Painawa na Dios​—Kasin Akaloob Ka Lad Satan?

“Say salita na Dios et mabilay tan mabisbiskeg.”​—HEB. 4:12.

1. Panon itayon makaloob ed painawa na Dios, tan akin et ag-itan mainomay?

DIAD imbeneg ya artikulo, naaralan tayon makaloob itayod painawa na Dios no matulok itayon mikimey ed organisasyon to parad pakasumpal na saray gagala to. Balet no maminsan et mairap itan a gawaen. Singa bilang, sano naamtaan tayon ag-aabobonan nen Jehova so sakey a bengatlan gagawaen tayo, nayarin agtayon tampol ontulok. No ontan so awawey tayo, kaukolan tayon aralen so pagmaliw ya “akaparaan ya ontulok.” (Sant. 3:17) Diad sayan artikulo et pantongtongan tayoy pigaran situasyon a pakapatnagan no kasin lawas itayon akaparaan ya ontulok.

2, 3. Antoy nepeg tayon gawaen pian mansiansia itayon “mabli” ed imaton nen Jehova?

² Kumusta kayo no nipaakar ed panangawat na simbawan base ed Biblia? Ibabaga na Kasulatan ya tiponen nen Jehova iray “mabli a bengatla na saray amin a nasyon.” (Ag. 2:7) Antis tayon naamtaay katuaan, kaslakan ed sikatayo et aliwan “mabli” ed imaton na Dios ta walaray gagawaen tayon makapuy. Balet, lapud inaro tayoy Dios tan say Anak to,  apakiwas itayon umanen so awawey tan kagagawa tayo pian napaliket tayoy Dios. Panamegley na pikakasi et kinerew tayoy tulong nen Jehova tan nansagpot itayon manguman. Kanian nagmaliw itayon kualipikado ed bautismo.​—Basaen so Colosas 1:9, 10.

³ Balet ta siansia nin agtayo perpekto. Kanian nepeg tayon itultuloy so mipuligesgesan. Ipapaseguro ed sikatayo nen Jehova ya tulongan to itayo no determinado itayon mansiansian “mabli” ed imaton to.

Sano Kaukolan Tayoy Simbawa

4. Antoy taloran paraan a makaawat itayoy Makasulatan a simbawa?

⁴ Antis tayon makapanggaway pananguman, nepeg tayon amtaen no antoy kaukolan tayon umanen. Nayarin usaren nen Jehova so balibalin paliwawa diad Kingdom Hall odino artikulo ed magasin tayo pian namoria tayo iray kakapuyan tayo. Et no agtayo nin siansia namoria itan, nayarin usaren nen Jehova so kaagian tayo pian ipetek itayo.​—Basaen so Galacia 6:1.

5. Antoray posiblin reaksion tayo sano walay manimbawad sikatayo, tan akin et nepeg ya itultuloy itayon ipetek na saray elder?

⁵ Aliwan mainomay so pangawat na simbawa na kapara tayon agperpekto, anggano mataktika tan maaro so impangibagad satan. Balet, singa ipapabitar na Galacia 6:1, ingganggan nen Jehova iray elder a “manggunaet” iran mangipetek ed sikatayo “tekep na inkaulimek.” No awaten tayoy panangipetek da, ipasen itayo nen Jehova a mas “mabli” ed imaton to. Diad pikakasi et aaksobien tayon ag-itayo perpekto. Balet ta no walay mangipaimanoy lingo tayo, no maminsan et manbaraan tayo, ikatunongan tayon aliwa met a seryoso so lingo tayo, odino kuestionen tayoy motibo na samay animbawa tan say paraan na impanimbawa to. (2 Ara. 5:11) No bagaan itayo na elder na bengatlan agtayo labay a narengel​—nipaakar ed makapuy ya ugali na kapamilyaan tayo, panangawes tan panag-ayos tayo, ag-inkamapalinis ed laman, odino saray klase na panagligliwaan a labalabay tayo balet ta kabusol nen Jehova​—nayarin makapasnok itayo. Ompan nadismaya tayon mismo ed satan a reaksion tayo tan lalo la imay animbawa! Balet no kinmalmado tayo la, namoria tayon parad pankaabigan tayoy insimbawa to.

6. Panon ya ipapatnag na salitay Dios so “kanonotan tan getma na puso”?

⁶ Ipapanonot na pinagka-teman teksto na sayan artikulo a say salita na Dios et “mabisbiskeg.” On, sarag ya umanen na salitay Dios so bilay tayo. Tinmulong itan ed sikatayon manggawa na saray pananguman antis tan kayari na bautismo tayo. Diad sulat nen Pablo ed saray Hebreo, imbaga ton say salita na Dios et “ontalos anggad pansianen to so kamarerwa tan espiritu, tan saray pukel tan utek na saratan, tan nibiig to iray kanonotan tan getma na puso.” (Heb. 4:12) Kabaliksan na saya a sano natatalosan tayoy labay na Dios a gawaen tayo, ipatnag na saray kiwas tayo no anton talagay inkatoo tayo. Kasin say pakanengneng na arum ed sika et duma ed talagan inkatoom? (Basaen so Mateo 23:27, 28.) Isipen pa no antoy gawaen mo ed sarayay pantongtongan tayon situasyon.

Mibansag ed Iyaaligwas na Organisasyon nen Jehova

7, 8. (a) Antoy posiblin rason no akin a walaray Hebreon Kristiano nensaman a siansia nin manguunor ed Mosaikon Ganggan? (b) Akin et nibagan susumlangen da so gagala nen Jehova?

⁷ Pamilyar itayod samay nabasad Uliran 4:18: “Say basbas na matunong sikato so singa liwawa na kabuasan, ya onsinag [lan] onsinag angga ed nagnap ya agew.” Kabaliksan na saya a diad ilabas na panaon et lalon onaligwas so pakatalos tayod saray gagala na  Dios tan mas nagawaan tayo ray bengatlan mamaliket ed sikato.

⁸ Naaralan tayod imbeneg ya artikulo a kayari impatey nen Jesus, wala ni ran siansiay Hebreon Kristiano ya manguunor ed Mosaikon Ganggan. (Gawa 21:20) Anggano malinlinew ya impaliwawa nen Pablo a saray Kristiano et anggapo lad silong na Mosaikon Ganggan, agnin siansia manisia so arum. (Col. 2:13-15) Ompan inisip dan no itultuloy dan unoren so arum a kabiangan na Ganggan et napaliisan day panamasegsegang. Diretsaan balet ya insulat nen Pablo ed sarayan Kristiano ya ag-ira makaloob ed painawa na Dios no sumlangen day gagala To. * (Heb. 4:1, 2, 6; basaen so Hebreos 4:11.) Pian abobonan ira nen Jehova, kaukolan dan awaten a duma lay paraan a labay ton pandayew dad sikato.

9. Antoy nepeg ya awawey tayo sano walaray pananguman ed pakatalos tayod Kasulatan?

⁹ Diad panaon tayo, walaray pananguman ed pakatalos tayo ed pigaran bangat na Biblia. Panliketan tayo iratan ta paneknek iyan uusaren nen Jehova so matoor tan makabat ya aripen pian ibangat ed sikatayoy katuaan. No namoria na sayan “aripen” a kaukolan ya ipalinew odino umanen so pakatalos tayod sakey a bengatla, makpel dan gagawaen itan. Say sankanonot da et aliwan say posiblin pankritiko ed sikara noagta say pakapibansag dad iyaaligwas na gagala na Dios. Antoy reaksion mo sano walay ibaga na matoor tan makabat ya aripen a pananguman ed pakatalos tayod Kasulatan?​—Basaen so Lucas 5:39.

10, 11. Antoy naaralan tayod reaksion na arum ya Estudyante na Biblia diad saray balon paraan na panagpulong?

¹⁰ Nia ni sakey ya alimbawa. Manga 100 taon lay apalabas, walaray Estudyante na Biblia ya inisip dan say pampaliwawad plataporma so sankaabigan a paraan na pampulong. Labalabay da itan ta idadayew ira na dakel a totoo ed marakep a panagpaliwawa ra. Balet diad saginonor, atalosan na saray lingkor nen Jehova ya labay ton manpulong ira diad nanduruman paraan, kaiba lay panagkabkaabungan. Balet ag-itan labay a gawaen na arum a marundunong a managpaliwawa. Tua, diad pakanengneng na totoo, singa ra maespiritual tan matoor irad Katawan. Balet, lapud sayan pananguman, pinmaway so tuan motibo ra tan ag-aliketan si Jehova ed satan. Diad saginonor et tinaynan day organisasyon.​—Mat. 10:1-6; Gawa 5:42; 20:20.

¹¹ Diad gapo et nairapan met so arum ya Estudyante na Biblia ed panagkabkaabungan. Balet ta siansian tinmulok ira. Diad inlabas na panaon, nagmaliw a mainomay la itan ed sikara tan talagan benendisyonan ira nen Jehova. Antoy reaksion mo sano ibaga na matoor tan makabat ya aripen a salien moy arum nin paraan na panagpulong? Kasin gawaen mo itan anggano singa mairap tan agmo nin balot asali?

Sano Tinaynan na Inad-aro Tayo si Jehova

12, 13. (a) Akin et ingganggan nen Jehova a dispeloen iray agmagbabawin managkasalanan? (b) Anton situasyon so nayarin pakasubokan na saray Kristianon atateng, tan akin et mairap itan?

¹² Amin tayo et miabobon a pian napaliket tayoy Dios, nepeg ya malinis itayod pisikal, moral, tan espiritual. (Basaen so Tito 2:14.) Balet, walaray situasyon a nasubok so katooran tayo ed Dios diad sayan pamaakaran. Nia ay so sakey ya alimbawa: Say saksakey ya anak na matoor a sanasawan Kristiano et inkaindan toy katuaan. Mas pinili toy “temporaryon panliket ed kasalanan” nen say maapit  ya relasyon tod Jehova tan ed atateng to kanian adispelo.​—Heb. 11:25.

¹³ Agaylay ermen na atateng to! Amta ray ibabaga na Biblia ya “agkayo la miulop ed siopaman a tatawagen ya agi a sakey a managlawan odino maagum a too odino managdayew ed idolo odino manag-ayew odino managbuanges odino managkatkat, agkayo anggan midudungo ed ontan a too.” (1 Cor. 5:11, 13) Amta da met ya say tutukoyen na samay salitan “siopaman” et anggan saray membro na pamilya ya anggapo lad pudir da. Balet lapud inad-aro day anak da, nayarin isipen dan: ‘Panon min natulongay anak min ompawil ed si Jehova no limitaan mi pilimog ed sikato? Agta mas natulongan mi no regular kamin mitongtong ed sikato?’ *

14, 15. Antoy nepeg ya ikonsidera na saray atateng diad pidedeneng dad adispelon anak da?

¹⁴ Talagan mililikna tayod sarayan atateng. Lalo la ta wala komoy pankanawnawa na samay anak da ya umaney bilay to, balet ta mas labay ton ituloy so gagawaen ton makapuy nen say pansiansia ton maapit ed atateng to tan ed saray agagi. Labay komon na atateng ya tulongan so anak da, balet ta anggapo met so nagawaan dad desisyon to. Kanian agla pankelawan no akin a maer-ermen ira.

¹⁵ Anto sirin so gawaen na sarayan atateng? Kasin unoren day ganggan nen Jehova? Odino kasin isipen da ya sarag dan regular a pilimogay adispelon anak da insan da ibaraan ya kaukolan itan parad pampamilya iran pamaakaran? Diad pandesisyon da, nepeg dan ikonsideray liknaan nen Jehova. Labay ton say organisasyon to et mansiansian malinis, tan labay to met a napakiwas iray managkasalanan ya umanen day bilay da. Panon a nasuportaan na sarayan atateng iyan gagala nen Jehova?

16, 17. Antoy naaralan tayo no dalepdepen tayoy naeksperiensya nen Aaron?

¹⁶ Ontan so naeksperiensya na agi nen Moises a si Aaron lapud duaran anak to a si Adab tan Abihu. Isipen pa labat so alikna nen Aaron sanen dinusa nen Jehova irayan ananak to lapud angiyapay ira na “sananey a nengneng na apoy.” Siempre, lapud inatey la ra, agto la ran talaga napilimogan. Ingen ta wala ni instruksion nen Jehova a lalon amairap ed situasyon di Aaron tan saray matoor ya ananak to. Imbaga nen Moises ed sikara ya aglabay nen Jehova ya ipanengneng day paneermen da. Oniay imbaga nen Moises: “Agyo papaulyan ya akabuskag so buek yo ed saray kauloan yo, nisay pilaten yo so kawe-kawes yo; pian agkayo ompatey, tan pian [si Jehova] et agnasanokan ed amin a sangkatiponan.” (Lev. 10:1-6) Malinew so  punto​—nepeg a mas baleg so panangaro tayod Jehova nen say panangaro tayod saray agmatoor a kapamilyaan tayo.

¹⁷ Diad panaon tayo, agtampol a dudusaen nen Jehova iray agmatulok ed ganggan to. Iikdan to ray pankanawnawan pagbabawian iray mauges a ginawa ra. Balet, anto kasi nalikna nen Jehova no saray atateng na adispelo et manggaway baraan pian regular dan napilimogan tan napitongtongan so anak da?

18, 19. Antoy bendisyon a nagamoran na pamilya no unoren day ganggan nen Jehova nipaakar ed saray adispelo?

¹⁸ Dakel ed saray adispelo nensaman et bidbiren dan akapawil irad kongregasyon lapud inkapekder tan katooran na kapamilyaan da. Singa bilang, imbaga na kalangweran a bii ed saray elder a say amaseseg ed sikaton umaney bilay to et say “impanmatoor na kuya to ed uksoyan parad saray adispelo.” Imbaga ton “say matoor ya intulok [na kuya to] ed Makasulatan iran instruksion so akatulong ed sikaton makapawil.”

¹⁹ Anto sirin so nepeg tayon gawaen? Nepeg tayon tuloken si Jehova ed amin a situasyon diad bilay tayo. Lapud ag-itayo perpekto, no maminsan et mairap itan a gawaen. Balet ta nepeg itayon manmatalek a no antoy ibaga nen Jehova et saman so sankaabigan.

“Say Salita na Dios et Mabilay”

20. Anton duaran bengatla so tutukoyen na Hebreos 4:12? (Nengnengen so footnote.)

²⁰ Sanen insulat nen Pablo a “say salita na Dios et mabilay,” aliwan say Biblia so espisipikon tutukoyen to. * Ipapanengneng na konteksto a say tutukoyen to et saray sipan na Dios. Idadanet nen Pablo a no say Dios so angisipan, tooren ton tooren itan. Pinekderan iya nen Jehova panamegley na propeta ton si Isaias: “[Say] salitak . . . ag-ompawil ed siak a paoy-paoy, noag ingen . . . onaligwas naani ed bengatla a pangiyakaran ko ed sikato.” (Isa. 55:11) Kanian, anggapoy rason a manpaga itayo no agni agawa so sipan na Dios diad panaon a labay tayo. Siansian “mankikimey ni” si Jehova anggad natan pian nasumpal iray gagala to.​—Juan 5:17.

21. Panon a napaseseg na Hebreos 4:12 iray matoor a maedad lan kabiangan na “baleg ya ulop”?

²¹ Pigaran dekada lan manlilingkor ed si Jehova iray maedad lan kabiangan na “baleg ya ulop.” (Apo. 7:9) Dakel ed sikara et nanilalon agla ra ontatken ed sayan sistema na bengabengatla. Balet ta ag-ira nadidismaya. (Sal. 92:14) Amta ran “say salita na Dios et mabilay” tan mankikimey si Jehova pian nasumpal iray sipan to. Talagan importante ed Dios so pakasumpal na gagala to, kanian sikatoy napaliket tayo no satan met so manunaan ed bilay tayo. Diad sayan komapiton agew, manpapainawa si Jehova ta amta ton anggapoy makaamper ed sikato diad panumpal tod gagala to. Tan amta ton bilang grupo et lawas iyan suportaan na saray lingkor to. Sika ey, kasin akaloob ka lad painawa na Dios?

[Saray paimano ed leksab]

Kasin Natandaan Mo?

• Diad panaon tayo, antoy nakaukolan pian makaloob itayod painawa na Dios?

• Antoy koneksion na gagala na Dios ed mabulos tayon pangawat na Makasulatan a simbawa?

• Diad antoran situasyon a nayarin aliwan mainomay so itulok ed Makasulatan iran instruksion, balet akin et importantin ontulok tayo nin siansia?

• Anton duaran bengatla so tutukoyen na Hebreos 4:12?

[Tepetepet Parad Panagaral]

[Litrato ed pahina 31]

Agaylay ermen na atateng!