Tepetepet na Saray Manbabasa

Kasin natukoy tayo no pigaray eksakton bilang na propesiya nipaakar ed Mesias diad Hebreon Kasulatan?

No usisaen tayoy Hebreon Kasulatan, nanengneng tayo ray dakerakel a propesiyan asumpal ed si Jesu-Kristo. Impasakbay na sarayan propesiya iray detalye nipaakar ed panlapuan, isabi, gawaen, pantrato na arum ed sikato, tan say betang to diad uksoyan nen Jehova a Dios. Tutugyopen na saraya so impormasyon a mangipapaamtan si Jesus so Mesias. Balet, no labay tayon amtaen so eksakton bilang na saray propesiya nipaakar ed Mesias diad Hebreon Kasulatan, kaukolan tayoy manalwar.

Nandurumay opinyon ed no dinan iray propesiyan ontutukoy ed Mesias. Unong ed libro nen Alfred Edersheim ya The Life and Times of Jesus the Messiah, diad saray rabinikon sulsulat nensaman et walay 456 a bersikulo manlapud Hebreon Kasulatan a minorian ontutukoy ed Mesias, anggano dakel ed saratan et ag-analambit ed Mesias. Balet no usisaen so 456 a bersikulo, walaray manduaruwa no kasin arum ed saratan et propesiyan nipaakar ed si Jesu-Kristo. Alimbawa, imbaga nen Edersheim ya impasen na saray Judio so Genesis 8:11 ya ontutukoy ed Mesias. Panisiaan dan say “bulong na olibo ya awit na malapati et nanlapud Palandey na Mesias.” Sinalambit met nen Edersheim so Exodo 12:42. Impaliwawa ton aliway impakatalos na saray Judio ed sayan teksto tan insulat ton: “No panon a pinmaway si Moises ed desierto, ontan met so ipaway na Mesias ed Roma.” Parad arum tan ed dakel ya iskolar, singa anggapoy pikonektaan na sayan duaran teksto ed lingon eksplinasyon ed si Jesu-Kristo.

Anggano say imanoen tayo labat et saray propesiyan talagan asumpal ed si Jesu-Kristo, agtayo naseguroy eksakton bilang na saratan. Alaen pan alimbawa so Isaias kapitulo 53, a nankargay propesiya nipaakar ed Mesias. Impropesiya na Isaias 53:2-7: “Anggapo so nengneng to . . . Sikato so amudmora, tan inkaindan na saray totoo . . . Sikato intepel to so saray sakit tayo . . . Sikato so asugatsugat nisengeg ed saray impakasumlang tayo . . . Singa sakey a kordero a niyarap ed panagpateyan.” Nepeg kasin ipasen iya a sakey labat a propesiya nipaakar ed Mesias, odino nanduruma?

Imanoen met so Isaias 11:1 ya oniay nabasa: “Ompaway naani simit a manlapu ed sengeg nen Isai [odino Jesse], tan say sanga a manlapu ed saray lamot to manbunga naani.” Diad bersikulo 10 et nabasa lamet iyan propesiya, a walay parehon punto. Kasin duaran propesiya iya odino sakey labat? Malinew ed sarayan alimbawa na Isaias kapitulo 53 tan 11 ya agtayon talaga naseguro no pigaray eksakton bilang na saray propesiya nipaakar ed Mesias.

Kanian, maabig no agtayo la magmaliw ya espisipiko ed bilang na saray propesiya nipaakar ed Mesias diad Hebreon Kasulatan. In-publish na organisasyon nen Jehova so pakaromogan na dakel ya propesiya nipaakar ed si Jesus tan ed kasumpalan na saratan. * Makatulong tan makapaseseg iraya ed sikatayo diad personal, pampamilyan panagaral, tan diad ministeryo. Sakey ni, saray dakel a propesiya nipaakar ed Mesias, pigara man itan, et mamapaneknek ya si Jesus so Kristo odino Mesias.

[Paimano ed leksab]