Kasin Kabat Ka nen Jehova?

“Kabat nen Jehova iramay kayarian to.”​—2 TIM. 2:19.

1, 2. (a) Antoy importantid si Jesus? (b) Antoray tepet a nepeg tayon isipen?

AMINSAN et walay Fariseon nantepet ed si Jesus: “Dinan so sankaimportantian ed Ganggan?” Oniay ebat nen Jesus: “Arom si Jehova a Dios mo ed interon pusom tan ed interon kamarerwam tan ed interon nonot mo.” (Mat. 22:35-37) Inad-aro nen Jesus so Ama to. Impatnag tod impanbilay to ya importante so panmoria nen Jehova ed sikato. Kanian antis na impatey nen Jesus, oniay imbaga to nipaakar ed impanmatoor to: “Inunor ko iray ganggan na Ama tan nansiansia ak ed aro to.”​—Juan 15:10.

² Dakel natan so mangibabagan inaro day Dios. Siempre, anggan sikatayo et ibaga tayon inaro tayo so Dios. Balet, nia ray importantin tepet a nepeg tayon isipen: ‘Anto kasi panmoria na Dios ed siak? Kasin nibagak a kabat odino aabobonan ak nen Jehova? Kasin ipapasen to ak bilang kayarian to?’ (2 Tim. 2:19) Talagan baleg a pribilehyo so pakapikaaro ed Soberano na uniberso!

3. Akin et isipen na arum ya ag-ira ipasen nen Jehova bilang kayarian to, tan antoy ontulong pian naresistian itan ya ideya?

³ Balet, walaray mangaarod si Jehova a mairap dan panisiaan a makapikaaro irad sikato. Iisipen na arum ya anggapoy kana ra, kanian ag-ira kuno ipasen nen Jehova bilang kayarian to. Diad tua balet, aliwan ontan so pakanengneng na Dios ed sikatayo. (1 Sam. 16:7) Oniay imbaga nen apostol Pablo ed saray kapara ton Kristiano: “No say sakey et aaroen toy Dios, sayan too et kabat to.” (1 Cor. 8:3) Importante sirin so panangarom ed Dios pian ipasen to kan “kabat to.” Isip mo pa ‘ya: Akin et babasaen mo ‘yan magasin? Akin et gagawaen moy anggaay nayarian mon lingkoran si Jehova ed interon puso, kamarerwa, nonot, tan biskeg mo? No indedikam lay bilay mod si Jehova tan bautismado ka la, antoray amakiwas ed sikan gawaen itan? Ibabaga na Biblia ya amta nen Jehova so walad puso tayo tan saramay “mabli” ed sikato et ‘iyaasingger’ to pian magmaliw a kaaro to. (Basaen so Aggeo 2:7; Juan 6:44.) Ipapaseguro sirin na saya a manlilingkor kad si Jehova ta inyasingger to ka. Agton balot ikaindan iray kakaaro to no mansiansia ran matoor ed sikato. Papablien tan inad-aro to ra.​—Sal. 94:14.

4. Akin et nepeg a lawas tayon pabpablien so pikakaaro tayod si Jehova?

⁴ Sano niyasingger itayo la nen Jehova ed sikato, kaukolan a panggunaetan tayoy mansiansia ed panangaro to. (Basaen so Judas 20, 21.) Nepeg tayon tandaan so ibabaga na Biblia a posiblin niyarawi itayod Dios. (Heb. 2:1; 3:12, 13) Singa bilang, antis na samay nabasad 2 Timoteo 2:19, abitla nen apostol Pablo si Himeneo tan Fileto. Dati irayan lingkor nen Jehova, balet ta tinaynan day katuaan. (2 Tim. 2:16-18) Ontan met, walaray agagid saray kongregasyon ed Galacia ya agmet nansiansiad katuaan. (Gal. 4:9) Komon ta lawas tayon pabpablien so pikakaaro tayod si Jehova.

5. (a) Antoran kualidad so papablien na Dios? (b) Antoran alimbawa so aralen tayo?

 ⁵ Walaray kualidad a talagan papablien nen Jehova. (Sal. 15: 1-5; 1 Ped. 3:4) Kaibad satan so pananisia tan inkamapaabeba. Pantongtongan tayo so alimbawa na duaran lalaki ya inad-aro nen Jehova lapud impangipatnag dad sarayan kualidad. Nengnengen tayo met so ginawa na sakey a laki a lapud inkamapaatagey to et impulisay nen Jehova. Walaray makanan leksion a naaralan tayod sarayan alimbawa.

Ama na Amin a Walaan na Pananisia

6. (a) Antoy ginawa nen Abraham lapud pananisia tod saray sipan nen Jehova? (b) Akin et nibagan kabkabat nen Jehova si Abraham?

⁶ Si Abraham et “anisia ed Jehova.” Diad tua, sikatoy atawag ya “ama na amin a walaan na pananisia.” (Gen. 15:6; Roma 4:11) Lapud pananisia nen Abraham, tinaynan toy abung to, kakaaro, tan mainawan bilay pian onlad arawin pasen. (Gen. 12:1-4; Heb. 11:8-10) Nansiansian mabiskeg so pananisia to. Napatnagan iya sanen “singa to la inyapay si Isaac” ya anak to bilang katutulok ed ganggan nen Jehova. (Heb. 11:17-19) Impatnag nen Abraham so pananisia ed saray sipan nen Jehova, kanian sikatoy nagmaliw ya espisyal ed Dios. Talagan sikatoy ‘amta’ odino kabkabat nen Jehova. (Basaen so Genesis 18:19.) Pinabpabli nen Jehova si Abraham bilang sakey a kaaro.​—Sant. 2:22, 23.

7. Kapigan asumpal iray sipan nen Jehova ed si Abraham, tan antoy epekto na satan ed sikato?

⁷ Insipan nen Jehova ed si Abraham a kayarianen na bini to so sakey a tawir a dalin tan magmaliw iran “singa saray buer a wala ed gilig na dayat.” (Gen. 22:17, 18) Anggaman ag-anengneng nen Abraham so kasumpalan na sarayan sipan legay impanbilay to, nansiansian mabiskeg so pananisia tod si Jehova. Amta ton no walay insipan na Dios, tooren Ton tooren itan. On, impatnag toy pananisia ed paraan na impanbilay to. (Basaen so Hebreos 11:13.) Kasin diad pakanengneng nen Jehova et walaan itayoy pananisia ya onman ed si Abraham?

Say Panalagar ed Jehova et Pakapatnagay Pananisia

8. Antoran natural a bengatla so pipilaleken na arum?

⁸ Nayarin walaray bengatlan talagan labalabay tayon nagawa. Natural tan duga met labat so pilalek a mangasawa, manpamilya, tan nawalaay maksil a laman. Balet ta ompan walaray arum ya agda nagagamoray pipilaleken da. No ontan so situasyon tayo, antoy gawaen tayo? Say ikiwas tayod oniaran kipapasen so mangipatnag ed kabiskeg na pananisia tayo.

9, 10. (a) Antoy ginawa na arum pian labat nagamoray pilalek da? (b) Antoy nibagam ed panumpal nen Jehova ed saray sipan to?

 ⁹ Makapuy so pansumpalan tayo no sumlangen tayoy panangigiya nen Jehova pian labat naala iray pipilaleken tayo. Deralen na saya so pikakaaro tayod Dios. Alimbawa, walaray arum a say pinili dan panagpatambal et misumlangan ed prinsipyoy Biblia. Wala met so arum ya angawat ed trabahon sengegay pakaarawi dad pamilya ra tan agla ra makapiaral. Say arum balet et akiinaroan ed agmananisia. No ontan so gawaen na sakey a Kristiano, ipapatnag to kasin labay to a sikatoy nakabat nen Jehova? Isipen pa: Anto kasi nalikna nen Jehova no bilang ta agla akan-kaanos si Abraham ed pakasumpal na saray sipan To? Anto kasi no nampaalagey lay baleg ya abung tan nanggunaetan toy nawalaan na ‘ngaran a kirayewan to’ imbes ya alagaren toy ikiwas nen Jehova? (Ikompara so Genesis 11:4.) Kasin sikatoy ipasen nin siansia nen Jehova bilang kaaro to?

¹⁰ Antoray bengatlan pipilaleken mo? Kasin ontan la kabiskeg so pananisiam a sarag mon alagaren ya iter iratan nen Jehova ed sika? Insipan to a ‘peneken to ray pilalek na amin a bengatlan mabilay.’ (Sal. 145:16) Singa ed samay agawad Abraham, nayarin walaray sipan nen Jehova ya agnagawad panaon ya iilaloan tayo. Anggaman ontan, no ipatnag tayod kabibilay tayo a say pananisia tayo et onman ed si Abraham, ag-itayo lingwanan nen Jehova. Tumangan to itayo.​—Heb. 11:6.

Alimbawa na Inkamapaabeba tan Alimbawa na Inkamapaatagey

11. Antoray pribilehyo nen Kora, tan antoy ipapatnag na saya nipaakar ed panaglingkor tod Dios?

¹¹ Nengnengen tayoy mandumaan ya alimbawa na duaran lalaki, si Moises tan Kora. Naaralan tayod saray ginawa ra a say panmoria nen Jehova ed sikatayo et akadepende ed panrespeto tayod saray desisyon tan uksoyan to. Si Kora et Kohatitan Levita, tan dakel so pribilehyo to. Atasian toy impangiliktar nen Jehova ed Israel diad Ambalangan Dayat, sinuportaan toy impangukom nen Jehova ed saray masugnar ya Israelita diad Palandey Sinai, tan walay betang tod pangiyaalis-alis ed kaban na sipan. (Exo. 32:26-29; Num. 3:30, 31) Ompatnag ya sikatoy abayag lan manmamatoor ed si Jehova kanian rerespetoen na saray Israelita.

12. Singa nanengneng ed litratod pahina 28, antoy agawad pikakaaro nen Kora ed Dios lapud inkamapaatagey to?

¹² Balet, legan a mamapaarap so nasyon na Israel ed Insipan a Dalin, inisip nen Kora a walay aliwa ed uksoyan na Dios. Labay ton walay nagawan pananguman, tan 250 nin lalaki so dinmapag ed sikato. Segsegurado iran walad sikaray panangabobon nen Jehova. Oniay kuan dad si Moises tan Aaron: ‘Alabas lay panbalegbalegan yo, anta say amin a duypo et masanto. Miulop-ulop a lanang si Jehova ed balang sakey ed saray duypo.’ (Num. 16:1-3) Talagan mapaatagey ira tan alablabas so panagmatalek dad sarili da! Oniay ebat nen Moises ed sikara: “Ipatnag naani nen Jehova no siopa so too to [odino, kayarian to].” (Basaen so Numeros 16:5.) Diad ontumbok ya agew, inatey si Kora tan amin ya rebelden kaiba to.​—Num. 16:31-35.

13, 14. Diad antoran paraan ya impanengneng nen Moises so inkamapaabeba?

¹³ Duman-duma balet si Moises ta ‘sikatoy mauyamon tuloy ed amin a lalaki a walad tapew na dalin.’ (Num. 12:3) Impatnag toy inkauyamo tan inkamapaabeba diad impangunor tod amin ya ganggan nen Jehova. (Exo. 7:6; 40:16) Anggapoy nabasad Biblia ya kinuestion nen Moises iray paraan nen Jehova odino asyodotan ed saray instruksion To. Singa bilang, espisipiko iray instruksion nen  Jehova nipaakar ed pamaalagey na tabernakulo. Kaibad satan iray angkekelag a detalye a singa say kolor na tinebey tan bilang na panagsigpit ya usaren ed tela parad tolda. (Exo. 26:1-6) No walay manangasikaso ed organisasyon na Dios ya mangiter ed sikatayo na instruksion a detalyadon maong, no maminsan et walay tendensia tayon ononganget. Si Jehova so perpekton manangasikaso. Walay kimey ya inter tod saray lingkor to tan panmamatalkan to ra. Seguradon walay rason no akin ya espisipiko iray instruksion to. Ag-inmunganget si Moises sanen detalyadon maong iray instruksion nen Jehova ed sikato. Agto inisip ya abebbebay pakanengneng na Dios ed sikato odino lilimitaan Toy kawayangan to. Imbes, sinegurado nen Moises ya ‘amin ya imbilin nen Jehova et ontan so gawaen’ na saray komikimey. (Exo. 39:32) Agaylan inkamapaabeba! Binidbir nen Moises a kimey itan nen Jehova tan sikatoy uusaren To labat pian nasumpal itan.

¹⁴ Nanengneng met so inkamapaabeba nen Moises sanen walay situasyon a sikato lan mismoy nalalanor. Sanen nanreklamo iray Israelita ta anggapo lay danum da, agto akontrol so sanok to tan ‘agto binidbir so kasantosan na Dios.’ Bilang resulta, imbaga nen Jehova ed si Moises ya agto makaloob ed Insipan a Dalin kaiba na saray Israelita. (Num. 20:2-12) Pigay taon ya maan-anos ya indaulo di Moises tan Aaron irayan mareklamon Israelita. Insan natan, lapud sakey a lingo nen Moises et agto nagamoray abaybayag to lan iilaloan! Antoy reaksion to? Siempre, anggan panon et adismaya. Anggaman ontan, mapaabeban inawat to so desisyon nen Jehova. Amta ton si Jehova et matunong tan mahustisya. (Deu. 3:25-27; 32:4) Agta talagan nibaga tayon si Moises et kabkabat nen Jehova?​—Basaen so Exodo 33:12, 13.

Kaukolay Inkamapaabeba Diad Pampasakop ed si Jehova

15. Antoy naaralan tayod ginawa nen mapaatagey a Kora?

¹⁵ Kabat odino abobonan itayo nen Jehova no awaten tayo ray pananguman diad organisasyon to tan respetoen tayo iramay uusaren  ton mangidadaulo ed kongregasyon. Dineral nen Kora tan saray kaiba to so relasyon dad Dios ta alabas so talek dad sarili da, mapaatagey ira, tan anggapoy pananisia ra. Inisip nen Kora a say masiken lan Moises et manggagaway sarili ton desisyon. Alingwanan ton si Jehova a mismo so mangigigiya ed nasyon. Bilang resulta et agto nanmatoor ed saramay uusaren na Dios. Lapud inkamapaatagey to, dineral toy rekord na abayag lan impanlingkor tod si Jehova!

16. Panon a makatulong ed sikatayo so mapaabeban alimbawa nen Moises?

¹⁶ Onkana iya bilang seryoson pasakbay ed saray elder tan arum nid kongregasyon. Nepeg tayon ipanengneng so inkamapaabeba pian naalagar tayoy ikiwas nen Jehova tan pian makapanpasakop itayod saray mangidadaulo. Kasin ipapanengneng tayon mapaabeba tan mauyamo tayo a singa si Moises? Kasin bibidbiren tayoy betang na saramay mangidadaulo ed sikatayo tan manpapasakop itayod sikara? Kasin lalabanan tayoy liknaan tayo sano nadidismaya itayo? No on, abobonan itayo nen Jehova. Pabpablien to itayo no mapaabeba tan mapasakop itayo.

Kabat nen Jehova Iramay Kayarian To

17, 18. Antoy makatulong pian itultuloy itayon ipasen nen Jehova bilang kaaro tan kayarian to?

¹⁷ Maabig no nodnonoten tayoy alimbawa na saramay inad-aro tan kabkabat nen Jehova. Si Abraham tan Moises et agperpekto tan walaan met na saray kakapuyan a singa sikatayo. Ingen ta impasen ira nen Jehova bilang kaaro tan kayarian to. Ipapanengneng balet na agawad si Kora a posiblin niyarawi itayod si Jehova, a lapud satan et agto la itayo abobonan. Kanian maabig no tepetan tayoy sarili tayo: ‘Anto kasi panmoria nen Jehova ed siak? Antoy naaralan kod sarayan alimbawa ed Biblia?’

¹⁸ Ipapasen nen Jehova iray matoor a lingkor to bilang kayarian to, tan makapaseseg itan ed sikatayo. Itultuloy tayo sirin a bayuboay pananisia, inkamapaabeba, tan arum nin kualidad. No walad sikatayo iratan, lalo itayon ar-aroen na Dios tayo. Talagan baleg a pribilehyo no kabat itayo nen Jehova. Maliket so bilay natan na saramay aabobonan to, tan makaawat iray daakan a bendisyon diad arapen.​—Sal. 37:18.

Kasin Nanonotan Mo?

• Antoy kabaliksan na pagmaliw a kabat nen Jehova?

• Panon mon naalig so pananisia nen Abraham?

• Antoy naaralan tayod alimbawa di Kora tan Moises?

[Tepetepet Parad Panagaral]

[Litrato ed pahina 26]

Singa si Abraham, kasin manisia itayon tooren nen Jehova so amin ya insipan To?

[Litrato ed pahina 28]

Aglabay nen Kora so manpasakop

[Litrato ed pahina 29]

Kasin kabat ka nen Jehova a mapaabeban manpapasakop ed saray instruksion?