Painawa na Dios—Anto Itan?
Painawa na Dios—Anto Itan?
“Wala nin siansia so panagpainawa ed sabaton parad saray totoo na Dios.”—HEB. 4:9.
1, 2. Antoy nibaga tayo nipaakar ed komapiton agew base ed Genesis 2:3, tan antoray linmesan tepet?
DIAD unonan kapitulo na Genesis, naamtaan tayon diad loob na anemiran piguratibon agew et imparaan na Dios so dalin pian panayaman na totoo. Diad kada sampot na sarayan “agew” et oniay nabasa tayod Biblia: “Wala nensaman so ngarem tan wala nensaman so kabuasan.” (Gen. 1:5, 8, 13, 19, 23, 31) Balet, kasabi komapiton agew, oniay ibabaga na Biblia: “Say Dios benendisyonan to so komapito ya agew, tan sinantipika to; lapud diad saman ya agew nampainawa so Dios ed amin a kimey to a pinalsa tan ginagawa to.”—Gen. 2:3.
2 Imanoen a diad sayan bersikulo et anggapoy imbaga ton “wala nensaman so ngarem tan wala nensaman so kabuasan.” Ipapanengneng na saya ya agni asumpal so komapiton agew sanen insulat nen Moises so libro na Genesis. Kasin anggad natan et manpapainawa ni so Dios? No ontan, panon itayon makaloob ed painawa na Dios? Importantin naamtaan tayo so ebat ed sarayan tepet.
Kasin Manpapainawa ni si Jehova?
3. Panon ya ipapanengneng na saray salita nen Jesus a walad Juan 5:16, 17 a samay komapiton agew et nantultuloy ni nen unonan siglo?
3 Walay duaran rason no akin et nibaga tayon siansia nin komapiton agew nen unonan siglo C.E. Unona, ikonsidera tayo pay imbaga nen Jesus ed saramay sinmumpa ed sikato sanen walay tinambal to legay Sabaton. Inisip dan aliway ginawa to ta unong ed Mosaikon Ganggan, satan ya agew et panaoy painawa. Ingen, oniay imbaga nen Jesus ed sikara: “Say Amak et mankikimey ni anggad natan, tan ontan ak met.” (Juan 5:16, 17) Kinuestion day Jesus no akin a mankikimey anta Sabaton. Diad samay ebat ton “Say Amak et mankikimey ni,” singa to ibabagan: ‘Pareho so kimey mi nen Amak. Mankikimey si Amak diad loob la na nilibon taon na Sabaton to, kanian anggapoy uges to no mankimey ak met anggano Sabaton.’ Ipapanengneng sirin na saya a samay komapiton agew et nantultuloy ni diad panaon nen Jesus. Anggaman nampainawa so Dios ed impamalsa to, siansia nin mankikimey pian sumpaley gagala to parad totoo tan ed dalin. *
4. Unong ed imbaga nen Pablo, panon tayon amta a siansia nin komapiton agew diad panaon na saray inmuunan Kristiano?
4 Impaamta nen apostol Pablo so komaduan rason. Sanen inaon to so Genesis 2:2 nipaakar ed painawa na Dios, oniay pinuyanan ya insulat to: “Sikatayoran angipatnag na pananisia so makaloob ed pampainawaan.” (Heb. 4:3, 4, 6, 9) Kanian ipapanengneng na saya a siansia nin komapiton agew sanen panaon nen Pablo. Balet, anggad kapigan so pantultuloy na satan ya agew?
5. Antoy gagala na komapiton agew, tan kapigay sigpot a pakasumpal na satan?
5 Pian naebatan itan a tepet, nepeg tayon tandaan no antoy gagala na komapiton agew. Impaliwawa itan na Genesis 2:3: “Say Dios benendisyonan to so komapito ya agew, tan sinantipika to.” Satan ya agew et “sinantipika” nen Jehova—a pinasantos odino imbiig to pian nasumpal so gagala ton say dalin et panayaman na matulok iran totoo a mangasikaso ed satan tan ed amin a bilay ditan. (Gen. 1:28) “Mankikimey ni anggad natan” si Jehova tan si Jesus, say “Katawan na sabaton,” pian nasumpal itan a gagala. (Mat. 12:8) Kanian say painawa na Dios et mantultuloy anggad sigpot a nasumpal so gagala to diad sampot na Sanlibon Taon ya Uley nen Kristo.
‘Ag-aaligey Agda Intulok’
6. Antoran alimbawa so onkanan pasakbay ed sikatayo, tan antoy naaralan tayo ed saratan?
6 Malinew ya impaliwawa na Dios so gagala tod si Adan tan Eva, balet ta sinumlang da itan. Tan minilyon so angalig ed sikara. Anggan say nasyon na Israel a pinilin totoo na Dios et aminpigapigan sinmunggay ed sikato. Pinasakbayan nen Pablo iray Kristiano nen unonan siglo ya posiblin naalig da iray Israelita. Insulat to: “Gawaen tayo sirin so anggaay nayarian tayo a makaloob ed satan a pampainawaan, ta pian anggapoy napelag tan mangalig ed satan ya alimbawa na agkatutulok.” (Heb. 4:11) Ipapanengneng na sayan imbaga nen Pablo ya agmakaloob ed painawa na Dios iray agmatulok. Antoy labay ya ibaga na satan? Kasin agtayo makaloob ed painawa na Dios no sumlangen tayoy gagala to anggan diad saray angkekelag a pamaakaran? Importantin amtaen tayoy ebat, tan aralen tayo itan diad sayan artikulo. Balet ta pantongtongan tayo nin unona so mauges ya alimbawa na saray Israelita tan no akin ya ag-ira akaloob ed painawa na Dios.
“Ag-ira Makaloob ed Pampainawaan Ko”
7. Antoy gagala na Dios ed saray Israelita sanen imbulos to rad Ehipto, tan antoy iilaloan tod sikara?
7 Nen 1513 B.C.E., impaamta nen Jehova ed lingkor ton si Moises no antoy gagala tod saray Israelita. Imbaga na Dios: “Ekalen ko ra ed saray lima na saray Ehipsios, tan pian itaynan ko ra ed saman a dalin [Ehipto] tan yakar ko ra ed sakey a maong tan maawang, dia ed sakey a dalin a panagusan na gatas tan dilo.” (Exo. 3:8) Inliktar nen Jehova iray Israelita ed “lima na saray Ehipsios” pian magmaliw a pinilin nasyon to, a singa insipan tod si Abraham. (Gen. 22:17) Inikdan to ra na saray ganggan ya ontulong ed sikaran nawalaan na mareen tan maapit a relasyon ed sikato. (Isa. 48:17, 18) Oniay imbaga tod saray Israelita: “No tuloken yo so boses ko a tuatua, tan em-eman yo so sipanan ko, sikayo ed satan so pabpablien ko a pinagka-kayamanan ko a manuna nen saray amin a totoo, ta amin a dalin kien ko.” (Exo. 19:5, 6) Kanian, saray Israelita et magmaliw a totoo na Dios no tuloken day boses to.
8. Anto komoy klase na bilay na saray Israelita no matulok irad Dios?
8 Isipen pa labat so bilay na saray Israelita no tuloken day Dios. Insipan nen Jehova ya bendisyonan to iray uma, kaubasan, tan ayayep da. Insipan to met ya salimbengan to rad saray kalaban da. (Basaen so 1 Arari 10:23-27.) Sanen sinmabi Mesias, bulos ira komon a nasyon, ya ag-ira sakop na Roma. Labay nen Jehova ya magmaliw a maong ya ehemplo so nasyon na Israel ed saray arum a nasyon, pian napaneknekan ya say itulok ed tuan Dios et manresultad espiritual tan materyal iran bendisyon.
9, 10. (a) Akin et seryoson bengatla so pilalek na saray Israelita ya ompawil ed Ehipto? (b) Panon a naapektoan so panagdayew na saray Israelita no ompawil irad Ehipto?
9 Balibali komoy pribilehyo na saray Israelita—say pitulongan dad gagala nen Jehova, a manresultad pakabendisyonan da tan na amin a totoo! (Gen. 22:18) Balet, imbaliwala na satan a rebelyoson kailalakan so pankanawnawan magmaliw a nasyon na Dios tan magmaliw ya ehemplo ed arum a nasyon. Labay da ni ingey ompawil ed Ehipto! (Basaen so Numeros 14:2-4.) Balet, no ompawil irad Ehipto, agda la nidayew si Jehova diad paraan a labay to tan agla ra magmaliw ya ehemplo ed arum a nasyon. No manpaaripen ira lamet ed Ehipto, agda la natumbok so Mosaikon Ganggan tan agla ra minabang ed uksoyan nen Jehova parad kaperdonay kasalanan da. Say iisipen da labat et say sarili da! Agda ninonot si Jehova tan say gagala to. Kampega lan oniay imbaga nen Jehova ed sarayan rebelde: “Binusol ko iyan kailalakan tan inkuan ko, ‘Diad kapusoan da et naynay iran onaarawi, tan agda amta iray dalan ko.’ Kanian lapud sanok ko et insambak, ‘Ag-ira makaloob ed pampainawaan ko.’”—Heb. 3:10, 11; Sal. 95:10, 11.
10 Diad impanpilalek dan ompawil ed Ehipto, impanengneng na saraman a masugnar ya Israelita ya agda pinabli iray espiritual a bendisyon. Imbes, mas pinilalek day pipino, lasuna, bawang, tan arum nin mananam a naakan ed Ehipto. (Num. 11:5) Singa ra si Esau, ya sarag dan isalat so espiritual a tawir da para labat ed naakan.—Gen. 25:30-32; Heb. 12:16.
11. Say kakulangan na pananisia na saray Israelita nen panaon nen Moises et walaan na anton epekto ed gagala nen Jehova?
11 Anggaman sayan kailalakan et andian na pananisia, ag-inuman nen Jehova so gagala to parad Israel. Say angipokusan to lay imano et say sinmublay ya kailalakan. Saray kabiangan na sayan kailalakan et mas matulok nen saray atateng da. Inunor day ganggan nen Jehova ya onloob ed Insipan a Dalin tan sakopen itan. Oniay nabasa tayod Josue 24:31: “Say Israel nanlingkor ed Jehova ed saray amin ya agew nen Josue, tan saray agew na saray masiken a nambilay ed kayari nen Josue, tan naamtaan da so amin a gawa nen Jehova, a ginawa to a nipaakar ed Israel.”
12. Panon tayon amta a posiblin makaloob iray Kristiano ed painawa na Dios?
12 Balet, sinmabi panaon et inatey la ray kabiangan na sayan matulok a kailalakan. Tan say sinmublay a kailalakan et “agda inamta si Jehova, ya anggan say gawa a ginawa to nipaakar ed Israel.” Kanian, “ginawa ra so mauges ed pakanengneng nen Jehova, tan nanlingkor ira ed saray Baal.” (Uko. 2:10, 11) Say Insipan a Dalin et aliwan peteg a “pasen a pampainawaan” parad sikara. Lapud agda intulok, abalang day maapit a relasyon ed Dios. Oniay insulat nen Pablo nipaakar ed sarayan Israelita: “No niloob la ra nen Josue diad sakey a pasen a pampainawaan, anggapo la komon so sananey nin agew ya ibaga na Dios ed saginonor. Kanian wala nin siansia so panagpainawa ed sabaton parad saray totoo na Dios.” (Heb. 4:8, 9) Say tutukoyen dia nen Pablo a “totoo na Dios” et saray Kristiano. Kasin labay ya ibaga na saya a makaloob iray Kristiano ed painawa na Dios? On, Judio man odino aliwan Judio!
Walaray Kristianon Ag-akaloob ed Painawa na Dios
13, 14. (a) Diad panaon nen Moises, antoy nepeg a gawaen na saray Israelita pian makaloob ed painawa na Dios? (b) Nen unonan siglo, antoy nepeg a gawaen na saray Kristiano pian makaloob ed painawa na Dios?
13 Sinulatan nen Pablo iray Hebreon Kristiano ta arum ed sikara et onsusumlang ed gagala na Dios. (Basaen so Hebreos 4:1.) Antoy gagawaen da? Siansia nin uunoren da so Mosaikon Ganggan. Tua, diad manga 1,500 a taon et nepeg ya unoren na saray Israelita itan a Ganggan pian napaliket so Dios. Balet kayari impatey nen Jesus, agla kaukolan so Mosaikon Ganggan. Ingen ta walaray Kristianon ipilit da nin siansia so pangunor ed arum a kabiangan na satan a Ganggan. *
14 Impaliwawa nen Pablo ed sarayan Kristiano a si Jesus et mas maabig ya atagey a saserdote nen say siopaman ya agperpekton saserdote, say balon sipanan et mas maabig nen say impisipanan ed Israel, tan say espiritual a templo et ‘babaleg tan mas ayadyari’ nen say templon ‘ginawa na too.’ (Heb. 7:26-28; 8:7-10; 9:11, 12) Inusar nen Pablo bilang alimbawa so sinimban Sabaton a walad Mosaikon Ganggan pian nipaliwawa no panon a makaloob iray Kristiano ed agew na painawa nen Jehova. Insulat to: “Wala nin siansia so panagpainawa ed sabaton parad saray totoo na Dios. Ta say toon akaloob la ed pampainawaan na Dios et nampainawa met la ed saray kimey ton dili, no panon a say Dios et nampainawa met ed saray kimey to.” (Heb. 4:8-10) Kaukolan ya isipen na sarayan Hebreon Kristiano ya say panangabobon na Dios et agla akadepende ed saray kimey da a base ed Mosaikon Ganggan. Manlapu la nen Pentecostes 33 C.E., say aabobonan nen Jehova et saramay mangipapanengneng na pananisia ed si Jesu-Kristo.
15. Akin et importante so katutulok no labay tayoy makaloob ed painawa na Dios?
15 Akin et ag-akaloob ed Insipan a Dalin iray Israelita nen panaon nen Moises? Ta ag-ira tinmulok. Akin et walaray Kristiano diad panaon nen Pablo ya ag-akaloob ed painawa na Dios? Ta agmet ira tinmulok. Agda inawat ya asumpal lay gagala na Mosaikon Ganggan tan duma lay paraan a labay nen Jehova a pandayew dad sikato.
No Panon Itayon Makaloob ed Painawa na Dios
16, 17. (a) Diad panaon tayo, panon a makaloob iray Kristiano ed painawa na Dios? (b) Antoy aralen tayo ed onsublay ya artikulo?
16 Diad sayan panaon tayo, anggapo la tay Kristianon mangibaga a nepeg tayon unorey Mosaikon Ganggan pian nilaban. Oniay malinew ya insulat nen Pablo ed saray taga Efeso: “On, diad sayan agnaparaan a kaabigan et nilaban kayo ed panamegley na pananisia; tan aliwa iyan lapud sikayo, noagta saya so regalo na Dios. Andi, aliwa itan a lapud saray gawa, ta pian anggapoy toon nawalaan na sengegan pian manpasirayew.” (Efe. 2:8, 9) Panon sirin a makaloob iray Kristiano ed painawa na Dios? Tandaan ya imbiig nen Jehova so komapiton agew bilang painawa to pian sumpaley gagala to parad dalin tan parad matulok a totoo. Ibabaga nen Jehova ed sikatayo so gagala to tan say panlabayan to panamegley na organisasyon to. Makaloob odino makapibiang itayod painawa nen Jehova no matulok itayon mikimey ed organisasyon to parad pakasumpal na gagala to.
17 Balet, no melmelagen tayoy simbawa na matoor tan makabat ya aripen odino pilien tayo labat so labay tayon unoren, susumlangen tayoy gagala nen Jehova. No ontan, ipepeligro tayoy maapit a relasyon tayod sikato. Diad onsublay ya artikulo, konsideraen tayoy pigaran situasyon a nipanengneng tayo no kasin matulok itayo. Saray desisyon tayo ed sarayan situasyon so mangipatnag no kasin talagan akaloob itayo la ed painawa na Dios.
[Saray paimano ed leksab]
^ par. 3 Saray saserdote tan Levita et mankikimey diad templo anggano Sabaton, ingen ta “nansiansia iran andian na kasalanan.” Si Jesus so atagey a saserdote na baleg ya espiritual a templo na Dios kanian sarag ton gawaen iray espiritual ya asainmin to anggano diad agew na Sabaton.—Mat. 12:5, 6.
^ par. 13 Agtayo amta no kayari Pentecostes 33 C.E. et wala ni ray Hebreon Kristiano a siansia nin angiyapay na saray bagat diad Agew na Pananakbong. No ontan so ginawa ra, ipapanengneng dan anggapoy respeto rad bagat nen Jesus. Basta say amta tayo, arum ed sikara et siansia nin ontutumbok ed saray tradisyon a kabiangan na Ganggan.—Gal. 4:9-11.
Saray Tepet a Nepeg a Dalepdepen
• Antoy gagala na komapiton agew?
• Panon tayon amta ya say komapiton agew et mantutultuloy ni anggad natan?
• Akin et ag-akaloob ed painawa na Dios iray Israelita diad panaon nen Moises tan say arum a Kristiano nen unonan siglo?
• Panon itayon makaloob ed painawa na Dios?
[Tepetepet Parad Panagaral]
[Blurb ed pahina 27]
Makaloob itayod painawa nen Jehova no matulok itayon mikimey ed organisasyon to parad pakasumpal na gagala to
[Saray litrato ed pahina 26, 27]
Manlapu la nensaman anggad natan, antoy kaukolan pian makaloob ed painawa na Dios?
