Manmatalek ed si Jehova, “Say Dios na Amin a Ligliwa”

“Narayew komon so Dios tan Ama na Katawan tayon Jesu-Kristo, say Ama na maaron panangasi tan say Dios na amin a ligliwa.”​—2 COR. 1:3.

1. Antoy kaukolan na balang sakey ed sikatayo?

MANLAPU lad inkianak tayo, kaukolan tayo lay ligliwa. Singa bilang, onaakis so ugaw no narasan odino labay toy manpaeba. Tan anggan diad itatatken tayo, kaukolan tayo nin siansiay manligliwad sikatayo. Lalo la no walaray dadalanen tayon mairap a situasyon.

2. Antoy ipapaseguro nen Jehova ed saray manmamatalek ed sikato?

² No maminsan et sarag itayon ligliwaen na saray kapamilya tan kakaaro tayo, balet aliwan diad amin a situasyon. Walaray pankanawnawan say Dios labat so makaligliwad sikatayo. Oniay ipapaseguro na Salita to: “Si Jehova asingger ed amin ya ontawag ed sikato, . . . denglen to met so akis da.” (Sal. 145:18, 19) On, “saray mata nen Jehova wala ra ed matunong a too, tan saray layag to akalukas ira ed saray akis da.” (Sal. 34:15) No labay tayon tulongan tan ligliwaen itayo na Dios, kaukolan a manmatalek tayod sikato. Ontan so impalinew nen salmistan David sanen inkanta ton: “Si Jehova et magmaliw a tori a salimbengan na siopaman a napapairap, sakey a torin salimbengan diad panaon na gonigon. Tan saramay kabat day ngaran mo et manmatalek ed sika, ta seguradon agmo taynan iramay manaanap ed sika, O Jehova.”​—Sal. 9:9, 10, NW.

3. Panon ya inyilustra nen Jesus so panangaro nen Jehova ed saray lingkor To?

³ Inad-aro nen Jehova iray lingkor to. Impaimano iya nen Jesus sanen inkuan ton: “Agta say limaran anuyaw et manbili labat na duaran sinsilyo? Ingen ta anggapo anggan sakey ed saratan so nalingwanan na Dios. Balet anggan saray buek na ulo yo et abilang ya amin. Agkayo natatakot, mas mabli kayo ni nen say dakel ya anuyaw.” (Luc. 12:6, 7) Panamegley nen propetan Jeremias et oniay imbaga nen Jehova ed saray Israelita nensaman: “Aroen ta ka ed maando a panangaro . . . Lapu ed maaro ya abig na linawa inyasingger ta ka.”​—Jer. 31:3.

4. Akin et napanmatalkan tayo ray sipan nen Jehova?

⁴ Say panmatalek ed si Jehova tan ed saray sipan to so manligliwad sikatayo diad panaoy gonigon. Nepeg sirin ya say talek tayod Dios et singa si Josue ya angibagan: “Say Katawan a Dios yo et inter tod sikayoy amin a maabig a bengatla ya insipan to. Asumpal ya amin iray insipan to; anggapoy ag-agawa.” (Jos. 23:14, Maung a Balita) Tan makaseguro tayo ya anggano walaray nasasagmak tayon kairapan natan, “matoor so Dios” tan agton balot ikaindan iray lingkor to.​—Basaen so 1 Corinto 10:13.

5. Akin et sarag tayon ligliwaey arum?

⁵ Deniskribe nen apostol Pablo si Jehova a “Dios na amin a ligliwa.” No ligliwaen moy sakey a too, tulongan mod pakakagonigon odino paneermen to. Nagawaan mo iya diad pamalemew mod liknaan to. Ontan a mismo so gagawaen nen Jehova. (Basaen so 2 Corinto 1:3, 4.) Anggapoy limitasyon nen Aman Jehova kanian sarag ton gawaen so antokaman ya nakaukolan pian naligliwa to ray mangaarod sikato. Bilang resulta, sarag tayo met ya ligliwaen iray kapananisiaan tayo diad “amin  a klase na kairapan.” Nagawaan tayo itan “diad panamegley na ligliwa a panliligliwa na Dios ed sikatayo.” Talagan anggapoy makapiparad panagligliwa nen Jehova!

Saray Nanduruman Sengegan na Gonigon

6. Antoray nayarin sengegay gonigon?

⁶ Kaukolan tayoy ligliwa diad nanduruman situasyon ed bilay tayo. Sakey ed saray sankaermenan a nagawa et say pakaandid bilay na inad-aro tayo, lalo la no satan et asawa odino anak tayo. Wala met so arum a kaukolan day ligliwa ta biktima ira na panaglabi odino ag-inkahustisya. Anggan say sakit, itatatken, kairapay bilay, problemay sanasawa, tan say mauges iran kipapasen ed mundo et sengegan met na pakagonigon tayo.

7. (a) Akin et kaukolan tayoy ligliwa sano nagogonigon itayo? (b) Panon a ligliwaen nen Jehova so puson “maralit tan mansisibkel”?

⁷ Sano nagogonigon itayo, kaukolan tayoy ligliwa a mamakalma ed puso, mamaligen ed nonot tan liknaan tayo, tan mamakasil ed laman tan ed espiritualidad tayo. Ikonsidera tayo pa so puso. Ibabaga na Salitay Dios a walaray panaon a say puso tayo et “maralit tan mansisibkel.” (Sal. 51:17) Sarag itayon tulongan nen Jehova ed oniaran situasyon ta “paabigen to so saray binmetag ed puso, tan bedberen to so sugasugat da.” (Sal. 147:3) Anggan diad sankairapan iran situasyon, sarag na Dios a paabigen so aliling to et binmetag a puso no manpikasi itayo tekep na sigpot a pananisia tan unoren tayo iray ganggan to.​—Basaen so 1 Juan 3:19-22; 5:14, 15.

8. Panon itayon natulongan nen Jehova sano ag-onligen so nonot tayo?

⁸ Kaukolan met na nonot tayo so ligliwa ta dakel iray pakapapagaan tayo natan. Agtayo nasarag irayan problema no diad dilin biskeg tayo labat. Balet oniay inkanta na salmista: “No mapagpaga tan nagogonigon ak, liligliwaen tan pagagayagaen mo ak.” (Sal. 94:19, MB) Tan onia met so insulat nen Pablo: “Agyo pampapagaan so antokaman, noagta diad amin a bengatla et ipaamta yo ed Dios iray kerew yo diad panamegley na pikakasi tan masimoon a pikekerew tekep na pisasalamat; tan say deen na Dios a palumbasan toy amin a kanonotan so manbantay ed saray puso tan nonot yo diad panamegley nen Kristo Jesus.” (Fil. 4:6, 7) Baleg met so nitulong na pambasa tan pandalepdep ed Kasulatan pian onligen so nonot tayo.​—2 Tim. 3:15-17.

9. Panon tayon nalabanan iray negatibon liknaan?

⁹ No maminsan et pirmi pakakadismaya tayo kanian negatibon maong so liknaan tayo. Ompan liknaen tayon agtayo sarag a gawaen iray Makasulatan a responsabilidad odino pribilehyod kongregasyon. Naligliwa tan natulongan itayo met nen Jehova ed oniaran situasyon. Singa bilang, sanen niganggan si Josue a mangidaulod saray Israelita diad pilaban dad saray makapanyarin nasyon, oniay imbaga nen Moises ed saray totoo: “Ombiskeg ka, tan manliket ka a maong, agka ontakot nisay nakigtot ed sikara; si Jehova a Dios mo sikato so mila a miulop ed sika; agnaani onkulang ed sika, nisay manpaulyan ed sika.” (Deu. 31:6) Diad tulong nen Jehova, nidaulo nen Josue iray totoo na Dios anggad Insipan a Dalin tan tinalo da ray kalaban dan nasyon. Pigaran dekada antis na satan, ontan met a tulong so inter nen Jehova ed si Moises diad Ambalangan Dayat.​—Exo. 14:13, 14, 29-31.

10. Antoy makatulong no apektoen la na makapagonigon iran situasyon so laman tayo?

¹⁰ Apektoen na makapagonigon iran situasyon so laman tayo. Siempre, maabig no dugay panangan tayo, sustoy ugip, magenap so ehersisyo, tan mapalinis itayo. Makatulong met no nonoten tayoy ibabaga na Biblia ya ilalo tayod arapen. No walay dadalanen tayon problema odino subok, maabig no sankanonot tayo imay naeksperiensya met nen Pablo tan sayan makapabiskeg ya imbaga to: “Nadedetdetan kami ed amin a paraan,  balet agkami naiingetan tan makagalaw kami ni; nawewetwet kami, balet amta mi nin siansia so pawayan mi; napapasegsegang kami, balet agkami napapaulyanan ed kairapan; natutumba kami, balet agkami nadederal.”​—2 Cor. 4:8, 9.

11. Antoy nepeg tayon gawaen no nalilikna tayon onleletey so espiritualidad tayo?

¹¹ Wala met iray probleman apektoen toy espiritualidad tayo. Sarag itayo met a tulongan nen Jehova ed saya. Oniay ipapaseguro na Salita to: “Ipapaalagey nen Jehova so amin a natutumba, tan itatagey to so amin a nipapaabeba.” (Sal. 145:14, NW) No nalilikna tayon onleletey so espiritualidad tayo, nepeg ya onkerew tayoy tulong ed saray elder. (Sant. 5:14, 15) Tan no sankanonot tayon lanang so ilalon andi-anggaan a bilay, sarag tayon sungdoan iray subok ed pananisia tayo.​—Juan 17:3.

Saray Alimbawa na Impanligliwa na Dios

12. Ideskribe so makaligliwan impideneng nen Jehova ed si Abraham.

¹² Oniay imbaga na angisulat ed Salmo 119: “Ipanodnonot mo [Jehova] so salita ed aripen mo, a dia ed sikato so amailaloan mo ed siak. Sikato so ligliwak ed kaermenan ko; ta say salitam pinabilay to ak.” (Sal. 119:49, 50) Nabasa tayod Salita na Dios no panon a niligliwa nen Jehova iray lingkor to nensaman. Singa bilang, sanen naamtaan nen Abraham ya deralen nen Jehova so Sodoma tan Gomorra, sikatoy agonigon. Intepet tod Dios: “[Deralen] mo ta so saray bagel a pati saray matunong?” Pinaseguroan nen Jehova si Abraham a no walay 50 matunong a totoo ed Sodoma, agto itan deralen. Balet, aminlima nin akitawalan si Abraham ed si Jehova, a kuan ton: Panon to ey no 45 labat so matunong? 40? 30? 20? 10? Diad kada intawal to, maan-anos tan maar-aron impaseguro nen Jehova ed si Abraham ya agto deralen so Sodoma anggano 10 labat so matunong a totoo ditan. Balet ta anggano agsinmabid samplora, inliktar nin siansia nen Jehova si Lot tan saray ananak to.​—Gen. 18:22-32; 19:15, 16, 26.

13. Panon ya impanengneng nen Hana so talek tod si Jehova?

¹³ Say asawa nen Elkana ya si Hana et talagan labay toy nawalaay anak. Balet ta ag-onanak kanian maer-ermen. Impikasi to itan ed si Jehova, tan oniay imbaga na Atagey a Saserdoten si Eli ed si Hana: “Say Dios na Israel iyabobon to komon so kerew mo.” Aligliwa si Hana ed sayan nadngel to, kanian ‘agla nanermen.’ (1 Sam. 1:8, 17, 18) Matalek lan impalima nen  Hana ed si Jehova iray bengabengatla. Anggano agto amtay magmaliw a resulta, dinmeen lay kanonotan to. Diad saginonor, inebatan nen Jehova so pikakasi to. Sikatoy nanlukon tan inyanak to so anak a laki, a nginaranan toy Samuel.​—1 Sam. 1:20.

14. Akin et kaukolan nen David so ligliwa, tan siopa so kinerewan toy tulong?

¹⁴ Si Arin David so sakey nid saray niligliwa na Dios. ‘Nanengneng nen Jehova so walad puso,’ kanian sanen pinili toy David a magmaliw ya ari na Israel, amta ton matunong si David tan matoor ed tuan panagdayew. (1 Sam. 16:7; 2 Sam. 5:10) Balet diad saginonor, akikalugoran si David ed si Bat-sheba tan implano toy ipatey na asawa nen Bat-sheba pian niyamot iyan kasalanan. Sanen amoria nen David so kabelat na ginawa ton kasalanan, impikasi tod si Jehova: “Punasan mo pa ray kasalanan ko, lapud daakan a panangasim! Urasan mo ak pad amin a kaugsan ko tan linisan mo ak pad amin a kasalanan ko! Bibirbiren ko ray mauges a ginagawak; lawas walad kanonotan ko ray kasalanan ko.” (Sal. 51:1-3, MB) Talagan nagbabawi si David, kanian sikatoy pinerdona nen Jehova. Balet siempre, siansia nin sinagmak to ray resulta na kasalanan to. (2 Sam. 12:9-12) Anggaman ontan, say panangasi nen Jehova so nanligliwa ed sayan mapaabeban lingkor to.

15. Panon a tinulongan nen Jehova si Jesus antis a mismo na impatey to?

¹⁵ Sanen wadiad dalin si Jesus, dakel so asagmak ton subok. Inyabuloy na Dios irayan subok, tan apansiansia nen Jesus so integridad to bilang perpekton too. Sikatoy lawas a nanmatalek ed si Jehova tan sinuportaan toy soberanya To. Sanen si Jesus et asingger lan traidoren tan pateyen, impikasi tod si Jehova: “Aliwan say linawak so nagawa, noag say linawam.” Insan, “walay anghel a nanlapud tawen a nampanengneng tan amabiskeg ed sikato.” (Luc. 22:42, 43) Inter na Dios ed si Jesus so tulong, biskeg na linawa, tan ligliwa a kakkaukolan to diad saman a bekta.

16. Antoy nitulong nen Jehova no nipepeligroy bilay tayo lapud talindeg tayo bilang Kristiano?

¹⁶ Sano nipepeligroy bilay tayo lapud talindeg tayo bilang Kristiano, sarag tan labalabay itayon tulongan nen Jehova a pansiansiaey katooran tayod sikato. Naliligliwa itayo met ed ilalon kiolid bilay. Tan pitalaran tayo lay panaon sano “say patey [bilang unor a kabusol] et naandi la”! (1 Cor. 15:26) Saray matoor ya lingkor na Dios tan arum ni ya naandi lad bilay et lawas a walad memorya nen Jehova tan paolien to ra. (Juan 5:28, 29; Gawa 24:15) Diad panaoy panamasegsegang, naligliwa tan ombiskeg so ilalo tayo no manmatalek itayod insipan nen Jehova ya kiolid bilay.

17. Panon itayon ligliwaen nen Jehova sano walay inad-aro tayon naandid bilay?

¹⁷ Makapaligliwa so panilalon saray inad-aro tayon naandid bilay et onoli lamet diad alay dakep ya balon mundo! Tan baleg so pribilehyo na “baleg ya ulop” a makaliktar ed anggaan na sayan mauges a sistema ta abrasaen tan bangatan da iray napaoli diad dalin!​—Apo. 7:9, 10.

“Saray Magnayon a Taklay To so Sakurong Yo”

18, 19. Panon ya aligliwa iray lingkor na Dios diad panaoy panamasegsegang?

¹⁸ Panamegley na makapabiskeg tan makaligliwan kanta et oniay impaseguro nen Moises ed saray Israelita: “Say andi-anggaan a Dios so lawas manangiyagel yo; saray magnayon  a taklay to so sakurong yo.” (Deu. 33:27, MB) Diad saginonor et oniay imbaga nen propetan Samuel ed saray Israelita: “Agyo komon ipupulisay so Katawan, noag ingen panlingkoran yod interon puso yo. . . . Sinambaan na Katawan ya agto kayo ikaindan, ta ginetma to lan pagmaliwen kayo a totoo to.” (1 Sam. 12:20-22, MB) Legan tayon matoor ya manlilingkor ed si Jehova, agto tayon balot ikaindan. Lawas ton iter so tulong a kaukolan tayo.

¹⁹ Diad sayan mair-irap a kaunoran iran agew, tutulongan tan liligliwaen na Dios iray lingkor to. Diad masulok lan sanlasus a taon, nilibon agagi diad interon mundo so pinasegsegang tan impriso lapud panlilingkor dad si Jehova. Papaneknekan na eksperiensya ra ya talagan liligliwaen nen Jehova iray lingkor to diad saray subok. Alimbawa, sakey ya agi ed Soviet Union so 23 taon ya apriso lapud pananisia to. Balet anggano walad prisoan, siansia nin akaawat na espiritual a tagano ya amabiskeg tan nanligliwad sikato. Oniay imbaga to: “Diad saraman a taon, naaralan koy manmatalek ed si Jehova tan pinabiskeg to ak.”​—Basaen so 1 Pedro 5:6, 7.

20. Akin et makaseguro itayon ag-itayo ikaindan nen Jehova?

²⁰ Antokaman ni nasagmak tayod arapen, maabig no tandaan tayo iyan imbaga na salmista: “Agpaulyan [nen Jehova] iray totoo to.” (Sal. 94:14, MB) Anggano sikatayon mismo et mankaukolay ligliwa, sarag tayo met ya ligliwaen so arum. Naaralan tayod onsublay ya artikulo no panon tayon naligliwa iray totoon naiirapan diad sayan magulon mundo.

Antoy Ebat Mo?

• Antoray pigaran sengegan na gonigon tayo?

• Panon a liligliwaen nen Jehova iray lingkor to?

• Antoy makaligliwad sikatayo sano nipepeligroy bilay tayo lapud talindeg tayo bilang Kristiano?

[Tepetepet Parad Panagaral]

[Kahon/Saray litrato ed pahina 25]

NO PANON TAYON NATALONAAN IRAY BENGATLAN APEKTOEN TOY . . .

▪ puso Sal. 147:3; 1 Juan 3:19-22; 5:14, 15

▪ nonot Sal. 94:19; Fil. 4:6, 7

▪ liknaan Exo. 14:13, 14; Deu. 31:6

▪ laman 2 Cor. 4:8, 9

▪ espiritualidad Sal. 145:14; Sant. 5:14, 15