Kasin Nanonotan Yo?

Binasam ta iray agano nin isyu na Say Panag-bantayan tan The Watchtower? Salim pa sirin ya ebatan iray onggendan a tepet:

• Antoray taloran aspekton makatulong ed sikatayo pian nalabanay tendensian magmaliw ya agmatua?

Niraya: (1) Bayuboan so dugan takot ed Dios. (1 Ped. 3:12) (2) Pabiskegey konsiensian impasal ed Biblia. (3) Pansagpotan so magmaliw a kontento.​—4/15, pahina 6-7.

• Panon tayon amta a say seryoson panagdayew ed Dios et agto labay ya ibagan lanang lan is-istriktoy itsura tayo odino agtayo la manrelaks?

Imanoen tayoy alimbawa nen Jesus. Sikatoy maliket ya angan kaibay arum. Sikatoy aliwan setseryoso odino is-istrikto. Saray arum, anggan saray ugugaw et labalabay day Jesus tan komportable rad sikato.​—4/15, pahina 10.

• Antoy nayarin gawaen na sanasawa no naaapektoan lay relasyon da sano wala la ray anak da?

Kaukolan da lamet ya ipalikna tan ibaga so panangaro rad balang sakey. Nayarin panggunaetan na asawan laki ya ekalen so antokaman a pampapagaan na asawa to. Tan nepeg a pantongtongan na sanasawa no antoray nalilikna tan kaukolan da.​—5/1-E, pahina 12-13.

• Antoy kabaliksan na samay ilustrasyon na kiew na olibo ya abitla ed Roma kapitulo 11?

Samay ilustrasyon na kiew na olibo et nipaakar ed komaduan kabiangan na bini nen Abraham, say espiritual ya Israel. Si Jehova so lamot na simbolikon kiew na olibo tan say sengeg et si Jesus. Sanen impulisay na maslak a Judio si Jesus, saray Gentil a nagmaliw ya mananisia et aliling day sangan insuldong, kanian akompleto so bilang na komaduan kabiangan na bini nen Abraham.​—5/15, pahina 22-25.

• Anton maong a balita so inanabang tayod saray mairap-bilay?

Say maong a balita et: Tinuro na Dios si Jesus bilang Ari. Sikato so manepeg a Manuley pian panganggaen so kairapan. Akin? Lapud uleyan to so amin a totoo tan walay pakayari ton onkiwas; sikatoy maabagey ed saray mairap-bilay; tan sarag ton panganggaen so sengegan na kairapan, salanti say atawir tayon tendensia a magmaliw a masiblet.​—6/1-E, pahina 7.

• Antoy labay ya ibaga nen Jesus sanen imbaga tod si Caifas: “Sikan mismo so angibaga ed satan”?​—Mat. 26:63, 64.

Say “sikan mismo so angibaga ed satan” et kaslakan lan ibabaga na saray Judio pian onabobon ed imbaga. Tinepet na Atagey a Saserdoten si Caifas no kasin si Jesus so Kristo, say Anak na Dios. Samay ebat nen Jesus ya: “Sikan mismo so angibaga ed satan” et mangipapanengneng ya sikatoy onaabobon.​—6/1-E, pahina 18.

• No nanilalak komon so perpekton too a si Jesus, nayari ra kasin magmaliw a kabiangan na dondon?

Andi. Anggano makapanilalak na binilyon a perpekton totoo si Jesus, saray magmaliw ya ilalak to et agkabiangan na dondon. Say perpekton bilay nen Jesus labat so misimbangan ed bilay nen Adan. (1 Tim. 2:6)​—6/15, pahina 13.

• Panon a nipanengneng na saray Kristiano ya seseryosoen day pasakbay a walad Gawa 20:29, 30 nipaakar ed saray palson managbangat?

Agda papalooben ed saray ayaman da nisay ibabano da iray palson managbangat. (Roma 16:17; 2 Juan 9-11) Papaliisan na saray Kristiano iray apostatan literatura, palabas ed TV, tan Web site.​—7/15, pahina 15-16.

• Siopay nepeg a mangibangat ed saray ananak na nipaakar ed Dios?

Say ama tan ina so nepeg a manggawa ed saya, base ed saray simbawa na Biblia. (Uli. 1:8; Efe. 6:4) Ipapanengneng na saray research ya no gagawaen na parehon atateng so betang da, positibo so epekto ed ananak.​—8/1, pahina 6-7.