Saniiba Itayon Manliket!

LALON oniirap so pagmaliw a maliket. Parad dakel, singa anggapoy niyistorya dad arum ya positibon bengatla. Lapud modernon panagbilay, lalo la diad saray angkabaleg a syudad, mas labay na totoo so mansarili tan manbukbukor.

“Dakerakel a totoo so maermen,” so inkuan na Professor na Psychobiology a si Alberto Oliverio, tan “mapatpatnag a say kabibilay diad saray angkakabaleg a syudad so sengegan na panagbukbukor. Lapud satan, nibabaliwala tayo lay ka-opisina, kaabay, odino say cashier ed asingger ya grocery.” Say ontan a panagbukbukor et kaslakan lan manreresultad depresyon.

Miduma balet so kipapasen tan awawey na saray Kristiano. Insulat nen apostol Pablo: “Manliket kayon naynay.” (1 Tes. 5:16) Dakerakel so rason tayon manliket tan miliket ed saray agagi tayo. Dadayewen tayo so Sankatagyan a Dios, si Jehova; natatalosan tayoy katuaan a karga na Biblia; walay ilalo tayon kilalaban tan  andi-anggaan a bilay; tan sarag tayo met a tulongay arum a nagamoran iratan a bendisyon.​—Sal. 106:4, 5; Jer. 15:16; Roma 12:12.

Maliket tan mililiket ed arum iray tuan Kristiano. Kanian agla pankelawan ya insulat nen Pablo ed saray taga Filipos: “Maliket ak tan miliket ak ed sikayon amin. Diad ontan met a paraan, manliket kayo met tan miliket kayo ed siak.” (Fil. 2:17, 18) Diad sayan antikey a balikas, amiduan binitla nen Pablo so nipaakar ed pagmaliw a maliket tan piliket ed arum.

Siempre, nakaukolan a manalwar iray Kristiano pian napaliisan day antokaman ya tendensian ibiig so inkasikara. Imposiblin makapiliket so sakey ed saray agagi no iyarawi toy inkasikato. Kanian panon tayon niyaplika so panamaseseg nen Pablo ya “mantultuloy kayon manliket ed Katawan” kaiba iray agagi?​—Fil. 3:1.

Miliket ed Saray Agagi

Nen sinulatan nen Pablo iray taga Filipos, nayarin sikatoy akapriso ed Roma lapud pampupulong to. (Fil. 1:7; 4:22) Balet anggan akapriso, ag-abawasan so ligsa tod ministeryo. Imbes, sikatoy malikeliket a nanlingkor ed si Jehova ed anggaay nayarian to unong ed kipapasen to, singa ‘iyiibung bilang sakey ya apay ya iinumen.’ (Fil. 2:17) Ipapanengneng na awawey nen Pablo a say liket et ag-akadependid sirkumstansya na sakey. Anggan akapriso, inkuan to: “Naynay ak met a manliliket.”​—Fil. 1:18.

Si Pablo so angiletneg na kongregasyon ed Filipos tan inmapit so liknaan tod saray agagi diman. Amta ton say panginabang na liket tod panaglingkor ed si Jehova et makapaseseg met ed sikara. Kanian insulat to: “Natan labay kon naamtaan yo, agagi, a saray agawa ed siak et nanresulta ed inyaligwas na maong a balita imbes ya akaamper, kanian akabatan ed limog na amin a Guardia na Emperador tan arum nin totoo so nipaakar ed impakaprisok lapud panlilingkor ko ed Kristo.” (Fil. 1:12, 13) Say impanginabang nen Pablo ed sayan makapaseseg ya eksperiensya so sakey a pakapatnagan ya sikatoy maliket tan mililiket ed saray agagi. Kanian seguradon akiliket met ed si Pablo iray taga Filipos. Balet pian nagawaan da itan, nepeg ya ag-ira nadismaya ed sasagmaken nen Pablo. Imbes, kaukolan dan aligey ehemplo to. (Fil. 1:14; 3:17) Niarum ni, sarag na saray taga Filipos ya itultuloy ya ilaktip si Pablo ed saray pikakasi ra tan itaryay antokaman a tulong tan suporta unong ed nayarian da.​—Fil. 1:19; 4:14-16.

 Kasin ipapatnag tayoy liket a singa si Pablo? Kasin panggugunaetan tayon isentroy imano tayod saray positibon aspekto na sirkumstansya tan ministeryo tayo? Sano mililimog tayod saray agagi, maabig no inabang tayod sikara so liket tayod panagpulong. Agtayo kaukolan ya alagaren nin walay nikaduman eksperiensya tayo insan gawaen itan. Nayarin asagyat so interes na sakey ed mensahe na Panarian lapud epektibo so introduksion odino panagkatunongan tayo. Nayarin marakep so impitongtong tayod householder nipaakar ed sakey a teksto. Odino ompan say impakabidbir dad sikatayo diad teritorya bilang Tasi nen Jehova et akapangiter lay maabig a pantasi. Say panginabang na ontan iran eksperiensya et sakey a paraan na piliket ed agagi.

Dakel ed saray lingkor nen Jehova so nansakripisyo tan siansia nin mansasakripisyo pian nasuportaan so panagpulong. Uusaren na saray payunir, ombiabiahen manangasikaso, Bethelite, misionero, tan saray international servant so inkasikara diad full-time a panaglingkor tan malikeliket irad satan. Kasin naliliketan tan mililiket tayod sikara? Ipanengneng tayo sirin so pisasalamat ed sarayan pinablin ‘kakimeyan parad panarian na Dios.’ (Col. 4:11) Sano kaiba tayo rad aral odino asemblea, sarag tayo ran pasesegen. Aligen tayo met so inkaseseg da. Tan mamawala na “pankanawnawa” pian narengelan iray eksperiensya tan panamaseseg da diad pamarawes ed sikara, nayarin diad pangimbitad sikaran mangan.​—Fil. 4:10.

Miliket ed Saramay Nasusubok

Say impansungdo tan impanalona nen Pablo ed saray subok so amabiskeg ed determinasyon ton manmatoor ed si Jehova. (Col. 1:24; Sant. 1:2, 3) Lapud amta to a posiblin nasagmak met na saray agagid Filipos iray ontan a subok tan napaseseg irad impansungdo to, walay rason ton manliket tan miliket ed sikara. Kanian insulat to: “Niiter ed sikayo so pribilehyo nisengeg ed si Kristo, ya aliwa labat a manisia kayo ed sikato, noagta manirap kayo met nisengeg ed sikato. Ta mipupuligesgesan kayo met a singa anengneng yo ed siak tan singa ed narerengelan yo ni natan nipaakar ed siak.”​—Fil. 1:29, 30.

Ontan met natan, makakasagmak iray Kristiano na isusumpa lapud panagpulong da. Sarayan isusumpa et marukruksa no maminsan, balet kaslakan et agnaim-imano. Nayarin satan et palson akusasyon manlapud saray apostata, isusumpa na saray kapamilyaan, panagbalaw na saray katrabaho odino kaeskuela. Impasakbay nen Jesus ya agtayo nepeg a pankelawan irayan subok, nisay nadismaya tayo. Imbes, rason iraya pian manliket itayo. Inkuan to: “Maliket kayo sano balbalawen tan papasegsegangen kayo na totoo tan papalsaan da kayo na amin a klase na mauges a bengatla nisengeg ed siak. Manliket kayo tan onlukso kayo ed gayaga, ta baleg so tumang yo ed katawenan.”​—Mat. 5:11, 12.

Agtayo ontatakot sano narengelan tayon makakasagmak na maruksan panamasegsegang iray agagi ed arum a bansa. Imbes, manliket tayo lapud panmamatoor da. Sarag tayon ipikasi ed si Jehova ya tulongan to ran napansiansiay pananisia tan panagsungdo ra. (Fil. 1:3, 4) Anggaman limitado labat so nitulong tayod saraman ya pinablin agagi, sarag tayon tulongan iray nasusubok ya kakongregasyon tayo. Ipatnag tayoy personal ya interes tan suportaan tayo ra. Nayarian tayoy manggaway paraan pian makapiliket ed sikara diad sagpaminsan ya pangimbitad sikara diad Panagdayew na Pamilya tayo, piulop ed sikara diad panagpulong, tan diad panagrelaks.

Dakerakel so rason tayon manliket a saniiba! Labanan tayoy espiritu na mundo ya panagbukbukor tan itultuloy tayoy miliket ed saray agagi. Diad panggawad satan, agtayo labat makatulong pian niwalay aro tan pankakasakey ed kongregasyon noagta sigpot tayon napanggayagaan so Kristianon impanaagi. (Fil. 2:1, 2) On, “manliket kayon naynay ed Katawan,” lapud papasesegen itayo nen Pablo: “Uliten ko, Manliket kayo!”​—Fil. 4:4.

[Picture Credit Line ed pahina 6]

Globe: Courtesy of Replogle Globes