Panggunaetan a Pansiansiaey Deen

“Tumboken tayo sirin iray bengatlan mamapawala na kareenan.”​—ROMA 14:19.

1, 2. Akin et panggagayagaan na saray Tasi nen Jehova so deen ed limog da?

DIAD panaon tayo et mairap lan niwalay tuan deen. Anggan saramay saksakey so bansa tan lenguahe ra et ag-ira mankakasakey lapud relihyon, politika, kuarta, tan edukasyon. Ingen, talagan nidumaduma iray lingkor nen Jehova ta walay deen ed limog da anggano nanlapu rad “amin a nasyon tan tribu tan rasa tan lenguahe.”​—Apo. 7:9.

² Walaray rason no akin et walay deen ed limog tayo. Say manuna ed satan et lapud ‘panggagayagaan tayo so pikakareenan ed Dios.’ Saya et resulta na pananisia tayod Anak to, a diad panamegley na dala to et asakbongan iray kasalanan tayo. (Roma 5:1; Efe. 1:7) Ontan met, iiter na tuan Dios so masanton espiritu to ed saray matoor a lingkor to, tan kabiangan so deen ed bunga na satan ya espiritu. (Gal. 5:22) Say sananey nin rason et lapud ‘ag-itayo kabiangan na mundo.’ (Juan 15:19) Anggapoy dadapagan tayod politika odino guerra, noagta  mansiasiansia itayon neutral. Singa ed ibabaga na Biblia, saray totoo nen Jehova et ‘pitpiten da iray espada ra pian magmaliw a tarem na lukoy.’​—Isa. 2:4.

3. Antoy resulta na deen a panggagayagaan tayo, tan antoy pantongtongan tayo ed sayan artikulo?

³ Say deen diad limog tayo et aglabat mankabaliksan ya agtayo sakitan iray agagi. Imbes, kabaliksan met na satan a “manaaroan” itayo diad kongregasyon anggano nandurumay binalegan, kultura, tan paraan na panagnonot tayo. (Juan 15:17) Satan met so rason no akin et ‘manggagawa itayo na maabig ed amin, balet nagkalalo lad saramay kapananisiaan tayo.’ (Gal. 6:10) Say pikakareenan tayod si Jehova tan ed saray kaagian tayo et talagan mabmabli kanian nepeg tayon protektaan itan. Pantongtongan tayo pa sirin no panon tayon napansiansiay deen diad kongregasyon.

Sano Walay Agpantatalosan

4. Antoy gawaen tayo pian napansiansiay deen sano naopendi tayo so sakey ya agi?

⁴ “Amin tayo et naynay a nalilingo,” so insulat nen disipulon Santiago. “No walay agnalilingo ed panagsalita to, sikatoy ayadyari.” (Sant. 3:2) Agtayo la sirin pankelawan no walaray onlesan agpantatalosan diad loob na kongregasyon. (Fil. 4:2, 3) Balet, nepeg ya resolbien a tampol so antokaman ya onlesan problema ed baetan na duaran agagi pian agnaderal so deen ed kongregasyon. Singa bilang, ikonsidera so simbawa a nepeg tayon iyaplika sano naamtaan tayon naopendi tayo so sakey ya agi.​—Basaen so Mateo 5:23, 24.

5. Panon tayon napansiansiay deen sano walay akaopendid sikatayo?

⁵ Panon to balet no sikatayo so naopendi? Kasin isipen tayon nepeg ya onkerew na dispensa imay akaopendid sikatayo? ‘Say aro et agmanbibilang na impakasakitan,’ so kuan na 1 Corinto 13:5. Kanian sano naopendi itayo, napansiansia tayoy deen no palabasen tayo lay lingo na arum tan lingwanan ti’ la ‘tan. (Basaen so Colosas 3:13.) Saya so sankaabigan a gawaen diad angkelag iran problema, ta ontulong iya pian mareen so ulopan tayo bilang sanaagi tan maligen so kanonotan tayo. Oniay imbaga na sakey a proverbio: “No nanggawad sika na makapuy so kaparam a too, [maabig] no palabasen mo.”​—Pro. 19:11, Maung a Balita.

6. Antoy nepeg tayon gawaen no naiirapan itayon palabasen so lingo na agi?

⁶ Panon to no naiirapan kayon palabasen so lingo na agi? Makapuy no ibagbaga yo itan ed arum. No itsismis yo itan, naderal so deen ed kongregasyon. Antoy nepeg ya gawaen pian naresolbe itan? Oniay ibabaga na Mateo 18:15: “No akagawa na kasalanan so agim, ipalinew mo ed sikato so akalingoan to a sikayon dua labat. No dengelen to ka, apapawil mo so agim.” Onaaplika so Mateo 18:15-17 ed saray seryoson kasalanan. Balet nausar tayo met so prinsipyo ed bersikulo 15 diad arum iran situasyon. Kanian sano walay onlesan agpantatalosan, maaron katongtongen so agi a sikayon dua labat, tan panggunaetan a makapikareenan ed sikato. *

7. Akin et nepeg a resolbien a tampol iray problema?

⁷ Insulat nen apostol Pablo: “Onsanok kayo, ingen ta agkayo mankakasalanan; agkomon onselek so agew a wala ni pasnok yo, tan agyo met iikdan na pankanawnawa so Diablo.” (Efe. 4:26, 27) “Miaregloan kan tampol ed samay mangidedemanda ed sika,” so kuan met nen Jesus. (Mat. 5:25) Kanian pian napansiansiay deen, miaregloan a tampol. Ta no andi, onggrabe so problema. Singa itan sugat ya no agtambalen a tampol et naimpeksion. Agtayo aabuloyan a lapud inkamapaatagey, imon, odino kuarta et agtayon tampol resolbien iray problema.​—Sant. 4:1-6.

Sano Dakel so Nalalanor ed Problema

8, 9. (a) Anton nandumaan a panmoria so walad saray agagi diad kongregasyon na Roma? (b) Antoy insimbawa nen Pablo ed sikara?

⁸ No maminsan, walaray problemad kongregasyon  ya aliwan duaran too labat so nalalanor, noagta dakel ya indibidual. Agawa itan ed saray Kristiano diad Roma. Balbalawen na arum ed kongregasyon iramay say konsiensia ra et maletey odino alabas a sensitibo. Uukomen balet na saramay maletey so konsiensia ra iramay agagin walaay mabiskeg a konsiensia. Ingen ta saray panagkatunongan da et base labat ed personal iran panlabayan da. Antoy insimbawa nen Pablo ed kongregasyon?​—Roma 14:1-6.

⁹ Imbaga tod saramay mabiskeg so konsiensia ra ya agda balbalawen iray agagi ra. (Roma 14:2, 10) Ta no ontan, nigapol da iramay arum a mangipapasen nin makapadimla iray kakanen ya isesebel na Ganggan. “[Agyo] la dederalen so kimey na Dios nisengeg labat ed kakanen,” so kuan nen Pablo ed sikara. “Maabig so agpangan na karne odino ag-iyinum na alak odino agpanggawa na antokaman a pansengegan na ikapuy na pananisia na agim.” (Roma 14:14, 15, 20, 21) Ingen, binilin met nen Pablo iramay maletey so konsiensia ra ya agda uukomen iramay walaan na duman panmoria. (Roma 14:13) Inkuan to: “Ibagak ed balang sakey ed sikayo ya agto maniisip na alabas nen say manepeg ya isipen.” (Roma 12:3) Kayari to ran sinimbawa, oniay insulat nen Pablo: “Tumboken tayo sirin iray bengatlan mamapawala na kareenan tan saray bengatlan makapabiskeg ed sakey tan sakey.”​—Roma 14:19.

10. Singa ed kongregasyon diad Roma nen inmunan siglo, antoy nakaukolan pian naresolbe iray problema natan?

¹⁰ Seguradon tinulok na saray agagid Roma so simbawa nen Pablo tan nanggawa ray nakaukolan a pananguman. Sano walaray onlesan agpantatalosan natan, agta manepeg a resolbien iratan a tampol diad mapaabeban pangiyaplika ed saray simbaway Biblia? Singa ed saray Kristiano diad Roma, no walay problemad kongregasyon, amin a nalalanor et nepeg a manggaway pananguman pian ‘napansiansiay kareenan ed balang sakey.’​—Mar. 9:50.

 No Panon a Makatulong Iray Elder

11. Antoy nepeg a gawaen na elder no sikatoy asinggeran na agi ta labay ton ibaga so problema tod kaagian to?

¹¹ Panon to no onasingger so agi ed sakey ya elder ta labay ton ibaga so problema tod kanayon odino kaagian to? Oniay ibabaga na Uliran 21:13: ‘Say mamepet ed saray layag to ed akis na duka et onakis met, tan agmet dengelen.’ No agdengelen na elder so onkekerew na tulong, singa to ‘pepepetay layag to.’ Balet ta oniay pasakbay na sakey nin proverbio: “Samay mansasalitan unona nipaakar ed kaso to et singa sikatoy walad katunongan; onloob so kapara ton too tan sikatoy usisaen to.” (Uli. 18:17, NW) On, kaukolan ya ondengel so elder, balet ta nepeg a manalwar ya agto pipilaan imay mangidadalem. Kayari ton dinengel so agi, tepetan to no kasin akatongtong to la imay irereklamo to. Sarag met ya ipanonot na elder no antoray ibabaga na Biblia a nagawaan na samay agi pian napansiansiay deen.

12. Mangibaga na saray alimbawa a mangipapatnag ed kapeligroan na tamtampol a pangukom.

¹² Talagan mapeligro no say sakey ya elder et tampol a mangukom anta say nadngel to ni labat et samay mangirereklamo. Imanoen tayo pa so taloran alimbawa diad Biblia. Anisiaan a tampol nen Potifar so istorya nen asawa to ya sikatoy labay ya akdolan nen Jose. Masyadoy pasnok nen Potifar kanian impaipriso toy Jose. (Gen. 39:19, 20) Anisiaan a tampol nen Arin David si Siba a lingkor nen Mefiboset. Imbaga nen Siba ya akikomplot si Mefiboset ed saray kalaban nen David. Oniay bengatbengat a desisyon nen David: “Nia, kien mo so amin a kayarian nen Mefiboset.” (2 Sam. 16:4; 19:25-27) Imbalitad si Arin Artaxerxes ya ipapaalagey lamet na saray Judio iray padir na Jerusalem tan labay day manrebelde ed uley na Empiryo na Persia. Anisiaan a tampol na ari so palson balita tan ingganggan ton itunda ra so kimey. Kanian say resulta et intunda na saray Judio so panagpaalagey lamet ed templo na Dios. (Esd. 4:11-13, 23, 24) Maabig no tumboken na saray elder imay simbawa nen Pablo ed si Timoteo ya agtamtampol manguukom.​—Basaen so 1 Timoteo 5:21.

13, 14. (a) Sano onlesay agpantatalosan ed baetan na duaran agagi, antoy kaukolan tayon tandaan? (b) Antoy ontulong ed saray elder pian makapanggaway dugan desisyon?

¹³ Anggano akatongtong ti’ la imay mangidadalem tan samay idadalem to, maabig no isipen tayo iya: “Siopaman a walay pikakabat to nipaakar ed sakey a bengatla, agto ni amta itan a singa kaukolan to ni ingen ya amtaen.” (1 Cor. 8:2) Amta tayo la kasin amin so detalye no akin a linmesay problema? Sigpot tayo kasin natatalosan so kipapasen na sarayan indibidual? Sano mangasikaso na kaso iray elder, kaukolan iran manalwar pian ag-ira napalikdo na tilatila, masilib iran taktika, odino tsismis! Say pinili na Dios ya Ukom a si Jesu-Kristo et matunong so panangukom to. Sikatoy “agnaani mangukom unong ed pakanengneng na saray mata to, agmet mangigeter unong ed pakadngel na saray layag to.” (Isa. 11:3, 4) Imbes, si Jesus et igigiya na espiritu nen Jehova. Ontan met ed saray elder natan, nepeg a paigiya irad masanton espiritu na Dios.

¹⁴ Antis a manggaway desisyon iray elder, kaukolan a kerewen day tulong na espiritu nen Jehova diad pikakasi, tan paigiya irad satan panamegley na pangusar dad Biblia tan saray publikasyon a nanlapud matoor tan makabat ya aripen.​—Mat. 24:45.

Mikareenan Anggan Antoy Nagawa?

15. No walay naamtaan tayon sakey a seryoson kasalanan, kapigan tayo ibaga ed saray elder so nipaakar ed satan?

¹⁵ Bilang Kristiano, napapaseseg itayon pansiansiaen so kareenan. Ingen, oniay ibabaga met na Biblia: “Say karunongan a manlalapud tagey, unona ed amin et malinis, insan mareen.” (Sant. 3:17) Say pikakareenan et komadua labat ed pagmaliw a malinis. Kabaliksan na saya a nepeg tayon suportaan so malinis ya estandarte na Dios ed moral tan manbilay itayod paraan a mamaliket ed sikato. No bilang ta naamtaan na sakey a Kristiano a walay seryoson kasalanan ya agawaan na sakey ya agi, kaukolan a pasesegen ton ipatuay kasalanan to ed saray elder.  (1 Cor. 6:9, 10; Sant. 5:14-16) No ag-itan gawaen na nankasalanan, samay agin makaamta so mangibaga ed saray elder. No agmansalita imay agin makaamta lapud labay ton mansiansiay deen ed baetan dan dua imay nankasalanan, anggan sikato et mankakasalanan met la.​—Basaen so Levitico 5:1.

16. Antoy naaralan tayo ed samay ginawa nen Jehu ed si Arin Joram?

¹⁶ Ipapanengneng na samay salaysay nipaakar ed si Jehu ya mas importante so panuportad inkatunong na Dios nen say pikareenan ed sakey ya manggagaway kasalanan. Imbaki na Dios si Jehu pian ipaakseb so panangukom To ed sankaabungan nen Arin Ahab. Linmugan ed karwahe so mauges ya Arin Joram ya anak nen Ahab tan Jezebel pian abeten toy Jehu, tan inkuan tod Jehu: “Kareenay inyakaran mo dia?” Oniay inyebat nen Jehu: “Panon a niwalay kareenan . . . no wala ni diad sikatayoy amin a klasiy panag-anito tan panangigalang ed saray talintao [na saray] dirios ya inggapo nen inam a Jezebel?” (2 Ara. 9:22, MB) Insan lad satan inuyos nen Jehu so pana to tan pinana toy Joram, a tinmalos anggad puso to. No panon ya nanggaway aksion si Jehu, nepeg met ya onkiwas iray elder no say sakey a managkasalanan et agmagbabawi. Agda aabuloyan ya mansiansian kabiangan na kongregasyon pian labat makapikareenan ed sikato. Eekalen da so agmagbabawin managkasalanan pian lawas panggayagaan na kongregasyon so pikakareenan ed Dios.​—1 Cor. 5:1, 2, 11-13.

17. Antoy nepeg a gawaen na amin a Kristiano pian mansiansiay deen?

¹⁷ Kaslakan ed saray agpantatalosan et anggapo met so nalalanor ya seryoson kasalanan. Mas maabig sirin no maaro tayo lan palabasen iray lingo na arum. Oniay ibabaga na Biblia: “No labay mon aroen ka na kaparam a too, perdonam ira no mankasalanan irad sika. Say agpakalingwan ed saray kakapuyan, makaderal na pankakaaro.” (Pro. 17:9, MB) No unoren tayo irayan salita, napansiansiay deen ed kongregasyon tan say maapit a relasyon tayod si Jehova.​—Mat. 6:14, 15.

Nabendisyonan Iramay Pansiasiansiaen Day Deen

18, 19. Antoray bendisyon no tumboken tayo iray bengatlan mamapawala na kareenan?

¹⁸ Nabendisyonan itayon maong no ‘tumboken tayo iray bengatlan mamapawala na kareenan.’ Diad pangaalig tayod si Jehova, napanggagayagaan tayoy maapit a relasyon ed sikato, tan mitutulongan itayo pian napansiansiay pankakasakey ed kongregasyon. No pansiasiansiaen tayoy deen ed kongregasyon, natulongan itayon lawas mikareenan ed saramay pupulongan tayo na “maong a balita na kareenan.” (Efe. 6:15) Akaparaan itayon magmaliw a ‘mauyamo ed amin, ya ag-ombabawi sano walay manggawa na mauges ed sikatayo.’​—2 Tim. 2:24.

¹⁹ Say pansasagpot tayo pian napansiansiay deen et pangipapasal ed sikatayo parad arapen. Ibabaga na Biblia a walay “kioli na saray matunong tan saray agmatunong.” (Gawa 24:15) Kabaliksan na saya a paolien nen Jehova so minilyon a totoon nandurumay kultura, ugali, tan personalidad da. Saraya et nambilay ed nanduruman parte na mundo tan ed nanduruman panaon a saknapen toy manlapu lad “inkiletneg na mundo.” (Luc. 11:50, 51) Agaylan pribilehyo so pangibangat ed saray apaoli no panon da met a napansiansiay kareenan. Kanian say kipapasal tayo natan a mikareenan et baleg a tulong ed sikatayo no onsabi la itan a panaon!

[Paimano ed leksab]

Antoy Naaralan Mo?

• Panon tayon napansiansiay deen sano walay naopendi tayo?

• Antoy nepeg tayon gawaen pian napansiansiay deen sano sikatayo so naopendi?

• Akin et makapuy no walay pilaan tayo sano walaray agpantatalosan?

• Akin et mas importante a gawaen so duga nen say pikareenan ed sakey a manggagaway kasalanan?

[Tepetepet Parad Panagaral]

[Saray litrato ed pahina 29]

Inaro nen Jehova iramay mabulos a mamerdona