“Mantultuloy a Manbantay”​—Akin ya Importantin Maong?

“ANTO naani so tanda na kiwawalam tan say kasampotan na sistema na mundo?” (Mat. 24:3) Bilang ebat ed satan a tepet, angiter si Jesus ed saray disipulo to na malinew, detalyado, sankapatnagan tan agnapanduaruwaan ya tanda, a singa nabasad Mateo kapitulo 24, Marcos kapitulo 13, tan Lucas kapitulo 21. Inyarum to: “Mantultuloy kayon manbantay.”​—Mat. 24:42.

No say tanda et talagan mapatpatnag, akin et nakaukolan ni itan ya kaaruman a pasakbay? Imanoen so duaran posiblin rason. Unona, nayarin nibaliwala na arum so tanda lapud saray pakaabalaan tan bilang resulta et naandi espiritualidad tan inkaalerto da. Komadua, nayarin nanenengneng na sakey a Kristiano so pigaran kasumpalan na tanda balet ta isipen ton agni direktan apektado. Ompan ikatunongan ton mabayag ni “baleg a kairapan,” say kapantokan na propesiya nen Jesus, kanian agto ni nakaukolan so ‘mantultuloy a manbantay.’​—Mat. 24:21.

“Ag-Ira Nanimano”

Impanonot nen Jesus ed saray papatumbok to so nipaakar ed saray kapanaonan nen Noe. Imposiblin agda naimano so impanpulong nen Noe, impangipaalagey na balbaleg ya biong, tan say pirmin kaugsan. Balet, “ag-ira nanimano.” (Mat. 24:37-39) Ontan met so kaslakan ya ugali na totoo natan. Alimbawa, walaray sankanengneng ya pasakbay nipaakar ed speed-limit, balet ibabaliwala itan na karaklan. Kanian, kapilitan a mangikakarga iray autoridad na humps diad saray karsada pian napaskar a mantantan iray drayber. Ontan met, nayarin nanenengneng na sakey a Kristiano so tanda na kaunoran iran agew balet ta diad saray gagawaen to et agnapatnagan a sikatoy akabantay. Naeksperiensya itan nen Arielle, sakey ya tinedyer ya taga West Africa.

Labalabay nen Arielle so manbantay na women’s handball ed TV. Sanen anugyop na team so eskuelaan da, pirpirawat toy mila kanian agto la ninonot iray posiblin peligro na satan ed espiritualidad to. Sikatoy nagmaliw ya goalkeeper. Antoy agawa ey? Inkuan to: Walaray ka-team kon say boyfriend da et manda-drugs tan mansisigarilyo. Elek-elekan da ak ta duma ak kuno, balet ta inisip kon nasarag ko ’tan. Agko inilaloan a say isport manaya so mamakapuy ed espiritualidad ko. Handball ya lanang so kargay isip tan pusok. Anggano peles na aral, walad handball court so nonot ko, aliwan diad Kingdom Hall. Naapektaan met so Kristianon personalidad ko. Dati labay ko labat so manggalaw, balet nagmaliw ak ya makompetensia. Impasyay panagpraktis ko pian agkami natalo. A-pressure ak ya maong. Nibaliwalak ni ingen iray kakaarok.

“Anggad sanen a-penalty kami, tan naikdan so kalaban na sakey ya tira. Siak so man-guardia ed goal. Agko aliklikas ya nampikasi ak ed si Aman Jehova pian tulongan to ak ya nasanggay bola! Diad saman ko amoria ya kinmapuy lan  talagay espiritualidad ko. Panon ko itan ya apapawil?

“Abantayan ko la ’may DVD tayon Young People Ask​—What Will I Do With My Life? * Balet denesidik ya bantayan lamet itan, tan diad saya et sineryosok la. Pareho so situasyon mi nen André, samay kalangweran ed drama. Inimanok ya maong ’may insuheri na elder ed si André​—basaen tan dalepdepen so Filipos 3:8. Talagan apakiwas ak ed saman, kanian inmekal ak ed team.

“Baleg so epekto na satan ed siak! Naandi makompetensian ugalik, pati say pirmin pressure ya naliliknak. Nagmaliw ak ya mas maliket tan mas inmapit ak ed saray kakaarok ya agagi. Inmaralem so panamablik ed saray espiritual ya aktibidad. Agla naapag so imanok no aral tan nae-enjoy ko lamet iratan. Inmaligwas met so ministeryok. Natan et mabetbet ak ya mano-auxiliary pioneer.”

No walay bengatlan manguguyor ed sika ya ibaliwalay tanda ya inter nen Jesus, manggaway nakaukolan a pananguman singa si Arielle. Nayarin salien irayan suhestion. Usaren so Watch Tower Publications Index, say tatawagen ya mapa na akaamot iran kayamanan. Wadtan iray reperensya na alay-abig iran simbawa tan eksperiensyan insalaysay a mismo na arum ed no panon dan tinalonaan iray tukso. Pian sigpot a minabang ed saray Kristianon pantitipon, manparaan a maong tan mannota. Nalmoan na arum a makagunggona so iyurong ed bandad arap. No walay pibiang na dumerengel, mankomenton tampol. Niarum ni, makatulong ed pansiansian akabantay so pangikomparad saray kaplesan a balita diad saray kabiangan na tanda tan ed arum niran pakabidbiran na “kaunoran iran agew.”​—2 Tim. 3:1-5; 2 Ped. 3:3, 4; Apo. 6:1-8.

‘Paneknekan Yon Akaparaan Kayo’

Say tanda na kaunoran iran agew et nagagawad sankamundoan, diad “interon dalin.” (Mat. 24:7, 14) Minilyon so manaayam ed saray lugar ya apektadon maong na saray salot, eras, yegyeg, tan arum niran nipropesiyan nagawa. Balet dakerakel met so manaayam ed saray lugar ya mareen so kipapasen. No agyo ni personal ya naeksperiensya so kasumpalan na pigaran kabiangan na tanda, kasin ikatunongan yon mabayag ni baleg a kairapan? Aliwan makabat itan a panmoria.

Alimbawa, imanoen pay impasakbay nen Jesus nipaakar ed “salot tan eras.” (Luc. 21:11) Unona, agto imbagan bansag ya nagawa iratan ed amin a lugar odino pareparehoy kagrabe ra. Imbes, imbaga ton nagawa iratan “diad nanduruman pasen.” Kanian agtayo nailaloan ya bansag tan pareparehoy nagawa ed amin a pasen. Komadua, kayari ton sinalambit so nipaakar ed eras, imbaga nen Jesus a kaukolan na arum ed saray papatumbok to so manalwar ed sobran panangan: “Manalwar kayo pian say kapusoan yo et agbalot nabelatan ed sobran panangan.” (Luc. 21:34) Kanian agnepeg ya ilaloan na amin a Kristiano ya naeksperiensya dan mismoy amin a kabiangan na tanda. Imbes, imbaga nen Jesus: “Sano nanenengneng yo a nagagawa la irayan bengatla, amtaen yo ya asingger lay panarian na Dios.” (Luc. 21:31) Diad panamegley  na modernon komunikasyon et nanenengneng tayoy kasumpalan na amin a kabiangay tanda, antokaman so nagagawad lugar tayo.

Tandaan met ya inggeter la nen Jehova so “agew tan oras” na igapoy baleg ya kairapan. (Mat. 24:36) Agnauman na antokaman ya ebento ed dalin itan ya petsa.

Pinaseseg nen Jesus iray Kristiano ed inerman a pasen: ‘Paneknekan yon akaparaan kayo.’ (Mat. 24:44) Nepeg ya lawas itayon akaparaan. Siempre, agtayo nayariay sanagew-sanlabin mibiang ed saray teokratikon aktibidad. Niarum ni, anggapod sikatayoy makaamta no antoy gagawaen tayo sano onggapoy baleg ya kairapan. Nayarin say arum et mankikimey ed uma odino diad abung. (Mat. 24:40, 41) Kanian anto sirin so nagawaan tayo pian naseguron akaparaan itayo?

Manaayam si Emmanuel, Victorine, tan say anemiran ananak dan bibii diad sakey ya lugar ed Aprika ya agda naliliknay sigpot a kasumpalan na amin a pakapatnagan na tanda. Kanian denesidi ray nawalaan na inagew-agew a pantotongtong ed espiritual pian naseguro dan lawas iran akaparaan. Imbaga nen Emmanuel: “Mairap so mananap na oras ya kombeniente ed amin. Anggad apili min siansiay manlapud alas-6 anggad 6:30 na kabuasan. Kayari min manteksto kada agew, ipaparaan mi pigaran parapo na publikasyon ya aralen ed panagaral na kongregasyon.” Kasin akatulong iyad sikaran mansiansian akabantay? On! Si Emmanuel so coordinator na ulop na mamatatken ed kongregasyon da. Si Victorine et panapanaon a mano-auxiliary pioneer tan dakerakel so atulongan ton mangawat ed katuaan. Amin ya ananak da et maabig so iyaaligwas dad espiritual.

Papasakbayan itayo nen Jesus: “Mantultuloy kayon manlikas, mansiansia kayon aliing.” (Mar. 13:33) Agyo aabuloyan so antokaman a mangabalad pansiasiansia yon akabantay. Imbes, ikdan na imano iray maabig a simbawa ed saray publikasyon tayo tan diad saray aral, a singa ginawa nen Arielle. Tan singa ed pamilya nen Emmanuel, sali yoy manggawa kada agew na bengatlan makatulong ed sikayo pian napaneknekan yon akaparaan kayo tan ‘mantultuloy ya akabantay.’

[Paimano ed leksab]

[Litrato ed pahina 4]

Say inagew-agew a pantotongtong ed espiritual so akatulong ed pamilya nen Emmanuel pian ‘napaneknekan dan akaparaan ira’