Anosay Ombatik ed Lumba

“Anosan tayoy ombatik ed lumba a niiyan diad arapan tayo.”​—HEB. 12:1.

1, 2. Antoy angikomparaan nen apostol Pablo ed bilay na Kristiano?

KADA taon, walaray lumbay batik diad nanduruman pasen ed mundo. Say arum a mimilad sayan lumba et maomaong a bumabatik, tan talagan labay day manalo. Parad arum balet, anggano ag-ira manalo basta makasabi rad finish line et maliket la ra.

² Diad Biblia, nikompara so bilay na Kristiano ed lumba. Impaimano iya nen apostol Pablo ed saray agagid Corinto nensaman diad unonan sulat tod sikara. Inkuan to: “Agyo ta amta a saray milulumba ed batik et ombabatik iran amin, balet saksakey so makaawat na premyo? Ombatik kayo ta pian naawat yo itan.”​—1 Cor. 9:24.

3. Antoy labay ya ibaga nen Pablo sanen imbaga ton “saksakey so makaawat na premyo”?

³ Kasin ibabaga nen Pablo a saksakey a Kristiano so makaawat na premyon bilay tan sayang labat so pilumba na arum? Siempre andi! Saray bumabatik et mani-ensayon maong tan iyuupot day anggaay nayarian da pian manalo ira anggano amta ran saksakey so makaawat na premyo. Idadanet sirin nen Pablo ed saray kapara ton Kristiano a kaukolan da met ya iyupot so anggaay nayarian dan mansiansian matoor ed si Jehova tan sumpalen so babatiken. No ontan so gawaen da, nailaloan dan awaten so premyon bilay. On, diad sayan lumba, amin a makasabid finish line et makaawat na premyo.

4. Antoy kaukolan tayon amtaen nipaakar ed lumba parad bilay?

⁴ Makapaseseg itan, ingen ta pannonoten to itayon amin a kaiba ed sayan lumba parad bilay. Akin? Tua, say premyo, balanglan bilay diad tawen odino diad Paraison dalin, et talagan alay-abig. Balet, andukey so babatiken tan makapakesaw; dakel so makasbel, pakaabalaan, tan peligro diad dalan. (Mat. 7:13, 14) Makapaermen ta walaray tinmayer, sinmuko, odino tinmunda la. Antoray patit tan peligro diad sayan lumba? Panon mon napaliisan iratan? Antoy nagawaan mo pian makasabi kad finish line?

Kaukolan so Panagsungdo Pian Manalo

5. Antoy impaliwawa nen Pablo diad Hebreos 12:1?

⁵ Diad saginonor, sinulatan nen Pablo iray Hebreon Kristiano diad Jerusalem tan Judea. Diad sulat to et tinukoy to lamet so nipaakar ed lumba. (Basaen so Hebreos 12:1.) Impaliwawa to no akin a kaukolan ya itultuloy na saray Kristiano so pilulumba da tan no antoy gawaen da pian nasumpal da itan. Balet, pantongtongan tayo nin unona no akin et sinulatan nen Pablo iray Hebreon Kristiano tan no antoy impaseseg ton gawaen da. Insan tayo pantongtongan no antoray naaralan tayod satan.

6. Antoy ginawa na saray lider na relihyon ed saray Kristiano nen inmunan siglo?

⁶ Saray Kristiano nen inmunan siglo, lalo lad saramay tagad Jerusalem tan Judea et manasagmak na dakel a subok tan kairapan. Pirmi so panedesdes ed sikara na saray lider na Judion relihyon, a siansia nin mangokontrol ed saray totoo. Sarayan lider so angakusad si Jesu-Kristo bilang rebelde tan impapatey dan singa kriminal. Tan agni ra kontentod sayan ginawa ra! Diad libro na Gawa, nabasa tayoy agmanundan panagtaktakot tan panangataki ed saray Kristiano kayarin tampol na Pentecostes nen 33 C.E. Seguradon mair-irap so kipapasen na sarayan matoor a Kristiano.​—Gawa 4:1-3; 5:17, 18; 6:8-12; 7:59; 8:1, 3.

7. Anto ni rason akin et mairap so kipapasen na saray Kristiano nen inmunan siglo ya sinulatan nen Pablo?

 ⁷ Nambilay met irayan Kristiano diad panaon ya asingger lan mangangga so Judion sistema. Impasakbay la nen Jesus ed sikara so kaderal na Jerusalem. Imbaga to ray nagawa antis a mismo na satan, tan inikdan to ra na espisipikon instruksion no antoy gawaen da pian makaliktar. (Basaen so Lucas 21:20-22.) Anto siri’ gawaen da? Oniay imbaga nen Jesus: “Manalwar kayo pian say kapusoan yo et agbalot nabelatan ed sobran panangan tan alabas a panag-inum tan saray kapagaan ed bilay, tan bigbiglan onsabi ed sikayo itan ya agew.”​—Luc. 21:34.

8. Antoray makasengeg a walaray Kristianon tinmayer odino tinmunda ed lumba?

⁸ Sanen sinulatan nen Pablo iray Hebreon Kristiano, ngalngali 30 taon lay linmabas manlapu la nen inter nen Jesus itan a pasakbay. Antoy agawad sarayan Kristiano diad inlabas na panaon? Arum ed sikara et nampadaeg ed saray kapagaan ed bilay tan ag-ira inmaligwas ed espiritual, a kakkaukolan da pian komon et ombiskeg ira. (Heb. 5:11-14) Nayarin inisip na arum a mas mainomay so bilay da no aligen day karaklan a Judio. Lalo la ta sarayan Judio et manisia met nin siansia ed Dios tan anggan panon et uunoren day Mosaikon Ganggan. Walara met so arum ed kongregasyon a mamipilit ed saray agagi ya unoren day Mosaikon Ganggan tan saray Judion tradisyon. Antoy imbaga nen Pablo a makatulong ed sarayan kaagian to a mansiansian alerto ed espiritual tan makapantultuloy ed lumba?

9, 10. (a) Anton panamaseseg nen Pablo so nabasa tayod bandad sampot na Hebreos kapitulo 10? (b) Akin et insulat nen Pablo so nipaakar ed pananisia na saray tasi nensaman?

⁹ Pinuyanan nen Jehova si Pablo a sulatan iray Hebreon Kristiano pian napabiskeg ira. Diad kapitulo 10 na sulat nen Pablo, indanet ton say Ganggan et “mangiyaanino ed saray maabig ya onsabi” tan malinew ton impanengneng so kablian na dondon bagat nen Kristo. Diad bandad sampot na satan a kapitulo, oniay impaseseg nen Pablo: “Nakaukolan yoy mansungdo, ta pian naawat yoy kasumpalan na sipan sano agawaan yo lay linawa na Dios. Ta ‘antiktikey la so panaon,’ tan ‘samay onla dia et onsabi tan agnaatrasado.’”​—Heb. 10:1, 36, 37.

¹⁰ Panamegley na sarayan salita, pinaseseg nen Pablo iray Hebreon Kristiano a mansungdo. Diad kapitulo 12, ontan lamet so impaseseg to tan imbaga ton ‘anosan day ombatik ed lumba.’ Balet antis ton imbaga itan, insalaysay tod kapitulo 11 iray alimbawa na totoon angipanengneng na tuan pananisia pian ipaliwawa no antoy kabaliksan na tuan pananisia ed Dios. Akin et sinalambit toy nipaakar ed pananisia antis ton impaliwawa lamet so nipaakar ed panag-anos odino panagsungdo? Ta labay ton namoria na sarayan Kristiano a kaukolan day panagsungdo tan pakpel pian nipatnag day tuan pananisiad si Jehova. Sinansakey ton sinalambit so dakel ya lalaki tan bibii nensaman a nanmatoor ed si Jehova anggan diad sankairapan iran kipapasen. Sarayan alimbawa so mamabiskeg ed saray Hebreon Kristiano a sungdoan iray subok tan irap. Kayarin sinalambit nen Pablo so pananisia na sarayan lingkor nen Jehova, inkuan to: “Lapud walay baleg a grupo na saray tasi ya akapaliber ed sikatayo, ekalen tayo met sirin so amin a pakabelatan tan say kasalanan a mainomay a makaamper ed sikatayo, tan anosan tayoy ombatik ed lumba a niiyan diad arapan tayo.”​—Heb. 12:1.

“Baleg a Grupo na Saray Tasi”

11. Antoy epekto ed sikatayo no nodnonoten tayoy alimbawa na “baleg a grupo na saray tasi”?

¹¹ Imbaga nen Pablo a saray lingkor nen Jehova antis na panaon na saray Kristiano et “baleg a grupo na saray tasi ya akapaliber ed sikatayo.” Nanmatoor irad Jehova anggad patey. Sayan “baleg a grupo na saray tasi” et aliling day bumabatik ya asumpal lan akilumba. Anggano natan et anggapo la ra, say alimbawa ra et  mamaseseg ed arum a mantultuloy ya ombatik. No bilang ta kaiba kad lumba tan antam a walaray maong a bumabatik a manbabantay tan papabiskegen day linawam pian nitultuloy moy ombatik, agta napakiwas kan gawaen moy anggaay nayarian mon makasabid finish line? Papaneknekan na sayan “baleg a grupo na saray tasi” ya anggano mair-irap so lumba parad bilay, sarag tayoy manalo. Kanian no sarayan alimbawa et nodnonoten na saray Hebreon Kristiano nen inmunan siglo, ombiskeg so linawa ra tan ‘naanosan day ombatik ed lumba.’ Tan sarag tayo met a gawaen itan.

12. Akin ya importantin ikonsidera tayo iray alimbawan sinalambit nen Pablo?

¹² Dakel ed saray matoor a lingkor a sinalambit nen Pablo et miparay kipapasen dad sikatayo. Alimbawa, si Noe et nambilay antis a dineral nen Jehova so mundo ed saman a panaon panamegley na Delap. Manbibilay itayo met ed panaon ya asingger lan deralen nen Jehova so mundo nen Satanas. Si Abraham tan Sara et ingganggan nen Jehova a taynan day abung da. Insipan to ya sikaray panlapuan na nasyon a manlingkor ed sikato, tan inalagar day kasumpalan na satan a sipan. Kekerewen met nen Jehova natan ya ikaindan tayoy inkasikatayo pian nagamoray panangabobon tan bendisyon to. Si Moises et nambaroy ed makapataktakot a kalawakan paonlad Insipan a Dalin. Aliling to et manbabaroy itayo met ed sayan marelmeng a sistema, ya anggad makasabi itayod balon mundon insipan nen Jehova. Amin sirin a dinadalan na sarayan lingkor nen Jehova, ontan met ed saray intalona tan kakapuyan da, et manepeg tayon ikonsidera.​—Roma 15:4; 1 Cor. 10:11.

Antoy Akatulong ed Sikaran Sumpalen so Lumba?

13. Akin et aliwan mainomay so situasyon nen Noe, tan panon ton asarag itan?

¹³ Antoy tinmulong ed sarayan lingkor nen Jehova pian makapansungdo tan sumpalen so lumba? Imanoen imay insulat nen Pablo nipaakar ed si Noe. (Basaen so Hebreos 11:7.) Say “delap na saray danudanum ed dalin, a mangaygay na amin a laman” et “bengatlan agni anengneng” nen Noe. (Gen. 6:17) Agnin balot agawa itan! Ingen, agbalot inisip nen Noe ya imposible itan. Akin? Lapud sikatoy walaan na pananisia ya antokaman so ibaga nen Jehova et gawaen Ton gawaen. Kanian ag-inisip nen Noe ya mairap so pagagawa nen Jehova ed sikato. Imbes, “unong na amin ya ingganggan na Dios ed sikato, ontan so ginawa to.” (Gen. 6:22) Dakel so nepeg a gawaen nen Noe​—mangipaalagey na biong, tiponen to ray ayayep, mangisimpen na naakan dan sankapamilyaan tan na saray ayayep, pasakbayan to ray totoo nipaakar ed Delap, tan tulongan toy pamilya ton mansiansian mabiskeg ed espiritual. Aliwan mainomay irayan kimey. Balet, lapud impatnag nen Noe so pananisia tan panagsungdo, nanresulta itan ed bilay tan bendisyon parad sikato tan ed pamilya to.

14. Antoray kaukolan a sungdoan nen Abraham tan Sara, tan antoy naaralan tayod sikara?

¹⁴ Si Abraham tan Sara so tinmumbok a sinalambit nen Pablo. Anguma-uman so bilay da sanen ingganggan ira na Dios a taynan day abung dad Ur. Tan agda amta no antoy nagawad sikara. Mabiskeg so pananisia rad si Jehova tan sikatoy inunor da anggan diad mairap a situasyon. Mabulos a nansakripisyoy Abraham parad tuan panagdayew kanian sikatoy tinawag na Biblia bilang “ama na amin a walaan na pananisia.” (Roma 4:11) Kabkabat na saray Hebreon Kristiano so nipaakar ed bilay nen Abraham tan say pamilya to, kanian pigara labat a detalye so sinalambit nen Pablo. Balet, oniay mapuersan konklusyon to nipaakar ed sikara: “Amin irayan totoo et inaatey a walaan na pananisia, anggano agda la naalagar so kasumpalan na saray sipan, balet abayag da lan anengneng iratan tan maliket dan inilaloan tan inyabawag da a sikaray sangkaili tan miaayam labat ed dalin a kawalaan da.” (Heb. 11:13) Malinew sirin a say pananisia dad Dios tan personal a relasyon dad sikato so tinmulong  ed sikaran makapantultuloy ya ombatik ed lumba.

15. Antoy amakiwas ed si Moises a pilien a ‘nakaibay totoo na Dios’?

¹⁵ Si Moises so sakey nin napanuliranan a lingkor a kabiangan na “baleg a grupo na saray tasi.” Tinaynan nen Moises so maaligwas tan mainawan bilay, tan “pinili toy napairap a kaiba na totoo na Dios.” Antoy amakiwas ed sikaton gawaen itan? Oniay ebat nen Pablo: “Akateen so ilalo to ed pakaawat ed tumang. . . . Sikatoy nansiansian malet a singa sankanengneng to imay Sakey ya agnanengneng.” (Basaen so Hebreos 11:24-27.) Ag-asagyat si Moises ed “temporaryon panliket ed kasalanan.” Parad sikato et talagan tua so Dios tan saray sipan To. Satan so tinmulong pian sikatoy makapansungdo tan ombiskeg so linawa to. Tinmulong met itan pian maan-anos ton nidaulo iray Israelita manlapud Ehipto paonlad Insipan a Dalin.

16. Akin et nibaga tayon ag-ansakit so linawa nen Moises sanen sikatoy ag-inabuloyan a makaloob ed Insipan a Dalin?

¹⁶ Singa si Abraham, agla anengneng nen Moises so kasumpalan na sipan na Dios. Sanen saray Israelita et kuan da lan onloob ed Insipan a Dalin, oniay imbaga na Dios ed si Moises: “Nanengneng mo so dalin ed arap mo, ingen ta agka onloloob diman ed dalin ya iter ko ed saray anak na Israel.” Ontan so desisyon nen Jehova ta antis na satan, si Aaron tan si Moises et asanokan ed inkarebelyoso na saray Israelita kanian ‘nankasalanan ira sumpad Dios diman ed kawalaan na danum na Meriba.’ (Deu. 32:51, 52) Kasin ansakit so linawa nen Moises? Andi. Imbalikas toy panamendisyon ed saray totoo tan oniay unor ya imbaga to: “Mapalar ka, O Israel! Siopa so mipara ed sika, a sakey ka a baley ya inlaban nen Jehova, kinlong so katulongan mo, tan say kampilan so panalonggaring mo!”​—Deu. 33:29.

 Saray Naaralan Tayo

17, 18. (a) No nipaakar ed lumba parad bilay, antoy naaralan tayod “baleg a grupo na saray tasi”? (b) Antoy aralen tayo diad ontumbok ya artikulo?

¹⁷ Diad impangonsidera tayod bilay na saramay kabiangan na “baleg a grupo na saray tasi,” naaralan tayon kaukolan so mabiskeg a pananisia ed Dios tan ed saray sipan to pian makasabi tayod finish line. (Heb. 11:6) Nepeg tayon ipatnag iyan pananisia diad paraan na kabibilay tayo. Aliwan singa saramay andian na pananisia, iilaloan na saray lingkor nen Jehova so marakdakep a bilay ed arapen. ‘Sankanengneng tayo imay Sakey ya agnanengneng,’ kanian tekep na panagsungdo et sarag tayon sumpalen so babatiken.​—2 Cor. 5:7.

¹⁸ Aliwan mainomay so pansiansiad lumba parad bilay. Anggaman ontan, sarag tayoy makasabi ed finish line. Diad ontumbok ya artikulo, aralen tayo no anto ni ray makatulong pian nagawaan itan.

Kasin Nipaliwawam?

• Akin et indetalye nen Pablo ed sulat to so nipaakar ed saray tasi nensaman?

• Panon itayon napaseseg a mantultuloy ed lumba no imadyinen tayon manbabantay so “baleg a grupo na saray tasi ya akapaliber ed sikatayo”?

• Antoy naaralan mod alimbawa na saray matoor a tasi a singa si Noe, Abraham, Sara, tan Moises?

[Tepetepet Parad Panagaral]

[Litrato ed pahina 19]

Mabulos a tinaynan di Abraham tan Sara so mainawan bilay diad Ur