Kasin Dengelen Mo Iray Malinew a Pasakbay nen Jehova?

“Saya so dalan. Ondalan kayo ed sikato.”​—ISA. 30:21.

1, 2. Antoy determinadon gagawaen nen Satanas, tan panon itayon tutulongan na Biblia?

IMADYIN mo pan manbiahe ka. Pinasakbayan ka na kaarom ya walay mauges a toon sinalatan toy sakey a karatula diad dalan pian nabalang iray manbiabiahe. Nayarin ipeligro ka na satan. Kasin dengelen mo imay pasakbay na kaarom?

² Si Satanas et mauges a kalaban a determinadon mangibalang ed sikatayo. (Apo. 12:9) Saramay mauges ya impluensyan apantongtongan diad inmunan artikulo et uusaren to pian nisuawi itayod dalan ya ompugtad bilay. (Mat. 7:13, 14) Misalsalamat itayo ta papasakbayan itayo na maaron Dios nipaakar ed saray pakana nen Satanas. Aralen tayo natan so talora nin impluensya nen Satanas tan no panon itayon natulongan na Biblia pian napaliisan iratan. Legan tayon ikokonsidera so ibabaga na Biblia, naimadyin tayoy Jehova ya manaakar ed benegan tayo tan ituturo toy dugan direksion, ya ibabaga ton: “Saya so dalan, ondalan kayo ed sikato.” (Isa. 30:21) Diad panaral tayod sarayan malinew a pasakbay, mas napakiwas itayon dengelen so ibabaga nen Jehova.

Agtutumboken Iray “Palson Managbangat”

3, 4. (a) Akin a saray palson managbangat et singa ra nakatan a bobon? (b) Iner so panlalapuan na saray palson managbangat, tan antoy labay da?

³ Imadyin mo pan diad panbiabiahem ed desierto et walay abantag mon bobon. Lapud apaet ka la, nilam iman pian makaala kay danum. Kanengneng mo et nakatan manaya. Seguradon nadisdismaya ka! Saray palson managbangat et singa ra nakatan a bobon. Talagan nadismaya labat so siopaman ya maniilalod sikara parad danum na katuaan. Papasakbayan itayo nen Jehova panamegley nen apostol Pablo tan Pedro nipaakar ed sarayan palson managbangat. (Basaen so Gawa 20:29, 30; 2 Pedro 2:1-3.) Siopa irayan managbangat? Ontulong iray imbaga nen Pablo tan Pedro pian naamtaan tayo no iner so nanlapuan na sarayan palson managbangat tan no panon dan ibabalang iray totoo.

⁴ Oniay imbaga nen Pablo ed saray mamatatken ed kongregasyon na Efeso: “Diad limog yo et walaray lalakin ontalindeg tan mansalita na pikewet iran bengatla.” Tan oniay insulat nen Pedro ed saray kaagian to: “Wala met iray palson managbangat diad limog yo.” Kanian, say panlapuan na saray palson managbangat et diad mismon loob na kongregasyon. Saraya et apostata. * Antoy labay dan nagawa? Imbaga nen Pablo a sano taynan day organisasyon nen Jehova, labay dan “tangguyoren iray disipulo ya ontumbok ed sikara.” Say tutukoyen nen Pablo dia ya “disipulo” et saray disipulo nen Jesu-Kristo. On, aliwan diad paway na kongregasyon so pangaalaan day patumbok, noagta diad mismon kongregasyon. Singa ra “masisiban lobo” a labay dan buagen iray membro na kongregasyon, a pakapuyen day pananisia ra pian taynan day katuaan.​—Mat. 7:15; 2 Tim. 2:18.

5. Panon ya ibabalang na saray palson managbangat iray totoo?

 ⁵ Panon ya ibabalang na sarayan palson managbangat iray totoo? Masilib iray paraan da. Saray apostata et singa kriminal ya ‘agnaliklikas a mangiloloob’ na makaderal iran ideya diad kongregasyon. Singa ra met managpalsipika, ta manguusar ira na “palso iran salita” tan papapawayen dan tua iratan. Ikakayat da iray “palson bangat da,” a ‘pipikeweten da so Kasulatan’ pian suportaan so ideya ra. (2 Ped. 2:1, 3, 13; 3:16) Ag-itayo iyaansakit na saray apostata. No tumboken tayo ra, nataynan tayoy dalan ya ompugtad bilay.

6. Antoy malinew ya pasakbay na Biblia nipaakar ed saray palson managbangat?

⁶ Panon tayon naprotektaay inkasikatayo ed sarayan palson managbangat? Ibabaga na Biblia no antoy gawaen tayo. (Basaen so Roma 16:17; 2 Juan 9-11.) Oniay malinew ya instruksion na Salitay Dios: “Paliisan yo iratan.” Diad arum ya bersion na Biblia say impangipatalos dad satan et “arawian yo ra”! Malinlinew itan a pasakbay. Isip mo pan binilin ka na doktor ya paliisan moy sakey a toon walaay grabe tan makaalis a sakit. Amta ton no naalisan ka et ompatey ka. Seguradon dengelen mo itan ya pasakbay to. Ibabaga na Biblia a saray apostata et “nadederal lay ulo” da, tan labay dan naalisay arum panamegley na saray bangat da. (1 Tim. 6:3, 4) Si Jehova et aliling toy maong a doktor ya mamibilin ed sikatayon paliisan iray palson managbangat. Malinlinew so pasakbay to, balet kasin determinado itayon unoren iya diad amin ya pankanawnawa?

7, 8. (a) Antoy gawaen tayo pian napaliisan tayo ray palson managbangat? (b) Akin et determinado kan paliisan iray palson managbangat?

⁷ Antoy gawaen tayo pian napaliisan tayo ray palson managbangat? Agtayo ran balot papalooben ed saray ayaman tayo nisay ibano ira. Agtayo met babasaen iray literatura da, agtayo babantayan iray palabas dad TV, agtayo nenengnengen iray Web site da odino mankomento ed saray isusulat da ditan. Akin et ontan lay determinasyon tayon paliisan ira? Lapud aro. Inaro tayo si Jehova, say “Dios na katuaan,” kanian agtayo interesado ed saray palson bangat ya mikontraan ed katuaan ya walad Salita to. (Sal. 31:5; Juan 17:17) Inaro tayo met so organisasyon ya uusaren nen Jehova pian ibangat itayo na katuaan​—a singa say ngaran ya Jehova tan say kabaliksan na satan, say gagala na Dios parad dalin, say kipapasen na saray inaatey, tan say ilalon kioli ed bilay. Kasin nanonotan mo ni liket mo sanen unaan mon naaralan iraya tan say arum nin katuaan? Agmo sirin aabuloyan ya lapud saray palson managbangat et taynan mo so organisasyon ya angibangat ed sika na sarayan katuaan.​—Juan 6:66-69.

⁸ Anggan antoy ibaga na saray palson managbangat, agtayo ra dedengelen! Akin et onla kad nakatan ya bobon anta nadismaya ka labat? Determinado itayo sirin ya mansiansian matoor ed si Jehova tan ed organisasyon to ya abayag lan mangiiter ed sikatayo na daakan ya danum na katuaan manlapud Salitay Dios.​—Isa. 55:1-3; Mat. 24:45-47.

 Agtutumboken Iray “Palson Istorya”

9, 10. Anton pasakbay so inter nen Pablo ed si Timoteo nipaakar ed saray “palson istorya,” tan antoy tutukoyen to? (Nengnengen so footnote.)

⁹ No maminsan, mainomay a naimano a say sakey a karatula et sinalatan tan aliway direksion ya ituturo to, balet no maminsan et mairap itan a napatnagan. Ontan met ed saray impluensya nen Satanas. No agtayo maalwar, mainomay itayon napalikdo na saray tila to. Pinasakbayan itayo nen apostol Pablo nipaakar ed sakey ya agnaliklikas a pakana nen Satanas​—saray “palson istorya.” (Basaen so 1 Timoteo 1:3, 4.) Anto irayan istorya, tan panon tayon napaliisan iraya? Nepeg tayon amtaen so ebat ed sarayan tepet pian makapansiansia itayod dalan ya ompugtad bilay.

¹⁰ Say pasakbay nen Pablo nipaakar ed saray palson istorya et kabiangan na unonan sulat tod si Timoteo, sakey a matatken ed kongregasyon nensaman. Binilin nen Pablo ya pansiansiaen ton malinis so kongregasyon tan tulongan to ray agagi a manmatoor. (1 Tim. 1:18, 19) Say Griegon salita ya inusar nen Pablo parad “palson istorya” et mankabaliksay “tila” o “gawa-gawan istorya.” Unong ed The International Standard Bible Encyclopaedia, sayan salita et manutukoy ed “istorya (na relihyon) ya anggapoy koneksion tod katuaan.” Nayarin say tutukoyen nen Pablo et saray tilan ibabangat na relihyon panamegley na saray istoryan makapainteres ingen ta gawagawa labat. * Say ontan iran istorya et ‘mamapawala na tepetepet’ ya aanapen na totoo so ebat. Ingen ta anggapoy kakanaan to met lanlamang ta katilaan irayan amin. Uusaren nen Satanas irayan palson istorya pian aglaingen naikday imano iray importantin bengatla ed bilay. Malinlinew so simbawa nen Pablo: Ag-iimanoen iray palson istorya!

11. Panon ya uusaren nen Satanas so palson relihyon pian ibalang iray totoo, tan anton pasakbay so nepeg tayon dengelen?

¹¹ Antoray palson istorya a makapangibalang ed saray agmaalwar? Ontutukoy itan ed antokaman a palson bangat na relihyon a lapud satan et ‘agla labay a dengelen na totoo so katuaan.’ (2 Tim. 4:3, 4) Mankukunwari si Satanas ya “anghel na liwawa,” tan uusaren toy palson relihyon pian ibalang iray totoo. (2 Cor. 11:14) Singa bilang, ibabaga na arum a relihyon a tutumboken day Kristo balet ta ibabangat day Trinidad tan maapoy ya impierno. Ibabangat da met a say kamarerwa et ag-ompatey. Amin irayan bangat et base ed tilatila tan gawagawan istorya. Seselebraan da met iray holiday a singa say Krismas tan Easter. No nengnengen et singa anggapoy uges na saratan a kustombre, balet diad tua et nanlapu iratan ed saray pagano. No dengelen tayoy pasakbay na Dios ya ibiig tayoy inkasikatayo tan ‘agtayo didiwiten so marutak a bengatla,’ ag-itayo naibalang na saray palson istorya.​—2 Cor. 6:14-17.

12, 13. (a) Anto ni ray tila ya uusaren nen Satanas, balet ta antoy katuaan? (b) Panon ya agtayo napalikdo na saray palson istorya nen Satanas?

¹² Wala ni arum a tilan uusaren nen Satanas a makapangibalang ed sikatayo no agtayo maalwar. Nia ray pigaran alimbawa: Gawam labat so labay mo. Sikay akauley no antoy duga tan aliwa. Onia so ideyan ipapasabi na media tan saray panagligliwaan. Lapud saya, mainomay itayon naimpluensyaan ya ibaliwala iray estandarte na Dios. Ingen ta diad katuaan to, kakkaukolan tayoy panangigiya ed moral a say Dios labat so makapangiter. (Jer. 10:23) Anggapoy gawaen na Dios pian umaney kipapasen na too. Dakel ed saray totoo natan et manbibilay a singano anggapo lay nabuas, tan ompan lapud satan et naimpluensyaan itayon “magmaliw a mangiras odino agmabunga.” (2 Ped. 1:8) Balet diad tua et asingsingger lay agew nen Jehova, tan nepeg a lawas tayon talaranan itan. (Mat. 24:44) Agka inaro na Dios. No panisiaan tayo iyan tila nen Satanas, nayarin ontunda tayo lan manlingkor ed Dios ta isipen tayon agtayo makanepegan  ed panangaro To. Balet say tua et inaro tan papablien nen Jehova so kada lingkor to.​—Mat. 10:29-31.

¹³ Nepeg a naynay itayon manalwar, ta saray kanonotan tan awawey na sayan mundo et papapawayen nen Satanas a singa duga. Tandaan tayon si Satanas et marundunong a mamalikdo. Agtayo napalikdo nen Satanas panamegley na “palso iran istorya a masilib a ginawa na too” no dengelen tayo iray simbawa tan panonot na Salita na Dios.​—2 Ped. 1:16.

‘Agtutumbokey Satanas’

14. Anton pasakbay so inter nen Pablo ed pigaran malangwer a balo a bibii nensaman, tan akin ya kaukolan tayon ipapuso iyan pasakbay to?

¹⁴ Imadyin mo pay karatulan say kuanto et “Dalan Paonlad Satanas.” Seguradon agtayo onlad satan ya direksion! Balet, impasakbay nen Pablo ya walaray paraan ya anggan saray dedikadon Kristiano et posiblin “ontumbok ed si Satanas.” (Basaen so 1 Timoteo 5:11-15.) Sayan pasakbay nen Pablo et parad pigaran “malangwer a balo a bibii” nen inmunan siglo, balet ta onaplika met ed sikatayon amin natan. Nayarin ag-inisip na saratan ya Kristianon bibii ya tutumboken day Satanas, balet ontan so ipapatnag na kiwakiwas da. Panon tayon napaliisan so agnaliklikas ya itumbok ed si Satanas? Pantongtongan tayo so pasakbay nen Pablo nipaakar ed tsismis.

15. Antoy labay nen Satanas a nagawa, tan antoray uusaren ton taktika unong ed si Pablo?

¹⁵ Labay nen Satanas ya itunda tayo lan ipulong so maong a balita. (Apo. 12:17) Kanian sasagyaten to itayon manggawa na saray bengatlan mangupot ed panaon tayo odino pansengegay inkaapag-apag. Imbaga nen Pablo iray pigaran taktikan uusaren nen Satanas. Imbaga ton saramay balo ed panaon to et “apasalan da lan anggapoy gagawaen da, ya oonla ra ed kaabungan.” Uusaren day dakel a panaon da ya ombisitad saray kakaaro da tan panistoryaan iray bengatlan ag-importante. Diad sayan panaon ya modernoy teknolohiya, mainomay met ya naupot so panaon tayo tan na arum a too diad pangipawit na saray ag-importantin e-mail odino text message ya no maminsan et aliwa ni ingen a tua. Imbaga met nen Pablo ya “mantatalabutob ira.” Say tsismis et nayarin mamauges ed sakey a too, a manresultad pankokolkol. (Uli. 26:20) Agnaliklikas na saramay mantsi-tsismis ya aaligen day Satanas ya Diablo. * Ontan met, saramay balon bibii et “mibabali ra ed gagawaen na arum a totoo.” Anggapoy kanepegan tayon diktaan so arum ed saray desisyon da. Lapud satan ya makaabala tan makapaingongot ya kagagawa, ompan agtayo la nagawaay panagpulong a kimey ya inter na Dios ed sikatayo. No agtayo la aktibon nasusuportaay kimey nen Jehova, onggagapo tayo lan tumbokey Satanas. Nepeg tayon pilien no siopay dapagan tayo.​—Mat. 12:30.

16. Antoran simbawa so nepeg tayon dengelen pian napaliisan tayoy ‘onsian tan tumbokey Satanas’?

¹⁶ Say idengel ed simbawa na Biblia et ontulong pian napaliisan tayoy ‘onsian tan tumbokey Satanas.’ Konsideraen tayo pay pigaran simbawa nen Pablo. “Dakel komon so gagawaen yo ed kimey na Katawan.” (1 Cor. 15:58) No dakel so gagawaen tayo parad Panarian, anggapo lay panaon tayo parad andi-kakanaan iran bengatla. (Mat. 6:33) “Salitaen yo so antokaman a maabig pian napabiskeg so arum.” (Efe. 4:29) Nepeg ya agtayo dengelen iray tsismis tan agtayo mantsi-tsismis. * Panmatalkan tan respetoen tayo  iray agagi, diad ontan et mas napakiwas itayon mansalita na makapabiskeg, aliwan makapakapuy. “Agkayo mibabali ed gagawaen na arum.” (1 Tes. 4:11) Ipanengneng so personal ya interes ed arum, balet siansian respetoey privacy da tan ag-eekaley dignidad da. Tandaan met ya agtayo nepeg ya ipilit ed arum so opinyon tayo no walaray kaukolan dan desisyonan.​—Gal. 6:5.

17. (a) Akin et inikdan itayo nen Jehova na saray pasakbay? (b) Antoy nepeg a determinado tayon gawaen?

¹⁷ Misalsalamat itayod si Jehova ta malinew iray pasakbay to nipaakar ed no antoray agtayo tumboken! Tandaan ya inad-aro itayo nen Jehova kanian inikdan to itayo na saray pasakbay ya inaral tayod sayan artikulo tan nen imbeneg. Agto labay ya nasagmak tayoy irap tan ermen a resulta na panumbok ed dalan nen Satanas. Tua, mainget so dalan a labay nen Jehova ya pankurangan tayo, balet ta satan labat so alenleneg a dalan ya ompugtad bilay. (Mat. 7:14) Komon ta agbalot onkapuy so determinasyon tayon dengelen so ibabaga nen Jehova ya: “Saya so dalan, ondalan kayo ed sikato.”​—Isa. 30:21.

[Saray paimano ed leksab]

Antoy Ebat Mo?

Panon mon iyaplika iray pasakbay a nabasad sarayan teksto?

• 2 Pedro 2:1-3

• 1 Timoteo 1:3, 4

• 1 Timoteo 5:11-15

[Tepetepet Parad Panagaral]

[Kahon/Saray litrato ed pahina 19]

 Pangikayat na Bagobago ed Dagem

Walay istorya na saray Judio nensaman ya mangipapabitar ed mauges ya epekto na tsismis.

Walay lakin angikayat na katilaan nipaakar ed sankarunongan ya too ed lugar da. Diad saginonor, amoria ton aliway ginawa to kanian kinmerew na perdona ed samay toon pinauges to, tan imbaga ton gawaen toy amin pian naperdona. Wala labat so sakey a kinerew na saman a makabat a too: Ingganggan ton mangalay danganan a nankargay bago insan to isabuyag iramay bago ed dagem. Anggan agto amtay makasengeg, siansian ginawa to itan, insan pinmawil ed samay makabat a too.

“Anto ey, aperdona mo ak la?” so tepet to.

“Basta tipon mo ni ’ramay bago ya insabuyag mo,” so ebat na samay too.

“Imposible ’tan ta inkayat la ray dagem!”

“No panon ya mairap lan tiponen iramay bago, mairap met lan apigeren so reputasyon ya dineral na saray inkayat mon katilaan.”

Malinew so punto. Mairap lan babawien so nibesngaw la ran salita, tan imposible met lan paabigen so sakit na linawa ya resulta na satan. Kanian antis tayon mangibagay anggan melag a bengatlan mamauges ed sakey a too, maabig no tandaan tayon singa tayo la onggapon mangikayat na bagobago ed dagem.

[Litrato ed pahina 16]

Panon a singa papalooben na arum iray apostata ed abung da?