Si Jehova​—Say “Dios a Mangiiter na Deen”

“Niwala komon ed sikayon amin so Dios a mangiiter na deen.”​—ROMA 15:33.

1, 2. Anton situasyon so nabasa tayod Genesis kapitulo 32 tan 33, tan antoy nansumpalan na saya?

SAY pambanaan da et diad asingger ed Penuel tan ed lawak na Jabboc diad bandad bukig na ilog Jordan. Nadngelan nen Esau a say kambal ton si Jacob et ompawil lad Canaan. Walay 400 a lalaki a kaiba nen Esau ya onabet ed agi to. Duamplon taon lay apalabas manlapu la nen inlako toy inkapanguloan tod si Jacob. Ingen ta natatakot nin siansiay Jacob ya ompan sikatoy pateyen nen Esau lapud eem-eman ton sakit na linawa. Kanian pinauna la nen Jacob iray ariripen to pian mangawit na saray regalo parad Esau. Pigaran grupo so imbaki to, a diad ami-amin et masulok ya 550 ya ayayep so awit da. Binilin to ran ibaga rad si Esau a saraya et regalo nen agi ton Jacob.

² Asabin siansiay panaon na pannengneng da. Legan ya si Jacob et makpel ya onaasingger ed si Esau, sikatoy dinmakmomo, aliwa labat ya aminsan noagta aminpito! Balet antis to ni iya, ginawa la nen Jacob so sankaimportantian a bengatla. Impikasi tod si Jehova ya sikatoy iyagel tod kinen Esau. Inebatan kasi nen Jehova iyan pikakasi? On. Oniay ibabaga na Biblia: “Si Esau binmatik ya inmabet ed sikato, et sikato so nilakap to tan dinmasay ed tenger to, tan inaangoban to.”​—Gen. 32:11-20; 33:1-4.

3. Antoy naaralan tayod salaysay nipaakar ed si Jacob tan Esau?

³ Naaralan tayod sayan salaysay a nepeg tayon gawaey anggaay nayarian tayo pian resolbien iray problema a nayarin maneral ed deen diad kongregasyon. Diad tua et  anggapoy kasalanan nen Jacob. Si Esau so ag-amablid inkapanguloan to, ya insalat to itan ed sanyaong a lentehas. Balet ta siansia nin akikareenan si Jacob. (Gen. 25:31-34; Heb. 12:16) Ipapanengneng na alimbawa to a kaukolan tayon gawaen so amin a paraan pian makapikareenan ed saray agagi tayo. Ontan met, naaralan tayon sano kerewen tayoy tulong nen Jehova pian nagawaan iya, ebatan to iray pikakasi tayo. Dakel ni alimbawa ed Biblia nipaakar ed pikakareenan. Aralen tayoy arum ed saraya.

Say Sankaabigan ya Alimbawa

4. Antoy ginawa na Dios pian niliktar so katooan manlapud kasalanan tan patey?

⁴ Say sankaabigan ya alimbawa ed saya et si Jehova​—say “Dios a mangiiter na deen.” (Roma 15:33) Isipen pa labat so amin a ginawa nen Jehova pian makapikareenan itayod sikato. Ananak itayo di Adan tan Eva kanian makasalanan itayo, tan makanepegan itayod ipapatey. (Roma 6:23) Balet lapud baleg a panangaro na Dios, nanggaway paraan pian nisalba itayo. Imbaki to diad dalin so inad-aro ton Anak pian nianak bilang too. Mabulos a ginawa nen Jesus so linawa nen Ama to tan inter toy bilay to parad sikatayo. (Juan 10:17, 18) Pinaoli na tuan Dios so inad-aro ton Anak, tan diad saginonor et inyawat nen Jesus ed Ama to so balor na bagat to a mangiliktar ed saray magbabawin managkasalanan manlapud andi-anggaan ya ipapatey.​—Basaen so Hebreos 9:14, 24.

5, 6. Panon ya ontulong so bagat nen Jesus pian saray totoo et makapikareenan ed Dios?

⁵ Lapud kasalanan et aderal so relasyon na katooan ed Dios. Panon ya ontulong so bagat nen Jesus ed sikatayo? Oniay ibabaga na Isaias 53:5: “Say dusa a pakapipaknaan tayo nigaton ed sikato; et lapu ed saray inkalewet to natambal itayo.” Lapud bagat nen Jesus, saray matulok ya totoo et posible lan magmaliw a kaaro na Dios. “Diad impanondon [nen Jesus] ed sikatayo ed panamegley na dala to et nibulos itayo, salanti, naperdona iray impakalingo tayo.”​—Efe. 1:7.

⁶ Oniay ibabaga na Biblia: “Nanliketan na Dios a manayam ed [Kristo] so amin a bengatlan nagnap.” Labay ya ibaga na saya a si Kristo so manunan usaren na Dios pian sumpalen iray gagala To. Antoy gagala nen Jehova? Gagala ton “makapikareenan ed [sikato] so amin niran bengatla . . . panamegley na dala” nen Jesu-Kristo. Say “amin niran bengatla” ya tutukoyen dia et saray “bengatlan walad dalin” tan saray “bengatlan walad tawen.” Anto iraya?​—Basaen so Colosas 1:19, 20.

7. Antoray “bengatlan walad tawen” tan “bengatlan walad dalin”?

⁷ Lapud dondon, saray alanaan ya Kristiano et ‘niyabawag lan matunong’ bilang ananak na Dios, tan ‘panggayagaan day pikakareenan ed Dios.’ (Basaen so Roma 5:1.) Sikara so tutukoyen ya “bengatlan walad tawen” ta walay ilalo ran manbilay ed tawen tan “manuley ira bilang arari ed dalin” tan manlingkor ira bilang saserdote na Dios. (Apo. 5:10) Saray “bengatlan walad dalin” et ontutukoy ed saray magbabawin totoo ya maniilalon manbilay na andi-anggaan diad dalin.​—Sal. 37:29.

8. Panon kan natulongan na alimbawa nen Jehova sano walaray problema ed kongregasyon?

⁸ Imbalikas nen Pablo so apresasyon tod sayan probisyon nen Jehova diad sulat tod saray alanaan a Kristiano diad Efeso: “Say Dios et daakan so panangasi to . . . , binilay to itayo pian makapikasakey ed Kristo, anggano inatey itayo lapud saray impakalingo tayo (nilaban kayo diad agnaparaan a kaabigan).” (Efe. 2:4, 5) Antokaman so ilalo tayo, balanglan diad tawen odino diad dalin, misalsalamat tayod panangasi tan agnaparaan a kaabigan na Dios. Papablien tayoy amin a  ginawa nen Jehova pian makapikareenan itayod sikato. No maminsan, nipapaarap itayod saray situasyon a nayarin maneral ed deen tan pankakasakey ed kongregasyon. Diad onia ran situasyon, nepeg tayon nodnonotey alimbawa nen Jehova pian napakiwas itayon pansiansiaen so deen ed kongregasyon.

Makaaral ed Alimbawa nen Abraham tan Isaac

9, 10. Panon ya impanengneng nen Abraham ya labay ton pansiansiaey pikakareenan ed arum?

⁹ Oniay ibabaga na Biblia nipaakar ed si Abraham: “‘Si Abraham et anisia ed si Jehova, tan sikatoy impasen a matunong lapud satan,’ tan atawag a ‘kaaro nen Jehova.’” (Sant. 2:23) Napatnagan so pananisia nen Abraham diad mareen a pidedeneng tod arum. Singa bilang, sanen dinmakel so ayayep to, walay linmesan siblangan ed baetan na saray managpastol to tan saray managpastol na kaanakan ton si Lot. (Gen. 12:5; 13:7) Nandesisyon ira ya maabig no mansian la ra. Antoy gawaen nen Abraham ed sayan situasyon? Imbes ya ipakana toy inkapanguloan to tan say pikakaaro tod Dios, impanengneng ton labay ton mansiansiay deen ed sikaran sanpangamaen.

¹⁰ “Kerewen ko ed sika ya anggapo komon so siblangan ed sikata, tan dia ed saray pastol ko tan saray pastol mo; ta sanagi ta,” so kuan nen Abraham ed kaanakan to. Intuloy to ni: “Agkasi wala ed arapan mo so sankadalinan? Pikasik ed sika ya onsian ka komon ed siak. No labay mo ya alaen so nikawigi, onla ak sirin ed nikawanan; odino no alaen mo so nikawanan, onla ak sirin ed nikawigi.” Pinili nen Lot so sankamabunaan a pasen, balet agnanreklamoy Abraham. (Gen. 13:8-11) Diad saginonor, sanen si Lot et dinakep na saray kalaban, tampol ya inliktar nen Abraham so kaanakan to.​—Gen. 14:14-16.

11. Panon ya apansiansia nen Abraham so pikakareenan ed saray Filisteo?

¹¹ Isipen pa met no panon ya apansiansia nen Abraham so pikakareenan ed saray Filisteo diad Canaan. “Sinamsam” na saray Filisteo so bobon diad Beer-seba a kinotkot na ariripen to. Anto kasi gawaen nen Abraham ed sayan situasyon? Imbes ya milaban pian nabawi toy bobon to, agto la itan nansakitay ulo. Diad saginonor, sikatoy binisita na ari na saray Filisteo pian misipanan ed sikato nipaakar ed kareenan. Nen nisamba la nen Abraham ya lawas maong so pideneng tod saray ilalak na ari, insan to imbaga so nipaakar ed samay bobon ya sinamsam na saray Filisteo. Abigla so ari nen arengel to itan, tan impawil to imay bobon ed si Abraham. Nantultuloy a mareen so impanayam nen Abraham bilang dayo ed satan a lugar.​—Gen. 21:22-31, 34.

12, 13. (a) Panon ya inalig nen Isaac so alimbawa nen ama to? (b) Panon a benendisyonan nen Jehova so mareen a pidedeneng nen Isaac ed arum?

¹² Inalig nen Isaac so mareen a pidedeneng nen ama ton Abraham. Nanengneng itan ed impideneng nen Isaac ed saray Filisteo. Lapud walay eras ed Beer-lahai-roi, sakey ya agmabunan pasen diad Negeb, inyalis nen Isaac so sankaabungan to ed Gerar, a mabunan teritorya na saray Filisteo. Benendisyonan nen Jehova iray tanem nen Isaac tan pinarakel Toy ayayep to. Angimon ed sikato iray Filisteo. Agda labay ya ondakel ni kayarian to a singa agawad ama to, kanian tinabunan da iramay bobon a kinotkot ni na ariripen nen Abraham diad saman a lugar. Diad kaunoran, si Isaac et binagaan na ari na saray Filisteo ya ontaynan lad saman a pasen. Pian mansiansiay deen, inmunor si Isaac.​—Gen. 24:62; 26:1, 12-17.

¹³ Sanen niyalis la nen Isaac so sankaabungan to, angotkot iray ariripen to na sananey  nin bobon. Balet, walaray Filisteon managpastol a kuan dan kayarian da kuno man. Singa si ama ton Abraham, agla itan nansakitay ulo nen Isaac. Imbes, ingganggan to ray ariripen to a mankotkot na sananey nin bobon. Et imbaga lamet na saray Filisteo a gawa da iman. Pian anggapoy gulo, inyalis la lamet nen Isaac so sankaabungan to ed arum a pasen. Ditan et angotkot iray ariripen to na bobon a tinawag nen Isaac a Rehobot. Diad saginonor, nanayam irad mas mabunan pasen diad Beer-seba, a ditan et sikatoy benendisyonan nen Jehova a kuan To: ‘Agka natatakot ta miuulop ak ed sika, et bendisyonan ta ka, tan parakelen ko so ilalak mo nisengeg ed Abraham ya aripen ko.’​—Gen. 26:17-25.

14. Panon ya impanengneng nen Isaac a labay ton pansiansiaey pikakareenan sanen binisita na ari na saray Filisteo?

¹⁴ Sarasarag komon nen Isaac ya ilaban so kanepegan tod saraman a bobon a kinotkot na ariripen to. Anggaman ontan, mas nilabay toy manalis-alis nen say milaban. Amta pa na ari na saray Filisteo ya bebendisyonan nen Jehova si Isaac ed amin a gagawaen to. Sanen si Isaac et nila na ari tan saray opisyal tod Beer-seba pian misipanan ed sikato nipaakar ed kareenan, inkuan na ari: “Anengneng mi a malinlinew a si Jehova akiulop-ulop ed sika.” Diad saman ya imbisita na ari, impanengneng lamet nen Isaac a labay ton pansiansiaey pikakareenan. Oniay ibabaga na Biblia: “Insaklangan to ra na sakey a [ponsia] et angan tan inminum ira. Et binmangon ira ya asakbay, tan say sakey tan sakey nansipan a malet; et si Isaac pinasipot to ra . . . a sirereen.”​—Gen. 26:26-31.

Makaaral ed Inad-aron Anak nen Jacob

15. Akin et kagulgula si Jose na saray kuya to?

¹⁵ Ibabaga na Biblia a say anak nen Isaac a si Jacob et “mareen” a too. (Gen. 25:27) Singa naaralan tayod gapo na sayan artikulo, ginawa toy anggaay nayarian ton mikareenan ed agi ton si Esau. Seguradon si Jacob et akaaral ed alimbawa na ama ton si Isaac. Akaaral met kasi iray anak tod alimbawa to? Diad 12 ananak ton lalaki, si Jose so inad-aro ton maong ta matulok tan marespeton anak, a talagan iyaansakit toy ama to. (Gen. 37:2, 14) Balet, angimonan a maong na saray kuya to kanian “kagulgula ra.” Lapud satan, inlako day Jose bilang aripen tan pinanisia day ama ran say agi ra et biningbingkas na ayep ed katakelan.​—Gen. 37:4, 28, 31-33.

16, 17. Panon ya impanengneng nen Jose a labay ton pansiansiaey pikakareenan ed saray agagi to?

¹⁶ Benendisyonan nen Jehova si Jose. Asabi panaon, sikatoy nagmaliw ya administrador ed Ehipto​—onkokomadua ed si Faraon. Sanen lapud eras et linma ray agagi nen Jose ed Ehipto, agda abidbir, nayarin lapud sulong ton kawes na opisyal. (Gen. 42:5-7) Sarasarag komon nen Jose so ombawi ed saray agagi to lapud ginawa rad sikato tan ed ama ra. Ingen ta agto binmawi. Imbes, nanggaway paraan pian makapikareenan ed sikara. Sanen apaneknekan ton nagbabawi la ray agagi to, inkabat toy sarili to, a kuan to: “Agkayo komon maneermen, nisay [tetelen] yo so inkasikayo, lapu ed inlako yo ak dia; ta say Dios imbaki to ak dia ya inmuna nen say sikayo a mangiyagel na bilay.” Insan ‘inangoban nen Jose so amin ya agagi to, tan nannangis a sankalakap to ra.’​—Gen. 45:1, 5, 15.

¹⁷ Nen inatey lay ama ran Jacob, inisip na agagi nen Jose ya ompan bawian to la ra. Sanen imbalikas da iyan pampapaga ra, “si Jose nannangis,” tan inkuan to: “‘Agkayo natatakot. Taganoen ta kayo, tan saray anak yo ya angkekelag.’ Et niligliwa to ra, tan maab-abig so impisalita to ed sikara.”​—Gen. 50:15-21.

 “Insulat Pian Nibangat Itayo”

18, 19. (a) Antoray naaralan mo ed sayan artikulo? (b) Antoy pantongtongan tayo ed ontumbok ya artikulo?

¹⁸ Insulat nen Pablo: “Amin ya insulat nensaman et insulat pian nibangat itayo, ta pian diad panagsungdo tayo tan panagligliwa na Kasulatan et nawalaan itayo na ilalo.” (Roma 15:4) Antoy naaralan tayod sankaabigan ya alimbawa, si Jehova, tan ed alimbawa di Abraham, Isaac, Jacob, tan Jose?

¹⁹ No isipen tayoy amin a ginawa nen Jehova pian makapikareenan itayod sikato, agta napapakiwas itayon gawaen met so anggaay nayarian tayon pansiansiaey pikakareenan ed arum? Naaralan tayod alimbawa di Abraham, Isaac, Jacob, tan Jose a nepeg ya ipanengneng na atateng so maong ya alimbawa ed ananak da. Ontan met, naaralan tayon bebendisyonan nen Jehova iray sagpot na saramay manggugunaet a pansiansiaey kareenan. Agla pankelawan a tinukoy nen Pablo si Jehova bilang “Dios a mangiiter na deen”! (Basaen so Roma 15:33; 16:20.) Pantongtongan ed ontumbok ya artikulo no akin ya indanet nen Pablo a kaukolan tayon pansiansiaey deen ed kongregasyon tan no panon tayon nagawaan itan.

Antoy Naaralan Mo?

• Antoray ginawa nen Jacob antis a minengnengan ed si Esau pian makapikareenan ed sikato?

• Lapud amin a ginawa nen Jehova pian makapikareenan itayod sikato, napakiwas kan gawaen so anto?

• Antoy naaralan mod alimbawa di Abraham, Isaac, Jacob, tan Jose?

[Tepetepet Parad Panagaral]

[Saray litrato ed pahina 23]

Antoy sankaimportantian a ginawa nen Jacob pian makapikareenan ed si Esau?