Tepetepet na Saray Manbabasa

Antoy pakatalos tayo ed saray bilang diad tinaon a report ed serbisyo?

Kada taon et tatalaranan tayo so report ed serbisyo diad Yearbook. Labalabay tayon naamtaan so nagagawaan na saray totoo nen Jehova diad panagpulong tan panagbangat ed interon mundo. Balet pian lalo tayon nagunggonaan ed sarayan report, kaukolan ya natatalosan tan balanse so panmoria tayo ed saraya. Pantongtongan tayo pa so pigara.

Service year. Onggagapo iya ed Setyembre anggad Agosto na onsublay ya taon. Say walad Yearbook et report na apalabas ya service year. Kanian say 2011 Yearbook et report na 2010 ya service year, manlapud Setyembre 1, 2009 anggad Agosto 31, 2010.

Sankarakelan tan average a bilang na saray manangipalapag. Kaibad “saray manangipalapag” iray bautismadon Tasi nen Jehova tan saray agbautismado ya kualipikadon mangipulong ed Panarian. Say “sankarakelan a manangipalapag” et say sankatageyan a bilang na nan-report ed anggan anton bulan na service year. Nayarin kaibad saraya iray atrasadon report ya agnipilad apalabas a bulan. Kanian, nayarin mamiduan napibilang so arum a manangipalapag. Balet, agkaibad saya iray manangipalapag ya akapanpulong ingen ta alingwanan day nanreport. Idadanet na saya sirin so kaimportantian na panreport ya tampol na manangipalapag kada bulan. Say “average na manangipalapag” et say kaslakan a bilang na agagin manrereport kada bulan.

Dagup na oras. Unong ed 2011 Yearbook, masulok ya 1.6 bilyon ya oras so inusar na saray Tasi nen Jehova ed ministeryo. Balet agkaibad saya so amin ya oras ya uusaren tayod panagdayew, a singa say panagpastol, iyaatendid saray pantitipon, personal a panagaral na Biblia, tan panagdalepdep.

Gastos. Legan na 2010 a service year, masulok ya $155 milyon so agastos na saray Tasi nen Jehova parad saray espisyal payunir, misionero, tan ombiabiahen manangasikaso diad asainmin da. Balet agni kaibad saya so gastos ed panag-imprinta na base ed Biblia iran publikasyon, pati say gastos parad masulok ya 20,000 a boluntaryo ed Bethel diad interon mundo.

Mibibiang ed Memoryal. Saya so bilang ed interon mundo na saray bautismadon agagi ya mamangan tan oniinum na emblema diad Memoryal. Kasin saya so interon bilang na alanaan a wadiad dalin? Andi. Lapud nanduruman rason, a singa say datin sisisiaen odino problemad isip o emosyon, abaloan na arum a kabiangan irad saray mangatatawen. Agtayo sirin nibaga so eksakton bilang na saray alanaan a wadiad dalin tan agtayo met la kaukolan ya amtaen. Ag-irerekord na Mananguley ya Ulop so kangaranan na saray angan tan inminum ed emblema diad Memoryal. *

Say amta tayo et walaray pigaran alanaan ya “ariripen na Dios” a wadia nid dalin sano ibulos lay makaderal a dagem na baleg ya kairapan. (Apo. 7:1-3) Legan a wadia ni ra, idaulo ra so sankalaknaban a panagpulong tan panagbangat a kimey ya detalyadon irekord ed tinaon a report ed serbisyo.

[Paimano ed leksab]