpili na relihyon. Kanian onia so nibalikas na sakey ya agi, “Agmin balot inilaloan ya nawalaan kami kawayangan!” Insan to intuloy, “Limamploy taon mi yan inalagar!”

Inanamot na saray agagid Russia itan a “maabig a panaon” diad impasyan impanpulong da, tan bilang resulta et dakel so kinmiwas. (2 Tim. 4:2) Onia so inkomento na sakey ya akaobserba: “Interesadon maong ed relihyon iray totoo.” Ag-abayag, dinmakel so bilang na saray manangipalapag, payunir, tan kongregasyon. Manlapud 1990 anggad 1995, say datin bilang na saray Tasi ed Moscow ya manga 300 et nagmaliw ya 5,000! Lapud tuloytuloy ya ondarakel so bilang na saray agagi, inmaburido iray onsusumpad sikara. Nen kapegleyay 1990’s, inmataki ira diad impangisegep na saray demanda ed korte. Dinmalan ni itan ed apatiran abaybayag iran proseso antis ya aresolbe.

GINMAPO SO IMBESTIGASYON

Say inmunan kabiangan na satan et ginmapo nen Hunyo 1995. Sakey a grupo ed Moscow a mapatpatnag ya onsusuportad Russian Orthodox Church so angisegep na reklamo. Aakusaan da ray agagi tayo a mibibiang ed kriminal iran aktibidad. Ibabaga dan say gagawaen da et para kunod saray manrereklamon kapamilyaan na saramay nagmaliw a Tasi. Nen Hunyo 1996, inggapo na saray imbestigador so impan-anap na saray ebidensya, balet ta anggapoy nalmo ra. Kayari to, angi-file lamet na sananey a reklamo itan a grupo, balet ta aman lanlamang so akusasyon da. Nan-imbestiga lamet iray imbestigador, balet apaneknekan dan anggapoy basiyan na saray reklamo. Anggaman ontan, insegep da lamet itan a reklamo ed komatlon pankanawnawa. Inimbestigaan lamet iray Tasi nen Jehova ed Moscow, balet ta mipara so desisyon na prosecutor odino piskal​—ya anggapoy basiyan na demanda ra. Siansia ni balet ya insegep day reklamo ed komapat a pankanawnawa, ingen ta anggapon talagay ebidensyan aromog na piskal. Makapakelaw ta kinmerew lamet na sananey ya imbestigasyon itan ya grupo. Nen Abril 13, 1998, sinampotan na balon imbestigador so kaso.

“Balet, walay makapakelaw ya agawa,” so inkuan na sakey ya abogado ed kaso. Inaksobi  na representanti na saray prosecutor ya nan-imbestiga ed sayan komaliman reklamo ya anggapoy ebidensya a manggagaway kriminal ya aktibidad iray agagi, balet ta siansia nin impaisegep toy demanda. Imbaga to a sinumlang na Moscow Community of Jehovah’s Witnesses so ley na bansa ra ontan met ed internasyonal a ley. Inmabuloy so prosecutor na Northern Administrative Circuit of Moscow ya isegep so demanda. * Nen Setyembre 29, 1998, ginmapo so bista diad Golovinsky District Court ed Moscow. Ginmapo ed saya so komaduan kabiangan na proseso.

SAY BIBLIA DIAD KORTE

Diad melag a korte ed northern Moscow, inggapo nen Prosecutor Tatyana Kondratyeva so panangataki ed saray Tasi nen Jehova diad impangusar ed konstitusyon a pinirmaan nen 1997. Diad satan a ley, say Orthodox Christianity, Islam, Judaism, tan Buddhism labat so bibidbiren ya relihyon. * Kanian nairapan a manparehistro iray arum ya relihyon. Lapud satan ya ley et sarag na korte a sebelan iray relihyon a mangilalagyat na pambubusolan. Base ed satan, inakusaan na prosecutor iray Tasi nen Jehova ya ilalagyat day pambubusolan tan sengegan iray kabubuyak na saray pamilya, tan lapud satan et nepeg iran sebelan.

Oniay intepet na abogado na saray agagi: “Sioparan membro na Moscow Congregation so apaneknekan ya onsusumlang ed ley?” Anggapoy anggan sakey ya abitla na prosecutor. Inkuan to balet ya ilalagyat na saray literatura na saray Tasi nen Jehova ya busolen iray sananey so relihyon da. Pian pruebaan so ibabaga to, walaray binasa to ed Watchtower tan Awake! tan arum niran publikasyon (nengnengen so litrato). Sanen tinepetan no panon ya pansesengegan na pambubusolan irayan publikasyon, inkuan to: “Ibabangat na saray Tasi nen Jehova ya say relihyon da so tua.”

Dinerewan na agi tayon abogado so huis tan prosecutor na sansakey a Biblia tan binasa toy Efeso 4:5: “Sakey a Katawan, sakey a pananisia, sakey a bautismo.” Kabebekta say huis, prosecutor tan say abogado et wala lay sankabembenan dan Biblia, tan pantotongtongan da ray tekston singa say Juan 17:18 tan Santiago 1:27. Kanian intepet na huis: “Kasin ilalagyat na sarayan teksto so pambubusolan ed relihyon?” Say ebat na prosecutor et sikatoy agkualipikadon mankomento nipaakar ed Biblia. Impanengneng na abogado iray publikasyon na Russian Orthodox Church ya pirmin mamapauges ed saray Tasi nen Jehova insan to intepet: “Kasin sumlang ed ley irayan balikas?” Say ebat na prosecutor: “Aliwa ak ya kualipikadon mankomento ed opinyon na saray lider na relihyon.”

ANDIAY BASIYAN SO AKUSASYON

Pian ombelat so akusasyon ed saray Tasi ya bubuyaken da ray pamilya, imbaga na prosecutor ya ag-ira manseselebra na saray holiday, singa say Krismas. Balet, inaksobi to lanlamang ya diad ley na Russia et agkapilitan so panselebra na Krismas. Amin ya taga Russia​—kaiba iray Tasi nen Jehova ditan​—so walaan na kawayangan a manpili. Ipipilit to ni ya say  organisasyon tayo et ‘mangisisiblet ed ugugaw na magenap a painawa tan panliket.’ Balet nen atepetan, inaksobi ton agto nin balot akapitongtong ed saray anak na Tasi. Sanen tinepetan na abogado no kasin asali to lay inmatendid aral na saray Tasi nen Jehova, say inyebat to: “Agla nakaukolan.”

Inyarap na prosecution so sakey a propesor na psychiatry pian mantestigo. Inkuan to a say pambasa kuno ed saray literatura tayo et makaderal na ulo. Sanen impaimano na abogado na saray Tasi a say insubmiti na propesor ya statement ed korte et mipara ed dokumenton ginawa na Moscow Patriarchate odino ulopan na saray papari ed Moscow, inaksobi na propesor a mipara so arum a karga na satan, salita por salita. “Walaray kinopyak ditan,” so inkuan to. Naamtaan balet diad impangituloy na impantepet ya anggapo ni Tasi ya nagmaliw a pasyente to. Diad dapag na depensa, wala met so propesor na psychiatry ya angobserba ed masulok ya 100 a Tasi ed Moscow a nantestigo. Imbaga ton normal so panag-isip da, tan inyarum to a nanlapu la nen nagmaliw iran Tasi, mas marespeto ira ed arum a relihyon nen say dati.

ANALO​—BALET ALIWA NIN PINAL

Nen Marso 12, 1999, anuro so huis na limaran eksperto a mangimbestiga ed literatura na saray Tasi nen Jehova, tan sinuspende toy bista. Balet antis ni na saya, wala lay grupo na saray eksperto ya ingganggan na Ministry of Justice na gobiernoy Russia a mangimbestiga ed saray literatura tayo. Nen Abril 15, 1999, inreport na sayan grupo ya anggapoy nalmoan dan mauges ed saray publikasyon tayo. Kanian nen Abril 29, 1999, in-renew na Ministry of Justice so rehistro na saray Tasi nen Jehova ed satan a bansa. Anggano wala la man ya resulta, impilit nin siansia na huis ed Moscow ya imbestigaan lamet na saramay limaran tinuro to iray literatura tayo. Nikadkaduma iyan situasyon​—legal a bibidbiren na Ministry of Justice na Russia iray Tasi nen Jehova bilang sakey a  relihyon ya ontutulok ed ley, ingen ta sikaray siansia nin iimbestigaan na Department of Justice na Moscow lapud akusasyon ya onsusumlang irad ley!

Ngalngali duay taon so apalabas antis ya intuloy so bista, tan nen Pebrero 23, 2001, impaakseb nen Judge Yelena Prokhorycheva so desisyon. Kayari ton inkonsidera so amin ya report na grupon nan-imbestiga, oniay desisyon to: “Anggapo so basiyan na pamatunda tan panebel ed kimey na saray Tasi nen Jehova ed Moscow.” Apaneknekan a siansia ed korte ya aliwan tua so amin ya akusasyon ed saray agagi! Balet ta ag-inawat na prosecutor iyan desisyon tan sikatoy inmapela ed Moscow City Court. Kayari taloy bulan, nen Mayo 30, 2001, kinansela na satan a korte so desisyon nen Judge Prokhorycheva. Ingganggan na korte ya uliten so bista. Samay datin prosecutor so mamemben balet ta sananey a huis lay onakto. Dia onggapo so komatlon kabiangan na proseso.

ATALO​—BALET ALIWA NIN PINAL

Nen Oktubre 30, 2001, inggapo nen Judge Vera Dubinskaya so pambista lamet. * Inulit nen Prosecutor Kondratyeva so akusasyon a saray Tasi nen Jehova et sengegay pambubusolan, balet ta inyarum to a say pangansela ed rehistro na saray Tasi nen Jehova et sakey a paraan pian naprotektaan so kanepegan na saray Tasi ed Moscow! Bilang ebat ed satan ya agmakatunongan a kerew, nanggawan tampol na petisyon so 10,000 ya Tasi nen Jehova ed Moscow. Kinerew dad korte so pangibasurad iyoopresi na prosecutor ya “proteksion.”

Imbaga na prosecutor ya agto la kaukolan so mangipresenta na saray ebidensya pian paneknekan ya talagan walay kasalanan na saray Tasi. Inkuan ton say bista et nipaakar ed saray publikasyon tan pananisia na saray Tasi nen Jehova, aliwan saray aktibidad da. Impaamta to a walay ipresenta ton spokesman na Russian Orthodox Church ya mantestigo. Diad satan ya imbaga to, apaneknekan ya talagan kakomplot iray klero ed getman panebel ed saray Tasi. Nen Mayo 22, 2003, ingganggan na huis ya imbestigaan lamet na sakey a grupo na saray eksperto iray publikasyon na saray Tasi nen Jehova.

Nen Pebrero 17, 2004, intuloy lamet so bista pian repasoey resulta na satan ya impan-imbestiga. Nalmoan na saray eksperto ya ipapaseseg na saray publikasyon tayo so “pamasiansia ed maabig ya uksoyan na pamilya tan panamaley” tan say akusasyon ya ilalagyat na saratan so pambubusolan et “andiay basiyan.” Inmabobon iray arum ya iskolar. Tinepetan so sakey a propesor na history na relihyon: “Akin et manpupulong iray Tasi nen Jehova?” Inkuan to: “Say panagpulong a kimey et kaukolan ed sakey a Kristiano. Atan so ibabaga na Ebanghelyo tan ingganggan itan nen Jesus ed saray babangatan to​—‘onla kayo tan manpulong ed amin a nasyones.’” Anggaman ontan, nen Marso 26, 2004, nandesisyon so huis a sebelan so kimey na saray Tasi ed Moscow, tan impaakseb itan na Moscow City Court nen Hunyo 16, 2004. * Onia so komento na sakey ya abayag lan Tasi ed satan a desisyon: “Nen uley na Soviet, say sakey a Russian et nepeg a magmaliw ya ateista. Natan balet, say sakey a Russian et nepeg a magmaliw ya Orthodox.”

Antoy reaksion na saray agagi ed pananebel? Singa ed si Nehemias nensaman. Sanen panggugunaetan na saray sumusumpa ya amperen so pangaapiger ed padir na Jerusalem ya idadaulo to, sikatoy agnampaapekto, ontan met ed saray kakaiba to. Imbes, ‘intuloy day pangipapaalagey da’ tan ‘nampeleng iran nankimey.’ (Neh. 4:1-6, Maung a Balita) Singa sikara, saray agagi tayod Moscow et  agmet nampaapekto ed saray sumusumpa tan intuloy day importantin kimey​—say pangipulong ed maong a balita. (1 Ped. 4:12, 16) Sikaray matalek ya ag-ira paulyan nen Jehova, tan akaparaan la rad komapat a kabiangan na proseso na sayan abaybayag lan kaso.

LINMOOR SO ISUSUMPA

Nen Agosto 25, 2004, angisubmite iray agagi tayo na petisyon ed Kremlin ya aka-address ed si Vladimir Putin, say presidente na Russia ed saman. Satan ya petisyon, a mangipapasabid liknaan da nipaakar ed pananebel, et tugyopen na 76 volume tan walaan na 315,000 ya pirma. Kabebekta, pinmaway a siansiay tuan motibo na saray klero na Russian Orthodox. Oniay inyanunsio na spokesman da: “Talagan sumpa kami ed aktibidad na saray Tasi nen Jehova.” Inkuan na sakey a lider na Muslim ya say impangipaakseb ed pananebel et “sakey a makatantanda tan alay abig ya agawa.”

Lapud satan, saray apalikdon taga Russia et lalon sinmibeg ya onsumpad saray Tasi nen Jehova. Walaray agagid Moscow ya binugbog tan dinedepakan na saray sumusumpa legan iran manpupulong. Diad sakey ya bilding et puersaan ya pinaalis na mansyodot a laki so sakey ya agin bii, insan to dinepakan ed beneg kanian atumba tan nibasig so ulo to. Naospital so agi, balet ta anggapoy aksion ya ginawa na pulis. Say arum ya agagi et inaresto na saray pulis, inalaan na fingerprint, nilitrato, tan inkulong ya sanlabi. Tinaktakot da ray manedyer na saray rerentaan ya hall ed Moscow ya ekalan iray lisensia no panrentaen da ni ray Tasi. Kanian ag-abayag, dakel a kongregasyon so naandian na saray panag-aralan. Apataplon kongregasyon so kaukolan a mansusublayan a mangusar ed sakey a Kingdom Hall ya walaan na apatiran hall. Kaukolan ya igapo na sakey a kongregasyon ditan so Publikon Paliwawa diad 7:30 na kabuasan. Oniay inkuan na ombiabiahen manangasikaso: “Pian makaatendi iray agagi, kaukolan day ombangon na alas singko, balet ta  maliket dan ginawa itan ed masulok a sakey taon.”

“BILANG PANTASI”

Pian napruebaan ya sumlang ed ley so impanebel ed saray Tasi diad Moscow, kinmerew na tulong ed European Court of Human Rights nen Disyembre 2004 iray abogado tayo. (Nengnengen so kahon ya “No Akin a Nirebyu ed France so Desisyon na Russia,” ed pahina 6.) Kayari anem taon, nen Hunyo 10, 2010, impaakseb na Korte so nankakasakeyan dan desisyon ya talagan anggapoy kasalanan na saray Tasi nen Jehova! * Dinengel na Korte so amin ya akusasyon sumpad sikatayo tan apaneknekan da ya talagan anggapoy basiyan na saratan. Indeklara da met ya obligado so Russia a “mamatunda ed amin a violation ya anengneng na Korte tan manggaway paraan pian naapiger iray epekto na satan.”​—Nengnengen so kahon ya “Say Desisyon na Korte,” ed pahina 8.

Say malinlinew a konklusyon na Korte ed no panon a proprotektaan na European Convention on Human Rights iray aktibidad na saray Tasi nen Jehova et nepeg a tumboken aliwa labat lan diad Russia noagta ontan met ed 46 niran bansa ya membro na Council of Europe. Nilikud ed satan, lapud kalaknab na impanaral ed ley tan saray ebidensya, seguradon paninteresan met itan a basaen na saray manaaral na ley, huis, managgaway ley, tan saray eksperto ed human rights diad interon mundo. Akin ey? Diad impanggawa na desisyon, aglabat inkonsidera na Korte so waloran desisyon ya akadkaunan impaakseb to a pabor ed saray Tasi nen Jehova, noagta pati say siameran impanalo na saray Tasi nen Jehova diad saray sankatageyan a korte ed Argentina, Canada, Japan, Russia, South Africa, Spain, United Kingdom, tan United States. Sarayan impangikonsidera tan say impangibasura na Korte ed saray akusasyon na prosecutor ed Moscow et baleg a tulong ed sikatayoran Tasi nen Jehova ed interon mundo diad pangidepensay pananisia tan saray aktibidad da.

Inkuan nen Jesus ed saray papatumbok to: “Iyarap da kayo ed saray gobernador tan arari nisengeg ed siak, pian makapantasi kayo ed sikara tan ed saray nasyon.” (Mat. 10:18) Saray kaso ed apalabas ya 15 taon et angiter ed saray agagi tayo na pankanawnawa pian nipakabat so ngaran nen Jehova diad laknab ya agnin balot agawad Moscow tan diad arum nin lugar. Lapud akasentrod saray Tasi iratan ya imbestigasyon, kaso ed korte, ontan met ed desisyon na sakey ya internasyonal a korte, talagan angiter itan na “pantasi” tan akatulong ed “inyaligwas na maong a balita.” (Fil. 1:12) Diad tua, sano manpupulong iray Tasi ed Moscow natan, dakel ya unabung so mantetepet, “Agta sinebelan da kayo?” Satan ya tepet so mabetbet a mangiiter ed saray agagi tayo na pankanawnawa ya ninabang ed unabung so dakel nin impormasyon nipaakar ed saray sisiaen tayo. On, anggapoy siopaman a makapatundad kimey tayo a panagpulong. Ipipikasi tayon tuloytuloy a bendisyonan tan asikasoen nen Jehova iray makmakpel tan pinabpabli tayon agagi ed Russia.

[Saray paimano ed leksab]

[Kahon/Litrato ed pahina 6]

No Akin a Nirebyu ed France so Desisyon na Russia

Nen Pebrero 28, 1996, nampirma so Russia ed European Convention on Human Rights. (Nen Mayo 5, 1998, pinaletan na Russia so Convention.) Diad impanpirma ed satan a paknaan, indeklara na Russia ya saray sakop to et walaan na

‘kanepegan a manpili na relihyon tan kanepegan a gawaey aktibidad na relihyon da diad ayaman da tan diad publiko tan sarag dan salatan so relihyon da no labay da.’​—Article 9.

‘kanepegan ya ibalikas tan isulat ed responsablin paraan no antoy opinyon da tan mangiter na impormasyon ed arum.’​—Article 10.

‘kanepegan a mibiang ed saray mareen a pantitipon.’​—Article 11.

Saray indibidual odino organisasyon ya biktima na impanumlang ed sayan paknaan tan dinmalan lad amin a legal a proseso na bansa ra et sarag dan iyapela so kaso ra ed European Court of Human Rights diad Strasbourg, France (litratod tagey). Tugyopen itan na 47 ya huis​—say bilang na saray bansa a nampirma ed European Convention on Human Rights. Saray desisyon ya ipaakseb na Korte et malet, agnauman. Saray bansan nampirmad paknaan so nepeg ya ontulok ed saray ipaakseb a desisyon.

[Kahon ed pahina 8]

Say Desisyon na Korte

Nia ray taloran kabiangan na desisyon na Korte.

Aakusaan da ray Tasi nen Jehova a sengegan iray kabubuyak na saray pamilya. Duma balet so desisyon na Korte. Inkuan to:

“Say pangokontra tan agpanlabay na saray aliwan relihyoson membro na pamilya ya awaten tan respetoen so kanepegan na saray kakanayon da a manpili na relihyon tan manggawad saray aktibidad da ed satan a relihyon so sengegan na agpantatalosan.”​—Par. 111.

Anggapo met so aromog na korte ya ebidensyan mamaneknek ed akusasyon ya “kokontrolen day isip,” tan inkuan ton:

“Nalmoan na Korte ya anggapon balot so sinalambit na korte [na Russia] a ngaran na anggan sakey ya indibidual ya asumlang iray kanepegan ton mandesisyon diad panamegley na satan a metodo.”​—Par. 129.

Ibabaga na sakey ya akusasyon ya lapud agda labay so manpasaksak na dala, ipepeligro na saray Tasi nen Jehova so bilay na saray kapananisiaan da. Aliwan ontan so desisyon na Korte, diad impangibagan:

“Say kawayangan ed pangawat odino agpangawat ed espesipikon panagtambal, odino pamili na alternatibon paraan na panagtambal et importante diad personal a panagpili tan panagdesisyon. Say makayarin adulton pasyente et bulos a makapandesisyon, singa bilang, no kasin labay to odino andi so manpaopera odino manpatambal, ontan met itan ed no kasin manpasaksak na dala.”​—Par. 136.